Emu Goada Hegeregerena Oi Gaukara Bena Do Oi Moale

“LAU karaia diba lasi!” Oi be nega hida unai bamona oi hereva, badina oi karaia palani oi hagugurua diba lasi? Reana, Keristani sina matamatana ta be unai bamona ia hereva, badina ena beibi naria totona nega bona goada ibounai ia henia, bena ia hegeregere lasi Dirava ia tomadiho eiava hesiai henia diba totona. Reana, Keristani tauna ta be ia maragi neganai, iena tama sina ese idia kara auka henia dainai, ia mamia ia be hegeregere lasi kongrigeisen lalonai maduna idauidau ia hagugurua totona. Reana, taihu buruka ta be ia lalohisihisi, badina hari ena goada be hegeregere lasi haroro gaukara ia karaia totona. Christiane ia ura painia gaukara ia karaia to ena ruma bese maurina dainai ia hegeregere lasi, bona ia gwau: “Ma haida idia hagoadaia painia gaukara karaia totona tok idia henia neganai, nega haida lau tai.”

Edena dala ai unai bamona hemami ita hanaia diba? Keristani taudia haida be edena dala ai mai lalohadai maorona ida edia tahua gaudia idia abia hidi? Mai laloa maoromaoro ida ita hagugurua gaudia sibona ita abia hidi ena namo be dahaka?

Laloa Maoromaoro

Aposetolo Paulo ese moale ita davaria dalana ta ia herevalaia, ia gwau: “Nega ibounai do umui moale, Lohiabada lalonai umui noho dainai. Ma lau gwau lou: Do umui moale. Emui manau bona manada kara taunimanima ibounai edia vairanai do umui hedinaraia.” (Fili. 4:​4, 5) Iseda hesiai gaukara ita moalelaia totona, namona be iseda diba, goada bona noho dalana hegeregerena ita hagugurua diba gaudia ita laloa namonamo. Bema iseda goada be hegeregere lasi gau ta ita karaia guguru totona, to sibona ita fosia, do ita lalohisihisi. To danu, ita ura lasi ita be sibona dekenai ita hebogahisi bona ekskius ita karaia dainai, Keristani hesiai gaukarana ita karaia badabada lasi.

Herevana iseda noho dalana be edena bamona, Iehova ia ura mai iseda lalona ibounai bona kudouna ibounai ida Iena hesiai gaukara ita karaia. (Kol. 3:​23, 24) Bema unai bamona ita karaia lasi, ita be iseda gwauhamata Dirava dekenai ita hagugurua lasi. (Roma 12:1) Mai iseda kudouna ibounai ida Dirava ita hesiai henia lasi dainai, moale korikorina bona hahenamo ma haida do ita reaia.​​—Aon. 10:22.

Baibel lalonai inai hereva “laloa manada” anina be ma ta kara namo henia eiava ma ta ena lalohadai ita abia dae. (Iam. 3:​17) Danu, ena anina ma ta be, Keristani tauna be sibona dekenai taravatu aukadia ia atoa lasi. Unai amo ia hahedinaraia iena diba, goada bona noho dalana ia laloa namonamo. Unai oi karaia be auka, a? Taunimanima haida be sibona dekenai taravatu aukadia idia atoa, to ma haida idia laloa bada bona idia kara namo henidia. Hegeregere, bema iseda turana namona ta be gaukara ta karaia totona sibona ia fosia ela  bona ia gorere, do ita hereva henia iena kara haida ia haidaua totona, ani? Unai hegeregerena, bema ita laloparara, iseda goada be hegeregere lasi ita ura karaia gaudia karaia totona, iseda lalohadai ita haidaua be namo.​​—Aon. 11:17.

Bema ita maragi neganai iseda tama sina ese ita idia fosia gau ibounai ita karaia totona, ita karaia guguru gaudia sibona abia hidi karana do ita diba lasi. Haida idia mamia idia maragi neganai, edia tama sina ese idia lalokau henidia totona, gaukara ibounai do idia karaia be namo. Bema ita dekenai unai ia vara, reana Iehova ese ita ia laloa bada karana do ita abia dae be auka. Iehova be ita ia lalokau henia badina ita be mai iseda kudouna ibounai ida Ia ita hesiai henia. Dirava ena Hereva ese ita ia hagoadaia, ia gwau, Iehova ‘ia diba, ita be tanobada ena kahu dekena amo ita ia karaia, bona ia laloatao ita be kahu sibona.’ (Sal. 103:​14) Ena be Iehova ia diba ita hegeregere lasi gau haida karaia totona, to mai iseda ura ibounai ida Ia ita hesiai henia neganai, ita do ia lalokau henia. Dirava be bosi aukana lasi, bema unai ita laloatao, ita karaia diba gaudia bona ita karaia diba lasi gaudia do ita laloa namonamo bona abia hidi maorona do ita karaia.​​—Mika 6:8.

To, haida be unai bamona idia karaia be auka. Bema oi be unai bamona, namona be oi ia diba namonamo lo Keristani tadikaka o taihu ta oi noia oi ia durua totona. (Aon. 27:9) Hegeregere, oi ura regula painia gaukara oi karaia, a? Unai be tahua gauna namona! To, oi hagugurua be auka, a? Reana, unai lo tadikaka o taihu ese oi ia durua diba emu noho dalana oi haidaua totona. Eiava, ena heduru dainai oi laloparara hari inai negai, emu famili ena maduna momo dainai, reana oi be hegeregere lasi painia gaukara oi karaia totona. Ena heduru amo oi laloparara, oi be hegeregere painia gaukara oi karaia totona eiava emu noho dalana dekenai gau haida oi haidaua be namo. Headava tauna be ena adavana ia durua diba, ena goada hegeregerena ia karaia gaudia sibona ia karaia totona. Hegeregere, ia hamaoroa diba hua ta dokona ai do ia laga-ani sisina be namo, unai amo hua matamatana ai mai goada ida do ia haroro bona ena hesiai gaukara ia moalelaia diba.

Oi Karaia Diba Gaudia Oi Tahua

Ita buruka eiava ita gorere neganai, Iehova ena hesiai gaukara lalonai gau haida ita karaia diba lasi. Bema oi be tama o sina ta, reana do oi laloa stadi o Keristani hebou lao henia karana amo namo ta do oi davaria lasi, badina emu goada bona nega bada be emu natu maragidia dekenai oi haorea. To, reana oi karaia diba lasi gaudia oi lalohekwarahilaia momo dainai, oi karaia diba gaudia oi hagugurua lasi, a?

Lagani tausen momo gunanai, Levi tauna ta be ia hagugurua diba lasi gauna ta ia ura karaia. Lagani ta ta lalonai dubu helaga dekenai wiki rua ia gaukara. To, ia ura dikadika boubou patana badinai do ia noho hanaihanai. (Sal. 84:​1-3) Dahaka ese unai abidadama tauna ia  durua bena ia abia dae, wiki rua lalonai dubu helaga dekenai ia gaukara be hegeregere? Ia laloparara dubu helaga lalonai dina tamona ia noho karana ese gau ibounai ia hereaia. (Sal. 84:​4, 5, 10) Unai hegeregerena, namo lasi ita karaia diba lasi gaudia ita lalohekwarahilaia momo, to namona be ita laloparara iseda goada hegeregerena ita hagugurua diba gaudia ita karaia.

Hegeregere Canada dekenai ia noho taihu ta, Nerlande, ena haheitalai mani oi laloa. Ia be nega ibounai uilisea dekenai ia helai bona ia mamia haroro gaukara lalonai gau momo ia karaia diba lasi. To, gabeai iena lalohadai ia haidaua bona iena gabu badinai ia noho sitoa badana be iena haroro teritori ai ia halaoa. Ia gwau: “Sitoa gabuna ai, helai gauna ta ena badinai egu uilisea ai lau helai. Lau moale badina, laga-ani totona idia helai taudia be nega kwadogina lalonai lau haroro henidia diba.” Nerlande be unai haroro dalana ia moalelaia.

Gau Haida Oi Haidaua

Lai badana ia toa neganai, lagatoi be ia heau haraga diba. To, bema lai goadana ia toa bona medu badana ia diho, lagatoi tauna ese palai do ia hadihoa be namo. Ia ese lai goadana ia koua diba lasi, to palai ia haidaua diba, unai amo iena lagatoi ena heau dalana ia biagua diba. Unai hegeregerena, nega momo iseda mauri lalonai ita davaria medu bona lai bamona hekwakwanai ita koua diba lasi. To, bema iseda lalohadai, hemami bona goada gaukaralaia dalana ita haidaua, iseda noho dalana ita biagua namonamo diba. Iseda mauri lalonai ita haidaua gaudia ita laloa namonamo neganai, Dirava ena hesiai gaukara do ita moalelaia noho.​​—Aon. 11:2.

Mani inai haheitalai haida oi laloa. Bema ita mamia ita hesiku bada, namona be daba kahanai gaukara metaudia ita karaia lasi, unai amo do ita hegeregere adorahi ai, Keristani hebouna dekenai ita lao totona. Unai amo iseda Keristani tadikaka taihu edia hebamo ese ita ia hagoadaia diba. Eiava, bema sina ta ena natuna ia gorere dainai ruma-ta-ruma-ta haroro gaukara ia lao lasi, reana ia ese taihu ma ta ia noia ena ruma dekenai do ia mai bona natuna ia mahuta lalonai, idia ruaosi be telefon amo taunimanima idia haroro henidia diba.

Edena bamona bema oi be nega lasi, hebou gaudia oi hegaegaelaia totona? Oi itaia edena gaudia be oi hegaegaelaia diba bona unai oi karaia namonamo. Iseda tahua gaudia ita  haidaua neganai, do ita moale bona Dirava ena hesiai gaukara do ita karaia noho.

Iseda tahua gaudia ita haidaua totona, do ita hekwarahi be namo. France dekenai Serge bona Agnès be edia palani idia haidaua. Serge ia gwau: “Agnès ia rogorogo neganai, ai diba misinari gaukarana do ai karaia palani be do ai hagugurua diba lasi.” Hari Serge be mai ena natuna kekeni namodia rua, bona ia bona adavana ese tahua gauna matamatana idia abia hidi karana ia herevalaia, ia gwau: “Tano idauna ta ai misinari gaukarana ai karaia diba lasi dainai, emai lalona ai hadaia emai tano dekenai ‘misinari’ gaukara do ai karaia bona gado idauna ta ena grup ai bamoa.” Tahua gauna matamatana idia abia hidi dainai, dahaka namo idia davaria? Serge ia gwau: “Ai be kongrigeisen lalonai tadikaka taihu ai durua diba.”

France dekenai, taihu ta ladana Odile, ena mauri lagani be 70 bamona be roki gorerena ia abia bona ia gini daudau diba lasi. Ena gorere dainai ruma-ta-ruma-ta haroro gaukara ia lao lasi neganai, ia lalohisihisi bada. To, unai ese ia koua lasi. Ena haroro dalana ia haidaua bona telefon amo taunimanima ia haroro henidia. Ia gwau: “Lau laloa do ia auka to ia be auka lasi bona lau moalelaia bada!” Inai haroro gaukara dalana dainai ena hesiai gaukara ia moalelaia bada.

Lalohadai Maorona ese Hahenamo Ia Mailaia

Mai lalohadai maorona ida ita hagugurua gaudia ita abia hidi neganai, do ita lalohisihisi lasi. Unai bamona ita karaia neganai, ena be gau haida dekenai ita hegeregere lasi, to ita moale badina ma gau haida ita karaia guguru diba. Ena be ita karaia gauna be maragi sibona, to ita moale.​​—Gal. 6:4.

Iseda goada hegeregerena Dirava ita hesiai henia karana ita lalopararalaia neganai, unai ese ita ia durua iseda Keristani tadikaka taihu ita lalodia bada totona. Ita idia durua totona idia karaia gaudia dainai, idia do ita tanikiu henia bada. Edia heduru dainai, tanikiu herevana ita gwauraia neganai, kongrigeisen lalonai lalotamona bona heduru heheni karana ita habadaia. (1 Pet. 3:8) Namona be ita laloatao, iseda lalokau Tamana, Iehova, be ita ia fosia lasi ita hagugurua diba lasi gaudia ita karaia totona. To, ita karaia diba gaudia ita abia hidi bona ita karaia guguru neganai, Iehova tomadiho henia karana do ita moalelaia bada.

[Blurb on page 29]

Iehova tomadiho henia karana ita moalelaia totona, namona be iseda diba, goada bona noho dalana hegeregerena ita karaia diba gaudia sibona ita abia hidi

[Picture on page 30]

Nerlande be haroro gaukara lalonai ia karaia diba gauna ia moalelaia

[Picture on page 31]

“Palai” haidaua dalana ita dibaia be namo

[Credit Line]

© Wave Royalty Free/age fotostock

[Picture on page 32]

Serge bona Agnès ese edia tahua gauna idia haidaua bona hahenamo idia davaria