Ruma-Ta-Ruma-Ta Haroro Gaukara Hanamoa Dalana
Ruma-Ta-Ruma-Ta Haroro Gaukara Hanamoa Dalana
“Dirava ese ai ia hagoadaia, vadaeni Sivarai Namona, Dirava dekena amo ia mai gauna, umui dekenai ai gwauraia, mai gari lasi danu.”—1 TES. 2:2.
1. Ieremia be dahaka hekwakwanai ia davaria, bona edena dala ai ia hanaia?
IEHOVA be Ieremia dekenai peroveta dagina ia henia, “bese idauidau” dekenai ia haroro totona. To, Ieremia ia gari bona ia gwau: “Lohiabada Dirava e, lau be hereva dalana lau diba lasi, lau be mero sibona.” Ena be Ieremia ia gari, to Iehova dekenai ia tabekau dainai, unai gaukara ia karaia. (Ier. 1:4-10) Lagani 40 mai kahana lalonai, taunimanima be Ieremia idia kamonai henia lasi, idia dadaraia, idia kirikirilaia, bona idia botaia. (Ier. 20:1, 2) Nega haida, Ieremia ia ura haroro gaukara ia rakatania. To, ia gini goada bona momo ese idia badulaia herevana ia harorolaia. Ieremia sibona be unai gaukara ia karaia diba lasi, to Dirava ese ia hagoadaia dainai unai gaukara ia karaia diba.—Ieremia 20:7-9 duahia.
2, 3. Edena dala ai hari Dirava ena hesiai taudia be Ieremia bamona?
2 Hari inai negai, Dirava ena hesiai taudia momo edia hemami be Ieremia ena hemami bamona. Matamanai, nega ginigunana ruma-ta-ruma-ta haroro gaukara ita laloa neganai, reana ita gwau, ‘Do lau karaia diba lasi.’ To, gabeai ita laloparara Iehova ia ura sivarai namona ita harorolaia, unai dainai iseda gari ia ore bona haroro gaukara ita karaia goadagoada. To nega momo, eda mauri lalonai gau ma haida idia vara dainai, haroro gaukara ita karaia noho be ia auka. Oibe, nega ginigunana ruma-ta-ruma-ta haroro gaukara ita karaia, eiava unai gaukara ita karaia noho ela bona dokona be mai ena hekwarahi.—Mat. 24:13.
3 Bema oi be Baibel oi stadilaia bona hanaihanai kongrigeisen heboudia dekenai oi mai, to oi gari ruma-ta-ruma-ta haroro gaukara oi hamatamaia totona be edena bamona? Eiava oi be bapatiso oi abia vadaeni bona emu tauanina ia goada, to ruma-ta-ruma-ta haroro gaukara oi karaia be ia auka be edena bamona? Namona be oi diba, tadikaka taihu danu be idia gaukara goada ruma-ta-ruma-ta haroro gaukara idia hanamoa totona, herevana edia noho dalana be idauidau. Iehova be oi ia hagoadaia diba, unai bamona oi karaia totona.
Mai Gari Lasi Danu Haroro
4. Dahaka ese Paulo ia durua mai gari lasi danu sivarai namona ia harorolaia totona?
4 Oi itaia diba taunimanima edia goada o aonega lasi, to Dirava ena lauma helaga dainai tanobada hegegemadai haroro gaukara ia bada ia lao. (Sek. 4:6) Keristani taudia ta ta edia hesiai gaukara dekenai, unai be momokani danu. (2 Kor. 4:7) Aposetolo Paulo mani ita laloa. Nega ta ia bona ena misinari turadia be edia inai taudia ese idia dagedage henidia neganai, Paulo ia gwau: “Umui diba, guna Filipi hanua dekenai ai lao neganai, be ai dekenai idia dagedage, bona ai idia hisihisi henia. Umui dekenai ai mai neganai tau momo ese ai idia koua gwauraia. To Dirava ese ai ia hagoadaia, vadaeni Sivarai Namona, Dirava dekena amo ia mai gauna, umui dekenai ai gwauraia, mai gari lasi danu.” (1 Tes. 2:2; Kara 16:22-24) Ita itaia, ena be Paulo be haroro goadagoada tauna to hekwakwanai ia davaria danu. To ita bamona, ia be Iehova dekenai ia tabekau dainai, mai gari lasi danu sivarai namona ia harorolaia diba. (Efeso 6:18-20 duahia.) Edena dala ai Paulo ena haheitalai ita tohotohoa diba?
5. Dahaka ese ita ia durua diba mai gari lasi danu ita haroro totona?
5 Mai gari lasi ida ita haroro totona, Dirava ita guriguri henia be namo. Painia ta ia gwau: “Lau guriguri mai gari lasi ida lau hereva totona, lau guriguri taunimanima ese sivarai namona idia abia dae totona, bona lau guriguri haroro gaukara lalonai moale lau davaria totona. Momokani, inai gaukara be Iehova ena gaukara dainai, Iena heduru amo inai gaukara ita karaia diba.” (1 Tes. 5:17) Namona be ita ibounai ita guriguri loulou Dirava ena lauma helaga ese ita ia durua totona, unai amo mai gari lasi danu ita haroro diba.—Luka 11:9-13.
6, 7. (a) Esekiela be dahaka matahanai ia abia, bona anina be dahaka? (b) Unai matahanai ese edena dala ai Dirava ena hesiai taudia ia durua?
6 Esekiela bukana be dala ma ta ia gwauraia, bona unai ese ita ia durua diba mai gari lasi danu ita haroro totona. Matahanai ta lalonai, Iehova be Esekiela dekenai lokua bukana ta—“kahana ruaosi dekenai be lalohisihisi ena boiboi bona mase ena taitai sivarai idia torea”—ia henia. Bena Iehova be Esekiela ia hamaoroa: “Tanobada tauna e, inai oi lau henia buka oi ania, oiemu bogana ia dekena amo do oi hahonua.” Unai matahanai ena anina be dahaka? Anina be Esekiela ese do ia harorolaia herevana ena anina ia lalopararalaia namonamo guna be gau badana. Esekiela ma ia gwau: “Vadaeni buka lau ania, bona iena mamina be namo herea, hani bamona.” Esekiela dekenai, taunimanima vairanai Dirava ena hereva do ia harorolaia be moale gauna—ena mamina be hani bamona. Ia mamia Dirava ena gwaukau tauna ai ia lao bona Iena hesiai gaukara ia karaia be hahenamo hereadaena, ena be taunimanima ese idia badulaia herevana ia harorolaia.—Esekiela 2:8–3:4, 7-9 duahia.
7 Unai matahanai ese hari Dirava ena hesiai taudia dekenai mai anina bada gauna ta ia hadibaia. Ita danu be taunimanima ese idia badulaia herevana ita harorolaia. To, Dirava ena hesiai gaukara ita laloa bada noho totona, Baibel ita duahia bona stadilaia be namo. To, Dirava ena hereva ita lalopararalaia namonamo totona, nega haida sibona ita stadi o ita duahia kava be hegeregere lasi. Emu Baibel duahia karana bona stadi karana oi hanamoa diba, a? Eiava nega oi atoa Baibel amo oi duahia gaudia oi laloa dobu totona, a?—Sal. 1:2, 3.
Hamatamaia Herevadia
8. Ruma-ta-ruma-ta haroro gaukara lalonai, pablisa haida be edena dala ai haroro herevana idia hamatamaia?
8 Ruma-ta-ruma-ta haroro gaukara lalonai, pablisa momo idia gari ruma taudia dekenai hamatamaia herevana idia gwauraia totona. Momokani, teritori haida ai, haroro herevana hamatamaia be auka. Pablisa haida idia gwau, edia gari ia ore bema ruma tauna dekenai hamatamaia hereva kwadogina sibona idia gwauraia bena pepapepa idia hariharilaia—henunai ia noho maua ese ia hahedinaraia hegeregerena. Pepapepa ena sinado eiava laulau namodia be ruma tauna ena lalona ia veria diba, unai be dala namona iseda vadivadi ena badina ita kikilaia eiava henanadai ta ita henia totona. Eiava ruma tauna dekenai pepapepa idaudia toi eiava foa ita hahedinaraia, bena ita noia ia ura henia pepapepana ta ia abia hidi totona. To, ita ura lasi pepapepa be ita hariharilaia kava o ruma-ta-ruma-ta ai ita rakatania kava sibona, to ita ura unai pepapepa amo haroro herevana o Baibel stadi ta ita hamatamaia.
9. Dahaka dainai ita hegaegae namonamo be gau badana?
9 Herevana edena hamatamaia herevana ita gaukaralaia, to hegaegae namonamo karana ese ita do ia durua ita gari lasi to mai moale ida ruma-ta-ruma-ta haroro gaukara ita karaia totona. Painia tauna ta ia gwau: “Lau hegaegae namonamo neganai, lau moale bada. Unai ese lau ia durua lau hegaegaelaia herevana lau gwauraia totona.” Painia tauna ma ta ia gwau, “Haroro gaukara ai do lau hariharilaia bukadia lau duahia guna neganai, lau be mai egu moale ida unai lau hariharilaia diba.” Ena be emu lalona dekenai do oi harorolaia herevana oi laloa be namo, to momo idia davaria mai edia gado regena badana ida haroro herevana be edia ruma dekenai idia tohoa be heduru gauna. Hegaegae namonamo karana ese idia ia durua Iehova idia hesiai henia namonamo totona.—Kol. 3:23; 2 Tim. 2:15.
10. Haroro grup ena hebou idia hakaua elda o tadikaka ese dahaka idia karaia be namo?
10 Haroro grup ena hebou ai haroro daladia ita herevalaia o haheitalaia neganai, ruma-ta-ruma-ta haroro gaukara do ita karaia namonamo bona moalelaia diba. Bema dina ena siri be haroro gaukara ia herevalaia, vadaeni unai hebou lalonai ita duahia bona herevalaia sisina. To, gau badana be unai hebou ia hakaua tadikaka ese nega bada ia gaukaralaia, haroro daladia namodia ia herevalaia o haheitalaia totona. Unai ese grup taudia do ia durua haroro gaukara idia karaia namonamo totona. Bema haroro grup ena hebou idia hakaua elda o tadikaka idia hegaegae namonamo guna, idia be grup taudia do idia durua bona unai hebou be nega korikori ai do idia hadokoa danu.—Roma 12:8.
Kamonai Karana Ena Namo
11, 12. Edena dala ai mai hebogahisi ida ita kamonai karana ese ita ia durua sivarai namona ita harorolaia totona? Haheitalai gwauraia.
11 Hegaegae namonamo karana sibona lasi, to ma haida laloa bada karana ese ita ia durua haroro herevana ita hamatamaia o taunimanima edia lalona ita veria totona. Ma haida ita laloa bada dalana ta be inai: Iseda kamonai karana. Loaloa naria tauna ta ia gwau: “Bema oi hahedinaraia oi ura taunimanima edia hereva oi kamonai, unai ese edia lalona ia veria sivarai namona idia kamonai henia totona, bona unai be taunimanima laloa bada karana hereadaena.” Paragraf 12 ai ia noho ekspiriens ese ia hahedinaraia bamona, mai hebogahisi ida ruma tauna ena hereva ita kamonai neganai, ruma tauna do ia ura sivarai namona ia kamonai danu.
12 Saint-Étienne, France dekenai, niuspepa ladana Le Progrès lalonai be hahine ta ena revareva idia halasia. Unai hahine ena beibi be mai ena gorere dainai, ena mauri lagani be hua toi neganai ia mase. To, unai revareva lalonai, unai hahine be iena iduara dekenai idia pidipidi taudia rua ia kikilaia. Ia gwau: “Maoromaoro, lau diba idia be Iehova ena Witnes taudia. Lau ura idia lau hamaoroa do idia lao totona, to edia imana dekenai idia hariharilaia buklet ta lau itaia. Unai buklet ese dahaka dainai Dirava ese hisihisi ia koua lasi herevana ia hahedinaraia. Unai dainai idia lau boiria vareai edia lalohadai do lau hakoikoia totona. . . . Unai Witnes kekeni rua be hora ta mai kahana idia noho. Mai hebogahisi danu lau idia kamonai henia, bona lau idia rakatania neganai, egu mamina be ia namo bona lau ura idia vadivadi lou.” (Roma 12:15) Gabeai, unai hahine be Baibel stadi ia abia dae. Oibe, unai hahine be unai Witnes taihu rua ese idia kikilaia gauna ia laloatao lasi, to edia kamonai karana ia laloatao.
13. Edena dala ai ruma tauna do ita durua dalanai sivarai namona ita harorolaia diba?
13 Mai hebogahisi ida taunimanima edia hereva ita kamonai neganai, idia ese ita idia hamaoroa dahaka dainai idia ura Basileia do ia mai. Unai ese ita do ia durua sivarai namona be idia dekenai ita harorolaia totona. Nega momo oi itaia, haroro gaukara lalonai manada pablisa taudia be ruma taudia edia hereva idia kamonai namonamo. (Aon. 20:5) Idia be haroro ai idia davaria taudia idia laloa bada. Ruma tauna ena ladana o adres sibona idia torea lasi, to ruma tauna ia laloa bada gaudia o dabu gaudia idia laloa danu. Ruma tauna be ia laloa momo gauna ta ia herevalaia neganai, unai pablisa taudia be tahua karana idia karaia, bona idia lou henia neganai, idia davaria gaudia idia herevalaia. Aposetolo Paulo bamona, idia be ruma tauna do idia durua dalanai Basileia ena sivarai idia harorolaia. (1 Korinto 9:19-23 duahia.) Unai bamona kara namona ese “iseda Dirava ena bogahisihisi” ia hahedinaraia bona kudou-maoro taudia ia veria sivarai namona idia kamonai totona.—Luka 1:78.
Lalohadai Maorona Oi Abia
14. Haroro gaukara lalonai, edena dala ai Iehova ena kara ita hahedinaraia diba?
14 Iehova be ita ia laloa bada dainai, ura kwalimu ia henia. Herevana Iehova be Siahu Ibounai Diravana, to ia be taunimanima ia lalokau henia dainai, idia ia fosia lasi, to idia ia noia Ia idia tomadiho henia, bona Iena harihari gaudia idia moalelaia taudia ia hanamoa. (Roma 2:4) Ita be Iehova ena Witnes taudia dainai, nega ibounai, eda haroro gaukara amo eda hebogahisi Diravana ena ladana ita abia isi be namo. (2 Kor. 5:20, 21; 6:3-6) Unai ita karaia totona, namona be lalohadai maorona ita abia bona iseda teritori ai idia noho taudia ita durua. Dahaka ese ita ia durua diba lalohadai maorona ita hahedinaraia totona?
15. (a) Iesu be aposetolo taudia ia hamaoroa dahaka idia karaia bema ta ia kamonai lasi? (b) Dahaka ese ita ia durua kara namo taudia ita tahua totona?
15 Iesu ese aposetolo taudia ia hagania, namona be kamonai lasi taudia idia rakatania to kara namo taudia idia tahua. (Mataio 10:11-15 duahia.) Unai hahegani ita badinaia totona, namona be ita hagugurua diba tahua gaudia ita abia hidi. Tadikaka ta ia gwau ia be maini ai golo ia tahua tauna ta bamona. Ia gwau, “Lau laloa hari dina ai, golo ta—kamonai tauna ta unai—do lau davaria.” Tadikaka ma ta ena tahua gauna be, “wiki ta ta ai ia ura kamonai tauna ta ia davaria bena dina ta o rua murinai ia lou henia.” Pablisa taudia haida idia ura, ruma taudia ta ta dekenai siri ta idia duahia. Oi be dahaka tahua gaudia oi abia hidi diba?
16. Dahaka dainai haroro gaukara ita hadokoa lasi?
16 Herevana taunimanima idia kamonai eiava lasi, to ruma-ta-ruma-ta haroro gaukara ita hagugurua diba. Momokani, haroro gaukara be mai anina bada, badina kudou-maoro taudia ese mauri idia abia diba. Unai sibona lasi, to haroro gaukara amo ita hahedinaraia ita be Iehova ita lalokau henia. (1 Ioa. 5:3) Danu, ita be taunimanima edia rara dekenai do ita kerere lasi. (Kara 20:26, 27) Unai gaukara ese kara dika taudia ia hadibaia, “Dirava ese taunimanima ibounai do ia kota henia ena nega ia ginidae vadaeni.” (Apok. 14:6, 7) Gau badana be inai: Haroro gaukara lalonai sivarai namona ita harorolaia neganai, tanobada hegegemadai Iehova ena ladana ita hanamoa unai. (Sal. 113:3) Unai dainai, herevana taunimanima idia kamonai o lasi, to Basileia ena sivarai namona harorolaia gaukarana ita hadokoa lasi. Momokani, bema ita hekwarahi unai gaukara ita karaia, vadaeni Iehova ena matanai ita be gau mai hairaina ta bamona.—Roma 10:13-15.
17. Kahirakahira taunimanima be dahaka do idia lalopararalaia?
17 Ena be hari momo be eda haroro gaukara idia laloa bada lasi, to kahirakahira edia lalohadai do idia haidaua. (Mat. 24:37-39) Iehova be Esekiela dekenai ia gwau, ia harorolaia hahemaoro karana ia guguru neganai, gwau-edeede Israela taudia be do “idia diba momokani, peroveta tauna ta be idia edia huanai ia mai vadaeni.” (Ese. 2:5) Unai hegeregerena, Dirava ese inai tanobada oromana dikana ia haorea neganai, taunimanima be inai do idia lalopararalaia: Iehova ena Witnes taudia ese ruma-ta-ruma-ta ai o taunimanima vairanai idia harorolaia herevana be Dirava momokanina Iehova ena hereva bona Witnes taudia be Iehova ena gwaukau taudia. Momokani, Iehova ena ladana bona ena hereva ita harorolaia be hahenamo badana! Iehova ena siahu amo, ruma-ta-ruma-ta haroro gaukara ita hanamoa noho.
Edena Bamona Do Oi Haere?
• Edena dala ai mai gari lasi danu ita haroro diba?
• Ruma-ta-ruma-ta haroro gaukara lalonai, dahaka be ita ia durua diba haroro herevana ita hamatamaia totona?
• Edena dala ai ita hahedinaraia ita be ma haida ita laloa bada?
• Dahaka ese ita ia durua diba iseda teritori taudia ita laloa bada totona?
[Study Questions]
[Box/Picture on page 9]
Haroro Dalana Ta
Hamatamaia herevana:
◼ Ruma tauna oi hanamoa murinai, reana pepapepa ta oi henia bona oi gwau, “Hari dina oi lau vadivadi henia ena badina be, lau ura inai pepapepa amo mai anina bada gauna ta lau herevalaia.”
◼ Eiava pepapepa ta oi henia bona oi gwau, “Hari dina oi lau vadivadi henia ena badina be, lau ura inai pepapepa lau herevalaia bona emu lalohadai oi gwauraia diba.”
Bema pepapepa ia abia:
◼ Ruma tauna oi nanadaia unai pepapepa ena sinado dekenai dahaka ia laloa.
◼ Ruma tauna ena hereva oi kamonai namonamo, ena lalohadai oi lalopararalaia totona. Iena hereva dainai oi tanikiu henia, bona emu haere lalonai iena lalohadai danu oi herevalaia.
Hereva ma haida:
◼ Ruma tauna durua totona o ena lalohadai hegeregerena, siri ta o rua oi duahia bona oi herevalaia.
◼ Ruma tauna ia kamonai neganai, buka ta oi henia bona Baibel stadi karaia dalana oi haheitalaia. Dala oi karaia oi lou henia totona.