Edena Dala ai Hakaua Oreana ese Gaukara Idauidau Ia Naria?

IEHOVA ENA WITNES taudia edia Hakaua Oreana be Dirava ena horoa hesiai taudia bona idia be bapatiso idia abia taudia. Idia be “hesiai tauna mai ena kamonai, bona mai ena kara maoromaoro” oreana ena gwaukau taudia, bona edia maduna be Baibel idia herevalaia bukadia idia hegaegaelaia, sisiba o hakaua herevadia idia henia, bona idia itaia Iehova ena Witnes taudia ese Basileia harorolaia gaukarana idia atoa guna be namo.​​—⁠Mat. 24:​14, 45-​47.

Wiki ta ta ai, Hakaua Oreana be Wednesday iboudiai idia hebou. Unai ese idia ia durua mai lalotamona ida idia gaukara hebou totona. (Sal. 133:⁠1) Danu, Hakaua Oreana taudia ta ta be komiti idauidau dekenai idia gaukara. Unai komiti ta ta be Iehova ena Witnes taudia edia gaukara idauidau idia naria, bona edia gaukara be henunai ai herevalaia:

◼ KODINEITA EDIA KOMITI: Hakaua Oreana ena komiti ta ta edia kodineita ibounai bona seketere ta, ia danu be Hakaua Oreana tauna ta, be inai komiti lalonai idia gaukara. Inai komiti ena gaukara be komiti ta ta dekenai heduru ia henia, unai amo idia heau namonamo diba. Danu, unai komiti ese tanobada hegegemadai idia noho Iehova ena Witnes taudia dekenai heduru ia henia, bema idia dekenai hekwakwanai badadia, hegeregere dagedage, tano mareremarere, bona ma haida.

◼ GAUKARA TAUDIA NARIA KOMITI: Inai komiti ena maduna be tanobada hegegemadai Betele famili ia durua Iehova idia tura henia bona ma dala haida ai heduru ia henia. Danu inai komiti be Betele famili taudia matamatadia abia hidi o boiria gaukarana ia naria, bona edia henanadai idauidau ia haerelaia.

◼ BUKA KARAIA KOMITI: Inai komiti ese Baibel idia herevalaia bukadia printaia, halasia bona tanobada hegegemadai dekenai idia siaia lao gaukarana ia naria. Ia be Iehova ena Witnes taudia ese idia gaukaralaia koporeisen idauidau ese idia biagua printa gabudia bona ruma o tano ia naria. Danu, inai komiti ese dala ia karaia edena dala ai tanobada ibounai Basileia ena gaukara durua kontribusen ita gaukaralaia namonamo totona.

◼ HESIAI KOMITI: Inai komiti be haroro gaukarana, kongrigeisen, painia taudia, elda taudia, bona loaloa naria taudia ia naria. Ia ese Iseda Basileia Gaukara hegaegaelaia karana ia naria, bona Gilead Sikuli bona Hesiai Gaukara Hadibaia Sikulina dekenai idia lao stiuden taudia idia abia hidi bona siaia lao gaukarana ia naria.

◼ HADIBAIA KOMITI: Inai komiti be sekit hebouhebou, distrik hebouhebou, kongrigeisen heboudia bona hebouhebou ma haida edia program idauidau hegaegaelaia karana ia naria. Danu, Baibel amo Betele famili durua program ia hegaegaelaia bona sikuli idauidau, hegeregere Gilead Sikuli bona Painia Gaukara Sikuli sibona lasi, to DVD, kaset, bona vidio program hegaegaelaia karana ia naria danu.

◼ TORETORE KOMITI: Inai komiti be Baibel idia herevalaia bukadia, magasin, pepapepa idia torea bona tadikaka taihu o taunimanima dekenai idia halasia gaukarana ia naria. Inai komiti ese taunimanima edia henanadai be Baibel amo idia ia haerelaia, bona drama buklet bona tok edia hereva ia sekea bona edia gwaumaoro ia henia. Danu, ia be tanobada hegegemadai gado hahanaia gaukarana ia naria.

Horoa taudia ese Dirava ena hesiai gaukara lalonai idia karaia gaukaradia be mai anina bada sibona lasi, to idia abidadama heheni, lalokau heheni bona gaukara hebou. Unai dainai, aposetolo Paulo ese horoa oreana be tauanina ta ida ia hahegeregerea. (Roma 12:​4, 5; 1 Kor. 12:​12-​31) Kwarana be tauanina ia durua, hakaua, bona aniani amo ia hagoadaia hegeregerena, Iesu be Hakaua Oreana dekenai unai bamona ia karaia. (Efe. 4:​15, 16; Kol. 2:​19) Unai dainai, Hakaua Oreana ese gaukara idauidau ia naria namonamo, bona Iehova ese ena lauma helaga amo unai orea ia hakaua.