Oi Laloatao, A?

Gima Kohorona matamatadia oi duahia neganai oi moalelaia, a? Bema oibe, henunai idia noho henanadai mani oi haerelaia:

• Aonega taudia be edena negai Iesu idia vadivadi henia?

Buka ta ia gwau: “Aonega taudia be Iesu ia vara hanuaboina ai idia vadivadi henia lasi, mamoe naria taudia ese idia karaia hegeregerena. Idia be hua haida murinai, Iesu be “mero maragi” neganai ena ‘ruma’ dekenai idia vadivadi henia.” (Mat. 2:​7-​11) Bema unai aonega taudia be Iesu ia vara hanuaboina ai idia vadivadi bona edia harihari gaudia, golo bona herahera gau namodia idia henia, reana Maria be dina 40 murinai Ierusalema ena dubu dekenai Iesu ia abia lao neganai, manu maragidia rua ia bouboulaia lasi.​​—⁠January-March 2008, rau 31.

• Momo be dahaka idia karaia diba edia mauri idia hanamoa totona?

Reana ta be sibona dekenai ia henanadai, ‘Egu noho dalana lau haidaua diba, a?’ Amy be unai bamona ia karaia. Ena kohu bona moni be momo, to ia moale lasi. Ia laloparara, inai tanobada lalonai dagi ia tahua momo dainai, Iesu abidadama henia karana ia rakatania. Unai dainai, Basileia gaudia ia atoa guna bona painia gaukara ia karaia. Amy ia gwau: “Hari egu mamina ia namo, guna moni gaukara lau karaia neganai egu mamina be unai bamona lasi.”​​—⁠1/15, rau 19.

• Iesu ese Mataio 24:34 ai “inai nega idia noho taudia” ia herevalaia neganai, ia be daidia ia herevalaia?

Baibel lalonai Iesu ese “inai nega idia noho taudia” ia herevalaia neganai, nega momo Iesu ia gwau idia be kara dika taudia. To, Iesu be iena hahediba taudia ia hereva henidia neganai, unai bamona ia herevalaidia lasi; idia be kahirakahira lauma helaga ese do ia horoa taudia. Idia sibona ese Mataio 24:​32, 33 lalonai ia noho herevana idia lalopararalaia diba. Unai dainai, Iesu be “inai nega idia noho taudia” ia herevalaia neganai, ia ese hahediba horoa taudia bona hari inai negai idia noho horoa taudia ia herevalaia.​​—⁠2/15, rau 23-4.

• Iamesi 3:​17 ena hereva bamona, ita be edena bamona kara ita hahedinaraia be namo?

Ita laloa goevagoeva ena anina be hahetoho ita dadaraia haraga be namo. (Gen. 39:​7-9) Ita maino ena anina be ita be maino ita karaia taudia bona dagedage karadia ita dadaraia. Unai dainai ita ta ta be sibona do ita nanadaia: ‘Lau be maino lau karaia tauna eiava maino hadikaia tauna? Nega haida lau be ma haida ida lau hepapahuahu, a? Lau badu haraga eiava ma haida lau habadua, a? Lau be ma haida edia dika lau gwauatao bona ma ta ena lalohadai lau abia dae, a?’​​—⁠3/15, rau 24-5.