Ma Haida Oi Laloa Dalana be Iehova ese Ia Lalodia Bamona, A?

“Tauanina be do ia parara lasi . . . bona kahana ibounai ese ta ta ibounai do idia naria.”​​—⁠1 KOR. 12:⁠25.

1. Nega ginigunana Dirava ena orea lalonai oi vareai neganai, emu hemami be edena bamona?

NEGA ginigunana inai tanobada dikana amo ita gini siri bona Iehova ena Witnes taudia ita bamoa neganai, reana edia lalokau bona laloa bada karana ita mamia bona moalelaia. Unai be idau momokani, badina Satani ena taunimanima be idia kara auka, ma haida idia inai henia, bona idia tuari! To Dirava ena orea taudia be maino bona lalotamona ai idia noho.​​—⁠Isa. 48:​17, 18; 60:18; 65:⁠25.

2. (a) Dahaka dainai ma haida ita laloa kerere? (b) Dahaka ita karaia be namo?

² Ita be goevadae lasi taudia dainai, lagani haida idia hanaia neganai, iseda tadikaka taihu edia kara do ita tahua matamaia. Reana edia kerere maragidia do ita laloa momo, to edia kara namodia do ita laloa maragi. Ita gwau diba, ita laloaboio Iehova be idia ia laloa bada. Bema unai bamona ita karaia, vadaeni hari be nega namona iseda lalona ita tahua namonamo, bona Iehova ena lalohadai ita abia totona.​​—⁠Eso. 33:⁠13.

Iehova ese Iseda Tadikaka Taihu Ia Lalodia Dalana

3. Baibel ia gwau Keristani kongrigeisen be dahaka bamona?

³ Korinto Ginigunana 12:​2-​26 dekenai, Paulo ia gwau horoa Keristani taudia edia kongrigeisen be tauanina tamona “mai ena kahana momo” bamona. Iseda tauanina ena kahana be idauidau hegeregerena, kongrigeisen tadikaka taihu edia kara bona diba be idauidau. To, Iehova be idia ibounai ia abia dae. Ia be idia ta ta ia lalokau henia bona laloa bada. Unai  dainai, Paulo be ita ia hagoadaia, kongrigeisen taudia “ibounai ese ta ta ibounai do idia naria” o laloa bada be namo. Nega haida unai bamona ita karaia totona be ia auka, badina ma haida edia kara be iseda bamona lasi.

4. Dahaka dainai iseda tadikaka taihu ita laloa bada be namo?

⁴ Reana eda tadikaka taihu edia manoka gaudia ita laloa momo. Unai be hegeregere, kamera amo ita abia foto ta lalonai gau maragina tamona sibona ita raraia noho. To, Iehova be laulau ibounai ia itaia bamona. Reana ita be tadikaka o taihu ta ena kerere maragina tamona sibona ita raraia noho, to Iehova be unai tadikaka o taihu eiava ena kara namodia sibona ia laloa bada. Bema ita gaukara goada Iehova ita tohotohoa totona, vadaeni kongrigeisen lalonai lalokau bona lalotamona ita habadaia diba.​​—⁠Efe. 4:​1-3; 5:​1, 2.

5. Dahaka dainai ma haida ita hahemaoro henia be maoro lasi?

⁵ Iesu ia diba, goevadae lasi taudia be nega momo ma haida edia kara idia maumauraia. Iena sisiba be inai: “Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi.” (Mat. 7:⁠1) Unai siri lalonai Iesu ese ia hahedinaraia goevagoeva, namona be ma haida ita “gwauraia kerere lasi” eiava ita hahemaoro henidia lasi. Iesu ia diba, ena haroro herevana idia kamonai taudia momo be unai kara idia manadalaia vadaeni. Ita be unai kara ita manadalaia vadaeni, a? Bema oibe, namona be iseda kara ita haidaua, unai amo Dirava ese ita do ia gwauraia kerere lasi eiava hahemaoro henia lasi. Momokani, Iehova ese ia abia hidi taudia ita hahemaoro henia be maoro lasi o inai bamona ita hereva lasi: “Kongrigeisen ai unai tau ia noho be anina lasi.” Bema tadikaka ta ena kara haida be namo lasi to Iehova ese ia gaukaralaia noho, unai tadikaka ita dadaraia be maoro, a? (Ioa. 6:​44) Ita abia dae momokani Iehova be ena orea ia gunalaia bona nega korikori ai kerere do ia hamaoromaoroa, a?​​—⁠Roma 14:​1-4 duahia.

6. Iehova ese ena hesiai taudia be edena bamona ia lalodia?

⁶ Iehova ena kara namona ta be inai: Ia diba tanobada matamatana lalonai Keristani taudia ta ta idia goevadae neganai, idia be edena bamona taudia ai do idia lao. Danu, Ia diba idia be dahaka kara idia haidaua vadaeni. Unai dainai, Ia be idia ta ta edia manoka gaudia ia laloa momo lasi. Salamo 103:12 ai unai ita duahia: “Dina ia daekau kahana, bona dina ia diho kahana be daudau herea. Unai daudauna hegeregerena be Dirava ese, iseda kara dika ita dekena amo ia kokidia lao vadaeni.” Unai dainai, Iehova ita tanikiu henia be namo!​​—⁠Sal. 130:⁠3.

7. Iehova ese Davida ia laloa bada dalana amo dahaka ita dibaia?

⁷ Baibel amo ita hamomokania diba, Iehova be taunimanima ta ta edia kara namodia ia laloa bada. Dirava ese Davida ia herevalaia neganai, ia gwau: “Egu hesiai tauna Davida . . . ese egu oda hereva ia kamonai henia, bona egu murinai ia raka momokani, bona egu vairana dekenai kara maoromaoro sibona ia karaia.” (1 Kin. 14:⁠8) Momokani, ita diba Davida be  kara dika rohorohodia haida ia karaia. To, Iehova ia diba Davida ena kudouna ia namo dainai, Ia be Davida ena kara namodia sibona ia laloa bada.​​—⁠1 Siv. 29:⁠17.

Emu Tadikaka Taihu Oi Lalodia Bada, Iehova Bamona

8, 9. (a) Edena dala ai Iehova ita tohotohoa diba? (b) Edena haheitalai ese ita do ia durua?

⁸ Iehova be taunimanima edia kudouna ia diba, to ita be lasi. Unai dainai, ita ese ma haida ita hahemaoro henia be maoro lasi. Ita be ma haida edia lalohadai ibounai ita diba lasi. Unai dainai, Iehova bamona, taunimanima edia kerere maragimaragidia ita laloa momo lasi, badina nega ta unai bamona kara be do idia ore. Namona be ita hekwarahi Iehova ita tohotohoa totona, ani? Bema unai bamona ita karaia, ita bona iseda tadikaka taihu be maino ai do ita noho hebou.​​—⁠Efe. 4:​23, 24.

⁹ Haheitalai ta mani ita laloa: Ruma ta ena gata be ia moru, uindo ia makohi, bona guhi ena silin be ranu ese ia hadikaia. Taunimanima momo be unai ruma idia itaia neganai reana idia gwau: “Unai ruma be ia namo lasi bona idia kokia be namo.” To, tau ta ena lalohadai be idau. Ia be unai ruma ena dika gaudia ia laloa momo lasi, to ia itaia, ruma ena badina ia goada bona ia hanamoa diba. Ia ese unai ruma ia hoia bona idia dika gaudia ia hanamoa lou bona ruma ena toana ia namo. Gabeai, idia raka hanai taudia idia gwau: “Unai ruma be namo herea.” Unai ruma ia hanamoa tauna ena kara ita tohotohoa be namo, ani? Iseda tadikaka taihu edia kerere maragidia ita laloa momo lasi, to namona be edia kara namodia ita laloa momo bona ita diba momokani idia be Keristani taudia namodia ai do idia lao, ani? Bema unai bamona ita karaia, ita be eda tadikaka taihu edia kara namodia do ita lalodia bada, Iehova bamona.​​—⁠Heberu 6:​10 duahia.

10. Edena dala ai Filipi 2:​3, 4 ena sisiba be ita ia durua diba?

¹⁰ Aposetolo Paulo be sisiba namodia haida ia henia, bona unai ese ita ia durua diba kongrigeisen taudia ibounai ita tura henia totona. Paulo be Keristani taudia ia hamaoroa: “Umui sibona emui ladana do umui habadaia gwauraia lasi, bona do umui hekokoroku lasi. To umui ibounai ta ta dekenai do umui manau. Umui ta ta nega ibounai inai bamona do umui laloa, ‘Haida be idia namo herea, to lau be namo lasi.’ Bona umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.” (Fili. 2:​3, 4) Manau karana ese ita do ia durua ma haida dekenai lalohadai maorona ita abia totona. Ma haida edia namo ita tahua neganai, unai ese ita do ia durua Iehova ita tohotohoa totona.

11. Kongrigeisen haida ai dahaka gaudia idia idau?

¹¹ Hari, metau dikadia momo idia vara dainai, taunimanima momo be edia tano korikori idia rakatania bona tano ma haida dekenai idia lao. Unai dainai, siti haida dekenai bese idauidau taudia idia noho. Iseda gabu idia mai taudia haida be hereva momokani idia abia dae, bona Iehova idia tomadiho henia. Baibel ia gwau: “Idia be bese idauidau, iduhu idauidau, kopina idauidau, bona gado idauidau.” (Apok. 7:⁠9) Unai dainai, iseda kongrigeisen momo lalodiai be tano idauidau amo idia mai taudia idia noho.

12. Ma haida dekenai dahaka lalohadai ita abia be namo, bona dahaka dainai nega haida unai be auka?

¹² Iseda kongrigeisen taudia dekenai lalohadai maorona ita abia be gau badana. Aposetolo Petero ena sisiba ita laloatao, ia gwau: “Emui Keristani varavara umui lalokau henidia noho” bona “umui ta ta do umui lalokau henia, mai emui lalona ibounai.” (1 Pet. 1:​22) Taunimanima idauidau dekenai lalokau ita hahedinaraia be ia auka. Eda tadikaka taihu edia kastom, edukeisen, moni davaria dalana, bona noho dalana be iseda amo ia idau. Oi davaria emu tadikaka taihu haida edia lalohadai o kara oi lalopararalaia be auka, a? Reana idia danu be emu lalohadai eiava kara idia lalopararalaia namonamo lasi. Unai dainai, Baibel ese ita ibounai ia hadibaia herevana be inai: “Keristani taudia ibounai do umui lalokau henia.”​​—⁠1 Pet. 2:​17.

13. Edena bamona lalohadai ita hamaoromaoroa be namo?

 ¹³ Reana eda lalohadai haida ita haidaua be namo, unai amo eda lalokau iseda tadikaka taihu ibounai dekenai do ita habadaia. (2 Korinto 6:​12, 13 duahia.) Nega haida ita gwau, “Lau be tadikaka o taihu lau hadikaia lasi, to . . . ” bona unai idau tano amo ia mai tadikaka o taihu ena kara haida ita maumauraia, a? To, unai bamona lalohadai dikadia ita dadaraia vaitani be gau badana. Ita sibona ita nanadaia, ‘Nega momo lau ura dikadika tano ma ta amo idia mai taudia edia mauri o noho dalana lau diba, a?’ Unai bamona henanadai ese ita ia durua tano ma ta amo idia mai tadikaka taihu ita abia dae bona laloa bada totona.

14, 15. (a) Ma haida dekenai lalohadai maorona idia abia taudia haida edia haheitalai oi gwauraia. (b) Edena dala ai idia ita tohotohoa diba?

¹⁴ Edia lalohadai idia haidaua taudia haida, hegeregere aposetolo Petero ena sivarai be Baibel ese ia gwauraia danu. Petero be Iuda tauna dainai, Iuda Lasi taudia edia ruma ai ia vareai be taravatu. To mani oi laloa: Dirava ese Petero ia noia Iuda Lasi tauna o kopina idia utua lasi tauna, Korenelio, ia vadivadi henia totona! Petero be ena lalohadai ia haidaua, badina ia diba Dirava ia ura bese ibounai taudia be Keristani kongrigeisen lalonai idia vareai. (Kara 10:​9-​35) Saulo, gabeai aposetolo Paulo ai ia lao tauna, danu ena lalohadai ia haidaua bona taunimanima inai henia kava karana ia dadaraia. Ia gwau, guna ia be Keristani taudia ia inai henia bada dainai, ‘Dirava ena ekalesia orea ia dagedage henia, ia hadikaia mai bogahisihisi lasi.’ To, Iesu ese Paulo ia sisiba henia murinai, Paulo be ena mauri ia haidaua, bona gunaguna ia dagedage henia taudia edia hakaua herevadia ia badinaia matamaia.​​—⁠Gal. 1:​13-​20.

¹⁵ Momokani, Iehova ena lauma helaga ena heduru dainai, eda lalohadai eiava kara ita haidaua diba. Bema ita davaria iseda lalona ai be taunimanima inai henia kava karana ia noho, vadaeni ita gaukara goada unai lalohadai dikana ita kokia totona, unai amo “lalotamona” bona “maino” ai do ita noho hebou. (Efe. 4:​3-6) Baibel ia gwau: “Do umui lalokau henia, vadaeni do umui noho hebou namo herea, mai laloa tamona danu.”​​—⁠Kol. 3:​14.

Haroro Gaukara Lalonai Iehova Tohotohoa

16. Dirava ena ura be dahaka taunimanima dekenai?

¹⁶ Aposetolo Paulo ia gwau: “Dirava ese taunimanima ibounai ia itaia noho, ibounai be hegeregere.” (Roma 2:​11, BHğ) Iehova ia ura taunimanima ibounai be Ia do idia tomadiho henia. (1 Timoteo 2:​3, 4 duahia.) Unai dainai, Ia ura “noho hanaihanai Sivarai Namona” be “bese ibounai, iduhu ibounai, gado ibounai  bona kopina idauidau ibounai taudia” dekenai ita harorolaia. (Apok. 14:⁠6) Iesu ia gwau: “Uma be tanobada.” (Mat. 13:38) Unai ese oi bona emu famili dekenai, dahaka ia hadibaia?

17. Edena dala ai taunimanima idauidau ita durua diba?

¹⁷ Ita haida be hegeregere lasi idau tanodia ai Basileia sivaraina be ma haida dekenai ita harorolaia totona. To, ita be iseda teritori dekenai idia noho bese idauidau taudia dekenai sivarai namona ita harorolaia diba. Ita hegaegae vadaeni ita haroro henia hanaihanai taudia sibona lasi, to taunimanima ibounai ita haroro henia totona, a? Namona be emu lalona oi haidaua sivarai namona idia do kamonai henia lasi taudia oi haroro henia totona.​​—⁠Roma 15:​20, 21.

18. Edena dala ai Iesu be taunimanima ia laloa bada?

¹⁸ Iesu ia ura dikadika taunimanima ibounai ia durua. Ia be gabu tamona dekenai ia haroro lasi. Baibel ena siri ta ese ita ia hadibaia, “Iesu be hanua badadia bona hanua maragidia dekenai ia loaloa.” Unai dainai, “taunimanima momo Iesu ese ia itaia, vadaeni ia bogahisihisi idia dekenai” bona ia durudia.​​—⁠Mat. 9:​35-​37.

19, 20. Iehova bona Iesu bamona, edena dala ai ita hahedinaraia diba ita be taunimanima ibounai ita laloa bada?

¹⁹ Edena dala ma haida ai Iesu ita tohotohoa diba? Pablisa haida be dala idia karaia teritori matamatadia dekenai idia haroro totona. Hegeregere, bisinesi gabudia, loaloa gabuna, PMV abia gabuna, eiava sekuriti ese idia gimaia ruma badadia edia vairana dekenai. Pablisa ma haida be gado ma ta idia dibaia, unai amo edia teritori ai gado ma ta idia herevalaia taudia eiava sivarai namona idia do kamonai lasi taudia idia haroro henia totona. Unai bamona taudia edia gado dekenai hanamoa herevadia gwauraia dalana ita dibaia neganai, ita hahedinaraia ita be unai gado idia herevalaia taudia edia namo ita laloa bada. Bema ita hegeregere lasi gado ma ta ita dibaia totona, vadaeni gado ma ta idia dibaia tadikaka taihu ita hagoadaia be namo, ani? Bema tadikaka ta o taihu ta be gado ta ia dibaia o kara ma haida ia karaia tano ma haida amo idia mai taudia ia haroro henia totona, ia ita hamanokaia lasi o maumauraia lasi. Dirava vairanai taunimanima ibounai be mai anina bada, bona ita danu ese taunimanima ita laloa bada be namo.​​—⁠Kol. 3:​10, 11.

²⁰ Dirava be taunimanima ia laloa bada dainai, ita ese taunimanima ibounai ita haroro henia be namo, herevana edia noho dalana be namo o dika. Taunimanima haida be ruma lasi, idia miro, eiava matabodaga karadia idia karaia momo. Bema ta be ita ia kara auka henia, ita gwau lasi iena tano taudia ibounai be unai bamona. Herevana taunimanima haida be Paulo idia kara dika henia, to Paulo be taunimanima edia kara dainai iena haroro gaukara ia hadokoa lasi. (Kara 14:​5-7, 19-​22) Ia diba momokani haida be hereva momokani do idia abia dae.

21. Dahaka dainai Iehova bamona, ma haida ita laloa bada be namo?

²¹ Ita lalopararalaia gauna be inai: Lalohadai maorona​—⁠Iehova ena lalohadai​—⁠ese ita do ia durua iseda kongrigeisen korikori ai idia noho tadikaka taihu, tano ma haida amo idia mai tadikaka taihu, bona haroro ai ita davaria taudia ita kara namo henia totona. Ita ese Iehova ena lalohadai ita abia neganai, maino bona lalotamona do ita havaraia. Danu, ita ese ma haida do ita durua Iehova​—⁠taunimanima ibounai ia kara namo henia Diravana​—⁠do idia laloa bada, badina Ia ese “idia ibounai ia karaia dainai.”​​—⁠Iobu 34:19; NW.

Oi Haere Diba, A?

• Edena lalohadai kererena, iseda tadikaka taihu dekenai ita dadaraia be namo?

• Iehova bamona, edena dala ai iseda tadikaka taihu ita laloa bada be namo?

• Dahaka ese oi ia durua tano ma ta amo idia mai tadikaka taihu oi laloa bada totona?

• Haroro gaukara lalonai, edena dala ai Iehova bamona ma haida ita laloa bada?

[Study Questions]

[Picture on page 26]

Edena dala ai taunimanima edia mauri dalana do oi diba?

[Picture on page 28]

Edena dala ai taunimanima momo dekenai sivarai namona oi harorolaia diba?