Lau Gwauhamata Ia Lau Itaia Lou Totona

LAU be ta dekenai gwauhamata lau karaia ia lau itaia lou totona. Lau be sina ta, Spain tano amo, bona unai gwauhamata lau karaia ena badina do lau sivarailaia.

Emai ruma bese lalonai maino bona noho namo be lasi. Egu tadina maragina ena mauri lagani be foa neganai, aksiden ta dekenai ia mase bona ai lalohisihisi bada. Danu, egu tamana ena kara dikadia dainai egu sinana be ia moale lasi. To, unai ese egu sinana ia koua lasi lau bona egu kakana dekenai kara namodia ia hadibaia totona.

Gabeai, egu kakana ia headava, bona lau danu lau headava. Daudau lasi murinai, egu sinana be kensa gorere ia abia bena ia mase. To ia do mase lasi neganai, ai dekenai dava bada gauna ta ia henia.

Turana ta be egu sinana dekenai Baibel ena gwauhamata toreisi lou helarona dekenai ia herevalaia, bona egu sinana ese Baibel stadi ia abia dae. Ena mauri dokona ai, Baibel ena helaro ese ena lalona ia hagoadaia bona ia moale.

Ai itaia Baibel ena hereva ese emai sinana ia hagoadaia dainai, lau bona egu kakana danu be Baibel ai stadilaia matamaia. Egu natuna kekeni hairaina Lucía ia do vara lasi neganai, lau bapatiso.

Egu bapatiso dinana be mai anina bada lau dekenai. Badina ta be hari, lau be Iehova lau gwauhamata henia Ia do lau hesiai henia ela bona hanaihanai. Lau moale ena badina ma ta be egu lalokau natuna mero bona kekeni dekenai hereva momokani lau hadibaia diba.

To egu moale be gau ta ese ia hadikaia. Lucía ena mauri lagani be foa neganai, ena bogana ia hisihisi bada. Doketa ese ena gorere idia tahua murinai, idia davaria ena asena dekenai tiuma badana ta, orensi ena bada bamona ia tubu noho. Doketa ia gwau, Lucía be kensa gorere (neuroblastoma) ia abia. Unai nega amo, Lucía be lagani 7 lalonai unai kensa gorere ia haheaukalaia, bona nega daudau lalonai hospital ai ia noho.

Ma Haida Ia Durua

Unai lalohisihisi laganidia lalonai, Lucía be egu lalona ia hagoadaia totona, lau ia rosia bona kisi henia momo. Mai ena goada ida ena gorere ia haheaukalaia dainai hospital ai idia gaukara taudia idia hoa bada. Ia ese nesi taudia ia durua yogurt, au huahua ena ranu, bona ma gau haida be gorere natudia ma haida dekenai ia abidia lao. Nesi ese Lucía dekenai kouti kurokurona ta idia henia mai ena ladana “nesi durua kekenina.”

Nesi ta ia gwau, “Lucía ena kara namodia ese egu kudouna ia hamarerea. Ia be gau momo ia karaia, bona laulau penia karana ia ura henia. Ia be hereva momo kekenina bona ena lalohadai be kekeni badana bamona.”

Lucía be Dirava ena Hereva amo goada ia abia. (Heb. 4:​12) Baibel ena gwauhamata hegeregerena, ia abia dae momokani tanobada matamatana lalonai, “mase bona lalohisihisi, bona taitai, bona hisihisi be do idia ore momokani.” (Apok. 21:⁠4) Ma haida edia namo ia laloa bada dainai, nega ibounai Baibel ena sivarai be idia dekenai ia harorolaia. Ena be Lucía ena gorere do ia namo lasi, to toreisi lou helarona ese ena abidadama ia hagoadaia bona ia moale. (Isa. 25:⁠8) Unai helaro ia dogoatao ela bona ia mase.

Unai dina ai Lucía dekenai gwauhamata lau karaia ia do lau itaia lou totona. Lucía ena matana ia kehoa diba lasi. Ena tamana ese ena  imana ta ia dogoatao bona lau ese ena imana ta lau dogoatao. Metairametaira lau hereva henia, lau gwau: “Oi lalohekwarahi lasi, oi do lau rakatania lasi, metairametaira oi hahodi. Oi toreisi lou neganai do oi namo. Hisihisi ta do oi mamia lasi, bona lau be oi danu do lau noho.”

Namona be unai gwauhamata herevana do lau hamomokania. Unai nega lau naria noho be mai ena hekwarahi. To, danu lau diba bema Iehova lau abidadama henia bona Ia lau badinaia noho, Lucía do ia toreisi lou neganai do lau itaia.

Lucía Ena Haheitalai ese Ai Ia Durua Bada

Lucía ena haheitalai bona kongrigeisen taudia edia heduru bada karana ese egu Witnes lasi adavana ena lalona ia veria. Lucía ena mase dinana ai, egu adavana be lau ia hamaoroa, gau haida do ia lalohadailaia. Wiki haida murinai, ia ese kongrigeisen ena elda tauna ta ia noia ia ida Baibel idia stadilaia totona. Daudau lasi egu adavana be hebou iboudiai ia lao henia matamaia. Iehova ese ia durua dainai, ia be kuku ania karana ia hadokoa.

Lucía ena mase dainai lau lalohisihisi noho, to ena haheitalai namona dainai Iehova lau tanikiu henia bada. Lau bona egu adavana be toreisi lou ena helaro namona dainai ta ta ai hagoadaia heheni, unai nega ai Lucía ena moale bona ena kiri toana do ai itaia lou.

Emai gabu dekenai ia noho hahinena ta be emai natuna kekeni ena mase sivaraina ia kamonai. Saturday daba ena medu negana ta ai, unai hahine, ena natuna be Lucía danu gabu tamona ai idia sikuli, be emai ruma dekenai ia mai. Iena natuna merona ma ta ena mauri lagani 11 be kensa gorerena ia abia, bona ia mase. Lucía dekenai ia vara gauna ia kamonai neganai, ia be emai ruma dekenai ia mai ai ia vadivadi henia totona. Ia ura diba lau be edena bamona Lucía ena mase lau haheaukalaia, bona ia ura unai bamona hekwakwanai idia davaria sina haida durua totona grup maragina ta do ai hamatamaia.

Lau hamaoroa Baibel ena gwauhamata namona ta ese lau ia hagoadaia bada, bona unai gwauhamata be taunimanima ese idia henia diba lasi. Iesu ena hereva Ioane 5:​28, 29 dekenai lau duahia neganai, unai hahine ia hoa bada. Baibel stadi ia abia dae bona daudau lasi murinai ia mamia “Dirava ena maino ese taunimanima edia diba ia hanaia momokani.” (Fili. 4:⁠7) Nega momo Baibel ai stadilaia hebou neganai, ai be tanobada matamatana ai emai lalokau mase taudia do ai hedavari henidia negana ai laloa.

Oibe, Lucía ena mauri be kwadogi to ena haheitalai ese ai ia durua bada. Ena abidadama ese emai ruma bese ia durua mai lalotamona ida Dirava ai hesiai henia totona, bona lau ia durua bada hereva momokani ai lau gini goada totona. Oibe, reana ita haida be iseda lalokau taudia idia mase bona gabeai do idia toreisi lou, bona ita ura idia do ita itaia lou.

[Picture on page 20]

Lucia ese ia torea Paradaiso ena laulau