Oi Hegaegae Oi Abia Dae Gaudia Oi Herevalaia Totona, A?

NEGA ta ai, haida idia henanadai dainai, oi ura oi abia dae gaudia oi herevalaia, a? Paraguay dekenai ia noho taihu ladana Susana​—⁠ena mauri lagani be 16​—⁠dekenai ia vara gauna mani oi laloa. Sikuli dekenai, iena klas lalonai, haida idia gwau Iehova ena Witnes taudia be “Taravatu Gunana,” Iesu Keriso, eiava Maria idia abia dae lasi. Ma haida idia gwau Iehova ena Witnes taudia be kavakava taudia, badina medikol heduru idia abia dae lasi dainai idia mase. Unai bamona hereva oi kamonai neganai, dahaka do oi karaia?

Susana be Iehova ia guriguri henia, bona ena imana ia abia isi. Herevahereva dokonai, Susana ese tisa ia hamaoroa ia be Iehova ena Witnes kekenina ta, bona ia noinoi bema namo Iehova ena Witnes taudia ese idia abia dae gaudia ia herevalaia totona. Tisa be Susana ena noinoi ia abia dae. Susana be wiki rua lalonai, klas ai do ia herevalaia gaudia ia hegaegaelaia, bona ia ese buklet ladana Iehova Ena Witnes Taudia​​—⁠Idia be Daidia? Dahaka Idia Abia Dae? ia gaukaralaia.

Hereva henia dinana ia ginidae. Susana ese ia hahedinaraia dahaka dainai ita be inai ladana, Iehova ena Witnes taudia ita abia. Danu, ia hahedinaraia dahaka be vaira negana ai do idia vara, bona dahaka dainai rara ita dadaraia. Bena stiuden ia noidia, henanadai idia henia totona. Stiuden momo be edia imana idia abia isi. Tisa ia moale, badina Susana be Baibel amo henanadai idauidau ia haerelaia.

Stiuden ta ia gwau: “Nega ta lau be Kingdom Hall dekenai lau lao, bona unuseniai kaivakuku ta lau itaia lasi.” Tisa ia ura diba dahaka dainai Kingdom Hall dekenai kaivakuku idia noho lasi. Susana ese Salamo 115:​4-8 bona Esodo 20:4 ia duahia. Tisa ia hoa bona ia gwau: “Dahaka dainai emai dubu lalonai kaivakuku momo herea idia noho, to Baibel ese unai gaudia ia taravatua?”

Unai herevahereva be miniti 40 lalonai idia karaia. Susana ia henanadai bema idia ura vidio ladana, No Blood​​—⁠Medicine Meets the Challenge idia itaia, bona ibounai idia gwau idia ura unai vidio idia itaia. Vadaeni tisa ese dala ia karaia, dina iharuana ai unai vidio idia itaia totona. Vidio idia itaia murinai, Susana ese ia hahedinaraia medikol heduru daladia haida dekenai rara idia gaukaralaia lasi, bona Iehova ena Witnes taudia be unai bamona medikol heduru idia abia dae. Unai dainai, tisa ia gwau: “Lau diba lasi unai medikol heduru daladia momo idia noho, bona lau diba lasi opereisen lalonai rara ita abia lasi be mai ena namo. To, Iehova ena Witnes taudia sibona ese unai medikol heduru idia abia, a?” Susana ese tisa ia hamaoroa unai medikol heduru be taunimanima ibounai totona, bona tisa ia gwau: “Bema Iehova ena Witnes taudia be egu ruma dekenai idia mai, do lau abidia dae.”

Susana ese ia hegaegaelaia herevana ena lata be miniti 20 gauna, to idia be  hora toi lalonai unai gauna idia herevalaia. Wiki ta murinai, stiuden haida be edia tomadiho ena hahediba herevadia idia herevalaia. Edia hereva dokonai, momo be henanadai idia henia, to idia ese unai henanadai idia haerelaia diba lasi. Tisa ese idia ia nanadaia: “Dahaka dainai Iehova ena Witnes kekenina be emui henanadai ia haerelaia diba, to umui be unai bamona umui karaia diba lasi?”

Idia haere: “Iehova ena Witnes taudia be Baibel idia stadilaia namonamo. To ai be lasi.”

Tisa be Susana ia itaia bona ia gwau: “Momokani, oi be Baibel oi stadilaia namonamo bona oi hekwarahi ena hereva oi badinaia totona. Oi dekenai lau moale bada.”

Susana be ena uduna ia koua lasi to ena abidadama ia herevalaia. Ia be Israela kekeni maragina​—⁠Suria ena hesiai kekenina​—⁠ena haheitalai namona ia tohotohoa. Unai kekeni maragi be Suria tuari biaguna, Namana​​—⁠lepera gorere ia abia tauna​​—⁠ena ruma dekenai ia noho. Unai Israela kekenina be ena uduna ia koua lasi to ena biaguna hahine dekenai ia gwau: “Bema lauegu biaguna ese Samaria dekenai ia noho peroveta tauna dekenai ia lao neganai, iena lepera gorere do ia ore.” Inai kekeni ia laloa, Dirava momokanina ena sivarai ia gwauraia hedinarai be maoro. Unai ese dala ia kehoa ena biaguna, Namana, be Iehova tomadiho henia tauna ta ai ia lao totona.​​—⁠2 Kin. 5:​3, 17.

Unai hegeregerena, Susana ia laloa Iehova bona Iena taunimanima edia sivarai ia gwauraia hedinarai be namo. Susana ese stiuden edia henanadai idauidau ia haerelaia neganai, ia be inai siri ena sisiba ia badinaia: “Emui kudouna dekenai Keriso do umui abia dae, do umui matauraia, bona ia tamona emui Lohiabada do umui halaoa. Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.” (1 Pet. 3:​15) Dala ia kehoa oi abia dae gaudia oi herevalaia neganai, oi hegaegae, a?

[Picture on page 17]

Inai tulu namodia ese oi idia durua oi abia dae gaudia oi herevalaia totona