Andes Ororodia Dekenai Sivarai Namona Harorolaia

AI IBOUNAI 18 be foloa mai mirona dekenai ai mahuta. Ai keru dainai emai blanketi lalonai ai heudeheude, bona guhi ena latanai medu ia diho ena regena ai kamonai. Unai ruma lalona kahana ena toana be namo lasi dainai, ai laloa reana unai ruma dekenai taunimanima be idia noho lasi.

Dahaka dainai ai ibounai 18 be unai gabu dekenai ai vadivadi? Badina ai ura Iesu ena hahegani hegeregerena, sivarai namona be “tanobada ena kahana ibounai” dekenai ai harorolaia. (Kara 1:8; Mat. 24:14) Ai be Bolivia ena Andes ororo gabudiai idia noho hanuana ta dekenai ai haroro.

Unai Gabu Dekenai Lao be mai Ena Hekwarahi

Unai gabu dekenai ai lao totona be mai ena hekwarahi. Ai kamonai PMV biagudia be edia ura taim dekenai unai bamona gabu daudaudia dekenai idia lao. PMV ia ginidae neganai, ai itaia ia be basi maragina bona ai haida be ai gini. Dokonai, ai ibounai be ai lao henia gabuna dekenai ai ginidae.

Emai ura badana be, Bolivia ena Andes ororodia dekenai idia noho hanua taudia do ai haroro henia. PMV be ai ia rakatania neganai, ai be aniani bona kohu ai huaia bona ororo badadia edia raka daladia dekenai metairametaira ai raka, ai ibounai be laini dekenai ai raka bamona.

Ena be hanua be idia maragi to ruma ta ta be gabu daudaudia dekenai idia  noho dainai, hora momo lalonai hanua ta amo hanua ta ai lao. Herevana hora hida ai raka, to nega momo ai itaia ruma ma ta be gabu daudauna ai ia noho. Nega momo uma dekenai dala be momo dainai ai daradara.

“Dahaka Dainai Guna Umui Mai Lasi?”

Hahine ta be ia hoa badina ai be gabu daudau ai raka. Unai dainai, ia ese ena kisini bona lahi au haida ia henia emai dina tubua ena aniani ai nadua totona. Tau ta be mase taudia dekenai dahaka ia vara be Baibel amo ia dibaia neganai, ia henanadai, “Dahaka dainai guna umui mai lasi?” Ia ura dikadika diba ma haida ia abia dainai, ena hanua ai rakatania neganai, ia be ai ia bamoa bona henanadai momo ia henia. Tau ma ta be guna Iehova ena Witnes taudia ia diba lasi, bona hari ia be iseda buka bona magasin ia ura henidia. Ai ia tanikiu henia badina ia dekenai ai lao bona ruma ta ena ki ia henia, unuseniai hanuaboi tamona ai mahuta totona.

Hanuaboi ai, gabu be ia dibura momokani, bona ai diba lasi emai kamepa be dimairi koremadia bona badadia edia huanai ai haginia. Unai dimairi ese ai idia koria. To, ai hesiku bada dainai ai ura lasi ai marere, bona daudau lasi murinai, dimairi be ai idia rakatania.

Ai be tano dekenai ai hekure momo dainai matamanai emai tauanina idia hisihisi bada, to hanuaboi ai unai ai manadalaia. Dabai, ai toreisi neganai, unai gabu mai hairaina, ori be metairametaira ororo kahirakahira dekenai idia lao, bona ororo ataiai idia noho aisi o sinou ai itaia neganai, emai tauanina ena hisihisi ai laloaboio. Unai gabu ai be  sinavai ena regena bona manu edia ane regena sibona ai kamonai.

Sinavai maragina ta dekenai ai digu murinai, dina sirina ai herevalaia hebou, ai aniani, bena metairametaira ororo dekenai ai daekau hanua ma haida ai lao haroro totona. Ororo ena ataiai ai ginidae neganai, gau namona ta ia vara. Hahine burukana ta ai davaria bona ia be Dirava ena ladana, Iehova unai, be Baibel lalonai ia dibaia neganai ia tai. Ia moale dikadika. Hari ia be ena guriguri lalonai Dirava ena ladana ia gwauraia diba!

Tau burukana ta ia gwau: ‘Dirava be lau ia laloaboio lasi,’ bona maoromaoro ane ta ia anelaia, ia gwau aneru be ai ia siaia. Ma tau ta be ia gorere bada dainai ruma dekenai ia noho sibona, bona ai ia hamaoroa iena hanua korikori tauna ta be ia dekenai ia vadivadi lasi. Ia hoa bada badina ai be La Paz amo ai mai, ia ai vadivadi henia totona. Tau ma ta ia hoa badina Iehova ena Witnes taudia be taunimanima edia ruma dekenai idia lao idia haroro, to tomadiho ma haida be dubu ena gaba idia botaia karana amo taunimanima idia boiria.

Ruma momo dekenai paua be lasi dainai, gabu ia dibura neganai taunimanima be idia mahuta bona dina ia diari neganai idia toreisi. Unai dainai, taunimanima be edia ruma dekenai ai davaridia totona, ai be 6 o’klok dabai haroro gaukara ai hamatamaia. Bema lasi, taunimanima momo be edia uma gabu dekenai do idia lao vadaeni. Uma dekenai, haida be edia uma gaukara idia rakatania badina idia ura Baibel amo ai gwauraia sivaraina idia kamonai, bona edia tano geia auri idia veria boromakau idia laga-ani diba. Ruma dekenai ai davaria taudia momo be mamoe kopina amo idia karaia gaudia idia atoa, ai helai totona. Bona edia famili taudia ibounai idia boiria sivarai namona idia kamonai totona. Biru taudia haida ese koni amo idia hahonua baege badadia idia henia, badina idia dekenai ai rakatania buka bona magasin idia moalelaia.

“Lau Umui Laloaboio Lasi”

Momokani, taunimanima be Baibel amo diba ma haida idia abia totona, ita vadivadi henidia loulou be namo. Momo be ai idia noia do ai lou henidia bona ai hadibadia totona. Unai dainai, ai be nega rua o toi bamona Bolivia ena kahana dekenai ai giroa lou.

Ai giroa lou negana ta ai, hahine burukana ta be mai moale ida, ia gwau: “Umui be lauegu natuna bamona. Badina lau umui laloaboio lasi.” Tau ta be emai gaukara dainai ai ia tanikiu henia bona ia gwau, gabeai ai giroa lou neganai be ena ruma dekenai ai noho diba. Emai haroro gaukara amo ai davaria hahenamo badana ta be inai: Ai kamonai emai vadivadi ginigunana ai, ai haroro henia hahinena ta be hari taoni dekenai ia noho bona sivarai namona ia harorolaia.

Emai laolao ginigunana ena dokonai, emai aniani nadua stou maragina ena kerosini ia ore bona emai aniani be bada lasi. Au haida ai haboua, lahi ai karaia, emai aniani oredia ai nadua, bena ai raka giroa matamaia. PMV abia gabuna be daudau herea. Unai dainai, ai be hanuaboi ai unai gabu dekenai ai ginidae.

Emai Noho Gabuna Dekenai Ai Giroa Lou

Emai laolao amo ai giroa lou lalonai, ai guia PMV be ia dika. Gabeai, ai be hutuma ida motuka ta ena murina kahanai ai guia.

Dala dekenai ai heau noho lalonai, motuka ai idia guia taudia haida idia ura diba unuseniai dahaka ai karaia, bona unai be nega namona idia ai haroro henia totona. Ena be idia hemarai, to idia be moale bona heabidae taudia.

Ai be unai motuka murinai ai helai ela bona hora 9 murinai, emai noho gabudia dekenai ai ginidae ​​—⁠ai paripari bona ai keru bada. To, emai laolao ese anina namona ia havaraia. Dala dekenai, ai be taoni ai ia noho hahinena ta ida Baibel stadi totona dala ai karaia.

Unai bamona gabudia ai sivarai namona harorolaia be hahenamo badana. Ai be hanua badadia foa bona ma hanua maragidia momo dekenai ai haroro. Ai ese inai hereva namona ai laloa: “Ororo dekenai idia raka mai noho taudia, edia aena be mai hairaidia danu. Badina be sivarai namona idia mailaia noho, maino ena sivarai idia gwauraia noho. Kwalimu bona hamauria herevana danu idia gwauraia noho.”​​—⁠Isa. 52:7; Roma 10:⁠15.

[Picture on page 17]

Ai hegaegae sivarai namona harorolaia totona