Nega Dokona Lalonai Headava Bona Natuna Naria Ena Maduna

“Nega be kwadogi.”​​—⁠1 KOR. 7:​29.

1. (a) Hari ia vara metau dikana ta be dahaka? (b) Dahaka dainai ruma bese lalonai idia vara hekwakwanai ita laloa be namo?

BAIBEL ia gwau “dokona negana” ai tuari, tano mareremarere, hitolo bada bona gorere do idia vara. (Dan. 8:​17, 19; Luka 21:​10, 11) Ma ia gwau unai nega ai taunimanima edia mauri lalonai gau momo do idia idau. “Nega ena dokona” ai ia vara metau dikana ta be ruma bese ena hekwakwanai idauidau. (2 Tim. 3:​1-4) Dahaka  dainai unai gaudia ita laloa be namo? Badina unai hekwakwanai be gabu ibounai dekenai idia vara bona unai ese Keristani taudia edia lalohadai headava bona natuna naria maduna dekenai ia haidaua diba. Edena dala ai?

2. Tanobada ena lalohadai headava bona headava hadokoa karana dekenai be dahaka?

² Hari inai negai, headava taudia ese edia headava idia hadokoa haraga bona tano haida ai unai kara be ia bada ia lao. To, namona be ita laloatao, Iehova Dirava ena lalohadai headava bona headava hadokoa karana dekenai be tanobada taudia edia lalohadai amo ia idau. Vadaeni, Iehova ena lalohadai be dahaka?

3. Iehova bona Iesu edia lalohadai headava dekenai be dahaka?

³ Iehova Dirava ia ura headava taudia be edia headava gwauhamatana do idia badinaia. Iehova be tau bona hahine ginigunadia edia headava ia karaia neganai, Ia gwau, “tau ese . . . iena adavana dekenai do ia noho, ruaosi be tauanina tamona do idia lao.” Gabeai, Iesu Keriso ese unai hereva ma ia gwauraia lou: “Dirava ese ia hakapua taudia, be taunimanima ese do idia hapararaia lasi.” Iesu ma ia gwau: “Iena adavana ia heudahanai lasi, to tau ta ese iena adavana ia rakatania, vadaeni hahine ta ma ia adavaia, unai tau be heudahanai tauna.” (Gen. 2:​24; Mat. 19:​3-6, 9) Unai ese ia hahedinaraia, Iehova bona Iesu edia lalohadai be, headava taudia rua be do idia noho hebou ela bona ta ia mase. (1 Kor. 7:​39) Headava be helaga dainai headava hadokoa karana be maoro lasi. Oibe, Baibel ia hahedinaraia bema ta ia heudahanai lasi to headava idia hadokoa kava, Iehova be unai kara ia inai henia. *​​—⁠Malaki 2:​13-​16; 3:6 duahia.

Headava Oi Laloa Namonamo

4. Dahaka dainai idia headava haraga matamata Keristani taudia haida be idia lalohisihisi?

⁴ Inai tanobada dikana lalonai taunimanima be mahuta hebou karana idia laloa bada. Dina ta ta ai mahuta hebou urana ia havaraia laulaudia be TV bona magasin idauidau ai idia hedinarai. Oibe, unai gaudia ese ita ibounai ia hadikaia diba, to kongrigeisen lalonai iseda matamata taudia idia hamorua haraga diba. Unai laulau dikadia ese Keristani matamata taudia edia lalona ia veria diba. Haida be dahaka idia karaia unai hekwakwanai idia hanaia totona? Unai hekwakwanai hanaia totona, haida edia mauri lagani be ia do maragi neganai idia headava haraga. Idia laloa unai dala ai, matabodaga karadia idia dadaraia diba. To daudau lasi murinai, haida be idia headava haraga dainai idia lalohisihisi. Dahaka dainai? Headava matamata ena moale ia ore murinai, idia davaria edia ura bona lalohadai be idauidau bona gau momo dekenai idia lalotamona lasi. Unai bamona matamata taudia edia headava lalonai hekwakwanai badadia idia davaria.

5. Dahaka ese headava taudia do ia durua edia headava gwauhamatana idia badinaia totona? (Futnout itaia.)

⁵ Ena be oi ese Keristani tauna o hahinena oi adavaia, to gabeai iena kara ia idau neganai, emui headava maurina be ia auka diba. (1 Kor. 7:​28) To herevana, headava lalonai umui moale lasi, Keristani korikori taudia idia diba, headava hadokoa karana be hekwakwanai hamaoromaoroa dalana lasi. Unai dainai, edia headava gwauhamatana idia badinaia bona edia headava hanamoa totona idia hekwarahi noho taudia be Keristani tadikaka ese idia matauraia bona durudia be namo. *

6. Matamata Keristani taudia ese headava be edena bamona idia laloa be namo?

⁶ Oi be matamata bona oi do headava lasi, a? Bema oi do headava lasi, vadaeni headava be edena bamona oi laloa be namo? Lalohisihisi oi  koua diba bema oi naria ela bona oiemu hetura karana Dirava ida be ia goada, emu mauri lagani be hegeregere bona oi laloa namonamo diba, bena gabeai tadikaka eiava taihu ta tura henia karana oi laloa diba. Momokani, Baibel be headava totona mauri lagani ta ia gwauraia lasi. * To, Baibel ia hahedinaraia, namo do oi davaria bema oi naria ela bona mahuta hebou urana ia goada negana oi hanaia. (1 Kor. 7:​36) Dahaka dainai? Badina unai nega ai mahuta hebou urana be ia goada bona emu laloa namonamo karana ia hadikaia diba, unai amo abia hidi kererena oi karaia diba bena gabeai do oi lalohisihisi bada. Mani oi laloatao, Iehova ena sisiba Baibel lalonai be emu mauri lalonai namo bona moale do ia havaraia.​​—⁠Isaia 48:​17, 18 duahia.

Natudia Naria Karana Laloa Namonamo

7. Idia headava matamata taudia haida ese dahaka hekwakwanai idia davaria?

⁷ Idia headava matamata taudia haida be daudau lasi murinai natuna idia havaraia, to idia be do matamata dainai natudia naria dalana idia diba lasi. Idia ruaosi idia do diba heheni namonamo lasi, to beibi ia vara dainai, nega bada idia henia edia beibi idia naria totona. Bema sina be beibi matamata sibona ia laloa momo, ena tau be reana ia mama diba. Bona danu, bema natuna ia taitai dainai idia mahuta namonamo lasi, unai ese tau bona hahine huanai lalohisihisi ia havaraia diba. Unai matamata headava taudia be nega lasi sibodia edia ura gabudia idia lao bona edia ura gaudia idia karaia totona. Edia mauri ia idau karana be edena bamona idia laloa be namo?

8. Tama sina ese natuna naria maduna be edena bamona do idia laloa, bona dahaka dainai?

⁸ Headava do idia laloa namonamo hegeregerena, namona be idia abia dae natuna naria karana be Dirava ese ia henia hahenamo bona maduna ta. Namona be headava Keristani taudia idia laloparara, bema beibi ta idia havaraia, edia mauri dalana be do ia idau. Unai dainai, namona be mai laloa namonamo ida unai maduna idia huaia. Iehova ese natuna havaraia karana be taunimanima dekenai ia henia dainai, namona be tama sina ese ia vara beibi matamatana be “Dirava ena harihari gauna” bamona do idia laloa. (Sal. 127:⁠3) Keristani tama sina do idia gaukara goada edia maduna do idia huaia totona badina unai be maoro Dirava vairanai.​​—⁠Efe. 6:⁠1.

9. (a) Natuna naria maduna be dahaka dahaka? (b) Tau ese edena dala ai ena adavana ia durua diba ena hetura karana Dirava danu ia goada noho totona?

⁹ Tama sina be lagani momo lalonai edia natuna do idia naria totona, nega bona goada bada do idia haorea. Namona be Keristani tau be ia laloparara, beibi ta ia vara murinai, lagani haida lalonai iena adavana be hebou edia hereva do ia kamonai namonamo lasi bona sibona ena Baibel stadi bona laloa dobu karana do ia karaia lasi. Unai ese hahine ena hetura karana Dirava ida ia hamanokaia diba. Natuna naria maduna idia laloa namonamo neganai, tau do ia abia dae ia ese gaukara  haida do ia karaia natuna ia naria totona. Reana, ruma dekenai iena adavana ese ia reaia tok edia point haida do ia herevalaia diba. Danu, reana ia ese beibi do ia naria bona adavana be haroro gaukarana ia karaia diba.​​—⁠Filipi 2:​3, 4 duahia.

10, 11. (a) Edena dala ai natudia dekenai “Iehova ena matahakani bona lalona biagua karana” ita hadibaia? (b) Dahaka dainai Keristani tama sina momo ita hanamodia be namo?

¹⁰ Tama sina ese natudia dekenai noho gabuna namona, aniani, bona dabua idia henia, bona idia gorere neganai hospital dekenai do idia abia lao. To, unai sibona lasi. Hari, ita be nega dikana lalonai ita noho dainai, matamata taudia idia do maragi lalonai tama sina ese kara maoromaoro taravatudia do idia hadibaia be namo. “Iehova ena matahakani bona lalona biagua karana” ai do idia hadibaia. (Efe. 6:⁠4, NW ) Unai “matahakani bona lalona biagua karana” ena anina be natuna ia do maragi negana amo ela bona ia bada, tama sina ese Iehova ena lalohadai be iena lalona dekenai do idia atoa.​​—⁠2 Tim. 3:​14, 15.

¹¹ Iesu ese iena hahediba taudia ia hamaoroa “bese ibounai be diba tahua taudia” do idia halaoa. Unai ena anina be tama sina ese edia natudia idia durua hahediba taudia ai do idia lao totona. (Mat. 28:​19, 20) Unai be mai ena hekwarahi bada badina matamata taudia be tanobada amo hahetoho idauidau idia davaria. Unai dainai, edia natudia idia hadibaia ela bona idia be bapatiso Keristani taudia ai idia lao tama sina be ita ibounai ese ita hanamodia be namo. Unai tama sina edia abidadama dainai, tanobada ena lalona veria gaudia idia koua bona mai abidadama ida edia natudia naria maduna idia huaia namonamo.​​—⁠1 Ioa. 5:⁠4.

Badina Namona Dainai Idia Headava Lasi o Natuna Idia Havaraia Lasi

12. Dahaka dainai Keristani taudia haida edia lalona idia hadaia lagani haida lalonai headava lasi maurina idia noholaia totona?

¹² “Nega be ia kwadogi” bona “tanobada, hari ia noho toana bamona, be kahirakahira do ia ore” dainai, Baibel ese ita ia hamaoroa headava lasi maurina ena namo do ita laloa. (1 Kor. 7:​29-​31) Unai dainai, Keristani taudia haida be edia lalona idia hadaia do idia headava lasi, eiava lagani haida lalonai headava lasi maurina idia noholaia bena gabeai idia headava. Idia bamona taudia ita hanamoa, badina idia be sibodia edia ura gaudia idia tahua lasi. Momo idia headava lasi, badina idia ura lasi idia “laloa rua” to Iehova ena hesiai gaukara sibona do idia karaia. (1 Korinto 7:​32-​35 duahia.) Headava lasi Keristani taudia haida be idia painia eiava Betele gaukara idia karaia. Haida idia ura Iehova ena orea lalonai edia hesiai gaukara do idia habadaia dainai, Hesiai Gaukara Hadibaia Sikulina dekenai idia lao. Haida idia davaria, lagani momo lalonai ful-taim hesiai gaukara idia karaia, bena gabeai idia headava neganai, guna idia dibaia gaudia ese edia headava maurina ia durua bada.

13. Dahaka dainai headava Keristani taudia haida be edia lalona idia hadaia natudia do idia havaraia lasi?

¹³ Tanobada ena kahana haida dekenai,  ruma bese lalonai kara idauna ta ia hedinarai​​—⁠headava taudia momo edia lalona idia hadaia natudia do idia havaraia lasi. Haida be unai bamona idia karaia badina edia moni be hegeregere lasi; ma haida be idia ura nega bada idia henia edia moni gaukara dekenai. Headava Keristani taudia haida danu edia lalona idia hadaia natudia do idia havaraia lasi. Unai idia karaia badina idia ura edia nega bada do idia gaukaralaia Iehova idia hesiai henia totona. Namo lasi ita laloa edia headava lalonai idia moale lasi. Lasi, idia moale. To, idia ura Basileia ena gaukara do idia atoa guna bona headava lalonai idia abia hahenamo haida do idia reaia. (1 Kor. 7:​3-5) Unai bamona headava taudia be Iehova ena hesiai gaukara idia karaia bona sekit, distrik gaukara eiava Betele gaukara ai edia tadikaka idia durudia. Haida be painia eiava misinari gaukara idia karaia. Iehova ese iena ladana dainai idia hahedinaraia lalokauna bona iena ura idia karaia karana do ia laloaboio lasi.​​—⁠Heb. 6:⁠10.

“Metau Bada Do Idia Abia”

14, 15. Tama sina ese dahaka “metau bada do idia” davaria?

¹⁴ Aposetolo Paulo ese headava Keristani taudia ia hamaorodia, idia be “metau bada do idia abia.” (1 Kor. 7:​28) Reana idia ta, edia natudia eiava edia buruka tama sina idia gorere. Danu, natudia dainai hekwakwanai bona lalohisihisi do idia davaria. Matamanai ita herevalaia hegeregerena, Baibel ia gwau, “nega ena dokona” ai “metau dikadia momo do idia vara.” Natudia be “edia tamana bona sinana do idia kamonai henia lasi” karana be unai metau dikana ta.​​—⁠2 Tim. 3:​1-3.

¹⁵ Keristani tama sina ese edia natudia do idia naria namonamo be maduna badana. Badina ita danu be “metau dikadia” do ita davaria. Unai dainai, Keristani tama sina be nega ibounai do idia hekwarahi, inai “tanobada ena kara dika” amo edia natudia idia gimaia totona. (Efe. 2:​2, 3) Bona nega momo idia kwalimu lasi! Hegeregere, bema Keristani tama sina idia hekwarahi bada edia natudia be hereva momokani lalonai idia noho totona, to edia natuna mero eiava kekeni be Iehova ia rakatania neganai, unai be metau badana bona tama sina be idia lalohisihisi bada.​​—⁠Aon. 17:⁠25.

“Hisihisi Bada Herea” Do Ia Vara

16. Iesu be edena “hisihisi bada herea” ia perovetalaia?

¹⁶ To, headava bona natuna naria karana dekenai idia vara hisihisi be “hisihisi bada herea” ma ta ese do ia hanaia. Iesu be iena noho negana bona tanobada dokona ia perovetalaia neganai, ia gwau: “Hisihisi bada herea do idia vara, Dirava ese tanobada ia karaia nega dekena amo hisihisi unai bamona idia vara lasi ia mai bona harihari, gabeai danu unai bamona ta do ia vara lou lasi.” (Mat. 24:​3, 21) Gabeai, Iesu ia hahedinaraia hutuma bada taudia be unai “hisihisi bada herea” amo do idia roho mauri. To, Satani ena tanobada be Iehova ena Witnes taudia do ia heai henidia noho ela bona Dirava ese idia do ia hadikaia ore. Momokani, unai nega ai ita ibounai​​—⁠tatau, hahine bona natudia​​—⁠be hahetoho badana do ita davaria.

17. (a) Dahaka dainai vaira negana do ita garilaia lasi? (b) Headava bona natuna naria maduna ita laloa neganai, dahaka ese iseda abia hidi idia biagua be namo?

¹⁷ To, namo lasi vaira negana ita garilaia. Iehova idia abidadama henia tama sina be Iehova ese idia bona edia natudia maragidia do ia gimaia. (Isaia 26:​20, 21 duahia; Sep. 2:​2, 3; 1 Kor. 7:​14) To, hari ita diba ita be dina gabedia lalonai ita noho dainai, headava bona natuna naria maduna ita laloa namonamo be gau badana. (2 Pet. 3:​10-​13) Unai amo, herevana ita be headava taudia eiava headava lasi taudia, mai iseda natudia eiava natudia lasi, to iseda mauri dalana ese Iehova ena ladana do ia abia isi bona Keristani kongrigeisen do ia hanamoa danu.

[Footnotes]

Riviu

• Dahaka dainai matamata Keristani taudia idia headava haraga lasi be namo?

• Natuna naria maduna be dahaka dahaka?

• Dahaka dainai Keristani taudia momo be idia headava lasi, eiava idia headava to natudia idia havaraia lasi?

• Keristani tama sina ese dahaka “metau bada do idia” davaria?

[Study Questions]

[Picture on page 17]

Dahaka dainai matamata taudia idia headava haraga lasi be aonega karana?

[Picture on page 18]

Tau ese adavana do ia durua Dirava ia tomadiho henia bona hesiai henia totona

[Picture on page 19]

Dahaka dainai headava Keristani taudia haida edia lalona idia hadaia natuna do idia havaraia lasi?