Palani Namona

CENTRAL Africa dekenai, tadikaka toi be idia ura edia tano dekenai idia karaia distrik hebouhebou ta idia lao. Edena bamona unai gabu dekenai do idia lao? Gabu ena daudau be 90 kilomita bamona, dala be ia namo lasi, kahu momo, bona motuka be lasi. Idia be haida idia noia bema namo edia basikele toi idia gaukaralaia totona, to basikele namona ta idia davaria lasi.

Edia kongrigeisen ena elda ta ese unai ia itaia bona ena basikele ia henia idia gaukaralaia totona​​—⁠unai be basikele gunana to ia gaukara namonamo. Unai elda tauna ese edena dala ai guna ia bona ma haida ese hebouhebou ta idia lao henia ena sivarai ia herevalaia. Bena idia dekenai ia gwau, namona be idia toi ese unai basikele tamona idia gaukaralaia hebou. Ia be palani namona, to mai ena hekwarahi. Edena dala ai unai tadikaka toi ese basikele tamona idia gaukaralaia hebou diba?

Unai tadikaka toi idia ura lasi dina siahuna lalonai idia lao dainai, daba momokani idia hedavari bona edia baege be basikele latanai idia kwatua. Tadikaka ginigunana be basikele dekenai ia guia bona ia heau guna, bona tadikaka ma rua be idia raka haraga. Tadikaka ginigunana be gabu ena daudau 500 mita dekenai ia ginidae neganai ia stopu, bona basikele mai ena kohu ida be au ta badinai ia rakatania. To unai tadikaka rua ese idia itaia diba gabuna ta dekenai ia hunia. Tadikaka ginigunana be unai basikele ia atoa murinai ia raka matamaia.

Tadikaka rua be basikele idia davaria neganai, tadikaka iharuana be basikele dekenai ia guia bona ia heau, to tadikaka ihatoina be ma 500 mita bamona ia raka murinai, basikele dekenai ia guia bona ia heau. Ena be gabu ena daudau be 90 kilomita bamona, to unai tadikaka toi edia palani namona bona idia haheauka dainai, idia be 60 kilomita murinai idia ginidae. Momokani, edia hekwarahi ena anina idia davaria. Unai tadikaka toi ese edia tadikaka bona taihu idia davaria bona hebouhebou idia moalelaia bada. (Deu. 31:12) Hari lagani ai, oi be do oi gaukara goadagoada emu gabu dekenai do idia karaia distrik hebouhebou dekenai do oi lao, a?