Nega Ibounai Iehova Oi Laloa
Nega Ibounai Iehova Oi Laloa
“Iehova be egu vairana ai lau atoa nega ibounai.”—SAL. 16:8, BHğ.
1. Edena dala ai Baibel ena sivarai be ita ia durua diba?
BAIBEL ai be Dirava ese taunimanima ia kara henia daladia ena sivarai namodia idia noho. Baibel ese ia sivarailaia taudia momo be Dirava ena ura idia karaia. Edia sivarai be momokani dainai, unai ese ita do idia durua Dirava kahirakahira ita lao totona.—Iam. 4:8.
2, 3. Salamo 16:8 ena anina be dahaka?
2 Baibel lalonai Aberahamo, Sara, Mose, Ruta, Davida, Eseta, Paulo bona ma haida edia sivarai idia noho bona idia amo gau momo ita dibaia diba. Ma haida edia sivarai be Baibel ese ia gwauraia momo lasi, to idia danu ese ita idia durua diba. Bema Baibel ena sivarai ita laloa dobu, unai ese ita ia durua salamo torea tauna ena hereva ita badinaia totona, ia gwau: “Iehova be egu vairana ai lau atoa nega ibounai; badina be Ia be lauegu idiba kahana ai dainai lau be lau marere lasi.” (Sal. 16:8, BHğ) Unai hereva edia anina be dahaka?
3 Nega momo tuari tauna ese ena tuari kaia be ena imana idiba ai ia dogoatao bona ena kesi be imana lauri dekenai ia dogoatao—unai dainai, imana laurina amo ena idiba kahana ia gimaia be auka. To, bema ena turana ta be ena idiba kahana ai ia gini bona ia tuari, unai be gimaia gauna. Bema nega ibounai Iehova ita laloa bona ena ura ita karaia, Ia ese ita do ia gimaia. Unai dainai Baibel ena sivarai haida ita itaia, badina unai ese iseda abidadama do ia hagoadaia bona ita do ia durua nega ibounai Iehova ita laloa totona.
Iehova be Iseda Guriguri Ia Haerelaia
4. Dirava ese guriguri ia haerelaia ena haheitalai ta oi gwauraia.
4 Bema nega ibounai Iehova ita laloa, Ia be iseda guriguri do ia haerelaia. (Sal. 65:2; 66:19) Aberahamo ena hesiai tauna ta, reana iena ladana be Eliesere dekenai unai hereva be ia momokani. Aberahamo ese Eliesere be Mesopotamia dekenai ia siaia, Dirava ia gari henia hahine ta do ia tahua, Isako ese ia adavaia totona. Eliesere be Dirava ena heduru ia noia bona Rebeka be Eliesere ena kamelo dekenai ranu ia henia neganai, Eliesere ia laloparara Dirava be ena guriguri ia haerelaia. Eliesere be mai ena lalona ibounai ida ia guriguri dainai, Isako ena adavana ia davaria. (Gen. 24:12-14, 67) Momokani, Eliesere be gaukara badana ta ia karaia. To, namona be ita diba momokani Iehova be iseda guriguri do ia haerelaia.
5. Dahaka dainai ita gwau diba Dirava be iseda lalona dekenai ita gwauraia guriguri kwadogina ia haerelaia diba?
5 Nega haida, karaharaga Dirava ita noia ita ia durua totona. Nega ta ai, Parasa ena King Aratasaseta ia itaia ena uaina kapusi naria tauna Nehemia be ia lalohisihisi bada. King ia henanadai: “Oiemu noinoi be dahaka?” Vadaeni karaharaga “[Nehemia] be Guba ena Dirava dekenai [ia] guriguri.” Nehemia be ena lalona dekenai unai guriguri kwadogina ia gwauraia. To, Dirava ese unai guriguri ia haerelaia, badina king ese Nehemia ia durua Ierusalema maguna ia haginia totona. (Nehemia 2:1-8 duahia.) Oibe, Dirava be iseda lalona dekenai ita gwauraia guriguri kwadogina ia haerelaia diba.
6, 7. (a) Epafra ena guriguri karana be edena bamona? (b) Dahaka dainai ma haida totona ita guriguri be namo?
6 Baibel be ita ia hagoadaia ‘ta ta totona do ita guriguri’ be namo, ena be nega momo unai bamona guriguri edia haere ita abia haraga lasi. (Iam. 5:16) Epafra, “Keriso ena hesiai tauna namona” ta unai, be ena tadikaka totona ia guriguri goadagoada. Paulo be Roma taudia ia tore henia neganai, ia gwau: “[Kolose] orea tauna ta Epafra, Keriso Iesu ena hesiai tauna ese umui ia hanamoa henia inai. Nega ibounai umui dainai ia guriguri goada. Dirava ia noia, do umui gini goada, Keriso do umui abidadama henia, mai maoromaoro, bona momokani danu. Bona ia noinoi, Dirava ena ura ibounai, be do umui diba namonamo, bona kamonai henia. Umui lau hamaoroa momokani, Epafra be umui totona, Laodikea taudia totona, bona Hieropoli taudia totona danu, ia hekwarahi bada noho.”—Kol. 1:7; 4:12, 13.
7 Asia Minor ena hanua haida be Kolose, Hieropoli bona Laodikea. Hieropoli taudia be kaivakuku edia sinana ladana Cybele idia tomadiho henia, Laodikea taudia be kohu momo idia tahua, bona Kolose taudia be taunimanima edia aonega dekenai idia tabekau. (Kol. 2:8) Unai dainai, Kolose ai Epafra be “ia guriguri goada” badina ena tadikaka be unai hanua toi dekenai idia noho! Epafra ena guriguri ena haere ia abia dalana be Baibel ese ia gwauraia lasi, to ita diba Epafra be ena tadikaka totona ena guriguri karana ia hadokoa lasi. Epafra ena haheitalai ita tohotohoa be namo. Ena be ita ura lasi ma ‘haida edia kara ita herevalaia,’ to reana ita diba ruma bese tauna o turana ta be hahetoho ia davaria noho. (1 Pet. 4:15) Unai bamona taudia totona ita guriguri be namo, ani? Ma haida edia guriguri ese Paulo idia durua bada, bona iseda guriguri ese ma haida ia durua diba.—2 Kor. 1:10, 11.
8. (a) Edena bamona ita diba Efeso elda taudia be guriguri karana idia laloa bada? (b) Dirava guriguri henia karana ita laloa bada be namo eiava lasi?
8 Ma haida idia itaia ita be nega ibounai Iehova ita guriguri henia, a? Paulo be Efeso elda taudia ida ia hedavari neganai, “ia tui diho, bona ibounai danu ia guriguri.” Bena “idia ibounai idia tai dikadika, bona Paulo idia rosia bona idia kisi henia. Edia lalona be hisihisi bada iena hereva dainai, badina be ia gwau, ‘Lauegu vairana be do umui itaia lou lasi.’ ” (Kara 20:36-38) Ena be unai elda taudia edia ladana ita diba lasi, to idia be guriguri karana idia laloa bada. Momokani, Dirava ita guriguri henia karana ita laloa maragi lasi bona ita diba momokani iseda guba Tamana ese iseda guriguri do ia haerelaia dainai, ‘iseda imana Dirava dekenai ita abia isi’ be namo.—1 Tim. 2:8.
Dirava Badinaia
9, 10. (a) Selopehada ena natuna kekeni edia kara be edena bamona? (b) Edena dala ai Selopehada ena natuna kekenidia edia kamonai karana ese idia headava lasi Keristani tadikaka taihu ia durua diba?
9 Bema nega ibounai Iehova ita laloa, unai ese ita do ia durua Ia ita badinaia bona Ia amo hahenamo ita abia totona. (Deu. 28:13; 1 Sam. 15:22) Oibe, Dirava badinaia karana be gau badana. Mose ena negai idia noho Selopehada ena natuna kekenidia faiv edia kara mani ita laloa. Israela taudia edia kastom be, tamana ia mase neganai, natuna merona be tano o ruma bese ena kohu do ia biagua. To, Selopehada be natuna mero ta lasi bona ia mase neganai, Iehova ia gwau Selopehada ena natuna kekenidia be edia tamana ena tano bona kohu ibounai idia biagua diba. Unai ia vara totona, gau badana be Selopehada ena natuna kekenidia ese Manase ena natuna memerodia idia adavaia guna be namo, unai amo edia tano bona kohu be iduhu tamona dekenai do ia noho.—Num. 27:1-8; 36:6-8.
10 Selopehada ena natuna kekenidia idia diba momokani bema Dirava idia badinaia, gau ibounai be do idia heau namonamo. Baibel ia gwau: “Unai dainai Selopehada ena natuna kekeni ese Lohiabada ena taravatu idia kamonai henia. Selopehada ena natuna kekeni, Mahata bona Tirisa bona Hogila bona Milika bona Noa ese edia tamana ena varavara taudia idia adavaia. Manase Iosepa ena iduhu lalonai idia headava, vadaeni edia tano be edia tamana ena iduhu dekenai ia noho.” (Num. 36:10-12) Unai kamonai kekenidia be Iehova ena ura idia karaia. (Ios. 17:3, 4) Unai hegeregerena, headava lasi lo tadikaka (o lo taihu) be Dirava ena oda ia badinaia dainai, Keristani taihu (o tadikaka) sibona ia adavaia.—1 Kor. 7:39.
11, 12. Edena dala ai Kaleba be Dirava ia badinaia?
11 Israela tauna Kaleba bamona, Iehova ita badinaia be namo. (Deu. 1:36) Lagani 1513 B.C.E. ai, Israela taudia be Aigupito idia rakatania murinai, Mose be spai taudia 12 ia siaia lao Kanana dekenai, to spai taudia rua—Kaleba bona Iosua—be taunimanima idia hagoadaia Dirava idia abidadama henia bona Kanana dekenai idia vareai totona. (Num. 14:6-9) Lagani 40 bamona murinai, Iosua bona Kaleba be idia do mauri noho bona Iehova idia badinaia noho, bona Dirava be Iosua ia gaukaralaia Israela taudia ia hakaua lao Gwauhamata Tanona dekenai idia vareai totona. To, spai taudia 10 be reana lagani 40 ena loaloa negana—Israela taudia be taunimanima idia noho lasi gabuna dekenai idia loaloa negana unai—lalonai idia mase ore.—Num. 14:31-34.
12 Unai gabu amo ia roho mauri tau burukana Kaleba be Iosua vairanai ia gini bona ia gwau diba: “Lau ese Lohiabada egu Dirava lau badinaia momokani, mai egu kudouna ibounai.” (Iosua 14:6-9 duahia.) Kaleba ena mauri lagani be 85, bona ia noinoi Dirava ese ia gwauhamatalaia ororo gabudia ia abia totona, herevana unai gabu dekenai be edia inai taudia idia noho.—Ios. 14:10-15.
13. Hahetoho lalonai Dirava amo hahenamo ita abia totona, dahaka ita karaia be namo?
13 Kamonai tauna Kaleba bamona, Iehova be ita do ia durua bema Ia ita “badinaia momokani.” Bema hekwakwanai badadia lalonai Iehova ita “badinaia momokani,” hahenamo momo do ita abia. To Kaleba bamona, eda mauri ibounai lalonai unai bamona ita karaia totona be mai ena hekwarahi. King Solomona be matamanai Iehova ia badinaia namonamo, to ia buruka neganai, adavana be ena lalona idia ania dirava koikoidia ia tomadiho henia totona, bona Solomona ese “Lohiabada ia badinaia momokani lasi, iena tamana Davida ese ia badinaia bamona.” (1 Kin. 11:4-6) Herevana dahaka hahetoho ita davaria, to hanaihanai Dirava ita badinaia bona ita laloa be namo.
Hanaihanai Iehova Abidadama Henia
14, 15. Naomi ese Dirava ia abidadama henia karana amo dahaka oi dibaia?
14 Dirava ita abidadama henia be namo, badina nega haida do ita daradara vaira negana ai gau namona ta do ia vara eiava lasi. Hahine buruka Naomi—ena adavana bona natuna ruaosi be idia mase—mani ita laloa. Ia be Moaba ia rakatania bona Iuda ia lao neganai, ia gwau: “Lauegu ladana umui atoa lasi, Naomi, to Mara do umui atoa, badina be Siahu Bada Diravana ena kara lau dekenai be auka. Mai gau momo lau ese inai gabu lau rakatania, to Lohiabada ese imana kavakava lau ia siaia lou. Dahaka dainai lauegu ladana Naomi umui atoa? Lohiabada ese lau ia hisihisi henia vadaeni. Siahu Bada Diravana ese lau ia hadikaia momokani.”—Ruta 1:20, 21.
15 Ena be Naomi ia lalometau, to Baibel bukana Ruta ita duahia neganai, ita itaia Naomi be Iehova ia abidadama henia noho. Unai dainai, iena mauri lalonai gau haida idia idau! Iena ravana Ruta be Boasi ia adavaia bona natuna mero ta ia vara. Naomi be unai beibi ia naria dainai, Baibel ia gwau: “Unuseni idia noho hahine taudia ese mero ena ladana idia atoa Obeda. Idia gwau, ‘Naomi be mai ena natuna mero.’ Obeda be Iese ena tamana, Iese be Davida ena tamana.” (Ruta 4:14-17) Naomi be tanobada ai ia toreisi lou neganai, do ia dibaia gauna be Ruta—tanobada ai do ia toreisi lou danu—be Iesu, Mesia unai, ena tubuna. (Mat. 1:5, 6, 16) Naomi bamona, hari hekwakwanai idia vara bona gabeai dahaka do idia vara be ita diba namonamo lasi. Unai dainai, nega ibounai Dirava ita abidadama henia be namo, badina Aonega Herevadia 3:5, 6 ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.”
Lauma Helaga Dekenai Tabekau
16. Edena dala ai Dirava ena lauma helaga ese Israela ena tatau badadia 70 ia durua?
16 Bema hanaihanai Iehova ita laloa, iena lauma helaga be ita do ia hakaua. (Gal. 5:16-18) Dirava ena lauma helaga be tatau badadia 70 ia hasiahua, idia be Mose do idia durua “Israela besena naria gaukara” idia karaia totona. Eledada bona Medada sibona edia ladana be Baibel ese ia gwauraia, to lauma helaga ese idia 70 ia durua edia maduna idia huaia totona. (Num. 11:13-29) Unai tatau badadia 70 be Dirava idia gari henia bona idia koikoi lasi—idia be guna Dirava ese ia abia hidi taudia bamona. (Eso. 18:21) Hari inai negai, Keristani elda taudia be unai bamona idia karaia danu.
17. Iehova ena lauma helaga ese dubu haginia gaukara be edena bamona ia durua?
17 Taunimanima idia noho lasi gabuna ai, Iehova ena lauma helaga be dubu haginia gaukarana ia durua bada. Iehova be Besalele ia abia hidi dubu haginia gaukarana do ia karaia, bona ia gwauhamata Besalele dekenai lauma helaga do ia henia, unai amo Besalele be aonega bona diba do ia abia bona ima gaukaradia ma haida do ia diba. (Eso. 31:3-5) “Inai bamona gaukara diba taudia ibounai” be Besalele bona ena durua tauna Oholiba idia durua, unai gaukara hereadaena idia karaia totona. Ma danu, Iehova ena lauma helaga ese harihari gaudia idia ura idia henia taudia ibounai ia hagoadaia harihari gaudia idia henia totona. (Eso. 31:6; 35:5, 30-34) Hari inai negai, unai lauma helaga be ena hesiai taudia ia hagoadaia Basileia idia atoa guna totona. (Mat. 6:33) Ena be eda diba be idauidau, to namona be Dirava ena lauma helaga totona ita guriguri, bona unai ese ita do ia hakaua Dirava ese hari ena taunimanima dekenai ia henia hesiai gaukara ita karaia namonamo totona.—Luka 11:13.
Nega Ibounai Iehova Matauraia
18, 19. (a) Edena kara be Dirava ena lauma helaga ese ia havaraia? (b) Simeona bona Ana edia haheitalai amo dahaka oi dibaia?
18 Lauma helaga ese eda lalona dekenai Iehova ita matauraia karana ia havaraia, unai amo hanaihanai Iehova do ita laloa. Dirava ese Israela taudia ia hamaoroa: “Israela ena Dirava do umui hahelagaia. Umui ese [ia] do umui matauraia.” (Isa. 29:23) Iesu ena negai, Ierusalema ai idia noho burukadia rua be Simeona bona Ana. (Luka 2:25-38 duahia.) Simeona be Mesia ena peroveta herevadia ia abidadama henia bona “Israela dekenai Hamauria Tauna ia naria noho.” Dirava be ena lauma helaga amo Simeona ia hadibaia ia be do ia noho ela bona Mesia do ia itaia. Bona unai hereva ia guguru. Lagani 2 B.C.E. dekenai, Maria bona Iosepa—Iesu ena sinana bona ubua tamana—ese Iesu be dubu dekenai idia abia lao. Simeona be Dirava ena lauma helaga ena siahu ia abia neganai, ia be Mesia idia perovetalaia herevadia ia gwauraia bona ia peroveta Iesu be satauro ai idia kokoa neganai Maria be do ia lalohisihisi. Mani oi laloa, Simeona ia moale bada badina ena imana dekenai “Iehova ena Keriso” (NW ) ia rosia noho! Dirava ia matauraia tauna Simeona ena haheitalai namona ese hari Dirava ena hesiai taudia ia durua bada!
19 Dirava ia matauraia hahinena Ana be vabu, ena mauri lagani be 84 bona ia be “Dubu Helaga ia rakatania lasi.” Dina bona hanuaboi ai, ia be Iehova ia hesiai henia bona “aniani ania lasi ena taravatu ia badinaia noho.” Ia danu be dubu dekenai ia noho lalonai, beibi Iesu ia itaia. Ia ese vaira negana ena Mesia ia itaia be moale bada. Vadaeni “Dirava dekenai ia hanamoa, bona Ierusalema hamauria totona idia naria noho taudia dekenai, inai mero ena sivarai be ia ese ia hamaoroa.” Mani oi laloa, Ana ia ura unai sivarai namona be ma haida dekenai ia harorolaia! Simeona bona Ana bamona, hari inai negai, Keristani tadikaka bona taihu burukadia idia moale badina idia be Iehova ena Witnes taudia bona Iena hesiai gaukara idia karaia noho.
20. Herevana eda mauri lagani be hida, to dahaka ita karaia be namo, bona dahaka dainai?
20 Herevana eda mauri lagani be hida, to nega ibounai Iehova ita laloa be namo. Unai amo Iehova ese ita do ia hanamoa bena mai manau ida ma haida dekenai Iena king dagina bona kara namodia ita harorolaia. (Sal. 71:17, 18; 145:10-13) To, bema ita ura Iehova ita matauraia, vadaeni Iena kara namodia ita hahedinaraia be namo. Baibel lalonai Iehova ena kara ita stadilaia neganai, dahaka do ita dibaia?
Edena Bamona Do Oi Haere?
• Edena bamona ita diba Iehova be guriguri ia kamonai henia?
• Dahaka dainai Dirava ita badinaia be namo?
• Herevana ita lalometau, to dahaka dainai hanaihanai Iehova ita abidadama henia be namo?
• Edena dala ai Dirava ena lauma helaga ese ena taunimanima ia durua?
[Study Questions]
[Picture on page 4]
Nehemia ese Iehova ia guriguri henia bona haere ia abia
[Picture on page 5]
Naomi dekenai ia vara gauna ita laloa neganai, unai ese ita do ia durua Iehova ita abidadama henia totona