Korinto Bukadia Edia Hereva Badadia
Iehova Ena Hereva be Ia Mauri Noho
Korinto Bukadia Edia Hereva Badadia
APOSETOLO Paulo be Korinto kongrigeisen ia laloa momo. Ia kamonai unuseniai tadikaka taihu be lalotamona ai idia noho lasi. Kongrigeisen amo matabodaga taudia idia kokia lasi. Kongrigeisen taudia be Paulo idia tore henia bona gau haida idia henanadailaia danu. Unai dainai lagani 55 C.E. ai, Paulo be Efeso dekenai ena laolao ihatoina ia karaia lalonai, Korinto taudia dekenai do ia siaia revareva ginigunana ia torea.
Revareva iharuana be hua haida murinai ia torea—revareva ginigunana ai ia torea gaudia ia herevalaia badabada totona. Aposetolo edia negai, Korinto kongrigeisen lalonai bona murimurinai idia vara gaudia momo be hari idia vara gaudia hegeregerena dainai, Paulo ese Korinto taudia dekenai ia siaia revarevadia be mai anina bada ita dekenai.—Heb. 4:12.
‘UMUI NARIA NAMONAMO, UMUI GINI GOADA’
Paulo ia gwau, “hereva tamona do umui gwauraia.” (1 Kor. 1:10) “Dirava ese du korikori ia atoa vadaeni,” unai du be Iesu Keriso—ia latanai be Keristani karadia idia haginia. (1 Kor. 3:11-13) Paulo ese kongrigeisen lalonai sihari kava karadia ia karaia tauna be inai bamona ia herevalaia: “Unai kara dika tauna be emui orea dekena amo umui atoa siri.” (1 Kor. 5:13) Ia gwau: “Iseda tauanina be lebulebu bona sihari kava karadia karaia totona lasi. Lasi, iseda tauanina ta ta be Lohiabada ena.”—1 Kor. 6:13.
Korinto taudia “[idia] torea hereva” haida dainai, Paulo be headava taudia bona headava lasi taudia dekenai sisiba namona ia henia. (1 Kor. 7:1) Paulo ese kwara dagina, Keristani heboudia karaia namonamo dalana, bona toreisi lou ia herevalaia murinai, ia gwau: “Umui naria namonamo, abidadama dekenai umui gini goada, metau ibounai lalonai do umui haheauka, do umui goada.”—1 Kor. 16:13.
Baibel Henanadaidia Edia Haere:
1:21—Iehova be “hereva kavakava” ia gaukaralaia abidadama taudia ia hamauria totona, a? Lasi. To “tanobada taudia ese sibona edia aonega dekena amo Dirava idia davaria diba lasi” dainai, idia dekenai Dirava ena hereva—taunimanima hamauria totona ia gaukaralaia herevadia—be kavakava bamona.—Ioa. 17:25.
5:5—“Tau dikana be Satani dekenai do umui henia, iena tauanina be Satani ese do ia hamasea totona. Vadaeni iena lauma ese mauri do ia davaria.”—Unai hereva ena anina be dahaka? Kara dika badana ta ia karaia bona ia helalo-kerehai lasi tauna ta be kongrigeisen amo idia atoa siri neganai, ia be Satani ena tanobada tauna ta ai ia lao lou. (1 Ioa. 5:19) Unai dainai, unai tau be Satani dekenai idia henia bamona. Kongrigeisen amo kara dika tauna idia atoa siri anina be, iena kara dikadia be kongrigeisen amo idia kokia danu, unai amo ia ese kongrigeisen ena lauma—o kara namodia—ia hadikaia lasi.—2 Tim. 4:22.
7:33, 34—Inai hereva “tanobada gaudia,”—headava tau o hahine ese idia laloa gaudia—ena anina be dahaka? Paulo ese aniani, dabua, ruma o unai bamona gaudia ia herevalaia, bona Keristani headava taudia ese unai gaudia idia laloa be namo. To Paulo be tanobada ena gau dikadia, Keristani taudia ese idia dadaraia gaudia unai, ia herevalaia lasi.—1 Ioa. 2:15-17.
11:26—Paulo be Iesu ena mase laloatao karana ia herevalaia neganai, ia be inai hereva “negadia ibounai” ia gaukaralaia danu. Unai hereva “negadia ibounai” ena anina be dahaka, bona “ela bona” edena negai? Unai hereva anina be, lagani ta ta ai, nega tamona o Nisan 14 ai, Keristani horoa taudia ese paraoa idia ania bona uaina idia inua neganai, idia be Lohiabada ena mase idia gwauraia hedinarai. Idia be unai bamona do idia karaia ela bona Lohiabada do ia giroa mai, anina be idia be guba dekenai do idia daekau.—1 Tes. 4:14-17.
13:13—Edena dala ai lalokau be abidadama bona Dirava ena gwauhamata naria karana ia hereaia? Dirava ena gwauhamata o ita abidadama henia gauna ia guguru neganai, abidadama bona Dirava ena gwauhamata naria karana idia ore unai. (Heb. 11:1) To lalokau be unai bamona lasi badina do ia noho hanaihanai.
15:29—Inai hereva, “bapatiso idia abia mase taudia totona,” ena anina be dahaka? Inai siri lalonai, Paulo ia gwau lasi, mauri taudia be bapatiso idia abia mase taudia totona. Lasi. Paulo be horoa Keristani taudia edia bapatiso karana ia herevalaia, badina edia mauri lalonai Dirava idia badinaia ela bona idia mase bona lauma tauanina dekenai idia toreisi lou.
Ita Dibaia Gaudia:
1:26-31; 3:3-9; 4:7. Bema ita hekokoroku lasi to Iehova ena kara ita heagilaia, kongrigeisen lalonai lalotamona do ia noho.
2:3-5. Paulo be Korinto—Greek diba bada taudia edia sikuli gabuna—dekenai ia haroro neganai, reana Paulo ia laloa momo gauna be, taunimanima be ia harorolaia herevadia do idia abia dae eiava lasi. To gau ta ese ia koua lasi o ia gari lasi dainai, Dirava ese ia henia gaukarana ia karaia noho. Unai hegeregerena, namo lasi gau haida ese ita idia koua bena Dirava ena Basileia ena sivarai namona ita harorolaia lasi. To Iehova ita abidadama henia noho, Paulo ia karaia bamona.
2:16. “Keriso ena laloa ita abia” ena anina be iena lalohadai ita diba, iena kara ita lalopararalaia, bona iena haheitalai ita tohotohoa. (1 Pet. 2:21; 4:1) Iesu ena mauri bona ena haroro gaukara sivaraina ita stadilaia be mai anina bada!
3:10-15; 4:17. Namona be Baibel stiuden taudia hadibaia karana o hahediba taudia halaoa gaukarana ita laloa bona hanamoa. (Mat. 28:19, 20) Bema iseda stiuden ita hadibaia namonamo lasi reana hahetoho do ia hanaia lasi, bona ita be do ita lalohisihisi bada, “lahi lalona dekena amo” idia hamauria tauna ta bamona.
6:18. ‘Heudahanai karadia ita rakatania’ anina be matabodaga (por·neiʹa) karadia ibounai ita dadaraia, hegeregere ponografi laulaudia itaia karana, kara mirodia, lalohadai mirodia, hauraia kava karadia—unai bamona karadia ese ta ia veria diba ia adavaia lasi tauna (o hahine) ida ia mahuta hebou totona.—Mat. 5:28; Iam. 3:17.
7:29. Headava taudia idia naria namonamo be namo, namo lasi edia mauri lalonai edia headava sibona idia laloa bada dainai Basileia gaudia idia laloa maragi.
10:8-11. Israela taudia be Mose bona Arona idia maumauraia neganai, Iehova ia badu. Namona be ita naria namonamo, bona maumau karana ita manadalaia lasi.
16:2. Bema hanaihanai ita palani namonamo guna, vadaeni nega ibounai iseda kontribusen moni amo tanobada ibounai haroro gaukarana do ita durua.
‘NEGA IBOUNAI EMUI LALOHADAI UMUI HAMAOROMAOROA’
Paulo ese Korinto taudia ia hamaoroa, sisiba ia abia kara dika tauna ia helalo-kerehai neganai, ena ‘dika do idia gwauatao, bona iena lalona do idia hagoadaia be namo.’ Ena be unai revareva ginigunana ese Korinto taudia edia lalona ia hahisia, to Paulo ia gwau ia moale badina ‘idia edia lalohisihisi ese lalona giroa ia havaraia.’—2 Kor. 2:6, 7; 7:8, 9.
Korinto taudia be ‘kara namodia momokani idia karaia noho’ dainai, Paulo ese idia ia hagoadaia “henia kara” do idia karaia noho totona. Paulo be ia idia inai henia taudia ia haere henia murinai, Korinto taudia ia hamaoroa: “Do umui moale, do umui namo momokani, [“Nega ibounai . . . emui lalohadai umui hamaoromaoroa,” NW ] do umui goada, do umui laloa tamona, maino lalonai do umui noho.”—2 Kor. 8:7; 13:11.
Baibel Henanadaidia Edia Haere:
2:15, 16—Edena dala ai ita be “Keriso ena bonana namona” bamona? Baibel ena hereva ita badinaia bona ita harorolaia dainai, ita be Keriso ena bonana namona bamona. Kara dika taudia dekenai “Keriso ena bonana namona” be bonana dikana bamona, to Iehova bona kudou-maoro taudia dekenai unai be bonana namona bamona.
5:16—Horoa Keristani taudia ese “tau ta, iena toana sibona dekena amo do [idia] laloa lasi” ena anina be dahaka? Idia be taunimanima ena toana, taga, bese, iduhu o tano idau tauna idia laloa bada lasi. Lasi, to idia dekenai tadikaka taihu tura henia karana be mai anina bada.
11:1, 16; 12:11—Oi laloa Paulo be Korinto taudia dekenai kavakava herevadia ia gwauraia, a? Lasi. Paulo ia gwau ia be aposetolo tauna dainai, haida idia laloa ia hekokoroku bona ia laloa namonamo lasi.
Ita Dibaia Gaudia:
3:5. Inai siri ese ia hahedinaraia, Iehova ese Baibel, lauma helaga, bona iena orea amo Keristani taudia ia hadibaia dainai, idia hegeregere haroro gaukara idia karaia totona. (Ioa. 16:7; 2 Tim. 3:16, 17) Unai dainai, namona be hanaihanai Baibel bona Baibel bukadia ita stadilaia namonamo, lauma helaga totona ita guriguri loulou, Keristani heboudia ita lao henia hanaihanai bona ita haere.—Sal. 1:1-3; Luka 11:10-13; Heb. 10:24, 25.
4:16. ‘Iseda lauma [“lalona,” BHğ ] be dina ibounai’ Iehova ese ia hamatamataia, unai dainai hanaihanai Iehova ese ita dekenai ia henia gaudia amo diba ita abia—anina be, dina ta ta ai iseda hetura karana Dirava ida ita hagoadaia be gau badana.
4:17, 18. Bema ita laloatao ita “abia noho hisihisi be metau lasi gaudia, bona do idia noho nega daudau lasi,” unai ese ita ia durua metau negadiai Iehova ita abidadama henia noho totona.
5:1-5. Horoa Keristani taudia be guba helarona do idia abia ena moale be Paulo ese ia herevalaia namo herea!
13:5. ‘Ita sibona eda kara do ita tahua, ita be abidadama korikori taudia o lasi,’ anina be ita itaia iseda kara be Baibel amo ita dibaia gaudia hegeregerena eiava lasi. ‘Iseda mauri do ita tohoa’ anina be, ita tahua ita be Dirava ita tura henia eiava, bona ita tahua iseda “lalona” o iseda abidadama be edena bamona. (Heb. 5:14; Iam. 1:22-25) Paulo ena hagoadaia hereva namodia ita badinaia neganai, ita be hereva momokani ena dala dekenai do ita raka noho.
[Picture on page 26, 27]
Inai hereva, “inai paraoa umui ania, bona inai kapusi umui inua negadia ibounai,” ena anina be dahaka?—1 Kor. 11:26