Iehova ese Iseda Taitai Ia Kamonai

“Lohiabada ese kara maoromaoro taudia ia naria noho. Edia taitai be ia ese ia kamonai henia noho.”​​—⁠SAL. 34:​15.

1, 2. (a) Hari inai negai, momo be dahaka idia mamia? (b) Dahaka dainai idia vara hisihisi gaudia ita hoalaia lasi?

OI BE gau haida dainai oi lalohisihisi noho, a? Bema oibe, oi sibona oi lalohisihisi lasi. Inai tanobada dikana lalonai, taunimanima milioni momo be dina ta ta ai idia vara gaudia dainai idia lalohisihisi noho. To haida ese idia mamia lalohisihisi be bada herea. Idia abia hemami be Davida ena hegeregerena, ia gwau: “Lau be lau manoka vadaeni, badina haida ese lau idia botaia patapata. Egu kudouna ia hisihisi noho, bona hisihisi dainai lau tai noho. Egu kudouna be ia gaukara haragaharaga noho, egu goada ia ore, bona egu matana ena diari ese, lau ia rakatania vadaeni.”​​—⁠Sal. 38:​8, 10.

² Ita be Keristani taudia dainai, mauri ena lalohisihisi gaudia ita hoalaia lasi. Ita diba Iesu ena noho negana ena toana ta be “hisihisi” idauidau do idia vara. (Mat. 24:​3, 8) Baibel ia gwau, unai “hisihisi” idauidau edia mamina be “natuna havaraia ena hisihisi bamona.” Unai ese ia hahedinaraia “dina gabedia ai” taunimanima be “nega aukadia mai edia hekwarahi” do idia davaria!​​—⁠2 Tim. 3:⁠1.

Iehova ese Iseda Lalohisihisi Gaudia Ia Lalopararalaia

3. Dirava ena taunimanima be dahaka idia diba?

³ Iehova ena taunimanima idia diba unai lalohisihisi idauidau do idia mamia danu, bona unai hekwakwanai be do idia bada idia lao. Taunimanima be hisihisi idauidau idia davaria, bona ita be Keristani taudia dainai ita ia “tuari henia tauna, Satani,” ia ura iseda abidadama ia hadikaia danu. (1 Pet. 5:⁠8) Unai nega ai iseda hemami be salamo torea tauna, Davida bamona: “Inai hereva dika ese egu kudouna idia makohia vadaeni, bona durua ta be lasi dainai lauegu laloa ia ore. Taunimanima edia bogahisihisi be lau tahua, to ta lasi. Hereva namona lau do idia henia taudia lau tahua, to ta lau davaria lasi”!​​—⁠Sal. 69:⁠20.

4. Ita lalohisihisi neganai, dahaka ese ita ia hagoadaia?

⁴ Davida ia mamia ia be helaro lasi, a? Lasi. Mani salamo torea tauna ena hereva ma haida oi laloa, ia gwau: “Badina be Lohiabada ese, gau lasi taudia edia noinoi ia kamonai henia noho, bona dibura ruma lalonai idia noho taudia, be ia laloaboio lasi.” (Sal. 69:33) Anina be, nega haida ita lalohisihisi eiava idia vara metau idauidau ita davaria neganai, ia be hegeregere ita be dibura ruma lalonai ita noho. Reana, haida be iseda lalohisihisi gaudia idia lalopararalaia lasi. To Davida hegeregerena, ita diba Iehova ese ita lalohisihisilaia gaudia ia lalopararalaia, bona unai ese ita ia hagoadaia.​​—⁠Sal. 34:⁠15.

5. King Solomona be dahaka ia diba momokani?

⁵ Ierusalema ena dubu idia hahelagaia neganai, Davida ena natuna, Solomona, be unai ia herevalaia. (2 Sivarai 6:​29-​31 duahia.) Iehova ia noia, kara maoromaoro taudia be “mai lalohisihisi momokani danu” idia guriguri neganai, edia guriguri do ia kamonai henia. Dirava ese idia lalohisihisi taudia ta ta edia guriguri ia kamonai neganai, dahaka ia karaia? Solomona ia diba momokani, Dirava ese idia lalohisihisi taudia edia guriguri ia kamonai henia sibona lasi, to kara ta ia karaia idia ia durua totona. Dahaka dainai? Badina Ia ‘sibona ese taunimanima ibounai edia laloa ia diba.’

6. Lalohisihisi negadiai dahaka do ita karaia bona dahaka dainai?

⁶ Ita ta ta be iseda lalohisihisi gaudia dainai, Iehova ita guriguri henia diba. Iehova be ita ia laloa bada bona ita lalohisihisilaia gaudia ia lalopararalaia, bona unai ita diba dainai iseda lalona ia hagoadaia. Aposetolo Petero ese unai ia hamomokania,  ia gwau: “Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.” (1 Pet. 5:⁠7) Iehova ese ita dekenai idia vara gaudia ia laloa bada. Iesu ese Iehova be mai lalokau ida ita ia laloa bada karana ia herevalaia: “Manu maragidia rua be moni maragimaragi tamona dekenai do idia hoia, ani? To idia ta be tano dekenai do ia moru lasi, emui Tamana bema ia ura lasi neganai. To umui emui kwarana huina ibounai be Dirava ese ia duahia haorea momokani. Do umui gari lasi, badina umui ese manu maragi momo umui hereaia.”​​—⁠Mat. 10:​29-​31.

Iehova Dekenai Ita Tabekau

7. Lalohisihisi gaudia ita davaria neganai, daika ese ita do ia durua?

⁷ Lalohisihisi gaudia ita davaria neganai, ita diba momokani Iehova ia ura bada ita do ia durua. “Dirava be iseda heau mauri gabuna, bona ia ese ita dekenai goada ia henia. Iseda nega dika negadia ibounai ita dekenai ia noho, ita do ia durua totona.” (Sal. 34:​15-​18; 46:⁠1) Edena dala ai Dirava ese ita ia durua? Korinto Ginigunana 10:13 ena hereva mani oi laloa, ia gwau: “Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.” Reana, Iehova ese dala ia karaia ita ia hahisia gauna do ia kokia, eiava ita dekenai goada ia henia unai hisihisi ita haheaukalaia totona. Iehova ese inai dala rua amo ita ia durua diba.

8. Dirava ena heduru ita abia totona, dahaka ita karaia be namo?

⁸ Dahaka ita karaia be namo, unai heduru ita abia totona? Petero ese ia gwauraia herevana mani ita itaia, ia gwau: “Emui laloa hekwarahi gaudia ibounai be iena imana dekenai do umui atoa.” Anina be, iseda lalohekwarahi bona lalohisihisi gaudia be Iehova ena imana dekenai ita atoa. Ita laloa momo lasi bona mai haheauka ida Iehova dekenai ita tabekau, iseda ura gaudia do ia henia totona. (Mat. 6:​25-​32) Iehova dekenai ita tabekau totona, ita manau be gau badana. Namo lasi ita sibona eda aonega o goada dekenai ita tabekau. “Dirava ena imana goadana henunai” ita noho neganai, ita hahedinaraia ita be manau taudia. (1 Petero 5:6 duahia.) Bona unai ese ita ia durua, Dirava ese ia koua lasi lalohisihisi gaudia ita haheaukalaia totona. Ita ura ita abia lalohisihisi gaudia be do idia ore haraga, to namona be ita laloparara Iehova be ita do ia durua daladia ia diba bona nega korikori ai unai ia karaia diba.​​—⁠Sal. 54:7; Isa. 41:⁠10.

9. Iehova dekenai Davida be dahaka lalohisihisi gaudia ia gurigurilaia?

⁹ Salamo 55:22 ai Davida ena hereva mani oi laloa: “Oiemu laloa hekwarahi be Lohiabada dekenai do oi henia, bona ia ese idia dekena amo oi do ia durua. Ia ese kara maoromaoro taudia ia durua noho. Idia be do idia moru lasi, lasi momokani.” Unai hereva ia torea neganai, Davida be ia lalohisihisi bada. (Sal. 55:⁠4) Unai hereva ia torea neganai, iena natuna Abesaloma be hunia dalanai palani ia karaia Davida ena king dagina ia abia totona. Bona iena sisiba tauna namona, ia abidadama henia tauna Ahitopela, be Abesaloma ida palani idia karaia Davida idia alaia totona. Davida be ia mauri totona Ierusalema amo ia heau. (2 Sam. 15:​12-​14) Ena be Davida ia lalohisihisi bada, to Dirava ia abidadama henia noho bona ia moale.

10. Ita lalohisihisi neganai, dahaka ita karaia be namo?

¹⁰ Davida hegeregerena, gau badana be iseda lalohisihisi gaudia be Iehova dekenai ita henia. Unai bamona lalohisihisi negadiai gau haida do ita karaia totona, mani aposetolo Paulo ena hereva ita laloa. (Filipi 4:​6, 7 duahia.)  Iseda guriguri goadagoada karana amo dahaka do ia vara? “Dirava ena maino ese taunimanima edia diba ia hanaia momokani. Keriso Iesu umui danu ia hakapua tamona dainai, inai maino ese [iseda] laloa gaudia, bona [iseda] kudouna idia mamia gaudia ibounai do ia gimaia namonamo.”

11. “Dirava ena maino” ese edena dala ai iseda kudouna bona lalona do ia gimaia?

¹¹ Oi guriguri dainai, emu hekwakwanai do ia namo, a? Reana. To, namona be ita diba, Iehova be nega ibounai iseda ura hegeregerena guriguri do ia haerelaia lasi. To, guriguri karana ese ita ia durua ita laloa namonamo totona, unai amo iseda hekwakwanai do ita lalohisihisilaia bada lasi. Ita lalohisihisi bada neganai, “Dirava ena maino” ese iseda lalona ia hagoadaia diba. Tuari oreana ta be taunimanima dikadia amo hanua ta idia gimaia hegeregerena, “Dirava ena maino” ese iseda lalona bona kudouna do ia gimaia. Danu, ita ia durua mai aonega ida ita laloa namonamo bona daradara, gari, bona lalohadai kereredia ia kokia diba, unai amo abia hidi kererena ita karaia haraga lasi.​​—⁠Sal. 145:⁠18.

12. Ta be lalomaino do ia abia dalana ena haheitalai mani oi gwauraia.

¹² Ita lalohisihisi bada neganai, edena dala ai lalomaino do ita abia? Haheitalai ta mani ita laloa. Gaukara tauna ta be biaguna dikana henunai ia gaukara. To, kampani ena bosi be hebogahisi bona laloa maoromaoro tauna dainai, unai gaukara tauna be ia dekenai ena lalohisihisi gaudia ia herevalaia. Bosi be unai tauna ena hekwakwanai ia lalopararalaia bona ia gwau, unai biaguna dikana ena dagi amo do ia kokia. Gaukara tauna ena hemami be edena bamona? Ena be lalohisihisi gaudia haida ia davaria, to ia diba daudau lasi unai biaguna dikana be do idia kokia dainai, unai ese ia hagoadaia ia haheauka noho totona. Unai hegeregerena, ita diba Iehova be ita lalohisihisilaia gaudia ia lalopararalaia, bona ita ia hadibaia daudau lasi murinai, “inai tanobada ena lohia do ia lulua murimuri dekenai.” (Ioa. 12:31) Unai ese ita ia hagoadaia!

13. Ita guriguri, bona dahaka ita karaia danu be namo?

¹³ To, Iehova dekenai iseda lalohisihisi gaudia ita gurigurilaia sibona be hegeregere, a? Lasi. Gau haida ita karaia be namo. Gau badana be iseda guriguri hegeregerena kara ta do ita karaia. Davida idia hamasea totona, King Saulo ese tatau haida ia siaia iena ruma dekenai idia lao neganai, Davida be inai bamona ia guriguri: “Egu Dirava e, lau idia hadikaia gwauraia taudia dekena amo lau do oi hamauria. Lau dekenai idia tuari henia noho taudia dekena amo, lau do oi gimaia. Kara dika taudia dekena amo lau do oi hamauria. Ala-ala taudia dekena amo lau do oi durua, do lau mauri noho.” (Sal. 59:​1, 2) Davida ia guriguri, bona ena adavana ena hereva ia kamonai bona ia heau mauri. (1 Sam. 19:​11, 12) Unai hegeregerena, namona be Iehova ita noia ita dekenai aonega ia henia, unai amo ita lalohisihisilaia gaudia do ita haheaukalaia eiava reana ita hanaia diba.​​—⁠Iam. 1:⁠5.

Haheauka Totona Goada Abia Dalana

14. Lalohisihisi negadiai, dahaka ese ita do ia durua ita haheauka noho totona?

¹⁴ Reana, iseda lalohisihisi gaudia be do idia ore haraga lasi. Bona, reana nega sisina daudau do idia noho diba. Bema ita mamia iseda lalohisihisi gaudia idia ore haraga lasi, vadaeni ita haheauka totona dahaka ese ita do ia durua? Gau ginigunana be, namona be ita laloatao, ena be hekwakwanai ita davaria, to mai abidadama ida Iehova ita hesiai henia neganai, ita hamomokania Ia ita lalokau henia. (Kara 14:22) Satani ese Iobu dekenai ia gwauraia koikoi herevana mani oi laloa, ia gwau: “Bema Iobu ese oi dekena amo gau ta ia abia lasi neganai, oi dekenai do ia gari, a? Oi be nega ibounai oi ese ia bona iena famili oi naria noho. Oi ese ia biagua gaudia ibounai danu oi naria noho. Oi ese Iobu ena kara ibounai oi hanamoa, bona iena boromakau ese tanobada  idia hahonua momokani. To, bema iena kohu, bona ia biagua gaudia ibounai oi kokia neganai, ia ese oiemu ladana do ia hadikaia momokani!” (Iobu 1:​9-​11) Iobu ena abidadama karana ese Satani ena hereva ia hakoikoia. Ita danu be lalohisihisi negadiai ita haheauka noho neganai, Satani ena hereva do ita hakoikoia. Danu, haheauka karana ese iseda helaro bona abidadama do ia hagoadaia.​​—⁠Iam. 1:⁠4.

15. Edena bamona sivarai ese ita idia hagoadaia?

¹⁵ Gau iharuana be, ita laloatao iseda “Keristani varavara taudia tanobada kahana ibounai dekenai, be hisihisi inai bamona idia abia noho.” (1 Pet. 5:⁠9) Oibe, “umui dekenai idia pidia dibagani ibounai ese taunimanima ibounai dekenai danu idia pidia noho.” (1 Kor. 10:13) Unai dainai, hisihisi idia abia noho taudia ma haida edia haheitalai ita laloa dobu karana ese ita do ia durua, iseda lalohisihisi gaudia do ita laloa momo lasi totona. (1 Tes. 1:​5-7; Heb. 12:⁠1) Namona be hisihisi idia davaria to idia haheauka noho tadikaka taihu haida edia sivarai oi laloa. Tadikaka bona taihu haida edia hekwakwanai be oiemu hegeregerena, namona be Gima Kohorona lalonai edia mauri sivaraidia oi tahua bona oi duahia. Reana unai sivarai ese oi do idia hagoadaia.

16. Hisihisi idauidau ita davaria neganai, edena dala ai Dirava ese ita ia durua?

¹⁶ Gau ihatoina be, ita laloatao Iehova be ‘iseda Tamana, bona bogahisihisi bona durua ibounai ia henia Diravana. Iseda hisihisi ibounai lalonai ia ese ita ia durua noho. Unai dainai hisihisi idia abia noho taudia be ita ese ita durua diba. Dirava ese ita dekenai ia henia durua, be ita ese ma ita henia noho idia dekenai.’ (2 Kor. 1:​3, 4) Toana be Dirava be iseda badinai ia gini bona ita davaria “hisihisi ibounai lalonai” ita ia durua bona hagoadaia. Unai ese ita ia durua ma haida be lalohisihisi gaudia idauidau idia abia neganai, idia ita hagoadaia totona. Paulo dekenai unai hereva be idia momokani.​​—⁠2 Kor. 4:​8, 9; 11:​23-​27.

17. Edena dala ai Baibel ese ita ia durua, mauri ena lalohisihisi gaudia ita haheaukalaia totona?

¹⁷ Gau namba foa be, ita dekenai Dirava ena Hereva, Baibel, ia noho bona ia be “mai ena siahu, Dirava ena hereva momokani ita dekenai do ia hadibaia. Ia be mai ena siahu danu iseda kara dika do ia hedinaraia, iseda kerere do ia hamaoromaoroa, bona mauri dala maoromaorona ita dekenai do ia hadibaia. Unai hereva momokani dainai, Dirava ena tau ena goada be hegeregere momokani, vadaeni kara namodia ibounai do ia karaia diba, mai kwalimu danu.” (2 Tim. 3:​16, 17) Dirava ena Hereva ese ita ia durua ita “hegeregere momokani” bona ‘kara namodia ibounai do ita karaia diba, mai kwalimu danu.’ Unai sibona lasi, to danu ita ia durua lalohisihisi gaudia idauidau ita haheaukalaia totona. Inai Greek herevana idia hahanaia “kara namodia ibounai do ia karaia diba,” ena anina be, gau ibounai ia abia hegaegae eiava “ia hegeregere.” Unai hereva idia gaukaralaia neganai, ia be hegeregere lagatoi do idia hegaegaelaia namonamo edia laolao totona, eiava masini ta ena kahana ibounai idia noho bona ia  hegeregere gaukara ta karaia totona. Unai hegeregerena, Iehova ese Baibel amo ita ia durua, do ita davaria lalohisihisi gaudia idauidau ita haheaukalaia totona. Unai dainai, ita gwau diba, “Bema Dirava be inai hahetoho ia koua lasi, Iena heduru amo unai do lau hanaia diba.”

Iseda Lalohisihisi Gaudia Ibounai amo Ita Do Ia Hamauria

18. Dahaka do ita laloaboio lasi, bona unai ese ita do ia durua ita haheauka totona?

¹⁸ Gau namba faiv, oi laloaboio lasi daudau lasi murinai Iehova be taunimanima ese idia lalohisihisilaia gaudia ibounai do ia haorea. (Sal. 34:19; 37:​9-​11; 2 Pet. 2:⁠9) Unai ia vara neganai, Dirava be hari ita davaria lalohisihisi gaudia idauidau amo ita ia hamauria sibona lasi, to danu tanobada paradaisona lalonai mauri hanaihanai do ita abia, eiava Iesu ida guba dekenai do ita noho.

19. Edena bamona ita haheauka noho diba?

¹⁹ Unai ia do vara lasi neganai, inai tanobada dikana lalonai ita davaria lalohisihisi gaudia idauidau do ita haheaukalaia noho be namo. Mai ura bada ida lalohisihisi gaudia idauidau idia ore negana ita naria noho! (Sal. 55:​6-8) Namona be ita laloatao, iseda haheauka karana amo ita hahedinaraia Diabolo be koikoi tauna. Namona be iseda guriguri karana bona tadikaka oreana amo goada ita abia, bona ita laloatao ita mamia hisihisi idauidau be idia ese idia davaria danu. Dirava ena Hereva ita gaukaralaia namonamo karana amo, do ita hegeregere momokani bona kara namodia ibounai do ita karaia diba, mai kwalimu danu. Namona be “bogahisihisi bona durua ibounai ia henia Diravana” dekenai, emu abidadama karana ia manoka lasi. Namona be oi laloatao, “Lohiabada ese kara maoromaoro taudia ia naria noho. Edia taitai be ia ese ia kamonai henia noho.”​​—⁠Sal. 34:⁠15.

Oi Haere Diba, A?

• Davida ese ia davaria lalohisihisi gaudia be edena bamona ia laloa?

• King Solomona be dahaka ia diba momokani?

• Dahaka ese ita do ia durua Iehova ese ia koua lasi hekwakwanai idauidau ita haheaukalaia totona?

[Study Questions]

[Picture on page 13]

Solomona ia diba momokani, Iehova ese idia lalohisihisi taudia do ia durua

[Picture on page 15]

Davida ena lalohisihisi gaudia be Iehova dekenai ia gurigurilaia bona kara ta ia karaia