Gau Ibounai Dekenai Dirava Ena Hakaua Herevadia Ita Badinaia
Gau Ibounai Dekenai Dirava Ena Hakaua Herevadia Ita Badinaia
“Inai Dirava be iseda Dirava ela bona hanaihanai. Ia ese nega ibounai doko lasi ita do ia hakaua noho.”—SAL. 48:14.
1, 2. Dahaka dainai ita sibona eda aonega ita abidadama henia lasi, to Iehova ena dala ita badinaia be namo? Dahaka henanadai do ita herevalaia?
ANINA lasi eiava dika idia havaraia diba gaudia ita ura henia neganai, ita sibona ita koia diba. (Aon. 12:11) Bema ita ura dikadika Dirava ese ia taravatua karana ta ita karaia, nega momo iseda kudouna be ita do ia koia unai taravatu ita utua totona. (Ier. 17:5, 9) Unai dainai, salamo torea tauna ese Iehova ia guriguri henia be aonega karana, ia gwau: “Oiemu diari bona oiemu hereva momokani, be mani oi siaia mai, idia ese dala maorona lau dekenai do idia hedinaraia.” (Sal. 43:3) Salamo torea tauna be sibona ena aonega ia abidadama henia lasi, to Iehova ia abidadama henia. Unai hegeregerena, Dirava ena dala ita badinaia be namo.
2 Dahaka dainai ita abia dae Iehova ena dala sibona be hereadae? Edena negai Iena dala ita badinaia be namo? Iehova ese ita ia durua totona, dahaka ita karaia be namo? Iehova be edena dala ai hari ita ia hakaua? Unai henanadai badadia be inai stadi lalonai do ita herevalaia.
Dahaka Dainai Iehova Ena Dala Ita Badinaia be Namo?
3-5. Dahaka dainai Iehova ena dala ita badinaia be namo?
3 Iehova be iseda guba Tamana. (1 Kor. 8:6) Ia be ita ta ta eda mauri ibounai bona iseda kudouna ia itaia namonamo diba. (1 Sam. 16:7; Aon. 21:2) King Davida be Dirava dekenai ia gwau: “Egu kara ibounai oi diba vadaeni. Oi be daudau herea dekena amo egu laloa ibounai oi diba. Do lau hereva lasi neganai, oi ese egu hereva be oi diba guna vadaeni.” (Sal. 139:2, 4) Iehova be ita ia diba namonamo dainai, ia diba dahaka be namo ita totona. Danu, Iehova ena aonega be bada herea. Ia be gau ibounai ia itaia bona tahua namonamo, taunimanima bamona lasi. Ia be gau ta ena matamana bona dokona ia diba. (Isa. 46:9-11; Roma 11:33) Ia be “aonega Dirava tamona.”—Roma 16:27.
4 Danu, Iehova be ita ia lalokau henia bona hanaihanai ia ura namo ita davaria. (Ioa. 3:16; 1 Ioa. 4:8) Lalokau Diravana be ita dekenai gau momo ia henia. Iamesi ia gwau: “Gau namodia ibounai, bona harihari gaudia namodia momokani ibounai, be Dirava dekena amo idia diho mai. Dirava ese diari ibounai ia karaia.” (Iam. 1:17) Dirava ena dala idia badinaia taudia be Ia ese ia hanamodia.
5 Ma danu, Iehova ena siahu be bada herea. Unai dainai, salamo torea tauna ia gwau: “Bema tau ta ese Ataiai Momokani Lohiabada dekenai ia lao, Lohiabada ese mase dekena amo do ia naria totona, bona bema unai tau be, Siahu Ibounai Dirava kahirakahira ia noho neganai. Dirava ese do ia naria bona durua. Unai tau ese Dirava dekenai do ia hereva, do ia gwau, ‘Lohiabada e, oi be egu gima Tauna bona egu naria Tauna, Oi be egu Dirava, oi dekenai lau abidadama noho.’ ” (Sal. 91:1, 2) Bema Iehova ena dala ita badinaia, ita diba Dirava be ita do ia gimaia. Dagedage lalonai danu, Iehova be ita ia durua. Ia be ita do ia rakatania lasi. (Sal. 71:4, 5; Aonega Herevadia 3:19-26 duahia.) Oibe, Iehova ia diba dahaka be namo ita dekenai, ia ura gau namodia ia henia ita dekenai, bona Ia be mai ena siahu unai bamona ia karaia totona. Unai dainai, Iehova ena dala ita dadaraia be kavakava karana! To, edena negai unai dala ita badinaia be namo?
Edena Negai Iehova Ena Dala Ita Badinaia be Namo?
6, 7. Edena negai Iehova ena dala ita badinaia be namo?
6 Momokani, ita matamata ela bona ita buruka negana lalonai, Dirava ena dala ita badinaia noho be namo. Salamo torea tauna ia gwau: “Inai Dirava be iseda Dirava ela bona hanaihanai. Ia ese nega ibounai doko lasi ita do ia hakaua noho.” (Sal. 48:14) Unai hegeregerena, namona be hanaihanai aonega Keristani taudia ese Dirava ena dala idia badinaia.
7 Momokani, nega haida ita ura bada heduru ita abia haraga. Nega haida eda “hisihisi be bada herea,” hegeregere dagedage ita davaria, ita gorere, o moni gaukara ita haboioa. (Sal. 69:16, 17) Unai bamona nega dikadia lalonai, Iehova ita guriguri henia be namo, bona ita abia dae momokani Ia be ita do ia hagoadaia hisihisi ita haheaukalaia, bona abia hidi maorodia ita karaia totona. (Salamo 102:17 duahia.) To, nega idaudia ai Iehova ena heduru ita abia danu be namo. Hegeregere, bema ita ura eda dekena taudia dekenai Basileia ena sivarai namona ita harorolaia namonamo, vadaeni Iehova ena heduru ita abia be namo. Gau ma haida—hegeregere moale karadia, dabua bona toana, turadia, moni gaukara, edukeisen, bona ma haida—ita abia hidi gwauraia neganai, aonega karana be Iehova ena dala ita badinaia. Momokani, iseda mauri lalonai, Iehova ena dala ita badinaia be namo.
Dirava Ena Dala Dadaraia Karana Ena Dika
8. Heva be taravatu huahuana ia ania ese dahaka ia hahedinaraia?
8 Namona be ita be mai eda ura ida Iehova ena dala ita badinaia. Dirava be ita do ia doria lasi, bema ita ura lasi Iena dala ita badinaia. Heva be ia ura lasi Iehova ena dala ia badinaia, bona Heva ena haheitalai ese ia hahedinaraia abia hidi kererena ese dika bada ia havaraia diba. Heva ena kara ese dahaka ia hahedinaraia? Heva ese taravatu huahuana ia ania, badina ia ura ‘Dirava hegeregere do ia noho, kara namona bona kara dikana do ia diba.’ (Gen. 3:5) Unai amo Heva ese ia hahedinaraia ia ura Dirava ena gabu ia abia, bona ia sibona ia abia hidi dahaka be namo bona dahaka be dika. Momokani, Heva be Iehova ena lohia siahuna ia dadaraia. Ia ura sibona ia lohiaia. Iena adavana, Adamu, danu be unai gwau-edeede dalana ia abia hidi.—Roma 5:12.
9. Iehova ena dala ita dadaraia ena anina be dahaka, bona dahaka dainai unai be kavakava karana?
9 Hari inai negai, bema Iehova ena dala ita dadaraia, ita be Iehova ena lohia siahuna ita dadaraia unai. Hegeregere, ponografi eiava matabodaga laulau ia itaia loulou tauna ta mani ita laloa. Bema ia be Keristani kongrigeisen ia bamoa tauna ta, ia be Iehova ena taravatu ia diba vadaeni. Iehova ia gwau, eda huanai miro karadia idauidau ibounai ita herevalaia lasi o mai eda ura ida ita itaia lasi. (Efe. 5:3) Unai taravatu ia dadaraia tauna be Iehova ena lohia siahuna o kwara dagina ia dadaraia. (1 Kor. 11:3) Unai bamona ia karaia tauna be kavakava, badina Ieremia ia gwau, “taunimanima edia mauri dalana, be idia sibona ese idia naria lasi.”—Ier. 10:23.
10. Dahaka dainai iseda ura kwalimu ita gaukaralaia namonamo be namo?
10 Reana haida be Ieremia 10:23 do idia abia dae lasi, badina idia gwau bema Iehova be ita dekenai ura kwalimu ia henia, vadaeni unai ura kwalimu ita gaukaralaia dalana ia maumauraia be maoro lasi. To, laloaboio lasi: Unai ura kwalimu be Iehova ena harihari gauna bona ita gaukaralaia namonamo be maoro. Dirava be eda hereva bona kara hegeregerena, ita do ia kota henia. (Roma 14:10) Iesu ia gwau: “Tau ena lalona ia honu momokani gaudia dekena amo iena uduna ia hereva.” Iesu ma ia gwau: “Tau ena lalona dekena amo idia mai gaudia be inai: Laloa dikadia, taunimanima alaia, heudahanai, matabodaga, henaoa, samania koikoi, hereva dikadia.” (Mat. 12:34; 15:19) Oibe, iseda hereva bona kara ese idia hahedinaraia, eda kudouna lalonai be dahaka idia noho bona ita be edena bamona taudia. Unai dainai, Keristani tauna ese gau ibounai dekenai Iehova ena hakaua herevadia ia badinaia be aonega karana. Unai amo, Iehova ese do ia itaia unai tau be ‘taravatu ia kamonai henia noho’ bona Ia ese do ia “hanamoa.”—Sal. 125:4.
11. Israela taudia edia sivarai amo dahaka ita dibaia?
11 Idaunegai Israela taudia edia sivarai ita laloaboio lasi. Idia be abia hidi maorodia idia karaia bona Iehova ena oda idia badinaia neganai, Iehova be idia ia gimaia. (Ios. 24:15, 21, 31) To nega momo, idia be edia ura kwalimu idia gaukaralaia kerere. Ieremia ena negai, Iehova ia gwau: “Lau dekenai idia kamonai henia lasi, lauegu hereva idia laloa lasi. Idia ese sibodia edia laloa dikadia bona laloa kerere hegeregerena idia karaia noho. Bona idia edia kara ese edia mauri ia hanamodia lasi.” (Ier. 7:24-26) Unai be dika rohoroho! Namona be ita gwau-edeede lasi, sibona eda ura ita tahua lasi, Iehova ena dala ita dadaraia lasi, bona ita sibona eda aonega ita badinaia lasi, badina unai ese eda ‘mauri ia hanamoa lasi’!
Dirava Ena Sisiba Badinaia Dalana
12, 13. (a) Edena kara dainai ita ura Iehova ena sisiba ita badinaia? (b) Dahaka dainai abidadama be mai anina bada?
12 Iehova ita lalokau henia dainai, ita ura Iehova ena dala ita badinaia. (1 Ioa. 5:3) To, Paulo be ma gau ta ia herevalaia: “Abidadama dainai ai raka, ai itaia gaudia dainai lasi.” (2 Kor. 5:6, 7, BHğ) Dahaka dainai abidadama karana be mai anina bada? Iehova be “kara maoromaoro daladia dekenai” ita ia hakaua, to unai dala edia dokonai be taga o tanobada ena hahenamo idauidau do ita davaria lasi. (Sal. 23:3) Unai dainai, namona be mai eda abidadama ida Iehova hesiai henia karana amo idia mai hahenamodia ita laloa noho. (2 Korinto 4:17, 18 duahia.) Danu, abidadama karana ese ita do ia durua moni o kohu dekenai ita laloa momo lasi totona.—1 Tim. 6:8.
13 Iesu ia gwau, Dirava momokanina ia tomadiho henia tauna be sibona ena ura ia dadaraia, bona unai ia karaia totona abidadama be gau badana. (Luka 9:23, 24) Dirava momokanina idia tomadiho henia taudia haida be ogogami, dagedage, eiava hahetoho ma haida idia haheaukalaia noho. (2 Kor. 11:23-27; Apok. 3:8-10) Edia abidadama be ia goada dainai, mai moale ida idia haheauka. (Iam. 1:2, 3) Unai abidadama goadana ese ita ia durua dainai, ita abia dae momokani Iehova ena sisiba ita badinaia be dala maorona. Ia be hanaihanai ita ia durua. Ita diba momokani, Iehova idia abidadama henia taudia be edia haheauka dainai ahuna namona do idia abia, badina idia davaria hisihisi be kahirakahira do ia ore.—Heb. 11:6.
14. Dahaka dainai Hagara ia manau be namo?
14 Danu, Iehova ena sisiba ita badinaia totona, manau karana be mai anina bada. Sara ena hesiai hahinena, Hagara ena sivarai ese unai ia hahedinaraia. Sara be natuna ta ia havaraia lasi neganai, ia ese Aberahamo dekenai Hagara ia henia bona Hagara ia rogorogo. Gabeai, Hagara be Sara vairanai ia hekokoroku. Unai dainai, Sara ese Hagara ia “gwau henia” bona Hagara be ia heau. To, Iehova ena aneru be Hagara ia davaria bona ia gwau: “Oi giroa lou, bona iena hereva oi kamonai henia.” (Gen. 16:2, 6, 8, 9; NW ) Reana Hagara ia gwau diba: “Sisiba idauna ma ta oi gwauraia.” Danu, aneru ena sisiba ia badinaia totona, ena hekokoroku karana do ia haidaua be namo. Momokani, Hagara be mai manau ida aneru ena sisiba ia badinaia bona ena natuna, Isamaela, be Aberahamo ena kamepa lalonai ia vara.
15. Edena nega haida ai Iehova ena sisiba ita badinaia be manau karana.
15 Iehova ena sisiba ita badinaia totona, ita danu ita manau be namo. Hegeregere, haida idia laloparara idia karaia moale karadia haida be Iehova idia habadua bona unai kara idia rakatania be namo. Reana tadikaka ta be tadikaka ma ta ena lalona ia hahisia, bona sori herevana ia gwauraia be namo. Eiava kerere ta ia karaia bona ia gwauraia hedinarai be namo. Bema kerere badana ta ia karaia tauna be edena bamona? Namona be mai manau ida ena kerere be elda taudia dekenai ia gwauraia hedinarai. Bema ia helalo-kerehai lasi, reana ia be orea amo do idia atoa siri. To, kongrigeisen dekenai idia abia-vareai-lou totona, mai manau ida ia helalo-kerehai bona ena kara ia haidaua be namo. Unai bamona hekwakwanai lalodiai Aonega Herevadia 29:23 be ita ia durua, ia gwau: “Bema oi hekokoroku neganai oi be do oi moru, to bema oi manau neganai, taunimanima ese oi do idia matauraia.”
Iehova ese Ita Ia Hakaua Dalana
16, 17. Edena dala ai Baibel ita gaukaralaia diba?
16 Ita ia hakaua buka hereadaena be Baibel o Dirava ena Hereva. (2 Timoteo 3:16, 17 duahia.) Ita naria ela bona hekwakwanai idia vara bena Baibel ena hereva ita tahua be aonega karana lasi. Unai dainai, dina ta ta lalodiai Baibel ita duahia be gau badana. (Sal. 1:1-3) Unai amo Dirava ena Hereva do ita manadalaia. Dirava ena lalohadai ita abia neganai, ita hegaegae hekwakwanai idauidau ita hanaia totona.
17 Ma danu, Baibel lalonai ita duahia herevadia ita laloa dobu bona ita gurigurilaidia. Hegeregere, Baibel ena siri ta ita duahia neganai eda lalona ai ita gwau, ‘inai siri be edena dala ai lau gaukaralaia hekwakwanai ta lau hanaia totona?’ (1 Tim. 4:15) Hekwakwanai badana ta ita davaria neganai, Iehova ita noia ena hakaua dalana maorona ita davaria totona. Iehova be ena lauma helaga amo ita do ia durua Baibel o Baibel idia herevalaia bukadia lalonai ita duahia vadaeni hakaua herevadia ita laloa lou totona.—Salamo 25:4, 5 duahia.
18. Edena dala ai Iehova be iseda tadikaka taihu amo ita ia hakaua?
18 Dala ma ta be inai: Iehova be eda tadikaka taihu amo ita ia hakaua. Ginigunana be, “hesiai tauna mai ena kamonai, bona mai ena kara maoromaoro” bona ena Hakaua Oreana—idia be hanaihanai buka, magasin, pepapepa bona hebouhebou idauidau amo Iehova ena hakaua herevadia idia halasia. (Mat. 24:45-47; Kara 15:6, 22-31 hahegeregerea.) Danu, iseda tadikaka taihu huanai lo taudia, hegeregere elda taudia, be Baibel amo ita dekenai heduru bona sisiba idia henia diba. (Isa. 32:1) Matamata taudia be edia ruma bese lalonai heduru namona idia abia diba. Edia Keristani tama sina be Dirava ese ia abia hidi, bona nega ibounai natudia ese edia tama sina amo heduru idia abia be namo.—Efe. 6:1-3.
19. Bema Iehova ena dala ita badinaia noho, vadaeni dahaka hahenamo do ita abia?
19 Oibe, Iehova be dala idauidau ia gaukaralaia ita ia hakaua totona, bona ita ese unai dala ita badinaia be namo. King Davida be Israela taudia ese abidadama idia hahedinaraia negana ta ia herevalaia neganai, ia gwau: “Aiemai sene taudia ese, oi dekenai idia abidadama henia; oi dekenai idia abidadama, vadaeni oi ese idia oi hamauria. Oi dekenai idia taitai, vadaeni mauri idia davaria. Idia ese oi idia abidadama henia, vadaeni idia dika lasi.” (Sal. 22:3-5) Bema Iehova ena dala ita badinaia, ita be “dika” ta do ita davaria lasi. To, ita naria noho helarona do ia vara momokani. Bema ‘iseda mauri be Lohiabada ena imana dekenai do ita atoa,’ bona eda aonega dekenai ita tabekau lasi, vadaeni hari bona vaira negana ai hahenamo momo do ita abia. (Sal. 37:5) Iehova ena dala ita badinaia bona ita haheauka neganai, unai hahenamo do ita abia ela bona hanaihanai. King Davida ia gwau: “Lohiabada ese, kara maoromaoro ia ura henia noho. Iena abidadama taudia, be ia ese do ia rakatania lasi. Kara maoromaoro taudia be, Lohiabada ese do ia naridia namonamo ela bona hanaihanai, . . . Kara maoromaoro taudia ese, Dirava ia henidia tano dekenai do idia noho ela bona hanaihanai.”—Sal. 37:28, 29.
Anina Oi Gwauraia Diba, A?
• Dahaka dainai Iehova ena dala ita badinaia?
• Iehova ena dala ita dadaraia ena anina be dahaka?
• Edena dala idauidau ai Keristani tauna ese manau ia hahedinaraia be namo?
• Edena dala ai Iehova be hari ita ia hakaua?
[Study Questions]
[Pictures on page 8]
Oiemu mauri lalonai Iehova oi tahua, a?
[Picture on page 9]
Heva be Iehova ena lohia siahuna ia dadaraia
[Picture on page 10]
Hagara be aneru ena sisiba ia abia dae totona, dahaka kara ia hahedinaraia be namo?