Ita Manoka Neganai, Dirava Ena Goada Ita Abia

EMU manoka gaudia be rara idia inua gaigai maragidia o doma (leeches unai) bamona. Idia be taunimanima edia tauanina ai idia kamokau momokani bamona. Reana oi laloa unai manoka gaudia do oi kokia be ia auka, eiava emu goada be ma haida edia ida oi hahegeregerea dainai oi laloa oi be anina lasi. Unai sibona lasi, reana gorere badana ta oi abia dainai, emu goada be ia ore bamona o oi moale lasi. Herevana emu manoka gauna be dahaka, to reana oi lalometau bada. Reana emu hemami be Iobu ena bamona, Dirava dekenai ia gwau: “Lau ura mase gabuna dekenai lau do oi hunia. Mani lau do oi hunia, ela bona oiemu badu ia ore. Vadaeni nega ta do oi gwauraia, unai neganai oi ese lau do oi laloa.”​​—⁠Iobu 14:⁠13.

Edena dala ai emu lalometau oi hanaia diba? Gau badana be oiemu metau oi laloaboio, ena be unai oi karaia be ia auka. Reana Iehova ese Iobu dekenai ia henia henanadai oi laloa diba, ia gwau: “Lau ese tanobada lau karaia neganai oi be edeseni? Bema oi diba, lau dekenai do oi hamaoroa. Daika ese tanobada ena bada ia gwauraia? Ena lata bona ena lababa be daika ese ia tohoa? Oi be oi haere diba?” (Iobu 38:​4, 5) Unai henanadai amo ita diba, Iehova ena aonega bona siahu be bada herea. Ia ese badina namona dainai tanobada ai dika ia koua lasi.

“Ginigini Ta”

Kamonai hesiai tauna ta, aposetolo Paulo, be nega toi Iehova ia noia “ginigini ta”​—⁠nega momo ia hisihisilaia hekwakwanai ta​—⁠ia kokia totona. Reana unai hisihisi dainai, Paulo be ia lalometau, herevana Iehova ena hesiai gaukara ia karaia. Paulo ia gwau: “Inai ginigini  ia henia be lauegu kopina do ia gwadaia totona.” To, Iehova ia haere: “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” Iehova be unai ginigini ia kokia lasi. Unai dainai, ena be Paulo ese unai hekwakwanai ia hisihisilaia, to ia gwau: “Lau manoka neganai, unai be Dirava ena goada lau abia.” (2 Kor. 12:​7-​10) Paulo ena hereva ena anina be dahaka?

Herevana Paulo ese unai hekwakwanai ia mamia noho, to Iehova ena hesiai gaukara ia goadalaia bona gau namodia momo ia karaia. Paulo be Iehova ia abidadama henia bona hanaihanai Iehova ia guriguri henia, heduru ia abia totona. (Fili. 4:​6, 7) Paulo ena mase negana ia kahirakahira neganai, ia gwau: “Tuari namona lau tuarilaia vadaeni, lauegu heau helulu be ia ore vadaeni, bona lauegu abidadama lau karaia haorea vadaeni.”​​—⁠2 Tim. 4:⁠7.

Herevana goevadae lasi taudia be nega haida idia kerere, to Iehova be idia amo Iena ura ia hagugurua bona ena ladana ia abia isi. Iehova be idia dekenai heduru bona aonega ia henia, unai amo idia ese hekwakwanai idia haheaukalaia bona Iena hesiai gaukara idia moalelaia totona. Oibe, herevana ita goevadae lasi bona eda manoka gaudia be dahaka, to Iehova be ita ia gaukaralaia diba Iena gaukara ita hagugurua totona.

Paulo ia gwau, Dirava ese “ginigini” ia kokia lasi ena badina be ‘do ia hekokoroku garina.’ (2 Kor. 12:⁠7) Paulo be unai “ginigini” ia hisihisilaia neganai, ia diba ena goada be mai hetoana bona ia manau be namo. Unai be Iesu ena hereva bamona, ia gwau: “Sibona ena ladana ia habadaia tauna ese ladana maragina do ia abia. To sibona ia hamanaua tauna ese ladana badana do ia abia.” (Mat. 23:12) Dirava ena hesiai taudia be hahetoho idia davaria neganai, idia diba idia manau bona Iehova dekenai idia tabekau be namo, unai amo idia haheauka diba. Unai dainai, idia ese Iehova ena ‘kara sibona do idia heagilaia’ be namo, aposetolo tauna ia karaia bamona.​​—⁠1 Kor. 1:​31.

Idia Hunia Manoka Gaudia

Haida be mai edia manoka gaudia to idia itaia lasi, eiava idia itaia to idia ura lasi ma ta dekenai idia gwauraia hedinarai. Hegeregere, reana ta ia laloa ia be mai ena goada dainai, ia sibona ena aonega dekenai ia tabekau diba. (1 Kor. 10:12) Eiava ta ia ura ladana bada o dagi ia abia.

King Davida ena ami jeneral ta ena ladana be Ioaba​—⁠ia gari lasi, ia ura gauna ia karaia haraga diba, bona hekwakwanai ia hamaoromaorodia diba. To, Ioaba be kerere badana ta ia karaia, bona unai ese ia hahedinaraia ia be hekokoroku bona dagi ia tahua momo tauna. Hegeregere, ia be tuari biagudia rua ia alaia mase. Ginigunana be inai: Ioaba be Abinere ia alaia mase, badina Abinere be Ioaba ena tadina ia alaia. Iharuana be inai: Ioaba be koikoi dalanai iena imana idibana amo ena kasin Amasa ena auki huina ia abia, do ia kisi henia totona bona iena imana laurina dekenai ia dogoatao kaia maragina amo Amasa ena bogana ia gwadaia. (2 Sam. 17:25; 20:​8-​10) Amasa be Ioaba ena ami jeneral dagina ia abia dainai, Ioaba ia laloa Amasa ia alaia mase neganai, Davida ese unai dagi be ia dekenai do ia henia lou. Unai sivarai amo oi itaia, Ioaba be ena lalona ia biagua lasi, to ia ura ladana bada eiava dagi ia abia. Ioaba be kara dika badana ia karaia to ia sori lasi. Unai dainai, King Davida ena mase negana ia kahirakahira neganai, ia ese ena natuna Solomona ia hamaoroa Ioaba ena kara dika davana ia henia be namo.​​—⁠1 Kin. 2:​5, 6, 29-​35.

Namona be ita gaukara goada eda manoka gaudia ita hanaia totona. Ginigunana be, eda manoka gaudia ita diba be namo. Iharuana be, dala ita tahua unai manoka gaudia ita hanaia totona. Hanaihanai Iehova ita guriguri henia bona Baibel ita stadilaia namonamo, unai ese ita do ia durua unai ura dikadia ita dadaraia totona. (Heb. 4:​12) Namo lasi ita lalometau, to hanaihanai dala ita tahua iseda manoka gaudia ita hanaia totona. Ita be goevadae lasi taudia dainai, eda manoka gaudia dainai do ita lalometau noho. Unai be momokani badina Paulo ia gwau: “Lau ura henia karadia be lau karaia lasi, bona lau ura lasi momokani karadia be lau karaia noho.” Oi itaia diba, herevana Paulo be ura dikadia ia abia danu, to ia be ena kara eiava ura ia biagua namonamo. Paulo be ena manoka gaudia ia haheaukalaia, bona ia naria Dirava ese Iesu amo heduru ia henia totona. (Roma 7:​15-​25) Nega ma ta ai, Paulo  ia gwau: “Lauegu tauanina lau botaia momokani, bona iena ura lau karaia lasi, do ia goada totona. Inai bamona lau karaia, badina be haida do lau haroro henidia, to gabeai lau sibona egu mauri do lau halusia garina.”​​—⁠1 Kor. 9:​27.

Taunimanima momo idia ura lasi sisiba idia abia dainai, ekskius momo idia gwauraia. To, namona be unai kara ita dadaraia bona Iehova ena lalohadai ita abia, hegeregere Paulo ena sisiba Keristani taudia dekenai ita badinaia, ia gwau: “Dika do umui negea momokani, to namo do umui dogoatao momokani.” (Roma 12:⁠9) Bema kara maoromaoro ita karaia, ita hesiku lasi, bona eda ura ita biagua, vadaeni eda manoka gaudia ibounai ita haheaukalaia diba. Davida be Iehova ia noia: “Egu ura bona egu laloa danu do oi tahua.” (Sal. 26:⁠2) Davida ia diba Dirava be iseda lalona ibounai ia tahua namonamo bona heduru maorona ia henia diba. Bema ita ese Iehova ena Hereva bona lauma helaga ena hakaua daladia ita badinaia, eda manoka gaudia ita hanaia diba.

Haida be hekwakwanai idauidau idia abia neganai, idia laloa idia hegeregere lasi unai idia hanaia totona. To, kongrigeisen elda taudia be hagoadaia herevadia o heduru namona idia henia diba. (Isa. 32:​1, 2) Momokani, lalohadai maorona ita abia be namo. Inai nega dokona lalonai, hekwakwanai haida ita hamaoromaoroa be ia auka. To, momo be unai hekwakwanai idia haheaukalaia bona idia moale.

Ita Diba Iehova be Ita Do Ia Durua

Hari inai negai metau dikadia momo do ita davaria, to ita diba Iehova be ita do ia gimaia bona naria. Baibel ia gwau: “Dirava ena imana goadana henunai do umui manau, vadaeni iena nega namona lalonai ia ese umui do ia abia isi. Ia ese umui ia naria noho. Unai dainai emui laloa hekwarahi gaudia ibounai be iena imana dekenai do umui atoa.”​​—⁠1 Pet. 5:​6, 7.

Lagani momo Betele dekenai ia gaukara taihu ta ladana, Kathy, ena adavana be gorere ta ladana, Alzheimer ia abia neganai, Kathy ia lalometau​—⁠ia laloa, ia be hegeregere lasi unai metau ia huaia totona. Hanaihanai Iehova ia guriguri henia, aonega bona goada ia abia totona. Iena adavana ena gorere ia bada ia lao neganai, tadikaka be nega haida gorere tauna idia durua bona taihu be hagoadaia hereva idia henia. Iehova be unai tadikaka taihu amo heduru ia henia dainai, Kathy be adavana ia durua namonamo, bona  lagani 11 murinai Kathy ena adavana ia mase. Kathy ia gwau: “Mai taitai ida Iehova lau tanikiu henia, badina Ia ese lau ia durua egu metau lau haheaukalaia totona. Ena be nega haida lau hesiku bona egu goada ia ore bamona, to Iehova be goada ia henia egu adavana lau naria namonamo totona!”

Manoka Gaudia Hanaia Dalana

Dika lalonai, haida idia laloa idia hegeregere lasi Iehova idia guriguri henia totona, badina idia laloa Iehova be heduru do ia henia lasi. To, Davida ena hereva mani ita laloa: Ia bona Bataseba be kerere idia karaia neganai, Davida be mai hemarai ida ia gwau: “Lau diba momokani, Dirava e, bema tau ta be iena kara dika dainai ia lalohisihisi momokani, bona ia manau momokani neganai, oi ese ia do oi negea diba lasi.” (Sal. 51:17) Davida be ia helalo-kerehai momokani, bona ia diba Dirava ia guriguri henia neganai, Iehova be hebogahisi do ia hahedinaraia. Iesu be Iehova ena kara ia tohotohoa. Evanelia torea tauna Mataio be Isaia ena hereva amo Iesu inai bamona ia herevalaia: “Ia ese manoka taudia dekenai manada kara do ia karaia, bona sibodia idia durua dalana be lasi taudia, be ia ese do ia bogahisihisi henidia.” (Mat. 12:20; Isa. 42:⁠3) Tanobada ai, Iesu be ogogami bona hisihisi taudia ia hebogahisi henia. Unai bamona taudia be lamepa ena lahi ia maragi bona ia bodo gwauraia gauna bamona. Iesu be unai lahi ia habodoa lasi to ia habadaia, hegeregere mai hebogahisi bona manau ida idia ia durua edia mauri idia moalelaia noho totona. Oibe, tanobada ai, Iesu ena kara be unai bamona. Oi abia dae Iesu ena kara be ia idau lasi bona ia be emu manoka gaudia ia diba bona ia hebogahisi, a? Heberu 4:​15 ese ia hahedinaraia, Iesu ia diba “ita be manoka dainai . . . ita ia bogahisihisi henia diba.”

Paulo be ia hisihisilaia “ginigini” sibona ia herevalaia lasi, to ia gwau Keriso ena siahu be “palai ruma ta” bamona, iena ataiai ia noho. (2 Kor. 12:​7-9; NW ) Paulo ia itaia Dirava be Keriso amo ia ia gimaia​—⁠unai be hegeregere ta be palai ruma ta henunai ia helai, bona medu ese ia hapariparia lasi. Paulo bamona, namona be eda manoka gaudia o hekwakwanai dainai ita hesiku lasi. Danu, Iehova be ena kongrigeisen amo gau idauidau ia henia, unai ese ita do ia durua Iehova ita badinaia noho totona. Namona be mai goada ibounai ida eda manoka gaudia ita haheaukalaia bona ita abia dae Iehova be ita do ia hakaua. Bema ita mamia Iehova be ita ia durua, vadaeni Paulo bamona ita gwau diba: “Lau manoka neganai, unai be Dirava ena goada lau abia.”​​—⁠2 Kor. 12:⁠10.

[Picture on page 3]

Paulo be hanaihanai Iehova ia guriguri henia, unai amo Iehova ese ia durua ena hesiai gaukara ia hagugurua totona

[Picture on page 5]

King Davida ese Ioaba dekenai tuari taudia biagua dagina ia henia

[Picture on page 5]

Ioaba be ena inai tauna Amasa ia alaia mase

[Picture on page 6]

Elda taudia be Baibel amo ita idia durua hekwakwanai ita haheaukalaia totona