Sibona Idia Noho to Ita Lalodiaboio Lasi

APOSETOLO Paulo ese Keristani taudia ia hagoadaia: “Taunimanima ibounai dekenai kara namodia do ita karaia. To Keriso ena abidadama henia taudia do ita durua bada herea be namo.” (Gal. 6:​10) Hari, ita be unai hakaua herevana ita do badinaia noho, bona dala ita tahua iseda tadikaka bona taihu dekenai kara namodia ita hahedinaraia totona. Keristani kongrigeisen amo unai bamona heduru idia abia taudia haida be buruka taudia naria rumadia dekenai idia noho tadikaka taihu.

Momokani, tano haida dekenai, ruma bese taudia be edia ruma ai idia noho buruka taudia idia naria. To, tano ma haida dekenai, buruka taudia momo be buruka taudia naria rumadia dekenai idia noho. Bema tadikaka o taihu burukadia be buruka taudia naria rumadia dekenai idia noho be edena bamona? Dahaka hekwakwanai idia davaria? Ruma bese taudia amo heduru idia abia lasi buruka taudia be edena bamona? Edena dala ai kongrigeisen taudia ese burukadia idia durua diba? Idia ita vadivadi henia loulou neganai, dahaka namo do ita davaria?

Buruka Taudia Naria Rumadia Dekenai Idia Vara Hekwakwanai

Bema tadikaka o taihu burukana ta be buruka taudia naria rumadia dekenai ia lao, reana unai teritori dekenai idia noho kongrigeisen taudia be ia idia diba lasi. Unai dainai, unai kongrigeisen taudia be ia do idia vadivadi henia lasi. Ma danu, buruka taudia naria rumadia dekenai, buruka tadikaka o taihu be tomadiho idauidau taudia huanai idia noho. Unai dainai, iseda tadikaka o taihu burukadia be hahetoho idia davaria diba.

Hegeregere, buruka taudia naria rumadia idia biagua taudia be dala idia karaia unuseniai tomadiho karadia idia karaia totona. Buruka taudia ia naria tauna ta ia gwau: “Edia hereva dalana ia auka Witnes burukadia haida be edia lalohadai idia herevalaia namonamo lasi dainai, nesi ese uilisea dekenai idia atoa bona idia abia lao dubu ma haida edia tomadiho karadia lalonai idia vareai.” Ma danu, nega momo vara dinadia, Krismas, o Ista negadia ai, nesi be buruka taudia hamoalea karadia idia karaia. Buruka taudia naria rumadia dekenai idia noho Witnes burukadia  haida be aniani haida idia ania, bona unai ese edia lalomamina ia hadikaia. (Kara 15:29) Bema iseda tadikaka o taihu burukadia ita vadivadi henia loulou neganai, idia do ita durua unai bamona hekwakwanai idia hanaia totona.

Kongrigeisen Taudia Edia Heduru

Keristani taudia ginigunadia be buruka taudia idia durua bema unai buruka tauna o hahinena be ruma bese taudia ese idia durua diba lasi. (1 Tim. 5:⁠9) Unai hegeregerena, hari, elda taudia be dala idia karaia kongrigeisen ese edia gabu dekenai buruka taudia naria rumadia ai idia noho tadikaka taihu burukadia idia vadivadi henia totona. * Elda ta, Robert, ia gwau: “Namona be elda taudia ese buruka taudia idia vadivadi henia, unai amo edia noho dalana idia diba bona idia ida idia guriguri hebou totona. Kongrigeisen taudia ese gau haida idia karaia diba, unai amo tadikaka o taihu burukadia idia durua diba.” Bema nega ita atoa buruka taudia ita vadivadi henia, vadaeni ita hahedinaraia ita laloparara Iehova be buruka taudia ia laloa bada.​​—⁠Iam. 1:⁠27.

Nega haida, elda taudia be mai edia ura ida dala idia karaia kongrigeisen taudia ese tadikaka bona taihu burukadia be buruka taudia naria rumadia dekenai idia vadivadi henidia totona. Robert be dala ta ia gwauraia, “Namona be buruka taudia ita hagoadaia, bema idia hegeregere kongrigeisen heboudia dekenai idia lao totona.” To, bema haida be Kingdom Hall dekenai idia lao be auka, elda taudia  be dala ma haida idia palanilaia diba. Jacqueline, ena mauri lagani be 85 ia hanaia bona ia be roki gorere (eiava osteoarthritis gorerena) ia abia, to ia be telefon amo kongrigeisen hebou edia hereva ia kamonai diba. Ia gwau: “Lau be nega korikori ai hebou ena tok lau kamonai diba, unai ese lau ia durua bada. Herevana dahaka ia vara, to lau ura lasi hebou lau reaia!”

Bema tadikaka o taihu burukana ese telefon amo hebou ena tok ia kamonai be auka, vadaeni elda taudia ese dala idia karaia tok be kaset teipi dekenai idia rekodi totona. Namona be unai kaset teipi ia abia lao tadikaka o taihu be unai nega ia gaukaralaia tadikaka o taihu burukana ida idia herevahereva totona. Elda ta ia gwau: “Tadikaka bona taihu burukadia dekenai kongrigeisen taudia edia sivarai ita kikilaia neganai, unai buruka taudia idia mamia idia be iseda tadikaka bona taihu.”

Burukadia ida Herevahereva

Momokani, buruka taudia naria rumadia dekenai, burukadia momo be idia lalometau bona gau momo idia laloaboio bamona. Unai dainai, idia haida be idia ura lasi ma haida idia hereva henia. To, bema tadikaka bona taihu burukadia be unai bamona ruma dekenai idia noho, maoromaoro idia ita vadivadi henia be namo, bona ita hamaorodia ita ura idia ita hagoadaia noho, unai amo idia ita durua idia moale bona noho namonamo totona.​​—⁠Aon. 17:⁠22.

Bema burukadia edia lalona ia boio ia lao, kamonai karana ia dika, o hekwakwanai ma haida dainai idia ida ita herevahereva be ia auka, nega momo, haida idia gwau unai bamona taudia ita vadivadi henia be anina lasi. To, namona be ita hekwarahi unai bamona burukadia ita vadivadi henia totona, unai amo ita hahedinaraia idia be iseda tadikaka bona taihu bona idia ita “matauraia.” (Roma 12:10) Bema tadikaka burukana ta be ena laloatao karana ia boio ia lao matamaia, namona be ita hagoadaia ena sivarai gunadia haida​​—⁠ia maragi negana amo​—⁠eiava hereva momokani ia abia dalana ia herevalaia totona. Bema hereva dalana dekenai ia hekwarahi, dahaka ita karaia be namo? Namona be iena hereva ita kamonai namonamo, bona hereva haida ita gwauraia, unai amo ia ita durua ena sivarai ia gwauraia noho totona. Bema unai tadikaka burukana be ia daradara eiava ena hereva dalana dainai ena hereva ita lalopararalaia namonamo lasi, namona be iena gado regena ita kamonai namonamo, iena hereva ita lalopararalaia toho totona.

Bema unai tadikaka o taihu burukana ida herevahereva dalana be ia auka, dala ma haida ita tohoa diba. Regula painia taihu ta, Laurence ese ia herevahereva diba lasi taihu Madeleine, ena mauri lagani be 80, ia vadivadi henia hanaihanai. Laurence be Madeleine ena herevahereva karana ia herevalaia neganai, ia gwau: “Madeleine ena imana lau dogoatao bona ai guriguri hebou. Guriguri lalonai, ia be egu imana ia dogoatao auka bona ena matana amo lau ia hadibaia ia tanikiu badina lau noho bona ai guriguri hebou.” Tadikaka o taihu burukadia edia imana ita dogoatao o ita rosia neganai, unai ese idia ia hagoadaia bada.

Iseda Vadivadi Karana be Gau Badana

Bema buruka taudia naria rumadia ai idia noho tadikaka o taihu ita vadivadi henia loulou neganai, unai ese nesi do ia durua buruka taudia idia naria namonamo totona. Lagani 20 mai kahana lalonai, Danièle be buruka taudia naria rumadia ai idia noho tadikaka taihu burukadia ia vadivadi henia bona ia gwau, “Nesi idia itaia, bema ta be buruka taudia ia vadivadi henia loulou, vadaeni idia be unai buruka taudia idia naria namonamo.” Guna ita herevalaia tadikakana, Robert ia gwau: “Nesi be hanaihanai buruka taudia idia vadivadi henia taudia edia hereva idia kamonai danu. To, nega ta ta ai idia vadivadi taudia idia hemataurai lasi.” Ruma bese haida be nesi dekenai idia hereva momo bona metau idia henia, to nesi idia ura vadivadi taudia amo tanikiu hereva idia kamonai danu be namo. Bona danu, bema nesi ita hereva henidia namonamo bona kara namo henia, idia be buruka tadikaka o taihu bona ena tomadiho do idia matauraia.

Danu gaukara maragidia haida dekenai nesi ita durudia be namo. Gabu haida dekenai, buruka taudia naria rumadia ai gaukara taudia be momo lasi dainai, nega haida ia auka burukadia  idia naridia namonamo totona. Nesi ta ladana, Rébecca, ia gwau: “Aniani negana ia ginidae neganai, nesi edia gaukara be bada. Unai dainai, ta be burukana ta ia vadivadi henia neganai, reana ia durua diba ia aniani totona.” Bona danu, nesi ita nanadaia dahaka ita karaia idia ita durua totona.

Buruka tadikaka o taihu ita vadivadi henidia loulou neganai, do ita diba idia edia ura gaudia be dahaka bona unuseniai idia gaukara taudia edia amo gwaumaoro ita abia, unai amo heduru ita henia diba. Hegeregere, reana unai tadikaka o taihu burukana ena daiutu ena haba dekenai iena ruma bese taudia edia laulau o natudia ese idia torea laulau haida ita atoa. Reana keru dabua ta, sopu ta, o bonana namo pauda ta ita abia lao diba. Bema buruka taudia naria rumadia be mai ena flaoa umana, reana eda turana be unai gabu dekenai ita hakaua lao, unai amo hodahoda namona ia abia diba. Laurence ia gwau: “Pura ibounai Madeleine be mai moale ida lauegu vadivadi negana ia naria. Bema lau be natuna maragidia haida lau abia lao, do ia kiri!” Bema unai bamona gaudia ita karaia, unai ese buruka taudia do ia hagoadaia bada.​​—⁠Aon. 3:​27.

Vadivadi Karana Ena Namo

Buruka taudia ita vadivadi henia loulou karana ese ‘eda lalokau do ia tohoa, ia momokani o lasi.’ (2 Kor. 8:⁠8) Edena dala ai? Bema ita itaia iseda tadikaka o taihu ta ena goada ia ore ia lao, do ita lalohisihisi bada. Laurence ia gwau: “Matamanai, Madeleine lau vadivadi henia bona ena goada ia ore ia lao lau itaia neganai, lau lalohisihisi bada bona ia lau rakatania negadia ta ta ai, lau tai. To, lau diba momokani guriguri goadagoada karana ese ita do ia durua ita gari lasi bona ita vadivadi henia taudia ita hagoadaia.” Lagani momo lalonai, Robert be tadikaka Larry ia vadivadi henia​—⁠Larry be kwara gorere ta (eiava Parkinson’s gorere) ia abia. Robert ia gwau: “Larry ena gorere ia bada ia lao dainai, iena herevahereva karana lau lalopararalaia diba lasi. To, ai ruaosi ai guriguri hebou neganai, lau mamia diba iena abidadama be ia goada noho.”

Tadikaka o taihu burukadia ita vadivadi henia neganai, idia ita durua sibona lasi, to ita danu be namo ita abia. Tomadiho idauidau taudia huanai, tadikaka o taihu burukadia be Iehova dekenai idia tabekau, bona unai ese ita ia hadibaia Iehova ita abidadama henia bona ita boga auka be namo. Ena be idia haida be edia matana ia kepulu bona taiana ia kudima, to idia ura bada Dirava ena Hereva idia dibaia, bona unai ese ia hahedinaraia goevagoeva idia diba “aniani sibona dekena amo taunimanima do idia mauri lasi, to Dirava ena uduna dekena amo idia mai hereva ibounai ese mauri ia henia.” (Mat. 4:⁠4) Buruka taudia be gau maragidia, hegeregere, natuna ta ena kiri o aniani hebou karana idia moalelaia, unai ese ita ia hadibaia gau maragidia ita moalelaia o ita gwau ita dekenai idia noho gaudia be hegeregere. Keristani burukadia edia hetura namonamo karana Dirava ida ese ita ia durua mai anina bada gaudia ita laloa bada totona.

Momokani, ita ese burukadia ita durua neganai, kongrigeisen ai idia noho taudia ese namo bada idia abia diba. Edena dala ai? Tadikaka bona taihu burukadia be edia tauanina idia goada lasi dainai, idia ura ita ese idia ita kara namo henia bona hebogahisi henia, bona unai ese dala ia kehoa kongrigeisen tadikaka bona taihu be unai bamona idia karaia totona. Unai dainai, namona be ita ibounai ita laloa tadikaka bona taihu burukadia naria karana​​—⁠herevana nega daudau lalonai do ita karaia karana​​—⁠be ma haida “durua” karana ta. (1 Pet. 4:​10, 11) Bema elda taudia be unai idia karaia guna, vadaeni ma kongrigeisen taudia haida do idia itaia unai Keristani maduna idia huaia be namo. (Ese. 34:​15, 16) Bema mai eda lalona ibounai ida Keristani burukadia ita durua, unai ese ia hahedinaraia ita be idia ita laloa bada!

[Footnote]

[Blurb on page 28]

“Buruka taudia naria rumadia ai idia gaukara taudia idia itaia, bema ta be hanaihanai tau buruka ta eiava hahine buruka ta ia vadivadi henia, idia ia naria namonamo diba”

[Picture on page 26]

Mai kudouna ibounai ida ita gwauraia gurigurina ese tadikaka o taihu burukadia ia hagoadaia idia moale bona maino ai idia noho totona

[Picture on page 26]

Iseda hagoadaia herevadia ese tadikaka bona taihu burukadia do ia hagoadaia bada