Matamata Taudia E, Emui Havaraia Tauna Badana Umui Laloa

“Oi be eregabe neganai, ia ese oi ia karaia Dirava do oi laloa.”​​—⁠HAD. 12:⁠1.

1. Iehova ena lalohadai matamata taudia dekenai be dahaka?

IEHOVA ia laloa matamata Keristani taudia be dava bada gaudia bona daba maragi ena paripari bamona. Oibe, Dirava ia gwau iena Natuna ‘idia tuari henia dinana’ ai memero bona kekeni matamata be “mai edia ura kwalimu danu” Keriso do idia durua. (Sal. 110:⁠3) Unai peroveta herevana ia guguru negana ai, taunimanima be Dirava do idia laloa lasi, to idia sibona bona moni do idia laloa bada bona do idia gwau-edeede. To, Iehova ia diba ia idia tomadiho henia matamata taudia be idau. Ia diba umui matamata taudia be iena taravatu do umui badinaia!

2. Iehova ita laloa ena anina be dahaka?

² Matamata taudia be edia Havaraia Tauna Badana idia laloa neganai, Dirava ia moale. (Had. 12:⁠1) To, Iehova ita laloa sibona be hegeregere lasi. Namona be iseda kara amo ita hahedinaraia danu​​—⁠anina be iseda mauri dinadia ta ta lalonai, iena taravatu bona hakaua herevadia do ita badinaia, unai amo Ia ita hamoalea. Danu, Iehova ita abidadama henia badina ita diba ia be iseda namo ia laloa bada. (Sal. 37:3; Isa. 48:​17, 18) Emui Havaraia Tauna Badana be unai bamona umui laloa, a?

“Lohiabada Do Oi Abidadama Henia, mai Emu Kudouna Ibounai”

3, 4. Edena dala ai Iesu ese ia hahedinaraia Iehova ia abidadama henia, bona dahaka dainai hari Iehova abidadama henia karana be mai anina bada?

³ Dirava ia abidadama henia tauna namona be Iesu Keriso. Ena mauri lalonai ia ese Aonega Herevadia 3:​5, 6 ena hereva ia badinaia: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” Iesu ia bapatiso murinai, Satani ese tanobada gavamani mai edia hairai amo Iesu ia dibagania. (Luka 4:​3-​13) To, Iesu ia moru lasi. Ia diba “Lohiabada do oi gari henia, bona do oi manau” neganai, “kohu, bona matauraia, bona mauri do oi davaria.”​​—⁠Aon. 22:⁠4.

⁴ Hari inai negai, tanobada taudia be idia mataganigani bona sibona edia ura idia tahua momo. Unai bamona tanobadana lalonai, Iesu ena haheitalai do ita tohotohoa be aonega karana. Namona be ita laloatao, Satani be ia hekwarahi noho Iehova ena hesiai taudia edia lalona ia veria, bena mauri ia lao henia dala maragina idia rakatania totona. Ia ura taunimanima ibounai be mase ia lao henia dala badana dekenai do idia raka. Namo lasi Satani ese umui ia koia! Namona be emui lalona umui hadaia, hanaihanai emui Havaraia Tauna Badana do umui laloa totona. Emui kudouna ibounai ida Ia do umui abidadama henia bena kahirakahira, vaira negana ai “mauri korikorina” do umui abia.​​—⁠1 Tim. 6:​19, BHğ.

Matamata Taudia E, Umui Aonega!

5. Vaira negana ai tanobada dekenai do ia vara gauna be edena bamona oi laloa?

⁵ Edia Havaraia Tauna Badana idia laloa matamata taudia be aonega taudia ai idia lao. (Salamo 119:​99, 100 duahia.) Idia be Dirava ena lalohadai idia abia dainai, idia diba vaira negana ai inai tanobada be dika bada herea do ia davaria. Emui mauri kwadogina lalonai umui itaia taunimanima be vaira negana idia garilaia bona idia lalohekwarahilaia. Bema umui do sikuli noho, umui ese hodahoda idia hadikaia karana, davara be motumotu ia koua karana, au momo idia utua karana  bona unai bamona hekwakwanai ma haida umui diba vadaeni. Taunimanima be unai gaudia idia lalohekwarahilaia bada, to Iehova ena Witnes taudia idia laloparara unai gaudia ese idia hahedinaraia Satani ena tanobada ena dokona be ia kahirakahira.​​—⁠Apok. 11:⁠18.

6. Edena dala ai Satani ese matamata taudia haida ia koia?

⁶ Madi, Dirava idia hesiai henia matamata taudia haida be idia naria namonamo lasi dainai, idia laloaboio ita be tanobada ena nega dokona ai ita noho. (2 Pet. 3:​3, 4) Haida be hebamo dikadia bona ponografi laulau idia itaia dainai, kara dika badadia lalonai idia moru. (Aon. 13:20) Ita be tanobada ena dokona momokani dekenai ita noho bona bema Dirava ena lalonamo ita haboioa, madi unai be dika momokani! Namona be Israela taudia dekenai ia vara gauna oi laloa. Lagani 1473 B.C.E. ai idia be Moaba tanona ai kamepa idia karaia, bona kahirakahira Gwauhamata Tanona dekenai do idia vareai. To, dahaka ia vara?

Kahirakahira Idia Vareai, to Idia Moru

7, 8. (a) Moaba tanona ai Satani be dahaka hedibagani karana ia gaukaralaia? (b) Hari, Satani be dahaka hedibagani karana ia gaukaralaia?

⁷ Unai nega ai, Satani ia ura Israela taudia ia koua bona gwauhamata tanona ai do idia vareai lasi. Israela taudia ia hadikaia totona, Satani be peroveta tauna Balama ia gaukaralaia to ia kwalimu lasi dainai, hunia dalana ma ta ia gaukaralaia. Ia ura Israela taudia be kara dika do idia karaia bena Iehova ena hahenamo do idia haboioa. Moaba hanua ena hegahusi hahinedia ese Israela tatau edia lalona idia veria, bona unai dala dekenai Satani ia kwalimu. Israela tatau ese Moaba hahine idia sihari henidia bona Peoro ena dirava Bala idia tomadiho henia! Ena be kahirakahira Gwauhamata Tanona ai do idia vareai, to Israela taudia 24,000 idia mase. Madi, unai be dika bada herea!​​—⁠Num. 25:​1-3, 9.

⁸ Hari, ita be gwauhamata tanona namo hereana ta ita lao henia noho​​—⁠unai be tanobada matamatana. Vaia Satani ena kara, ia be matabodaga karadia ia gaukaralaia lou, Dirava ena taunimanima ia hamorua totona. Tanobada taudia be kara maoromaoro taravatudia idia badinaia lasi, bona idia gwau heudahanai be kara dikana lasi bona bema tatau be tatau (eiava hahine be hahine) ida matabodaga karana idia karaia, unai be sibona edia ura. Keristani taihu ta ia gwau: “Aiemai natudia be ruma dekenai ai hadibaia bona Kingdom Hall edia hebou amo idia laloparara, sihari kava karana bona tatau be tatau (eiava hahine be hahine) ida matabodaga karadia idia karaia be kara dika badadia Dirava vairanai.”

9. Matamata negana ai dahaka ia vara diba, bona memero kekeni be edena dala ai unai hekwakwanai idia hanaia diba?

⁹ Edia Havaraia Tauna Badana idia laloa matamata taudia idia diba mahuta hebou karana be Iehova ena harihari gauna natudia havaraia totona. Unai dainai, idia laloparara Dirava ena taravatu hegeregerena, mahuta hebou karana be headava  sibona lalonai idia karaia diba. (Heb. 13:⁠4) To, memero kekeni idia matamata neganai mahuta hebou urana be ia goada bona ta ena laloa namonamo karana ia hadikaia diba. Unai dainai, kara maoromaoro taravatudia idia badinaia be ia auka. (1 Kor. 7:​36, NW ) Lalohadai mirodia umui laloa neganai, dahaka umui karaia be namo? Iehova dekenai do umui guriguri goadagoada, lalohadai goevadia umui laloa totona. Iehova ese ia dekenai idia noinoi taudia ia kamonai henidia. (Luka 11:​9-​13 duahia.) Sivarai namodia bona Dirava abidadama henia karana do idia hagoadaia gaudia umui kikilaia karana ese umui do idia durua mai anina bada gaudia umui laloa noho totona.

Mai Aonega ida Tahua Gaudia Umui Abia Hidi!

10. Edena lalohadai ita dadaraia be namo, bona ita sibona dekenai dahaka henanadai ita henia?

¹⁰ Matamata taudia momo be edia ura gaudia idia badinaia sibona bona moale karadia idauidau idia karaia. Unai idia karaia badina “Dirava ena hereva ena namo bona siahu, . . . idia itaia lasi”​​—⁠anina be idia ese Dirava ena hakaua dalana idia dadaraia bona vaira negana totona idia be helaro lasi. (Aon. 29:18) Idia be Isaia ena nega ai idia noho Israela taudia bamona, unai taudia be Dirava idia badinaia lasi to ‘moale bada idia karaia, vamu idia ania bona uaina idia inua.’ (Isa. 22:13) Unai bamona taudia umui mama henidia lasi, to namona be Iehova ese iena abidadama hesiai taudia totona ia gwauhamatalaia helaro namona umui laloa bada. Bema oi be Dirava ena hesiai merona o kekenina ta, oi be mai emu ura ibounai ida tanobada matamatana oi naria noho, a? Oi “noho namonamo” bona Iehova ese oi dekenai ia gwauhamatalaia hahenamo be “mai moale bada danu” oi naria noho, a? (Tito 2:​12, 13) Emu haere ese emu mauri lalonai oi laloa bada bona tahua guna gaudia do ia hahedinaraia.

11. Dahaka dainai idia do sikuli noho matamata taudia ese edia sikuli gaukara idia goadalaia be namo?

¹¹ Tanobada taudia idia ura memero kekeni be tauanina gaudia do idia tahua guna. Momokani, umui do sikuli noho matamata taudia be diba umui abia totona, emui sikuli gaukara do umui karaia goadagoada be namo. Namona be umui laloatao, emui ura be moni gaukara namona do umui abia sibona lasi, to kongrigeisen lalonai gaukara namona umui karaia bona haroro tauna namona ai do umui lao danu. Unai bamona umui karaia totona, namona be mai aonega ida umui laloa namonamo, bona hemataurai bona manau dalanai ma haida do umui hereva henidia. Oibe, Baibel idia stadilaia bona ena hakaua herevadia idia badinaia matamata taudia be edukeisen namo hereana idia abia. Bona ia durudia vaira negana ai do idia kwalimu bona mauri hanaihanai do idia abia.​​—⁠Salamo 1:​1-3 duahia. *

12. Keristani ruma besedia be daidia edia haheitalai idia tohotohoa be namo?

¹² Israela dekenai tama sina be edia natudia hadibaia karana idia laloa bada. Unai hahediba dalana be edia mauri ibounai lalonai ia durudia, to mai anina bada gauna be ia durudia Dirava idia tura henia namonamo totona. (Deu. 6:​6, 7) Unai dainai, Israela matamata taudia be edia tama sina bona lo taunimanima badadia ma haida edia hereva idia kamonai neganai, diba, aonega, bona laloparara idia abia, bona gau idauidau idia lalohadailaia namonamo diba​​—⁠unai kara namodia be Dirava ena hahediba dalana amo idia dibaia. (Aon. 1:​2-4; 2:​1-​5, 11-​15) Hari inai negai, Keristani ruma besedia ese unai bamona hahediba dalana idia badinaia be namo.

Umui Idia Lalokau Henia Taudia Umui Kamonai Henia

13. Matamata taudia haida be daika amo sisiba idia abia, bona dahaka dainai idia laloa namonamo be gau badana?

¹³ Taunimanima idauidau ese matamata taudia  idia sisiba henidia​​—⁠sikuli dekenai danu tisa ta ese stiuden taudia ta ta dekenai sisiba ia henia edena koledi, iunivesiti, kosi eiava moni gaukara idia abia hidi totona. Namona be unai bamona sisiba herevadia umui laloa namonamo, Dirava umui guriguri henia bona Baibel bona hesiai tauna mai ena kamonai ese ia henia buka bona magasin lalonai idia noho sisiba umui tahua. Emui Baibel stadilaia karana amo umui diba vadaeni, Satani ia ura diba bada lasi matamata taudia ia hamorua. Hegeregere, Eden umana ai Heva ena diba be bada lasi dainai, ena be Heva be Satani ia diba lasi bona Satani ese lalokau karana ta ia hahedinaraia lasi, to Heva be Satani ia kamonai henia. To, Dirava be dala idauidau ai ena lalokau karana Heva dekenai ia hahedinaraia, unai dainai bema Heva be Dirava ia kamonai henia, hari kara dika be lasi!​​—⁠Gen. 3:​1-6.

14. Dahaka dainai Iehova bona Ia idia lalokau henia tama sina ita kamonai henidia be namo?

¹⁴ Emui Havaraia Tauna Badana be umui ia lalokau henia bona emui namo ia laloa bada. Iena ura be do umui moale ela bona hanaihanai! Unai dainai, lalokau tamana ta bamona, Dirava be umui bona Ia idia tomadiho henia taudia ibounai dekenai, ia gwau: “Dala be inai, ia dekenai do umui raka lao.” (Isa. 30:21) Bema oiemu tama sina be Iehova idia lalokau henia taudia, unai be hahenamo badana oi dekenai. Bema oi ura diba edena gaudia be mai anina bada bona edena tahua gaudia oi abia hidi totona, mai hemataurai ida emu tama sina edia sisiba oi kamonai henia be namo. (Aon. 1:​8, 9) Oibe, emui tama sina idia ura mauri do umui davaria, unai be tanobada ena kohu eiava ladana bada ia hereaia gauna.​​—⁠Mat. 16:⁠26.

15, 16. (a) Dahaka dainai Iehova ita abidadama henia? (b) Baruku ena haheitalai amo dahaka mai anina bada gauna ita dibaia?

¹⁵ Edia Havaraia Tauna Badana idia laloa taudia be kohu momo lasi maurina idia noholaia, badina idia diba Iehova ese idia do ia “negea lasi” bona idia do ia “rakatania lasi.” (Heberu 13:5 duahia.) To, namona be do ita naria namonamo, badina unai lalohadai namona be tanobada ena lalohadai amo ia idau bona tanobada ena lalohadai ese iseda lalona ia veria garina. (Efe. 2:⁠2) Mani Ieremia ena seketere, Baruku ena haheitalai ita laloa. Babulonia ese lagani 607 B.C.E. ai Ierusalema idia do hadikaia lasi neganai, bona unai dika bada negana ai, Baruku ia noho.

¹⁶ Reana, Baruku ia ura kohu momo maurina ia noholaia. Iehova be unai ia itaia bona Baruku ia sisiba henia, unai “gau namo herea” do ia tahua lasi. Baruku be ia aonega dainai, mai manau ida Iehova ena sisiba ia abia dae bona Ierusalema idia hadikaia neganai, ia roho mauri. (Ier. 45:​2-5) To, Baruku ena turana haida be kohu momo idia tahua bona Iehova idia laloaboio. Daudau lasi murinai, edia kohu ibounai be Babulonia tuari taudia ese idia dadia bona momo idia hamasedia. (2 Siv. 36:​15-​18) Baruku ena haheitalai ese ita ia hadibaia, Dirava tura henia karana be mai anina bada, ia ese tanobada ena kohu eiava ladana bada ia hereaia.

Haheitalai Namodia Umui Tohotohoa

17. Dahaka dainai hari inai negai Iesu, Paulo bona Timoteo be haheitalai namodia?

¹⁷ Baibel ese haheitalai namodia momo ia  hahedinaraia ita ia durua mauri ena dala dekenai ita raka totona. Hegeregere, Iesu be diba bada tauna, to ia be “Basileia ena Sivarai Namona” ia laloa bada, badina unai ese taunimanima do ia durua hanaihanai. (Luka 4:​43) Aposetolo Paulo be Iehova ia hesiai henia totona, iena dagi namona ia rakatania bona iena nega bona goada ia gaukaralaia sivarai namona ia harorolaia totona. ‘Iesu ia badinaia’ merona, Timoteo be Paulo ena haheitalai namona ia tohotohoa. (1 Tim. 1:⁠2) Gabeai, Iesu, Paulo bona Timoteo be edia mauri dalana idia lalohisihisilaia, a? Lasi vaitani! Paulo ia gwau Dirava ena hesiai gaukara ese tanobada gaudia ibounai ia hereaia, badina idia be “anina lasi gaudia.”​​—⁠Fili. 3:​8-​11.

18. Tadikaka matamata ta ena mauri lalonai dahaka ia haidaua bona dahaka dainai ia lalohisihisi lasi?

¹⁸ Hari, Keristani memero kekeni momo be Iesu, Paulo bona Timoteo edia abidadama karana idia tohotohoa. Hegeregere, tadikaka matamata ta, guna ia be moni gaukara ia karaia bona pei namona ia abia, be inai bamona ia hereva: “Baibel ena hakaua herevadia lau badinaia dainai, lau dekenai dagi badana idia henia. Ena be moni badana lau abia, to lau moale lasi. Kampani ena bosi badadia lau hadibaia lau ura Dirava ena hesiai gaukara lau karaia neganai, idia ura egu pei idia habadaia badina idia laloa unai ese egu lalona do ia haidaua. To, egu lalona lau hadaia vadaeni. Momo idia laloparara lasi dahaka dainai pei bada gaukarana do lau rakatania bona ful-taim hesiai gaukara lau karaia. Egu haere be, lau ura egu gwauhamata Dirava dekenai lau hagugurua. Hari, Dirava tomadiho henia karadia be egu mauri lalonai lau laloa bada dainai, egu noho ia namo bona lau moale bada. Moni eiava ladana bada amo unai lau davaria lasi.”

19. Matamata taudia be dahaka abia hidi maorodia idia karaia be namo?

¹⁹ Tanobada hegegemadai, matamata taudia tausen momo be unai bamona abia hidi maorona idia karaia noho. Unai dainai, matamata taudia e, vaira negana ai dahaka do umui karaia umui lalohadailaia neganai, namona be umui laloatao Iehova ena dina be ia kahirakahira vadaeni. (2 Pet. 3:​11, 12) Inai tanobada gaudia idia moalelaia noho matamata taudia umui mama henidia lasi. To, umui idia lalokau henia taudia umui kamonai henidia. “Umui emui kohu be guba dekenai do umui haboua” neganai, gau ta ese do ia hadikaia diba lasi bona unai kara sibona amo mauri hanaihanai do umui abia diba. (Mat. 6:​19, 20; 1 Ioane 2:​15-​17 duahia.) Oibe, emui Havaraia Tauna Badana do umui laloa. Unai umui karaia neganai, Iehova ese umui do ia hanamoa.

[Footnote]

Oi Laloatao Diba, A?

• Edena dala ai Dirava ita abidadama henia diba?

• Hahediba dalana namona be edena?

• Baruku ena haheitalai amo dahaka ita dibaia?

• Daidia be haheitalai namona, bona dahaka dainai?

[Study Questions]

[Pictures on page 13]

Iehova ese edukeisen namona ia henia

[Picture on page 15]

Baruku be Iehova ia kamonai henia bona Ierusalema ena dika amo ia roho mauri. Ena haheitalai amo dahaka oi dibaia?