Iehova Ena Lohia Siahuna Ita Abia Dae
Iehova Ena Lohia Siahuna Ita Abia Dae
“Dirava ita lalokau henia ena anina be inai: Dirava ena taravatu do ita badinaia. Iena taravatu be metau lasi.”—1 IOA. 5:3.
1, 2. (a) Dahaka dainai hari inai negai momo idia ura lasi ma ta ena ura gauna idia karaia? (b) Idia ura lasi edia kara idia haidaua taudia be ta ese ia biagudia, a? Gwauraia hedinarai.
HARI inai negai, momo idia ura lasi ma ta ena ura gauna idia karaia. Momo be idia ura lasi edia kara idia haidaua dainai, idia gwau: “Tau ta ese lau do ia hamaoroa lasi dahaka do lau karaia.” To, oi laloa unai taudia be ta ese ia biagudia, a? Oibe! Idia momo be “inai tanobada taudia edia kara bamona” idia karaia. (Roma 12:2) Idia be sibona edia ura idia badinaia lasi, to aposetolo Petero ia hereva bamona, idia be “dika bona mase ena hesiai taudia.” (2 Pet. 2:19) Ma danu, idia be “inai tanobada ena kara dika” idia karaia bona lauma dikadia edia biaguna, Satani Diabolo unai, idia kamonai henia.—Efe. 2:2.
2 Buka torea tauna ta be mai hekokoroku ida ia gwau: “Lau ura lasi egu tama sina, pris ta, dubu tauna ta, . . . o Baibel edia hereva lau kamonai.” Momokani, reana haida be edia siahu idia gaukaralaia kerere dainai, ita kamonai henidia be ia auka. To, hakaua hereva iboudiai ita dadaraia be maoro, a? Bema niuspepa lalonai idia noho sivarai ita itaia, unai henanadai ena haere do ia hedinarai. Ita itaia, ta ese taunimanima ia hakaudia be namo, to momo be unai idia ura lasi.
Siahu Taudia Ita Laloa Dalana
3. Edena dala ai aposetolo taudia ese idia hahedinaraia, nega haida siahu taudia edia hereva idia badinaia lasi?
3 Ita be Keristani taudia dainai, eda lalohadai be tanobada taudia edia lalohadai bamona lasi. To, ita gwau lasi taunimanima ese idia gwauraia gaudia ibounai ita badinaia kava sibona be namo. Lasi, nega haida ita be ma haida—siahu taudia danu—edia hereva do ita badinaia lasi. Aposetolo taudia be unai bamona idia karaia. Hegeregere, Kara 5:27-29 duahia.
hahelaga tauna badana bona Sanhedrin ena siahu taudia ma haida ese aposetolo taudia edia haroro gaukara idia koua neganai, aposetolo taudia be idia gari lasi bona edia haroro gaukara idia hadokoa lasi. Momokani, aposetolo taudia be unai siahu taudia edia hereva idia badinaia lasi.—4. Daidia edia sivarai Heberu Revarevadia lalonai ese idia hahedinaraia, Dirava ena hesiai taudia momo be taunimanima idia badinaia kava lasi?
4 Idaunegai, Dirava ena hesiai taudia momo be unai bamona idia karaia danu. Hegeregere, Mose “ia ura lasi ia idia gwauraia Farao natuna hahine ena natuna. Ia laloa Dirava ena bese taudia danu do ia hisihisi hebou be namo,” bona “king ena badu dekenai ia gari lasi.” (Heb. 11:24, 25, 27) Potifara ena adavana ia ura Iosepa ida idia mahuta hebou, to Iosepa ese ia dadaraia, herevana unai hahine be mai ena siahu Iosepa ena ladana ia hadikaia totona. (Gen. 39:7-9) Daniela be ena lalona ia hadaia “king ena aniani bona uaina be do ia ania bona inua lasi,” herevana Babulonia ena hesiai tauna badana be Daniela ena ura ia abia dae lasi. (Dan. 1:8-14) Unai bamona sivarai gunadia ese idia hahedinaraia, ena be Dirava ena taunimanima be dika idia davaria diba, to idia gini goada bona kara maoromaoro idia badinaia. Idia ura lasi taunimanima idia badinaia kava o taunimanima edia lalonamo idia abia. Idia ita tohotohoa be namo.
5. Edena dala ai ita ese siahu taudia ita laloa dalana be tanobada taudia edia amo ia idau?
5 Bema Dirava ita kamonai henia bona taunimanima ita kamonai henia lasi, ita gwau lasi unai be gwau-edeede karana; ita be politikol taudia idia gwau-edeede henia taudia bamona lasi. To iseda lalona ita hadaia Iehova ena lohia siahuna ita badinaia totona, badina Iena lohia siahuna ese taunimanima edia siahu ia hereaia. Bema ita itaia taunimanima edia taravatu ese Dirava ena taravatu ia utua, vadaeni abia hidi ita karaia be auka lasi. Aposetolo taudia bamona, Dirava ita kamonai henia be namo, taunimanima ita kamonai henia be dika.
6. Dahaka dainai hanaihanai Iehova ena oda herevadia ita badinaia be namo?
6 Dahaka ese ita ia durua Dirava ena lohia siahuna ita abia dae totona? Aonega Herevadia 3:5, 6 ena hereva be maoro, ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi. Oi karaia gaudia ibounai lalonai, Lohiabada do oi laloa, vadaeni ia ese dala maorona, be oi dekenai do ia hadibaia.” Ita abia dae Dirava ia ura ita karaia gaudia ibounai be iseda namo totona. (Deuteronomi 10:12, 13 duahia.) Momokani, Iehova be Israela taudia dekenai ia gwau: “Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.” Bena Ia gwau: “Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.” (Isa. 48:17, 18) Unai hereva ita abia dae. Ita diba momokani Dirava ena taravatu ita badinaia neganai, hanaihanai namo do ita davaria.
7. Bema Baibel lalonai Dirava ena hahegani ta ita lalopararalaia namonamo lasi, dahaka ita karaia be namo?
7 Iehova ena siahu ita abia dae bona ita badinaia be namo, herevana Baibel dekenai Dirava ese ia gwauraia taravatu haida edia badina o anina be ita lalopararalaia namonamo lasi. Unai be Iehova abidadama henia karana. Unai kara amo ita hahedinaraia, ita abia dae Iehova be ita ia laloa bada. Danu, Dirava badinaia karana be Iehova lalokau henia karana, badina aposetolo Ioane ia gwau: “Dirava ita lalokau henia ena anina be inai: Dirava ena taravatu do ita badinaia.” (1 Ioa. 5:3) To, Dirava ita badinaia dalana ma ta ita itaia be namo.
Iseda Lalona Ita Hadibaia Loulou
8. Edena dala ai iseda lalona ita hadibaia loulou neganai, unai ese ita do ia durua Iehova ena lohia siahuna ita abia dae?
8 Baibel ia gwau namona be iseda ‘lalona ita hadibaia lou, hadibaia lou, ela bona ia manada vadaeni. Unai neganai ita be maoro bona kerere edia toana ita diba namonamo.’ (Heb. 5:14) Unai dainai, ita ura lasi Dirava ena taravatu ita badinaia kava sibona. Lasi, ita ura Iehova ena taravatu ita laloa bena ‘maoro bona kerere edia toana ita diba namonamo.’ Ita ura Iehova ena taravatu edia namo ita lalopararalaia, unai amo salamo torea tauna bamona ita gwau diba: “Oiemu taravatu be lauegu kudouna lalonai ia noho.”—Sal. 40:8.
9. Edena dala ai iseda lalomamina be Iehova ena dala hegeregerena ita hadibaia diba, bona dahaka dainai unai bamona ita karaia be mai anina bada?
9 Salamo torea tauna bamona, Dirava ena taravatu ena namo ita lalopararalaia totona, Baibel ita duahia bona ita laloa dobu be namo. Hegeregere, Iehova ena taravatu o hakaua hereva ta ita dibaia neganai, reana ita henanadai diba: ‘Dahaka dainai inai taravatu o hakaua herevana lau badinaia be aonega karana? Dahaka dainai Dirava lau badinaia neganai, lau dekenai namo do ia havaraia? Dirava ena sisiba idia badinaia lasi taudia be dahaka dika idia davaria?’ Iseda lalomamina be Dirava ena taravatu hegeregerena ita hadibaia neganai, ita be Dirava ena ura hegeregerena abia hidi do ita karaia danu. Ita be “Lohiabada ena ura gaudia sibona” do ita tahua bona ita badinaia. (Efe. 5:17) To, unai bamona ita karaia be auka.
Satani be Dala Ia Tahua Dirava Ena Lohia Siahuna Ia Hadikaia Totona
10. Edena dala ta ai Satani ese Dirava ena lohia siahuna ia hadikaia toho?
10 Lagani momo lalonai Satani be dala ia tahua Dirava ena lohia siahuna ia hadikaia totona. Dala idauidau ai ita itaia, Satani be Dirava ena lohia siahuna ia dadaraia. Hegeregere, taunimanima be Dirava ena taravatu headava dekenai idia matauraia lasi. Haida idia laloa ena be idia headava lasi to idia noho hebou sibona be namo, bona ma haida be dala idia tahua edia headava idia hadokoa totona. Unai bamona taudia edia lalohadai be vidio lalonai ia hedinarai ladana bada hahine ta ena lalohadai bamona, ia gwau: “Tau o hahine be adavana tamona sibona ida ia noho hanaihanai be hegeregere lasi.” Ma ia gwau: “Lau itaia headava taudia ibounai edia headava ia dika o idia ura edia adavana korikorina idia rakatania.” Danu, vidio lalonai ia hedinarai ladana bada tauna ta ena headava be ia dika bona unai ia laloa neganai, ia gwau: “Lau laloa tau bona hahine idia noho hebou ela bona idia mase be taunimanima ese idia badinaia karana ta lasi.” Namona be ita sibona ita henanadai, ‘Headava karana dekenai, lau be Iehova ena lohia siahuna lau matauraia eiava tanobada taudia edia lalohadai lau abia dae, a?’
11, 12. (a) Dahaka dainai matamata taudia be Iehova ena lohia dalana idia abia dae be auka? (b) Iehova ena taravatu bona hakaua herevadia badinaia lasi karana ese ia havaraia dika ena ekspiriens ta gwauraia.
11 Iehova ena orea lalonai umui noho matamata taudia e, umui naria namonamo, badina Satani ia ura umui ia hakaua kerere, bona do umui laloa Iehova ena lohia dalana be anina lasi. “Uhau edia lebulebu karadia” bona emu turadia edia lalona veria karadia dainai do oi laloa Dirava ena taravatu be idia metau. (2 Tim. 2:22) Namo lasi unai bamona oi laloa. To oi gaukara goada Dirava ena taravatu ena namo oi diba totona. Hegeregere, Baibel ia gwau “heudahanai karadia umui rakatania.” (1 Kor. 6:18) Sibona dekenai inai henanadai oi henia: ‘Dahaka dainai unai be aonega herevana? Bema unai sisiba lau badinaia, dahaka namo do lau davaria?’ Dirava ena sisiba idia badinaia lasi bona kerere lalonai idia vareai taudia haida be oi diba. Idia be hari idia moale, a? Iehova ena orea idia rakatania murinai, edia noho dalana ia namo, a? Idia be Dirava ena hesiai taudia ese idia abia lasi moalena idia davaria vadaeni, a?—Isaia 65:14 duahia.
12 Taihu ta ladana Sharon ena hereva mani ita laloa, ia gwau: “Iehova ena taravatu lau badinaia Ioa. 8:44) Momokani, hanaihanai Iehova ena lohia siahuna ita badinaia be maoro.
lasi dainai, lau be AIDS gorerena lau davaria. Nega momo, lau be Iehova ena hesiai gaukara lau karaia nega gunadia lau laloa, unai be moale negadia.” Ia laloparara Iehova ena taravatu utua karana be aonega karana lasi, bona ia ese guna unai taravatu ia matauraia be gau badana. Iehova ena taravatu be ita ia gimaia. Sharon be unai hereva ia torea, bena wiki 7 murinai ia mase. Sharon ena sivarai ese ia hahedinaraia, Satani ese inai tanobada idia bamoa taudia dekenai gau namona ta ia henia diba lasi. Ia be “koikoi ibounai edia tamana,” ia be gwauhamata momo ia karaia, to ia hagugurudia lasi, Heva dekenai ia karaia bamona. (Sibona Eda Ura Ita Badinaia Lasi
13. Dahaka dainai ita naria namonamo bona sibona eda ura ita badinaia lasi?
13 Iehova ena lohia siahuna ita abia dae totona, namona be sibona eda ura ita badinaia lasi. Namona be ita hekokoroku lasi, badina unai bamona taudia be idia ura lasi ma haida edia hakaua herevana idia badinaia. Hegeregere, reana ita hekokoroku dainai do ita ura lasi Dirava ena taunimanima idia gunalaia taudia edia sisiba ita badinaia. To, Dirava ese hesiai tauna mai ena kamonai bona mai ena kara maoromaoro oreana ia gaukaralaia nega korikori ai Iena Hereva idia halasia totona. (Mat. 24:45-47) Namona be mai manau ida ita abia dae, Iehova be unai orea amo Iena taunimanima ia naria. Iesu ena aposetolo taudia bamona ita karaia be namo. Hahediba taudia haida be Iesu ena hereva dainai ia idia rakatania neganai, Iesu ese ena aposetolo taudia ia nanadaia: “Umui danu do umui raka siri, a?” Petero ia haere: “Lohiabada e, ai be daika dekenai do ai lao? Mauri hanaihanai herevadia be oi dekenai idia noho.”—Ioa. 6:66-68.
14, 15. Dahaka dainai mai manau ida Baibel ena sisiba ita badinaia be gau badana?
14 Iehova ena lohia siahuna ita abia dae anina ta be, Baibel ena sisiba ita badinaia. Hegeregere, hesiai tauna mai ena kamonai bona mai ena kara maoromaoro oreana be ita ia hagoadaia “ita noga noho, ita laloa goada noho” totona. (1 Tes. 5:6) Unai bamona sisiba be namo, badina hari inai nega dokona lalonai, taunimanima momo be “edia ura sibona do idia tahua, moni do idia mataganigani henia.” (2 Tim. 3:1, 2) Unai bamona karadia ita hahedinaraia diba, a? Oibe. Bema tanobada ena anina lasi gaudia ita tahua, unai ese iseda hetura karana Dirava ida ia hadikaia diba eiava reana kohu laloa bada taudia ai ita lao diba. (Luka 12:16-21) Unai dainai, aonega karana be inai: Baibel ena sisiba ita abia dae bona Satani ena taunimanima ese idia hahedinaraia sibona laloa bada karana ita dadaraia!—1 Ioa. 2:16.
15 Hesiai tauna mai ena kamonai bona mai ena kara maoromaoro oreana ese elda taudia ia gaukaralaia idia hegaegaelaia Baibel ena sisiba namodia be kongrigeisen dekenai idia henia totona. Baibel ia gwau: “Umui idia hakaua taudia do umui kamonai henia, bona edia hereva do umui badinaia. Badina be idia ese umui emui lauma idia naria noho, nega ibounai. Gabeai idia ese Dirava ena vairanai, edia gaukara ibounai ena anina do idia gwauraia hedinarai. Unai dainai edia hereva do umui kamonai henia, bona idia edia henunai do umui noho. Bema inai bamona umui karaia neganai, edia gaukara be mai moale danu do idia karaia, lalohisihisi ta lasi. To bema mai lalohisihisi danu umui idia naria neganai, umui ese anina namona ta do umui davaria lasi.” (Heb. 13:17) Ita gwau diba kongrigeisen elda taudia be goevadae taudia, a? Lasi! Dirava be taunimanima bamona lasi, Ia ese elda taudia edia kerere idauidau ia itaia diba. To, Dirava ia ura elda taudia ita kamonai henia. Ena be elda taudia be idia goevadae lasi, to idia ida ita gaukara hebou neganai, ita hahedinaraia ita be Iehova ena lohia siahuna ita abia dae.
Manau Karana be mai Anina Bada
16. Iesu be Keristani kongrigeisen ena Kwarana dainai, edena bamona ita hahedinaraia ita be ia ita matauraia?
16 Namona be nega ibounai ita laloatao, Iesu be kongrigeisen ena Kwarana. (Kol. 1:18) Unai dainai, elda taudia bona edia hakaua dalana ita matauraia be namo. (1 Tes. 5:12, 13) Oibe, elda taudia be kongrigeisen dekenai edia lalohadai idia gwauraia lasi, to Dirava ena hereva idia gwauraia maoromaoro neganai, idia hahedinaraia idia danu be Dirava ena lohia siahuna idia badinaia. Idia be “Buka Helaga ena hereva” sibona idia hadibaia, to idia edia hereva lasi.—1 Kor. 4:6.
17. Dahaka dainai ladana bada o dagi ura henia karana ese dika ia havaraia diba?
17 Kongrigeisen lalonai, namona be tadikaka taihu ibounai be idia naria namonamo—namo lasi sibona hanamoa momo karana idia tahua. (Aon. 25:27) Aposetolo Ioane ese ia hedavari henia hahediba tauna ta be unai bamona ia karaia. Ioane ia gwau: “Diotrepe, sibona ia gwauraia ia be gunalaia tauna, ia ese lauegu hereva ia kamonai henia lasi. Unai dainai, umui dekenai do lau mai neganai, iena kara do lau laloatao. Ia ese mai hereva dika bona koikoi danu aiemai kara ia maumauraia noho.” (3 Ioa. 9, 10) Unai sivarai ese ita dekenai gau ta ia hadibaia. Bema ita mamia ita be ladana bada o dagi ita tahua momo taudia, namona be eda kara ita haidaua haraga. Baibel ia gwau: “Hekokoroku be hadikaia gabuna dekenai ia lao noho, bona sibona ia gwauraia bada tauna, be do ia moru momokani.” Unai dainai, Dirava ena lohia siahuna idia abia dae taudia be hekokoroku karana idia dadaraia, badina hekokoroku karana ese hemarai ia mailaia.—Aon. 11:2; 16:18.
18. Dahaka ese ita do ia durua Iehova ena lohia siahuna ita abia dae totona?
18 Momokani, namona be emu lalona oi hadaia tanobada lalonai sibona emu ura oi badinaia lasi, to Iehova ena lohia siahuna oi abia dae. Nega ta ta ai, Iehova oi hesiai henia ena hahenamo be mai moale ida oi laloa loulou. Oi be Dirava ena taunimanima edia huanai oi noho dainai, unai ese ia hahedinaraia Dirava ese ena lauma helaga amo oi ia veria mai. (Ioa. 6:44) Oiemu hetura karana Iehova ida oi laloa bada be mai anina. Emu mauri lalonai oi hahedinaraia oi be sibona emu ura oi badinaia lasi, to Iehova ena lohia siahuna oi abia dae.
Oi Laloatao, A?
• Iehova ena lohia siahuna ita abia dae ena anina be dahaka?
• Edena dala ai iseda lalona ita hadibaia loulou neganai, unai ese ita do ia durua Iehova ena lohia siahuna ita abia dae?
• Edena dala haida ai Satani ese Dirava ena lohia siahuna ia hadikaia toho?
• Iehova ena lohia siahuna ita abia dae totona, dahaka dainai manau karana be mai anina bada?
[Study Questions]
[Picture on page 18]
“Dirava ai kamonai henia be namo, taunimanima ai kamonai henia be dika”
[Picture on page 20]
Nega ibounai Dirava ena taravatu ita badinaia be aonega karana