Dahaka Dainai Ruma-Ta-Ruma-Ta Haroro Gaukara be mai Anina Bada?

“Dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.”​​—KARA 5​:​42.

1, 2. (a) Iehova ena Witnes taudia be edena dala ai idia haroro? (b) Inai stadi lalonai, dahaka do ita herevalaia?

TANO momo ai, taunimanima ibounai be inai kara idia itaia momo: Dabua namona idia karaia taudia rua be ruma ta dekenai idia lao, bona nega sisina lalonai, Baibel amo Dirava ena Basileia ena sivarai be ruma tauna ida idia kikilaia. Bema ruma tauna ia kamonai, idia ese magasin o buka ta idia hahedinaraia bona davana lasi Baibel stadi ta idia gwauraia. Bena unai ruma idia rakatania bona ruma ma ta dekenai idia lao. Bema oi be unai gaukara oi karaia, oi itaia nega momo taunimanima oi do hereva henia lasi neganai, idia diba vadaeni oi be Iehova ena Witnes tauna ta. Momokani, taunimanima idia gwau ruma-ta-ruma-ta haroro gaukara be Iehova ena Witnes taudia sibona ese idia karaia gaukarana.

² Iesu ese ia henia haroro gaukarana bona hahediba taudia halaoa gaukarana be dala idauidau ai ita karaia. (Mat. 28:​19, 20) Hegeregere maketi gabudiai, dala ai, eiava taunimanima ita davaria gabudia ma haida dekenai ita haroro. (Kara 17:17) Telefon eiava leta amo momo ita haroro henia. Dina ta ta ai ita davaria taudia dekenai hereva momokani ita harorolaia. Internet ai be eda Web sait ta ia noho, bona taunimanima be unuseniai gado 300 mai kahana ai ita halasia gaudia idia duahia diba. * Unai dala ibounai amo taunimanima momo ita durua. To, gabu momo ai, sivarai namona ita halasia dalana badana be, ruma-ta-ruma-ta haroro gaukara. Dahaka dainai ruma-ta-ruma-ta dekenai ita haroro? Edena dala ai Iehova ena Witnes taudia ese unai gaukara be tanobada hegegemadai idia karaia? Dahaka dainai hari inai negai unai gaukara be mai anina bada?

Aposetolo Taudia Edia Haroro Dalana

3. Iesu ese aposetolo taudia be haroro totona ia siaidia neganai dahaka ia gwau? Iesu ena hereva ese dahaka ia hahedinaraia goevagoeva?

³ Ruma-ta-ruma-ta haroro gaukara be Baibel ese ia herevalaia. Iesu ese aposetolo taudia be haroro totona ia siaidia neganai, ia gwau: “Hanua maragina ta dekenai o hanua badana ta dekenai do umui ginidae neganai, kara namona tauna ta do umui tahua.” Edena dala ai aposetolo taudia ese kara namo tauna ta do idia tahua? Iesu ese idia ia hamaoroa, taunimanima edia ruma dekenai idia lao. Ia gwau: “Ruma dekenai umui raka vareai neganai be do umui hanamoa. Bona bema ruma taudia idia namo, umui emui hanamoa be idia latanai do umui atoa.” Unai anina be, aposetolo taudia idia naria ela bona ta ese idia ia boiria ena ruma dekenai idia vadivadi totona, a? Iesu ena hereva ita laloa, ia gwau: “Bema ruma taudia o hanua taudia idia abia dae lasi umui, bona emui hereva idia kamonai lasi, unai gabu do umui rakatania, bona emui aena dekenai ia noho momoru umui negea oho unuseni.” (Mat. 10:​11-​14) Unai ibounai ese idia hahedinaraia goevagoeva, aposetolo taudia be “idia raka lao, hanua momo edia lalonai Sivarai Namona idia harorolaia” neganai, idia be ruma dekenai taunimanima idia vadivadi henia.​​—Luka 9:6.

4. Edena Baibel siri ese ruma-ta-ruma-ta haroro gaukara ia herevalaia?

 ⁴ Baibel ia gwau, aposetolo taudia be ruma-ta-ruma-ta dekenai haroro gaukara idia karaia. Hegeregere Kara 5:​42 ia gwau: “Dina ibounai, Dubu Helaga lalonai bona ruma lalonai, taunimanima idia hadibaia noho, bona Iesu Keriso ena Sivarai Namona idia gwauraia noho. Inai gaukara idia hadokoa lasi.” Lagani 20 murinai, aposetolo Paulo ese Efeso kongrigeisen ena tau badadia ia hadibaia: “Umui diba vadaeni umui dekenai lau haroro bona hadibaia neganai, emui ruma dekenai, bona taunimanima edia vairana dekenai durua hereva ta lau hunia lasi umui dekenai.” Anina be unai elda taudia be Keristani taudia ai idia do lao lasi neganai, Paulo be idia ia vadivadi henia guna, ani? Oibe, badina Baibel ia gwau idia ia hadibaia “edia lalona do idia giroa Dirava dekenai, bona Lohiabada Iesu do idia abidadama henia.” (Kara 20:​20, 21) Buka ta (Robertson’s Word Pictures in the New Testament) ia gwau: “[Kara 20:20] dekenai ita laloa bada gauna be, unai haroro taudia be ruma-ta-ruma-ta ai idia haroro.”

Kwadi Oreana​—Hari Inai Negai

5. Ioela ena peroveta herevana ese haroro gaukara be edena bamona ia herevalaia?

⁵ Matamanai aposetolo taudia ese idia karaia haroro gaukara be hari ita ese ita karaia noho. Peroveta tauna Ioela ese horoa Keristani taudia edia haroro gaukara be kwadi oreana ese uma ta idia hadikaia karana ida ia hahegeregerea. (Ioe. 1:4) Kwadi oreana be tuari oreana ta bamona​​—koua gaudia idia hanaia, uma lalonai idia vareai, bona gau ibounai idia hadikaia. (Ioela 2:​2, 7-9 duahia.) Unai kwadi oreana hegeregerena, Iehova ena Witnes taudia be haroro gaukara idia karaia goadagoada bona idia karaia namonamo! Horoa taudia bona “mamoe idaudia” taudia ese idia gaukaralaia dalana badana be ruma-ta-ruma-ta haroro gaukara. Unai dala amo idia ese Ioela ena peroveta herevana idia hagugurua. (Ioa. 10:16) Edena dala ai Iehova ena Witnes taudia ese aposetolo taudia edia haroro dalana idia badinaia?

6. Lagani 1922 ai, Hakaua Oreana be edena dala ai tadikaka taihu idia hagoadaia ruma-ta-ruma-ta haroro gaukara idia karaia totona? Haida be dahaka idia karaia?

⁶ Lagani 1919 amo, Hakaua Oreana ese tadikaka taihu ta ta idia hagoadaia haroro gaukara idia karaia be gau badana. Hegeregere, August 15, 1922 Watch Tower, ena kahana ta ladana “Ita Haroro be Gau Badana” (eiava “Service Essential”) ese horoa taudia ia hagoadaia, gau badana be  “idia printaia bukadia be taunimanima edia ruma dekenai ita abia lao bona do ita gwau guba basileia be ia kahirakahira.” Haroro herevadia be Bulletin (hari ena ladana be Iseda Basileia Gaukara) ai idia halasia. Ena be unai bamona idia karaia, to ruma-ta-ruma-ta haroro gaukara idia karaia taudia be momo lasi. Haida idia ura lasi unai gaukara idia karaia dainai, ekskius herevadia idia gwauraia. To, idia haroro lasi ena badina be idia hekokoroku, idia laloa idia be taunimanima badadia dainai ruma-ta-ruma-ta haroro gaukara idia karaia be anina lasi. Hakaua Oreana ese haroro gaukara idia herevalaia momo neganai, unai bamona tadikaka taihu momo be metairametaira Iehova ena orea idia rakatania.

7. Lagani 1950 ia lao lagani 1953 ai, dahaka ia hedinarai?

⁷ Lagani haida murinai, haroro taudia edia namba ia bada. To, ruma-ta-ruma-ta haroro gaukara karaia dalana idia dibaia be namo. Hegeregere, United States ai ia vara gauna mani ita laloa. Lagani 1950 ia lao lagani 1953 lalonai, unai tano ai, Iehova ena Witnes taudia 28 pesen be dala dekenai boiboi pepadia bona magasin sibona idia hariharilaia. Pablisa taudia 40 pesen mai kahana be hua haida sibona idia haroro. Edena dala ai unai tadikaka taihu idia durua, ruma-ta-ruma-ta ai idia haroro totona?

8, 9. Dahaka sikuli be lagani 1953 ai idia hamatamaia, bona dahaka gau namodia idia vara?

⁸ Lagani 1953 ai, New York City dekenai, intenesenel hebouhebou ta ena tok momo be ruma-ta-ruma-ta haroro gaukara idia herevalaia. Tadikaka Nathan H. Knorr ia gwau, elda taudia ibounai edia maduna badana be, tadikaka taihu do idia durua ruma-ta-ruma-ta haroro gaukara idia karaia hanaihanai totona. Ia gwau: “Tadikaka taihu ibounai be ruma-ta-ruma-ta ai sivarai namona idia harorolaia be namo.” Unai idia karaia totona, tanobada hegegemadai, sikuli ta idia hamatamaia. Ruma-ta-ruma-ta haroro gaukara idia karaia lasi taudia be unai sikuli lalonai idia vareai bona ruma taudia dekenai idia haroro, Baibel ena anina idia herevalaia, bona henanadai idia haerelaia dalana idia dibaia.

⁹ Unai sikuli dainai gau namodia idia vara. Lagani 10 lalodiai, tanobada hegegemadai, pablisa edia namba be 100 pesen amo ia bada, lou henia ena namba be 126 pesen amo ia bada, bona Baibel stadi ena namba be 150 pesen amo ia bada. Hari inai negai, tanobada hegegemadai, kahirakahira pablisa ibounai seven milioni be Basileia ena sivarai namona idia harorolaia. Unai ese ia hamomokania, Iehova be ena hesiai taudia edia ruma-ta-ruma-ta haroro gaukarana ia hanamoa noho.​​—Isa. 60:22.

Taunimanima Makaia Idia Roho Mauri Totona

10, 11. (a) Esekiela karoa 9 hegeregerena, Esekiela be matahanai lalonai dahaka ia itaia? (b) Hari inai negai, unai matahanai ena anina be edena bamona ia guguru noho?

¹⁰ Peroveta tauna Esekiela ena matahanai amo ita itaia diba, ruma-ta-ruma-ta haroro gaukara be mai anina bada. Unai matahanai lalonai, Esekiela be tatau siks ia itaia, edia imana dekenai be tuari kaia idia dogoatao. To danu, ia ese tau namba seven ia itaia, ia be dabua aukana ia karaia, bona mai ena toretore peni ta. Iehova ese tau namba seven ia hamaoroa, ia gwau: “Ierusalema hanua do oi raka hanaia, bona kara dika rohoroho ibounai, hanua lalonai idia karaia noho, dainai idia taitai noho, bona idia lalohisihisi noho taudia edia bagudia dekenai maka do oi atoa.” Unai maka atoa gaukarana murinai, Iehova ese unai tatau siks dekenai oda ia henia edia tuari kaia amo maka idia abia lasi taudia ibounai idia alaia mase totona.​​—Esekiela 9:​1-6 duahia.

¹¹ Ita diba, unai peroveta herevana lalonai “dabua aukana ia karaia” tauna be Keristani horoa orena taudia ia laulaulaia. Hegeregere, haroro gaukara bona hahediba taudia halaoa gaukara lalonai, horoa taudia be Keriso ena “mamoe idaudia” ai idia lao taudia dekenai maka ta idia atoa bamona. (Ioa. 10:16) Unai maka ena anina be dahaka? Mamoe idaudia edia  baguna dekenai maka ia noho ena anina be, idia be edia mauri idia gwauhamatalaia, bapatiso idia abia, Iesu Keriso ena hahediba taudia ai idia lao bona Iesu ena kara idia hahedinaraia. (Efe. 4:​20-​24) Unai mamoe idaudia be horoa taudia idia bamoa bona idia durua taunimanima ma haida idia makaia totona.​​—Apok. 22:17.

12. Edena dala ai Esekiela ese ia hahedinaraia mamoe bamona taudia makaia gaukarana be mai anina bada?

¹² Esekiela ese ia hahedinaraia, dahaka dainai “idia taitai noho, bona idia lalohisihisi noho taudia” ita tahua noho be gau badana. Taunimanima momo be do idia mase. Kahirakahira, Iehova ena guba tuari oreana​​—tuari kaia idia dogoatao tatau siks ese idia laulaulaia taudia​​—be maka idia abia lasi taudia do idia alaia mase. Aposetolo Paulo ia gwau, unai hahemaoro negana ai, “Lohiabada Iesu bona iena aneru mai siahu bada danu” do idia mai bona “Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia.” (2 Tes. 1:​7, 8) Unai siri ese idia hahedinaraia, sivarai namona idia kamonai henia lasi taudia be hahemaoro do idia abia. Unai dainai, Dirava ena hereva ita harorolaia goadagoada noho ela bona dokona be mai anina bada. (Apok. 14:​6, 7) Iehova ena hesiai taudia ibounai dekenai unai maduna be gadara gauna lasi.​​—Esekiela 3:​17-​19 duahia.

13. (a) Aposetolo Paulo ia laloa iena maduna be dahaka, bona dahaka dainai? (b) Oiemu teritori ai idia noho taudia dekenai emu maduna be dahaka?

¹³ Paulo ia laloa, ma haida dekenai sivarai namona ia harorolaia be iena maduna. Ia gwau: “Helene taudia bona bese idauidau taudia, aonega taudia bona kavakava taudia dekenai lau be abiatorehai tauna; unai dainai lau ura umui Roma ai umui noho taudia emui vairanai sivarai namona do lau harorolaia.” (Roma 1:​14, 15, BHğ) Dirava be Paulo ia hebogahisi henia dainai, Paulo ese Dirava ia tanikiu henia bona ia mamia namona be ma haida ia durua unai hebogahisi ena namo idia abia totona. (1 Tim. 1:​12-​16) Paulo be mai ena abiatorehai bamona, bona sivarai namona ia harorolaia neganai, unai be hegeregere abiatorehai ena davana ia heniatorehai. Oi laloa emu teritori taudia dekenai oi be mai emu abiatorehai, a?​​—Kara 20:​26, 27 duahia.

14. Ruma-ta-ruma-ta ai bona taunimanima vairanai ita haroro ena badina badana be dahaka?

¹⁴ Taunimanima ita durua idia roho mauri be gau badana, to ruma-ta-ruma-ta ai ita haroro ena badina badana ma ta ia noho. Malaki 1:​11 dekenai Iehova ia peroveta: “Tanobada ena kahana ibounai dekena amo taunimanima ese lauegu ladana idia hanamoa noho. . . . Bona lau dekenai boubou namodia idia henia noho. Inai taunimanima ibounai ese lau idia hanamoa noho momokani.” Tanobada hegegemadai, Iehova ena hesiai taudia be mai manau ida haroro gaukara idia karaia bona taunimanima edia vairanai Iehova ena ladana idia hanamoa bona unai peroveta herevana idia hagugurua. (Sal. 109:30; Mat. 24:14) Ruma-ta-ruma-ta ai bona taunimanima vairanai ita haroro ena badina badana be inai: Ita ura bada Iehova ita “hanamoa.”​​—Heb. 13:15.

Vaira Negana Ena Gaukara Badana

15. (a) Dina namba 7 ai Israela taudia be Ieriko idia rakaia hegege neganai, edena dala ai edia gaukara idia habadaia? (b) Ieriko ai ia vara karana ese ita dekenai dahaka ia hadibaia?

¹⁵ Vaira negana ai haroro gaukara ai dahaka do ita karaia? Baibel bukana Iosua lalonai Israela taudia ese Ieriko idia koua hegege ena sivarai ia noho, bona unai sivarai ese ita dekenai gau ta ia hadibaia. Mani oi laloa: Dirava ese Ieriko ia hadikaia gwauraia neganai, Ia ese Israela taudia ia hamaoroa, dina ta ta dekenai hanua do idia raka  hagegea ela bona dina siks idia ore. To dina namba 7 dekenai, hanua do idia raka hagegea nega 7. Iehova ese Iosua ia hamaoroa: “Hanua do umui raka hagegea nega 7, bona hahelagaia taudia ese kibi do idia hiriria. Vadaeni kibi ena regena do umui kamonai . . . neganai taunimanima ibounai do idia boiboi bada herea, vadaeni hanua maguna be do ia moru.” (Ios. 6:​2-5) Momokani, toana be vaira negana ai, eda haroro gaukara do ia bada herea. Inai tanobada oromana dikana ia do ore lasi lalonai, do ita itaia Dirava ena ladana bona Basileia harorolaia gaukarana be do ia bada herea, guna be unai bamona lasi.

16, 17. (a) “Hisihisi badana” ia do ore lasi lalonai, dahaka do ia vara? (b) Dahaka henanadai be stadi gabena ai do ita haerelaia?

¹⁶ Dina ta do ia mai, Israela ena tuari taudia bamona, do ita “boiboi bada herea.” Baibel bukana Apokalupo ese ia hahedinaraia, Iehova ena hahemaoro herevadia be “aisi nadi ta ta edia metau be 50 kilogaram bamona.” Unai dainai Apokalupo 16:21 ia gwau, iena “hisihisi” be “dika herea momokani.” Ita do diba lasi ruma-ta-ruma-ta dekenai Dirava ena hahemaoro karana ginigabedia do ita harorolaia eiava lasi. To, ita diba hisihisi badana ia do ore lasi neganai, taunimanima ibounai be Iehova ena ladana do idia diba, guna be unai bamona lasi.​​—Apok. 7:​14; Ese. 38:23.

¹⁷ Vaira negana ena gaukara badana ita naria noho lalonai, namona be hari Basileia ena sivarai namona ita harorolaia goadagoada noho. To ruma-ta-ruma-ta haroro gaukara lalonai, dahaka hekwakwanai haida ita davaria, bona edena dala ai unai ita hanaia diba? Unai henanadai be stadi gabena ai do ita haerelaia.

[Footnote]

Edena Bamona Do Oi Haere?

• Baibel ese ruma-ta-ruma-ta haroro gaukara be edena bamona ia herevalaia?

• Edena dala ai Hakaua Oreana ese tadikaka taihu idia hagoadaia ruma-ta-ruma-ta haroro gaukara idia karaia totona?

• Dahaka dainai idia bapatiso taudia idia haroro be gau badana?

• Dahaka gaukara badana be vaira negana ai do ita karaia?

[Study Questions]

[Pictures on page 4]

Aposetolo Paulo bamona, oi laloa ma haida oi haroro henia be namo, a?

[Picture on page 5]

Tadikaka Knorr, lagani 1953