Oi Aonega Bona Oi Manau

“Oiemu taudia do oi hadibaia lou . . . do idia manau.”​​—⁠TITO 3:​1, 2.

1, 2. Baibel ena hereva be dahaka manau karana dekenai? Bona dahaka dainai unai be maoro?

IEHOVA, iseda lalokau guba Tamana be aonega bada Diravana. Ita ia havaraia dainai, namona be iseda mauri lalonai iena hakaua dalana ita badinaia. (Sal. 48:14) Hahediba tauna Iamesi ese ita ia hamaoroa: “Dirava dekena amo aonega ia abia tauna ena kara ginigunana be inai: Ia laloa goevagoeva. Ma iena kara haida be inai: Mai ena maino, laloa manada bona gado namo. Ia be mai ena bogahisihisi, bona kara namodia momo ia havaraia noho. Ia be maka tamona dekena amo taunimanima ibounai ia kara henidia, edia toana dekena amo lasi. Ma inai tau be Keristani koikoi tauna lasi.”​​—⁠Iam. 3:​17.

² “Emui manau bona manada kara taunimanima ibounai edia vairanai do umui hedinaraia.” (Fili. 4:⁠5) Keriso Iesu be Lohiabada bona Keristani kongrigeisen ena kwarana. (Efe. 5:​23) Keriso ena hakaua dalana ita matauraia, aonega bona manau dalanai ma haida ita kara henidia, bona sibona iseda lalohadai ita dogoatao auka lasi, to ma haida edia lalohadai ita abia dae be mai anina bada!

3, 4. (a) Mani haheitalai amo, haida edia namo ita laloa bada bona gavamani ita matauraia karana ena namo oi gwauraia. (b) Dahaka gaudia do ita stadilaia?

³ Aonega bona hemataurai dalanai ma haida ita kara henidia neganai, namo ita davaria. Hegeregere, Britain dekenai, idia davaria terorist taudia idia ura peleini idia hadikaia dainai, gavamani be taravatu ia karaia guia taudia be peleini lalonai gau haida do idia abia vareai lasi. Taunimanima be mai moale ida unai taravatu idia badinaia. Motuka ita taria neganai, motuka taria taudia ma haida ita matauraia be gau badana. Hegeregere, raunabaut dekenai ita heau neganai, motuka taria taudia ma haida ita matauraia be namo bona motuka ibounai be edia dala korikori dekenai idia heau neganai, aksiden do ia vara lasi.

⁴ Ita momo be ita manau bona ma haida ita matauraia karana ita hahedinaraia be auka. Ita ia durua totona, inai stadi lalonai ita ese inai gaudia: Iseda ura, iseda kara siahu taudia eiava dagi bada taudia dekenai, bona edena dala ai ma haida ita matauraia bona edia lalohadai ita abia dae karana do ita herevalaia.

Aonega Bona Manau Karadia Edia Badina

5. Mose ena Taravatu lalonai, dahaka ese hesiai tauna ena lalona ia veria ena biaguna henunai ia noho totona?

⁵ Israela taudia edia negai, hesiai taudia edia haheitalai ese dagi bada tauna ena siahu matauraia dalana maorona ia hahedinaraia. Mose ena Taravatu henunai lagani namba 7 eiava Iubili lagani ia abia neganai, hesiai taudia be edia biaguna ese do idia ruhaia. To, bema hesiai tauna ta ia ura lasi ia lao neganai, ia be hesiai gaukara ia karaia noho diba. (Esodo 21:​5, 6 duahia.) Dahaka ese hesiai tauna ena lalona ia veria ia noho totona? Hesiai tauna be iena biaguna namona ia lalokau henia dainai, ia ura iena siahu henunai do ia noho.

6. Iehova bona ma haida ita kara henidia neganai, lalokau ese edena dala ai ita ia durua?

⁶ Unai hegeregerena, ita be Iehova ita lalokau henia dainai, iseda mauri be ia dekenai ita gwauhamatalaia bona ita ura ia do ita hesiai henia noho. (Roma 14:​7, 8) Aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.” (1 Ioa. 5:⁠3) Unai bamona lalokau karana be sibona ena namo ia tahua lasi. (1 Kor. 13:⁠4, 5) Ma haida ita kara henidia neganai, dekena taudia lalokau henia karana ese ita ia doria edia namo ita laloa guna totona, unai be gau badana.​​—⁠Fili. 2:​2, 3.

7. Iseda haroro gaukara lalonai edena dala ai hemataurai karana ita hahedinaraia?

⁷ Namona be iseda hereva eiava kara amo ma haida ita hahekwakwanaia lasi. (Efe. 4:​29) Oibe, lalokau dainai ita ura lasi iseda kara eiava hereva ta ese hanua idauidau o kastom idauidau taudia edia dala ia koua, bena Iehova kahirakahira do  idia lao lasi. Unai ese ia hahedinaraia ma haida edia lalohadai ita matauraia be namo. Hegeregere, misinari taihu haida be vairana hahairaia gaudia atoa karana dekenai idia manada, to tano ma haida dekenai idia lao neganai unai gaudia idia atoa lasi, badina idia ura lasi unai tano taudia idia hahekwakwanaia.​​—⁠1 Kor. 10:​31-​33.

8. Edena dala ai Dirava lalokau henia karana ese ita ia durua “maragi momokani tauna” bamona ita kara totona?

⁸ Iehova ita lalokau henia karana ese ita ia durua hekokoroku karadia ita dadaraia totona. Hahediba taudia ese daika be bada idia hepapahuahulaia murinai, Iesu ese mero maragina ta ia abia bona idia huanai ia haginia, bena ia gwau: “Lauegu ladana dainai, inai mero maragi ia abia dae tauna ese lau danu ia abia dae. Bona lau ia abia dae tauna ese lau ia siaia Diravana danu ia abia dae. Badina be umui emui huana dekenai ia maragi momokani tauna, ia be badana.” (Luka 9:​48; Mar. 9:​36) Reana, ita ta ta ita davaria ita be “maragi momokani tauna” bamona ita kara be auka. Ita be goevadae lasi taudia dainai, ita heagi bona ita ura sibona iseda ladana ita abia isi, to manau karana ese ita do ia durua ma haida ita hanamoa totona.​​—⁠Roma 12:⁠10.

9. Manau bona aonega karana ita hahedinaraia totona, dahaka ita laloa be namo?

⁹ Dirava ese ia abia hidi taudia edia dagi ita matauraia neganai, unai be manau bona aonega karana. Keristani taudia ibounai idia diba kwara dagina matauraia taravatuna be mai anina bada. Aposetolo Paulo ese Korinto tadikaka dekenai unai ia hahedinaraia: “Lau ura umui diba, tatau ibounai edia kwarana be Keriso, hahine edia kwarana be edia tau, bona Keriso ena kwarana be Dirava.”​​—⁠1 Kor. 11:⁠3.

10. Iehova ena siahu ita matauraia neganai, dahaka ita hahedinaraia?

¹⁰ Dirava ena siahu ita matauraia karana ese ia hahedinaraia ita be Iehova ita lalokau henia iseda Tamana bamona bona ita abidadama henia. Ia ese idia vara gaudia ibounai ia itaia bona iseda kara hegeregerena davana do ia henia. Namona be unai ita laloatao bema ma haida ese ita idia matauraia lasi bona ita idia badu henia. Paulo be inai sisiba ia henia: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.” Bena ena hereva lalonai inai hahegani ia gwauraia: “Lauegu lalokau taudia e, dika ena davana do umui henia lasi, davana henia be, Dirava sibona. Badina be Buka Helaga ia gwau: “Lohiabada ia gwau, ‘Dika ena davana be lau sibona ese do lau karaia.’ ”​​—⁠Roma 12:​18, 19.

11. Edena dala ai ita hahedinaraia ita be Iesu ena kwara dagina ita matauraia?

¹¹ Keristani kongrigeisen lalonai Dirava ese ia abia hidi taudia ita matauraia danu be namo. Apokalupo karoa 1 ese ia hahedinaraia Keriso Iesu be iena imana idibana dekenai kongrigeisen ena “hisiu” ia dogoatao. (Apok. 1:​16, 20) Unai “hisiu” be kongrigeisen ena elda eiava naria taudia ia laulaulaia. Unai taudia ese Keriso ena dagi idia matauraia bona ia ese taunimanima ia kara henia dalana idia tohotohoa. Iesu ese “hesiai tauna mai ena kamonai, bona mai ena kara maoromaoro” ia hegaegaelaia, nega korikori ai ita dekenai Dirava ena hereva ia halasia totona, unai dainai kongrigeisen taudia ibounai ese unai dala idia matauraia be namo. (Mat. 24:​45-​47) Hari,  mai iseda ura ida inai magasin ita stadilaia bona iseda mauri lalonai ena sisiba ita badinaia karana ese ia hahedinaraia, ita be Keriso ena kwara dagina ita matauraia, bona unai ese maino bona lalotamona ia havaraia.​​—⁠Roma 14:​13, 19.

Ma Haida Matauraia Karana Ena Hetoana

12. Dahaka dainai ma haida matauraia karana be mai ena hetoana?

¹² Ena be gavamani eiava siahu taudia ita matauraia, to namona be Dirava ena hakaua herevadia ita badinaia bona iseda abidadama ita hadikaia lasi. Keristani ginigunadia be dubu gunalaia taudia ese idia oda henidia Iesu ladanai do idia haroro lasi neganai, dahaka idia karaia? Petero bona aposetolo taudia ma haida be mai gari lasi ida idia gwau: “Dirava ai kamonai henia be namo, taunimanima ai kamonai henia be dika.” (Kara 4:​18-​20; 5:​28, 29) Unai dainai, hari inai negai bema gavamani taudia ese iseda sivarai namona harorolaia gaukarana idia taravatua, iseda gaukara do ita hadokoa lasi, to aonega dalanai do ita haroro. Bema iseda ruma-ta-ruma-ta haroro gaukarana idia koua, dala idauna ta ai ruma taudia ita haroro henia diba, unai amo ita be Dirava ena hahegani ita badinaia noho. Danu, bema “gavamani” ese iseda hebou karana idia taravatua, namona be mai aonega ida grup maragidia dekenai ita hebou diba.​​—⁠Roma 13:1; Heb. 10:​24, 25.

13. Siahu taudia matauraia karana dekenai Iesu be dahaka ia gwau?

¹³ Iesu ena Ororo Harorona ai, ia hahedinaraia siahu o lohia taudia ita matauraia be namo: “Bema tau ta do ia kota henia oi dekenai, oiemu dabua abia totona, oiemu rami danu do oi henia. Sedira tuari tauna ta ese oi do ia hamaoroa, ‘Kilomita ta dekenai lauegu kohu do oi huaia,’ vadaeni, kilomita rua do oi huaia.” (Mat. 5:​40, 41) * Taunimanima ita lalokau henidia bona ita ura durudia dainai, edia kohu be kilomita rua ita huaia ena anina be inai: Ia noia heduru gauna sibona ita karaia lasi, to heduru ma haida ita henia danu.​​—⁠1 Kor. 13:⁠5; Tito 3:​1, 2.

14. Dahaka dainai aposteit taudia edia lalohadai ita dadaraia be namo?

¹⁴ Ena be ita ura ma haida edia lalohadai ita abia dae, to aposteit taudia edia lalohadai ita dadaraia be namo. Aposteit taudia bona edia hereva ita dadaraia momokani be namo, badina unai amo hereva momokani be do ia goeva bona kongrigeisen be lalotamona ai do ia noho. Paulo be “varavara koikoi taudia” ia herevalaia, ia gwau: “To ai be ai manoka lasi, bona edia ura Tito totona ai kamonai henia lasi, lasi bona lasi momokani. Inai ai karaia, be Sivarai Namona ena momokani umui ese do umui badinaia goada noho totona.” (Gal. 2:​4, 5) Aposteit karana ia hedinarai neganai, Keristani taudia be hereva momokani do idia badinaia goadagoada.

Elda Taudia Idia Manau be Namo

15. Keristani elda taudia be idia hebou neganai, edena dala ai manau idia hahedinaraia diba?

¹⁵ Bema tadikaka idia ura elda taudia ai idia lao, namona be idia manau. Paulo ia gwau: “Ekalesia gunalaia tauna be . . . mai ena manau.” (1 Tim. 3:​2, 3) Elda taudia be kongrigeisen ena gaukara dainai idia hebou neganai, manau karana be mai anina bada. Gau ta idia do abia hidi lasi neganai, idia ta ta ese edia lalohadai idia gwauraia hedinarai, to bema ta be ena lalohadai ta ia gwauraia lasi, unai be namo danu. Edia hebou lalonai, haida ese Baibel ena hakaua hereva idia gwauraia neganai, ta ena lalohadai ia haidaua diba. Lo Keristani elda tauna be sibona ena lalohadai do ia dogoatao auka lasi, to elda ma haida edia lalohadai do ia abia dae. Hebou matamanai, reana idia ta ta edia lalohadai be idauidau, to guriguri karana ese idia ia durua unai amo mai manau ida ta ta edia lalohadai idia abia dae bena idia lalotamona.​​—⁠1 Kor. 1:​10; Efeso 4:​1-3 duahia.

16. Elda tauna ese dahaka kara ia hahedinaraia be namo?

¹⁶ Namona be Keristani elda tauna ena gaukara ibounai lalonai, tiokratik dalana do ia badinaia. Unai kara be mamoe naria gaukara lalonai do ia hahedinaraia danu, unai amo ia durua taudia edia namo ia laloa bona mai hebogahisi ida ia kara henidia. Petero ia gwau: “Dirava ese umui ia henia mamoe orea do umui naridia namonamo. Do umui gunalaia, Dirava ena ura hegeregerena. Do umui maumau lasi, to mai emui ura namona inai dagi do umui karaia. Ta ese umui ia oda dainai do umui karaia lasi, to sibona emui  ura dainai. Kohu do umui davaria totona do umui karaia lasi.”​​—⁠1 Pet. 5:⁠2.

17. Edena dala ai kongrigeisen lalonai ta ta dekenai hemataurai ita hahedinaraia?

¹⁷ Kongrigeisen lalonai idia noho buruka taudia be matamata taudia edia heduru idia moalelaia bona idia matauraidia. Unai hegeregerena, matamata taudia ese lagani momo lalodiai Iehova idia hesiai henia buruka taudia idia matauraia. (1 Tim. 5:​1, 2) Keristani elda taudia be kongrigeisen lalonai idia hegeregere tatau idia abia hidi maduna haida idia huaia totona bona idia hadibaia Dirava ena mamoe idia naria totona. (2 Tim. 2:​1, 2) Keristani taudia ta ta be Paulo ena sisiba namona idia laloa be namo. “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.”​​—⁠Heb. 13:⁠17.

Hemataurai Karana Ruma Bese Lalonai

18. Dahaka dainai ruma bese lalonai kwara dagina matauraia karana be mai anina bada?

¹⁸ Ruma bese lalonai hemataurai heheni karana be mai anina bada. (Kolose 3:​18-​21 duahia.) Baibel ese Keristani ruma bese taudia ta ta edia maduna ia gwauraia. Tau be hahine ena kwarana bona natudia hadibaia gaukarana be iena maduna. Hahine ese ena tau ena kwara dagina do ia matauraia bona natudia be edia tama sina edia hereva do idia kamonai, badina Lohiabada be unai ia moalelaia. Ruma bese taudia idia hemataurai heheni neganai, ruma bese lalonai maino bona lalotamona do ia noho. Baibel lalonai idia noho sivarai haida ese unai point idia hahedinaraia.

19, 20. (a) Eli ese ena natudia ia kara henia dalana bona Iehova ese aneru edia lalohadai ia abia dae karana mani oi gwauraia. (b) Tama sina ese unai haheitalai amo dahaka gaudia idia dibaia?

¹⁹ Samuela be mero maragi neganai, Eli be Israela ena hahelaga tauna badana. To, Eli ena natudia mero, Hopini bona Pineha be “lebulebu taudia, bona idia ese Lohiabada idia matauraia lasi.” Eli ia kamonai ena natudia be kara dika idia karaia, hegeregere palai dubu ena iduara dekenai idia gaukara hahine idia sihari henidia noho. Vadaeni, Eli be dahaka ia karaia? Eli ese ena natudia ia hamaorodia bema idia be Iehova idia kara dika henia, tau ta be idia totona do ia guriguri diba lasi. To, Eli be ena natudia ia matahakani henia lasi. Unai dainai, edia kara dika idia habadaia.  Dokonai, Iehova ia gwau edia kara dika dainai idia mase be maoro. Eli be edia mase sivaraina ia kamonai neganai, ia danu ia mase. Madi! Eli be aonega dalanai ena natudia ia matahakani henidia lasi dainai, toana be edia kara dika ia abia dae.​​—⁠1 Sam. 2:​12-​17, 22-​25, 34, 35; 4:​17, 18.

²⁰ To, Dirava ese aneru, iena lauma natudia unai, ia kara henidia dalana mani ita itaia. Peroveta tauna Mikaia be matahanai amo Iehova bona aneru edia hebou ta ia itaia. Iehova ese ena aneru ia nanadaidia daika ese kara dika tauna King Ahaba ia koia diba bena unai amo do ia mase. Iehova ese aneru ta ta edia lalohadai ia kamonai. Bena, aneru ta ia gwau ia karaia diba. Iehova ese unai aneru ia nanadaia edena bamona do ia karaia. Iehova ese unai aneru ena hereva ia kamonai bona ena lalohadai ia abia dae murinai, unai aneru dekenai gwaumaoro ia henia ena ura gauna ia karaia totona. (1 Kin. 22:​19-​23) Taunimanima ese unai sivarai amo idia dibaia gauna be, edia ruma bese lalonai ma haida edia lalohadai do idia laloa bada be namo. Keristani tau eiava tama be iena hahine bona natudia edia ura eiava lalohadai do ia kamonai henia be namo. To, namona be hahine bona natudia idia diba, ena be edia ura gauna eiava lalohadai idia gwauraia, to edia adavana o tamana ena kwara dagina do idia matauraia dainai, bema ia ese abia hidi ta ia karaia, ena lalohadai do idia abia dae be maoro.

21. Stadi herevana iharuana be dahaka do ia herevalaia?

²¹ Ita moale badina Iehova ese ita dekenai sisiba namodia ia henia, ita aonega bona ita manau totona! (Sal. 119:99) Iseda stadi herevana iharuana lalonai do ita itaia, edena dala ai manau bona aonega karana ese headava lalonai moale ia havaraia.

[Footnote]

Edena Bamona Do Oi Haere?

• Bema ita aonega, manau, siahu taudia ita matauraia bona edia lalohadai ita abia dae, dahaka namo do ita davaria?

• Elda taudia ese edena dala ai manau karana do idia hahedinaraia?

• Dahaka dainai ruma bese lalonai kwara dagina matauraia karana be mai anina bada?

[Study Questions]

[Picture on page 4]

Elda taudia be Keriso ese mai hebogahisi ida taunimanima ia kara henia dalana idia tohotohoa

[Picture on page 6]

Kongrigeisen elda taudia idia hebou neganai, idia guriguri hebou bona ta ta edia lalohadai idia abia dae karana ese lalotamona ia havaraia