Kara Namo Oi Hahedinaraia Noho
Kara Namo Oi Hahedinaraia Noho
‘Durua do umui henia noho.’—LUKA 6:35.
1, 2. Dahaka dainai taunimanima dekenai kara namo ita hahedinaraia be auka?
TAUNIMANIMA dekenai kara namo ita hahedinaraia be auka. Reana, ita lalokau henia taudia haida be ita dekenai lalokau do idia hahedinaraia lasi. Ena be ita ura taunimanima ita durua dainai, “moale Diravana ena sivarai namona mai hairaina” bona iena Natuna ena sivarai be idia dekenai ita harorolaia, to idia ura lasi kamonai. (1 Tim. 1:11, NW ) Ma haida be “Keriso ena mase satauro dekenai ena anina idia hadikaia noho.” (Fili. 3:18) Ita be Keristani taudia dainai, edena bamona idia ita kara henia be namo?
2 Iesu be iena hahediba taudia ia hamaoroa: “Umui dekenai idia badu taudia do umui lalokau henia, bona idia dekenai durua do umui henia.” (Luka 6:35) Mani unai sisiba ita herevalaia. Danu, Iesu ese ia gwauraia taunimanima kara namo henia karadia ma haida amo namo do ita abia.
Umui Idia Badu Henia Taudia Lalokau Henia
3. (a) Iesu ena hereva Mataio 5:43-45 ai be sibona emu hereva amo oi gwauraia. (b) Iuda tomadiho gunalaia taudia edia lalohadai be dahaka Iuda taudia bona Iuda lasi taudia dekenai?
3 Iesu be ena Ororo Harorona ai, iena hereva idia kamonai taudia ia hamaoroa idia dekenai idia badu bona dagedage henia taudia do idia lalokau henia. (Mataio 5:43-45 duahia.) Iesu ena hereva idia kamonai taudia be Iuda taudia, bona Dirava ena hahegani idia diba: “Kara dika ena davana do umui haloua lasi, bona unai tau do umui badu henia noho lasi. To emui badibadinai tauna do umui lalokau henia, umui sibona umui lalokau henia hegeregerena.” (Lev. 19:18) Aposetolo edia negai idia noho Iuda tomadiho gunalaia taudia idia laloa edia “badibadinai tauna” be Iuda taudia sibona. Mose ena Taravatu hegeregerena, Israela taudia be idau bese taudia ida do idia turana karaia lasi, to gabeai haida idia laloa Iuda lasi taudia ibounai ta ta do idia inai henia be maoro.
4. Edena dala ai Iesu ena hahediba taudia ese idia dekenai idia badu taudia do idia kara henia?
4 To, Iesu ia gwau: “Umui dekenai idia badu henia taudia do umui lalokau henia, bona umui dekenai idia dagedage henia taudia dainai do umui guriguri.” (Mat. 5:44) Iena hahediba taudia be idia dekenai idia badu taudia do idia lalokau henia. Luka bukana ai, Iesu ia gwau: “Lau dekenai umui kamonai henia taudia, lau hamaoroa umui dekenai, umui dekenai idia badu taudia do umui lalokau henia, bona umui dekenai idia hadikaia taudia be do umui kara namo henia. Edia hereva dekenai umui idia hadikaia taudia be do umui hanamoa, bona umui dekenai idia dagedage taudia be idia totona do umui guriguri.” (Luka 6:27, 28) Unai nega ai, Iesu ena hereva idia badinaia taudia hegeregerena, namona be ita ese ita ‘idia hadikaia taudia do ita kara namo henia’ bona idia do ita lalokau henia. ‘Edia hereva amo ita idia hadikaia taudia’ be hemataurai dalanai ita hereva henia neganai, ita ese idia ita “hanamoa” unai. Bona ita “dekenai idia dagedage taudia” totona do ita guriguri. Ita guriguri, ita idia dagedage henia taudia be edia lalona idia haidaua diba bona Iehova do idia hanamoa.
5, 6. Dahaka dainai ita idia badu henia taudia ita lalokau henia be namo?
5 Dahaka dainai ita idia badu henia taudia ita lalokau henidia be namo? Iesu ia gwau: “Unai dekena amo emui Tamana guba dekenai ia noho ese iena natuna do ia halaoa umui.” (Mat. 5:45) Bema unai sisiba ita badinaia, ita be Dirava ena ‘natudia,’ badina ita be Iehova ita tohotohoa, Ia be “kara dika taudia bona kara namo taudia edia latanai dina ena diari ia henia noho. Medu danu kara maoro taudia bona kara kerere taudia edia latanai ia siaia diho.” Luka ia gwau, Dirava “ese ia dekenai idia tanikiu henia lasi taudia bona kerere taudia danu ia bogahisihisi henidia.”—Luka 6:35.
6 Iesu ia hahedinaraia iena hahediba taudia be idia dekenai idia badu taudia idia lalokau henia be mai anina bada, ia gwau: “Bema umui idia lalokau henia taudia sibona dekenai do umui lalokau henia, dahaka dainai umui laloa Dirava be umui do ia hanamoa? Kara dika taudia ese danu unai bamona idia karaia noho. Bema emui turana sibona do umui hanamoa, emui namo be edena bamona do ia bada? Dika taudia danu unai bamona idia karaia noho.” (Mat. 5:46, 47) Bema ita idia lalokau henia taudia sibona ita lalokau henidia, Dirava amo hahenamo ta do ita abia lasi. Ena be kara dika takisi gogoa taudia be taunimanima ese idia ura henia lasi, to takisi gogoa taudia be taunimanima idia lalokau henia danu.—Luka 5:30; 7:34.
7. Dahaka dainai iseda “turana” sibona ita hanamoa be namo lasi?
7 Iuda taudia idia hedavari neganai, ta ta dekenai inai hereva “Sha·lohmʹ” anina be “maino” idia gwauraia. (Luka 10:5, 6; Ioa. 20:19) Unai idia gwauraia neganai, anina be idia hereva henia tauna be maino bona noho namo do ia abia. Bema iseda “turana” sibona ita hanamoa, unai be namo lasi. Iesu ese ia hahedinaraia bamona, “dika taudia danu” be unai bamona idia karaia.
8. Iesu be ena hereva idia kamonai taudia dekenai ia gwau: “Do umui maoromaoro momokani.” Unai ena anina be dahaka?
8 Keriso ena hahediba taudia be goevadae lasi taudia. (Roma 5:12) To, Iesu be ena haroro herevana ia hadokoa neganai, ia gwau: “Unai dainai umui be do umui maoromaoro momokani, umui emui Tamana guba dekenai ia noho ia maoromaoro momokani bamona.” (Mat. 5:48) Iena hereva idia kamonai taudia ia hagoadaia edia guba “Tamana” Iehova ena lalokau karana idia tohotohoa totona, anina be idia dekenai idia badu taudia do idia lalokau henia. Ita danu be unai bamona ita karaia be namo.
Dahaka Dainai Dika Ita Gwauatao be Namo?
9. Iesu ese ia hadibaia gurigurina hegeregerena, edena kara namona ma ta do ita hahedinaraia?
9 Bema ita dekenai ia kara dika tauna ena dika be mai hebogahisi ida ita gwauatao, ita be kara namo ita hahedinaraia noho. Iesu ese ia hadibaia gurigurina lalonai inai hereva ia noho: “Aiemai dika mani oi gwauatao, badina be ai dekenai idia hadikaia taudia edia dika ai gwauatao.”—Mat. 6:12.
10. Edena dala ai Dirava ena dika gwauatao karana ita tohotohoa diba?
10 Dirava be idia helalo-kerehai kara dika taudia edia dika ia gwauatao dainai, Ia ita tohotohoa be namo. Aposetolo Paulo ia gwau: “Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao, Dirava ese Keriso dainai emui dika ia gwauatao hegeregerena.” (Efe. 4:32) Salamo torea tauna ia gwau: “Lohiabada be mai ena bogahisihisi, bona mai ena hariharibada. Ia ese iena badu ia hakerua noho. Iena lalokau bona bogahisihisi be bada herea. . . . Iseda kara dika ena bada hegeregerena davana ia henia lasi. Ita ese kara dika momo ita karaia vadaeni, bona Dirava ese kerere davana bada herea ia henia diba, to unai bamona ia karaia lasi. . . . Dina ia daekau kahana, bona dina ia diho kahana be daudau herea. Unai daudauna hegeregerena be Dirava ese, iseda kara dika ita dekena amo ia kokidia lao vadaeni. Tamana taudia be edia natuna dekenai idia bogahisihisi noho. Inai bamona danu Lohiabada ese, ia dekenai idia gari taudia ia bogahisihisi henidia noho. Dirava ia diba, ita be tanobada ena kahu dekena amo ita ia karaia. Bona ita dekenai ia laloa noho, ita be kahu sibona.”—Sal. 103:8-14.
11. Dirava ese daika ena dika ia gwauatao?
11 Dirava ese taunimanima edia dika do ia gwauatao bema idia ese idia dekenai idia kara dika taudia edia dika idia gwauatao. (Mar. 11:25) Iesu ese unai ia hahedinaraia, ia gwau: “Badina be bema taunimanima edia dika umui gwauatao neganai, emui Tamana, guba dekenai ia noho ese emui dika danu do ia gwauatao. To bema taunimanima edia dika umui gwauatao lasi, emui Tamana ese emui dika danu do ia gwauatao lasi.” (Mat. 6:14, 15) Oibe, Dirava ese ma haida edia dika idia gwauatao taudia sibona edia dika ia gwauatao. Kara namo ita hahedinaraia noho dalana ta be, Paulo ena sisiba ita badinaia: “Lohiabada ese umui emui dika ia gwauatao, vadaeni unai bamona do umui karaia danu.”—Kol. 3:13.
“Taunimanima Umui Gwauraia Kerere Lasi”
12. Ma haida hahemaoro henia karana dekenai Iesu be dahaka ia gwau?
12 Iesu ese ena Ororo Harorona ai ma haida kara namo henia karana ma ta ia herevalaia. Iena hereva idia kamonai taudia ia hamaoroa ma haida do idia gwauraia kerere lasi o hahemaoro henia lasi, bona haheitalai ta amo unai ia hahedinaraia. (Mataio 7:1-5 duahia.) Iesu ia gwau: “Ma haida do idia gwauraia kerere lasi.” Unai hereva ena anina mani ita tahua.
13. Iesu ena hereva idia kamonai taudia be edena dala ai ‘dika do idia gwauatao’?
13 Mataio ena Evanelia bukana ai Iesu ia gwau: “Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi.” (Mat. 7:1) Luka bukana ai Iesu be inai bamona ia hereva: “Emui lalona dekenai taunimanima do umui gwauraidia kerere lasi, vadaeni Dirava ese umui do ia gwauraia kerere lasi. Dika ena davana do umui gwauraia lasi, vadaeni Dirava ese emui dika ena davana do ia gwauraia lasi. Dika do umui gwauatao, vadaeni emui dika be Dirava ese do ia gwauatao.” (Luka 6:37) Farisea taudia be ma haida idia hahemaoro auka henidia, bona Baibel ese ia gwauraia lasi sene karadia idia badinaia. Bema Iesu ena hereva idia kamonai taudia haida be unai bamona idia karaia, namona be unai kara idia hadokoa bona ma haida edia ‘dika do idia gwauatao.’ Aposetolo Paulo be kara dika gwauatao karana ia herevalaia danu.
14. Iesu ena hahediba taudia be ma haida edia dika idia gwauatao neganai, ma haida idia durua dahaka idia karaia totona?
14 Iesu ena hahediba taudia be ma haida edia kara dika idia gwauatao neganai, taunimanima ese edia dika do idia gwauatao danu. Iesu ia gwau: “Umui gwauraia kerere karana hegeregerena Dirava ese umui do ia gwauraia kerere. Taunimanima dekenai umui kara henia hegeregerena be Dirava ese danu umui dekenai do ia kara henia.” (Mat. 7:2) Ma haida ita kara henia hegeregerena, taunimanima ese ita do idia kara henia.—Gal. 6:7.
15. Edena dala ai Iesu ia hahedinaraia ma haida ita gwauraia dika karana be maoro lasi?
15 Iesu ia ura hahedinaraia dahaka dainai ma ta ita gwauraia dika be kerere, ia gwau: “Badina be dahaka au ena momoru oiemu tadikakana ena matana lalonai oi itaia, to au badana oiemu matana lalonai ia noho be oi laloa lasi? Badina be dahaka oiemu tadikakana oi hamaoroa, oi gwau, ‘Mani au ena momoru oiemu matana dekena amo lau kokia,’ to au badana be oiemu matana dekenai ia do noho?” (Mat. 7:3, 4) Ena tadikaka ta ia gwauraia kerere tauna be kerere maragina ta iena tadikaka ena “matana” dekenai ia itaia. Ena tadikaka ia gwauraia dika tauna ia laloa ena tadikaka be abia hidi kererena ia karaia eiava gau ta dekenai ia laloparara lasi. Ena be unai be kerere maragina sibona—au ena momoru bamona—to ia laloa unai be kerere badana bona ia ura unai “au ena momoru” ia kokia. Mai koikoi ida ia ura unai tadikaka ia durua ia laloparara namonamo totona.
16. Dahaka dainai ita gwau diba Farisea taudia edia matana ai “au badana” ia noho?
16 Iuda tomadiho gunalaia taudia be nega momo ma haida idia gwauraia kerere. Hegeregere, nega ta Iesu ese matakepulu tauna ta ena matana ia hanamoa dainai, unai tauna ia gwau Iesu be Dirava amo ia mai, to Farisea taudia ese ia idia hamaoroa: “Oi be kara dika lalonai oi vara, to edena bamona ai dekenai oi hadibaia, a?” (Ioa. 9:30-34) Farisea taudia be Iehova ena taravatu hegeregerena ai hahemaoro idia karaia lasi, unai dainai edia matana dekenai “au badana” ia noho bamona bona idia matakepulu momokani. Unai dainai Iesu ia gwau: “Koikoi tauna e, au badana oiemu matana dekena amo do oi kokia guna, oi itaia namonamo totona. Unai murinai au ena momoru oiemu tadikakana ena matana dekena amo do oi kokia diba.” (Mat. 7:5; Luka 6:42) Bema iseda lalona ita hadaia ma haida dekenai kara namo ita hahedinaraia bona idia ita gwauraia kerere lasi, ita gwau diba ita ese iseda tadikaka ena matana ai au ena momoru do ita tahua lasi. To, ita be goevadae lasi dainai, iseda tadikaka do ita hahemaoro henia lasi bona gwauraia kerere lasi.
Taunimanima Ita Kara Henia Dalana
17. Mataio 7:12 hegeregerena, edena bamona taunimanima ita kara henia be namo?
17 Ororo Harorona ai, Iesu ia hahedinaraia Dirava be tamana ta bamona ena hesiai taudia edia guriguri ia haerelaia. (Mataio 7:7-12 duahia.) Iesu be inai hereva ia gwauraia: “Unai dainai, gau ibounai umui ura taunimanima ese do idia karaia umui dekenai, umui ese unai bamona do umui karaia idia dekenai.” (Mat. 7:12) Bema ma haida be unai bamona ita kara henidia, ita hahedinaraia ita be Iesu Keriso ena hahediba taudia korikoridia.
18. Edena dala ai “Mose ena Taravatu” ese ia hahedinaraia, ita ura ma haida ese ita idia kara henia hegeregerena idia ita kara henia?
18 Iesu ia gwau, ita ura taunimanima ese ita idia kara henia hegeregerena, idia do ita kara henia. Unai murinai ma ia gwau: “Badina be Mose ena taravatu bona peroveta taudia edia hereva anina korikori be unai.” Iesu ia hereva hegeregerena taunimanima ita kara henidia neganai, ita be “Mose ena Taravatu”—Baibel buka ginigunadia Genese ia lao Deuteronomi dekenai idia noho herevadia ita badinaia unai. Unai buka ese idia hahedinaraia danu Dirava ena ura be garana ta do ia havaraia kara dika kokia totona, bona lagani 1513 B.C.E. ai Dirava ese Mose amo Israela taudia dekenai ia henia Taravatu be unai buka lalonai idia noho. (Gen. 3:15, NW ) Danu, Mose ena Taravatu ese ia hahedinaraia Israela taudia be kara maoromaoro do idia badinaia, maka tamona dekenai taunimanima idia kara henia, bona hisihisi idia davaria taudia bona idau taudia do idia kara namo henidia.—Lev. 19:9, 10, 15, 34.
19. Edena dala ai “peroveta taudia” ese idia hahedinaraia kara namo ita hahedinaraia be namo?
19 Iesu be “peroveta taudia” ia gwauraia neganai, ia be Heberu Revarevadia ena peroveta bukadia ia herevalaia. Heberu Revarevadia lalonai idia noho Mesia ena peroveta herevadia be Keriso dekenai idia guguru. Heberu Revarevadia ese idia hahedinaraia Dirava ena taunimanima be iena ura hegeregerena idia kara bona dala maorona ai ma haida idia kara namo henidia neganai, Dirava ese ia hanamodia. Hegeregere, Isaia ena peroveta herevana Israela taudia dekenai ia gwau: “Lohiabada ese inai bamona ia hereva, ia gwau, ‘Kota maoromaoro do umui karaia. Kara maoromaoro danu do umui karaia. . . . Idia badinaia noho nega ibounai taudia, be do lau hanamoa. . . . Sibodia edia kara idia naria, dika do idia karaia garina taudia danu do lau hanamoa.’ ” (Isa. 56:1, 2) Dirava ia ura iena taunimanima be kara namo do idia karaia noho.
Nega Ibounai Taunimanima Umui Kara Namo Henia
20, 21. Iesu ena Ororo Harorona idia kamonai taudia be dahaka idia karaia, bona dahaka dainai ena sisiba oi laloa dobu be namo?
20 Iesu ese Ororo Harorona lalonai ia gwauraia sisiba namodia haida sibona ita herevalaia. To, unai amo Iesu ena hereva idia kamonai taudia edia hemami ita lalopararalaia. Baibel ia gwau: “Iesu ena haroro ia hadokoa, bona taunimanima ese iena hadibaia hereva dekenai idia hoa bada, badina iena hadibaia hereva be edia taravatu hadibaia taudia bamona lasi. Ia ese taunimanima ia hadibaia mai siahu danu.”—Mat. 7:28, 29.
21 Iesu Keriso ia hahedinaraia ia be Isaia ese ia perovetalaia “Sisiba Henia Tauna Namo Herea.” (Isa. 9:6) Iesu ena Ororo Harorona ese ia hahedinaraia, Iesu be iena guba Tamana ena lalohadai gau idauidau dekenai ia diba namonamo. Inai stadi lalonai ita be gau haida sibona ita herevalaia, to unai haroro herevana ai moale korikori davaria dalana, matabodaga dadaraia dalana, kara maoromaoro badinaia dalana, vaira negana namona ita abia diba dalana, bona gau ma haida ia herevalaia danu. Namona be mai guriguri ida Mataio karoa 5 ia lao 7 oi duahia namonamo. Unai karoa toi ai idia noho sisiba oi laloa dobu. Iesu ese Ororo Harorona ai ia gwauraia gaudia be emu mauri lalonai oi badinaia. Bena Iehova do oi hamoalea, ma haida do oi kara namo henia diba, bona kara namo do oi karaia noho.
Edena Bamona Do Oi Haere?
• Ita idia badu henia taudia be edena bamona do ita kara henidia?
• Dahaka dainai ma haida edia kara dika ita gwauatao be namo?
• Taunimanima gwauraia kerere karana dekenai Iesu ena sisiba be dahaka?
• Mataio 7:12 hegeregerena, taunimanima be edena bamona ita kara henia?
[Study Questions]
[Blurb on page 10]
Oi diba dahaka dainai Iesu ia gwau: “Taunimanima umui gwauraia kerere lasi,” a?
[Picture on page 8]
Dahaka dainai ita idia dagedage henia taudia totona ita guriguri be namo?
[Picture on page 10]
Oi ura haida ese oi idia kara henia hegeregerena, idia oi kara henia, a?