Dirava Ita Gari Henia Bona Ita Helaga

BAIBEL ese Iehova Dirava be inai bamona ia herevalaia: “Helaga, bona helaga bona helaga! [Iehova] be ia Helaga!” (Isa. 6:3; Apok. 4:⁠8) Heberu bona Greek gado ai inai hereva “helaga” ena anina be goeva o tomadiho karadia ibounai idia goeva​—⁠miro gaudia amo idia parara. Inai hereva ‘Dirava be ia Helaga’ ese ia hahedinaraia Iehova be goevadae momokani.

Oi laloa helaga Diravana, Iehova, ia ura ena taunimanima edia tauanina, kara bona tomadiho ia goeva, a? Oibe, badina Baibel ese ia hahedinaraia goevagoeva, Iehova ia ura ena taunimanima be idia helaga. Hegeregere 1 Petero 1:​16 ia gwau: “Do umui helaga, badina lau be lau helaga noho.” Ena be ita goevadae lasi to Iehova vairanai ita helaga diba, a? Oibe. Bema iseda tomadiho karana ia goeva bona Ia kahirakahira ita lao, Iehova vairanai ita helaga diba.

Inai tanobada mirona lalonai, edena dala ai kara goevadia ita karaia diba? Edena kara mirodia ita dadaraia be namo? Iseda hereva bona kara haida ita haidaua be gau badana, a? Iehova ese Iuda taudia​—⁠lagani 537 B.C.E. ai, Babulonia idia rakatania taudia​—⁠dekenai ia henia taravatuna ese ita do ia durua, unai henanadai ita haerelaia totona.

“Helaga Kara Ena Dala”

Iehova ia peroveta, ena taunimanima be Babulonia do idia rakatania bona edia tano dekenai do idia giroa lou. Unai peroveta herevana lalonai be inai gwauhamata ia noho: “Unai gabu dekenai, laolao dalana be do ia noho, iena ladana be do idia atoa, ‘Helaga Kara ena Dala.’ ” (Isa. 35:8a) Unai hereva ese ia hahedinaraia, Iehova be Iuda taudia edia dala do ia kehoa sibona lasi, to idia do ia gimaia danu.

Unai hegeregerena, Iehova be “Helaga Kara ena Dala” ma ta ia kehoa, ena hesiai taudia be tanobada ena tomadiho koikoi ibounai​—⁠Babulonia Badana​—⁠idia rakatania totona. Lagani 1919 ai Iehova ese horoa Keristani taudia be tomadiho koikoi amo ia ruhadia, bona unai gaukara goadagoada Keristani taudia be hahediba koikoi herevadia idia dadaraia, edia tomadiho ia goeva totona. Hari, Iehova ena orea goevana lalonai, ita be Iehova ita tomadiho henia sibona lasi, to Iehova bona iseda tadikaka taihu ida maino ai ita noho diba.

Horoa Keristani taudia, “orea maragi” unai, bona “hutuma bada” taudia, “mamoe idaudia” unai, be helaga dalana ai idia raka, bona idia ese ma haida idia boiria idia ida unai helaga dalana dekenai idia raka hebou totona. (Luka 12:32; Apok. 7:​9, NW; Ioa. 10:16) Bema haida be mai edia ura ida ‘edia tauanina idia henia, boubou gauna mai mauri bona mai helaga, Dirava ese ia moalelaia gauna’ bamona, vadaeni idia be “Helaga Kara ena Dala” dekenai idia raka diba.​​—⁠Roma 12:​1, NW.

 “Kara Dika Tauna ta ese, Unai Dala Dekenai Do Ia Raka Lasi”

Lagani 537 B.C.E. ai, Babulonia idia rakatania Iuda taudia ese taravatu ta idia badinaia be gau badana. “Helaga Kara ena Dala” dekenai idia raka diba taudia be Isaia 35:8b ese inai bamona ia gwauraia: “Kara dika tauna ta ese, unai dala dekenai do ia raka lasi.” Iuda taudia be Ierusalema dekenai tomadiho momokanina do idia haginia lou dainai, Iehova ia ura lasi unuseniai sibona edia namo idia tahua taudia, helaga gaudia idia matauraia lasi taudia, eiava miro karadia idia karaia taudia idia noho. Babulonia amo idia giroa lou taudia ese Iehova ena kara maoromaoro taravatudia idia badinaia be namo. Hari inai negai, bema ta ia ura Dirava ena lalonamo ia abia, namona be unai taravatu ia badinaia danu. Namona be Dirava idia gari henia bona idia helaga. (2 Kor. 7:​1, NW ) Dahaka kara mirodia ita dadaraia be namo?

Aposetolo Paulo ia gwau: “Tauanina ena kara be ita ibounai ita diba. Karadia be inai: Heudahanai [“Sihari kava,” NW ], kara mirodia, matabodaga [“lebulebu mai matabodaga karana,” NW ].” (Gal. 5:​19) Greek herevana idia hahanaia ‘sihari kava’ karana anina be Baibel ena taravatu ia utua mahuta hebou karadia ibounai, hegeregere ta be mai ena matabodaga ida ma ta​—⁠ena adavana lasi​—⁠ena kopina (usina o kiona) ia gadaralaia. Lebulebu mai matabodaga karana ena anina be, “taravatu idia utua kara dikadia, ta ese mai ena ura ida ia karaia kara dikadia, hemarai karadia, matabodaga karadia.” Sihari kava karana bona lebulebu mai matabodaga karana be Iehova ena helaga karadia amo idia idau. Unai dainai, unai bamona kara idia hadokoa lasi taudia be Keristani kongrigeisen lalonai idia vareai diba lasi eiava kongrigeisen amo idia atoa siri. Unai sibona lasi, to bema ta be ‘mai ena ura dikadika ida kara mirodia’ ia karaia bona ia helalo-kerehai lasi, ia danu be kongrigeisen amo idia atoa siri diba, badina ia karaia karana be kara miro badana.​​—⁠Efe. 4:​19.

Inai hereva “kara mirodia” be kara dika badadia idauidau ia herevalaia. Greek gado ai unai hereva idia hahanaia neganai, ena anina be hereva mirodia, kara mirodia, bona dirava koikoi tomadiho henia karadia. To danu, kara mirodia be gau momo ia herevalaia, bona idia haida be hahemaoro komiti gaudia lasi. * To unai bamona kara mirodia idia karaia taudia be idia helaga, a?

Haheitalai ta ita laloa: Pablisa ta be hehuni dalana ai ponografi laulau dikadia ia itaia. Vadaeni, metairametaira unai ese ura dikadia ia havaraia dainai, pablisa be miro karadia ia karaia bona Iehova ena vairanai ia helaga lasi. Herevana unai be kara miro badana lasi, to unai pablisa be ‘momokani karadia, kara maoromaoro, kara goevagoeva’ ia laloaboio unai. (Fili. 4:⁠8) Ponografi laulau dikadia itaia karana be kara mirona, bona unai ese ta ena hetura karana Dirava ida ia hadikaia diba. Namona be miro karadia idauidau ibounai ita herevalaia lasi momokani.​​—⁠Efe. 5:​3, NW.

Haheitalai ma ta ita laloa: Pablisa ta be sibona ena kopina ia gadaralaia (o masturbation) momo​—⁠mahuta hebou urana ia havaraia  totona​—⁠herevana ponografi laulau dikadia ia itaia neganai o lasi. Ena be unai hereva be Baibel lalonai ia hedinarai lasi, to unai kara ese ta ena lalona bona hemami ia hamiroa diba, ani? Bema ta be unai kara mirona ia hadokoa lasi, ia ese ena hetura karana Iehova ida ia hadikaia diba bona Dirava ena vairanai ia goeva lasi, ani? Aposetolo Paulo ese ia gwauraia herevana ita laloa bada, ia gwau: “Tauanina bona lauma hamiroa karadia ibounai do ita hadokoa” bona ‘tauanina ena ura kara, iseda lalonai idia gaukara noho, be do ita hamasea. Gaudia be inai: Heudahanai, lebulebu, ura dikadia, matabodaga, bona kohu momo ura dikadika kara.’​​—⁠2 Kor. 7:⁠1, NW; Kol. 3:⁠5.

Satani ese ia lohiaia tanobadana be taunimanima idia hagoadaia kara dikadia idia karaia totona. Nega haida, kara mirodia karaia ena hahetoho ita dadaraia be ia auka. To, namona be Keristani taudia momokanidia be “Dirava diba lasi taudia bamona idia noho lasi,” badina unai bamona taudia “edia laloa be anina lasi.” (Efe. 4:​17) Bema kara mirodia ibounai​—⁠herevana hehuni gabunai o taunimanima idia itaia diba gabunai ita karaia karadia​—⁠ita dadaraia, Iehova be dala do ia kehoa “Helaga Kara ena Dala” dekenai ita raka hanaihanai totona.

“Laiona be Unuseni Do Idia Noho Lasi”

Bema ta ia ura helaga Diravana Iehova ena lalonamo ia abia, vadaeni ena kara bona hereva ia haidaua be gau badana. Isaia 35:9 ia gwau: “Laiona be unuseni do idia noho lasi. Dagedage gaudia be unai gabu dekenai do idia loaloa lasi,” anina be “Helaga Kara ena Dala” dekenai do idia lao lasi. Taunimanima haida be mai dagedge ida idia kara bona hereva dainai, Baibel ese unai bamona taudia be dagedage animal ida ia hahegeregerea. Unai bamona taudia be Dirava ena tanobada matamatana lalonai do idia noho lasi. (Isa. 11:6; 65:25) Unai dainai, bema ta ia ura Dirava ena lalonamo ia abia, vadaeni ena kara o hereva ia haidaua bona ia helaga be namo.

Baibel ia gwau: “Heai, dagedage, bona badu do umui koua. Hereva dika, laloa dika, bona samania koikoi hereva ibounai do umui hadokoa.” (Efe. 4:​31) Kolose 3:8 ia gwau: “Inai gaudia umui negea momokani: Badu, dagedage, laloa dika. Hereva dika bona hereva mirodia do umui gwauraia lasi.” Greek gado herevana idia hahanaia “hereva dika” ena anina be tau ta, Dirava o helaga gauna ta hadikaia herevadia.

Hari inai negai, gabu momo dekenai, famili lalonai danu, taunimanima be hereva mirodia o lalona hahisia herevadia idia gwauraia. Headava tauna (o hahinena) be ena hereva amo ena adavana bona natuna ia hahemaraia, hadikaia o hahisia. To, namona be Keristani taudia ese unai bamona herevadia idia dadaraia.​​—⁠1 Kor. 5:​11.

Dirava Ita Gari Henia Bona Ita Helaga be Hahenamo Ta!

Helaga Diravana, Iehova, ena hesiai gaukara ita karaia be hahenamo ta! (Ios. 24:19) Iehova ena orea lalonai ita noho be mai anina bada. Iehova ena vairanai ita helaga o kara goevadia ita karaia be mauri hereadaena.

Kahirakahira tanobada be Paradaiso ai do ia lao, Dirava ena gwauhamata hegeregerena. (Isa. 35:​1, 2, 5-7) Unai nega idia naria noho bona Dirava ena dala dekenai idia raka noho taudia be unai tanobada Paradaisona lalonai do idia noho. (Isa. 65:​17, 21) Unai dainai, namona be Iehova ita tomadiho henia, kara goevadia ita karaia noho bona Iehova kahirakahira ita noho.

[Footnote]

[Picture on page 26]

Iuda taudia be dahaka do idia karaia, “Helaga Kara ena Dala” dekenai idia raka noho totona?

[Picture on page 27]

Ponografi laulau dikadia itaia karana ese ta ena hetura karana Iehova ida ia hadikaia diba

[Picture on page 28]

“Hereva dika, laloa dika, bona samania koikoi hereva ibounai do umui hadokoa”