“Dirava Sibona ese Hadoa Gauna Ia Hatubua”!

“Hadoa tauna bona dairia tauna edia gaukara be herevana, badina Dirava sibona ese hadoa gauna ia hatubua.”​​—1 KOR. 3:7.

1. Edena dala ai ita be Dirava ida ita gaukara hebou?

ITA be Dirava ida ita gaukara hebou. Aposetolo Paulo be ita ibounai ese ita karaia diba gaukarana ia gwauraia neganai, unai bamona ia hereva. (1 Korinto 3:​5-9 duahia.) Paulo ese hahediba taudia halaoa gaukarana ia herevalaia. Ia gwau unai gaukara be biru tauna ese uhe ia hadoa bona ia dairia hegeregerena. Unai gaukara dekenai ita kwalimu totona, Iehova ena heduru ita abia be gau badana. Paulo be ita ia hadibaia: “Dirava sibona ese hadoa gauna ia hatubua.”

2. ‘Dirava ese uhe ia hatubua’ dainai iseda haroro gaukara be edena bamona ita laloa?

² Ita laloparara ‘Dirava ese uhe ia hatubua’ dainai, namona be mai manau ida haroro gaukara ita karaia. Ena be mai iseda goada ibounai ida haroro bona hahediba gaukarana ita karaia namonamo, to Iehova sibona ese anina ia havaraia dainai Ia do ita hanamoa. Dahaka dainai? Badina kamonai tauna ta ena hetura karana Dirava ida ia goada ia lao karana ita lalopararalaia diba lasi, bona ita biagua diba lasi. King Solomona ena hereva be maoro, ia gwau: “Dirava ese gau ibounai ia karaia, bona oi ese iena kara ena dala oi diba lasi.”​​—Had. 11:5.

3. Uhe hadoa gaukarana bona hahediba taudia halaoa gaukarana be edena bamona idia hegeregere?

³ Kamonai tauna ena hetura karana Dirava ida ia goada ia lao karana ita lalopararalaia diba lasi. To, hahediba tauna ai ia lao neganai ita moale bada. King Solomona ia gwau: “Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.” (Had. 11:6) Momokani, uhe korikorina ita hadoa neganai, ita diba lasi do ia tubu eiava lasi. Unai gaudia ita biagua diba lasi. Kamonai tauna be hahediba tauna ai ita halaoa gaukarana be unai bamona. Evanelia bukana Mareko karoa 4 lalonai Iesu ese unai point idia hahedinaraia parabole rua ia gwauraia. Mani ita itaia unai parabole amo dahaka gaudia do ita dibaia.

Tano Idauidau

4, 5. Uhe hadoa tauna ena parabole mani oi herevalaia.

⁴ Mareko 4:​1-9 ai, Iesu ese tano idauidau ai uhe ia hadoa tauna ia herevalaia: “Umui kamonai. Tau ta ena uhe ia hadoa tano dekenai. Ia hadoa neganai, uhe haida idia moru dala dekenai, bona manu idia mai idia ania. Uhe haida idia moru nadi gabuna dekenai, unuseni be tano momo lasi dainai, idia tubu haraga, badina be tano ia dobu lasi. Dina ia daekau neganai, iena siahu ese unai uhe matamata ia hamasea, badina idia be ramudia lasi. Uhe haida be idia moru ava ginigini lalonai, bona uhe edia tubu dala be ava ginigini ese idia koua, bona au huahua ia atoa lasi. To uhe haida idia moru tano namona dekenai, idia tubu namo herea, huahua idia atoa, haida 30, haida 60, haida 100.”

⁵ Baibel negadiai, uhe be tano dekenai idia negea lao negea mai. Uhe hadoa tauna be ena dabua eiava uro lalonai uhe ia udaia bona tano dekenai ia negea. Inai parabole lalonai uhe hadoa tauna be iena ura tanona ai uhe ia hadoa lasi. To, ia negea sibona bona uhe be tano idauidau dekenai idia moru.

6. Iesu ese uhe hadoa tauna ena parabole ena anina be edena bamona ia gwauraia?

 ⁶ Ita sibona ese unai parabole ena anina do ita tahua lasi. Mareko 4:​14-​20 dekenai Iesu ese ena anina ia gwauraia hedinarai: “Uhe hadoa tauna ese Dirava ena hereva ia hadoa. Taunimanima haida be unai hereva ia moru dala dekenai tano bamona. Hereva idia kamonai, to nega tamona Satani ia mai, idia lalonai hadoa hereva gauna ia abia lao. Hegeregere, uhe haida idia moru nadi dekenai, be taunimanima haida bamona. Hereva idia kamonai neganai, idia abia dae haraga, mai moale danu. To idia be ramu lasi dainai, nega sisina mo idia goada. Gabeai inai hadibaia hereva dainai, nega dika bona dagedage idia mai neganai, idia moru haraga. Bona haida be uhe ia moru ava ginigini lalonai hegeregere. Inai taudia be hereva idia kamonai vadaeni. To tanobada gaudia dekenai laloa momo, bona kohu ura henia bada, bona ura dika idauidau dainai, hereva ena tubu dala idia koua. Bona au huahua idia atoa lasi. To haida be uhe ia moru tano namona dekenai hegeregere. Hereva idia kamonai, idia abia dae goada, au huahua idia abia. Haida 30, haida 60, haida 100.”

7. Uhe bona tano idauidau be dahaka idia laulaulaia?

⁷ Parabole lalonai Iesu ese aniani idauidau edia uhe ia herevalaia lasi. To, ia ese aniani tamona ena uhe be tano idauidau dekenai idia moru bona edia tubu daladia idauidau ia herevalaia. Tano ginigunana be ia auka; iharuana be ia dobu lasi; ihatoina be ava ginigini amo ia honu; bona namba foa be “tano namona” bona huahua namodia ia havaraia. (Luka 8:8) Unai uhe ese dahaka ia laulaulaia? Ia be Baibel lalonai ia noho Basileia ena sivarai namona. (Mat. 13:19) Unai tano idauidau be dahaka idia laulaulaia? Idia be taunimanima ta ta edia kudouna idauidau ia laulaulaia.​​—Luka 8:​12, 15 duahia.

8. (a) Uhe hadoa tauna be daika ia laulaulaia? (b) Dahaka dainai haida be sivarai namona idia abia dae bona haida be idia abia dae lasi?

⁸ Uhe hadoa tauna be daika ia laulaulaia? Ia be Dirava ida idia gaukara hebou taudia ia laulaulaia, idia ese Basileia ena sivarai namona idia harorolaia. Paulo bona Apolo bamona, idia ese hadohado bona dairia gaukarana idia karaia. Ena be idia hekwarahi bada, to huahua idauidau idia havaraia. Dahaka dainai? Badina kamonai taudia edia kudouna be idauidau. Unai dainai parabole lalonai, uhe hadoa tauna be uhe idia tubu o lasi karana ia biagua diba lasi. Unai be hagoadaia herevana tadikaka bona taihu momo dekenai, badina lagani momo lalonai mai haheauka ida sivarai namona idia harorolaia goadagoada, to taunimanima be idia kamonai lasi! * Dahaka dainai unai be hagoadaia herevana?

9. Aposetolo Paulo bona Iesu be dahaka hagoadaia herevana idia gwauraia?

 ⁹ Basileia ena sivarai ia harorolaia tauna ena abidadama be ia hadoa gauna ese ia atoa huahua amo ia hedinarai lasi. Paulo ena hereva ese unai ia hahedinaraia, ia gwau: “Dirava ese ta ta edia gaukara davana do ia henia, edia hekwarahi hegeregerena.” (1 Kor. 3:8) Dirava ese edia hekwarahi hegeregerena edia davana ia henia, to edia gaukara ese ia havaraia anina dainai edia davana ia henia lasi. Iesu ena hahediba taudia be haroro gaukara amo idia giroa neganai, Iesu be unai point ia hahedinaraia danu. Idia moale bada badina Iesu ena ladana idia gaukaralaia neganai, demoni idia luludia diba. To, ena be idia moale bada, Iesu ese idia ia hamaoroa: “Lauma dikadia ese umui dekenai idia kamonai henia, be do umui moalelaia lasi, to inai sibona mo do umui moalelaia: Umui emui ladana be guba dekenai ia torea vadaeni.” (Luka 10:​17-​20) Ena be sivarai namona ia harorolaia tauna ese kamonai taudia momo be hahediba taudia ai ia halaodia lasi, to namo lasi ita gwau ia be lahedo tauna. Badina kamonai tauna be hahediba tauna ai ia lao totona, ena kudouna be mai anina bada. Gau badana be Dirava sibona ese kamonai tauna ena kudouna ai sivarai namona ena uhe ia hatubua!

Hereva Idia Kamonai Taudia Edia Maduna

10. Hereva ia kamonai tauna be tano namona o lasi, be dahaka ese ia biagua?

¹⁰ Hereva idia kamonai taudia be edena bamona? Edia kara be Dirava ese ia abia hidi vadaeni, a? Lasi. Idia be tano namona eiava lasi be idia sibona ese idia abia hidi. Oibe, tau ta ena kudouna be ia namo eiava ia dika ia lao diba. (Roma 6:​17) Iesu ena parabole lalonai ia gwau, haida be “hereva idia kamonai, to nega tamona Satani ia mai, idia lalonai hadoa hereva gauna ia abia lao.” To unai kara idia koua diba. Iamesi 4:7 ese Keristani taudia ia hagania, ‘Satani do idia tuari henia’ bena idia amo do ia heau oho. Iesu ia gwau haida be mai moale ida hereva momokani idia abia dae, to “idia be ramu lasi dainai” idia moru haraga. To, Baibel ese Dirava ena hesiai taudia ia hagoadaia do idia gini goada, “ramu ese au badana ia dogoatao, ia gini goada bamona,” unai amo ‘edia goada bona aonega dekena amo, Keriso ena lalokau ena lababa, bona ena lata, bona ena ataiai, bona ena dobu, do idia diba momokani. Oibe, lau ura Keriso ena lalokau do idia diba. Unai lalokau ese diba ibounai ia hereaia.’​​—Efe. 3:​17-​19; Kol. 2:​6, 7.

11. Tanobada gaudia laloa momo bona kohu ura henia bada karana dadaraia totona, kamonai tauna ese dahaka do ia karaia?

¹¹ Hereva idia kamonai taudia haida be “tanobada gaudia dekenai laloa momo, bona kohu ura henia bada, bona ura dika idauidau dainai, hereva ena tubu dala idia koua.” (1 Tim. 6:​9, 10) Edena bamona unai idia dadaraia diba? Paulo ia gwau: “Moni do umui ura henia dikadika lasi. To umui dekenai ia noho gauna, be inai bamona do umui laloalaia, ‘Lau dekenai noho gauna be namo, ia hegeregere vadaeni.’ Badina be Dirava be inai bamona ia hereva, ia gwau: ‘Lau ese umui do lau negea lasi, bona umui do lau rakatania lasi. Lasi bona lasi momokani.’ ”​​—Heb. 13:5.

12. Dahaka dainai tano namona ese ia laulaulaia taudia be huahua idauidau idia atoa?

¹² Parabole dokonai Iesu ia gwau, tano namona ai idia moru uhe be huahua idia atoa, “haida 30, haida 60, haida 100.” Ena be hereva idia kamonai taudia haida edia kudouna be ia namo bona huahua idia atoa, to edia noho dalana hegeregerena sivarai namona idia harorolaia. Hegeregere, haida be idia buruka o gorere dainai, edia haroro gaukara idia habadaia diba lasi. (Mareko 12:​43, 44 hahegeregerea.) Oibe, uhe hadoa tauna ese ia hadoa uhena be huahua hida do ia atoa ia biagua diba lasi, to ia moale badina ia hadoa uhena be Iehova ese ia hatubua.​​—Salamo 126:​5, 6 duahia.

Ia Mahuta Uhe Hadoa Tauna

13, 14. (a) Uhe hadoa tauna ena parabole mani oi gwauraia. (b) Uhe hadoa tauna be daika bona uhe be dahaka ia laulaulaia?

¹³ Mareko 4:​26-​29 ai, uhe hadoa tauna ma ta ena haheitalai ita davaria: “Dirava ena Basileia  be inai bamona: Tau ta tano latanai uhe ia negea. Hanuaboi ia mahuta, dina neganai ia toreisi, vadaeni uhe hadoa gauna ia tubu bona ia vara, to hadoa tauna ia diba lasi edena bamona uhe ia tubu. Tano sibona ese huahua ia havaraia, rau ia tubu guna, gabeai kwarana, inai murinai be anina ia vara. To anina ia mage neganai, karaharaga ia utua kaia dekenai, badina huahua gogoa negana ia ginidae.”

¹⁴ Unai uhe hadoa tauna be daika? Kerisendom taudia haida idia gwau unai be Iesu ia laulaulaia. To, Iesu be ia mahuta bona ia diba lasi uhe be edena bamona idia tubu, a? Lasi, Iesu be uhe edia tubu dalana ia diba! To, inai uhe hadoa tauna be guna ai herevalaia bamona, Basileia ena sivarai idia harorolaia taudia ia laulaulaia. Edia haroro goadagoada karana amo Basileia ena uhe idia hadoa. Tano dekenai idia negea uhe be idia harorolaia herevana ia laulaulaia. *

15, 16. Uhe korikorina bona hahediba taudia halaoa gaukarana be edena bamona idia hegeregere?

¹⁵ Iesu ia gwau uhe hadoa tauna be “hanuaboi ia mahuta, dina neganai ia toreisi.” Uhe hadoa tauna be ia lahedo lasi, to Iesu be vaia taunimanima edia mauri lalonai idia karaia gauna ia herevalaia. Danu, Iesu be unai nega ai ia vara gauna ia herevalaia, ia gwau: “Vadaeni uhe hadoa gauna ia tubu bona ia vara.” Ma ia gwau: “To hadoa tauna ia diba lasi edena bamona uhe ia tubu.” Mai anina bada gauna be “tano sibona ese huahua ia havaraia.” *

¹⁶ Iesu ena hereva anina be dahaka? Oi itaia Iesu ese uhe ena kahana ta ta idia tubu metairametaira dalana ia herevalaia. “Tano sibona ese huahua ia havaraia, rau ia tubu guna, gabeai kwarana, inai murinai be anina ia vara.” (Mar. 4:​28) Unai uhe be metairametaira ia tubu, bona nega korikori ai kahana idauidau idia hedinarai. Ena tubu dalana ita haharagaia diba lasi. Taunimanima be hahediba taudia ai idia lao be unai bamona danu. Iehova ese kudou-maoro taudia edia kudouna lalonai hereva momokani be nega korikori ai ia hatubua.​​—Kara 13:48; Heb. 6:1.

17. Uhe be anina ia havaraia neganai daidia idia moale?

¹⁷ “Anina ia mage neganai,” uhe hadoa tauna be edena dala ai huahua ia gogoa? Iehova ese Basileia ena hereva momokani be hahediba  taudia matamatadia edia kudouna lalonai ia hatubua neganai, Dirava idia lalokau henia bona edia mauri idia gwauhamatalaia Iena ura idia karaia totona. Bena, edia gwauhamata be ranu bapatisona amo idia hamomokania. Idia goada idia lao tadikaka be kongrigeisen lalonai maduna haida idia huaia diba. Kamonai tauna be hahediba tauna ai ia lao neganai, ena be Basileia idia harorolaia taudia ma haida be unai uhe idia hadoa lasi, to idia bona Basileia ena uhe ia hadoa tauna do idia moale hebou. (Ioane 4:​36-​38 duahia.) Oibe, uhe “hadoa tauna bona utua tauna be do idia moale hebou.”

Ita Dibaia Gaudia

18, 19. (a) Iesu ena parabole ita herevalaia neganai, dahaka ese oi ia durua bada? (b) Stadi herevana iharuana ai dahaka do ita herevalaia?

¹⁸ Mareko karoa 4 lalonai idia noho parabole rua amo dahaka ita dibaia? Ita dibaia gauna be ita be mai iseda gaukara​​—Basileia ena uhe hadoa gaukarana unai. Namo lasi hekwakwanai ta dainai, ita be haroro gaukara ita reaia. (Had. 11:4) Namona be ita laloatao, Dirava ida ita gaukara hebou be hahenamo badana. Iehova ese iseda hekwarahi do ia hanamoa bona sivarai namona idia kamonai taudia do ia durua hahediba taudia ai idia lao totona. Ita laloparara tau ta be hahediba tauna ai do ia lao karana ita haharagaia diba lasi. Unai dainai, bema kamonai tauna be hahediba tauna ai ia lao haraga lasi, namona be ita hesiku lasi o lalohisihisi lasi. Ita moale badina Iehova ia gwau ita be gaukara namona ita karaia badina Iena hereva ita kamonai bona ia henia gaukarana, ‘Basileia sivarai namona be tanobada ibounai dekenai ita harorolaia’ noho.​​—Mat. 24:14.

¹⁹ Basileia harorolaia gaukarana bona kamonai tauna be hahediba tauna ai ia lao ena tubu dalana dekenai, Iesu ese dahaka gau ma haida ia hadibaia? Unai henanadai ena haere be Evanelia bukadia lalonai idia noho parabole ma haida amo do ita tahua. Stadi herevana iharuana lalonai unai parabole haida do ita stadilaia.

[Footnotes]

Oi Laloatao, A?

• Uhe korikorina hadoa gaukarana bona Basileia ena sivarai harorolaia gaukarana be edena bamona idia hegeregere?

• Iehova ese Basileia ia harorolaia tauna ena gaukara davana be edena bamona ia henia?

• Uhe korikorina bona hahediba taudia halaoa gaukarana be edena bamona idia hegeregere?

• Edena dala ai uhe “hadoa tauna bona utua tauna be do idia moale hebou”?

[Study Questions]

[Picture on page 13]

Dahaka dainai Iesu ese Dirava ena Basileia ia harorolaia tauna be uhe hadoa tauna ida ia hahegeregerea?

[Picture on page 15]

Tano namona ese ia laulaulaia taudia be mai kudouna ibounai ida, edia goada hegeregerena ai Basileia idia harorolaia

[Picture on page 16]

Dirava sibona ese uhe ia hatubua