Iehova be Ena Abidadama Taudia Do Ia Rakatania Lasi

“[Iehova] iena abidadama taudia, be ia ese do ia rakatania lasi . . . do ia naridia namonamo ela bona hanaihanai, to kara dika taudia edia natudia ese, dika do idia davaria.”​​—SAL. 37:28.

1, 2. (a) Lagani 900 B.C.E. ai, Dirava ena hesiai taudia be dahaka hahetoho idia davaria? (b) Dahaka hekwakwanai idia davaria neganai, Iehova ese iena abidadama taudia ia rakatania lasi?

LAGANI 900 B.C.E. ai, Iehova ena hesiai taudia ese abia hidi ta idia karaia be namo. Iehova ese dala ia kehoa Israela ena not kahana ena iduhu 10 be sibodia edia lohia tauna do idia abia hidi, unai amo tuari do ia vara lasi. Edia king matamatana Ieroboama ese tomadiho matamatana ia haginia. Bona ia ura ia henunai idia noho taudia be ia sibona do idia badinaia. Vadaeni, Iehova ena abidadama hesiai taudia be dahaka do idia karaia? Idia tomadiho henia Diravana do idia badinaia noho, a? Idia tausen momo be Iehova idia badinaia dainai, Ia ese idia ia gimaia.​​—1 Kin. 12:​1-​33; 2 Siv. 11:​13, 14.

² Hari inai negai, Dirava ena hesiai taudia be edia abidadama karana dekenai hahetoho idia davaria danu. Baibel ia gwau: “Do umui laloa maoromaoro, bona naria namonamo. Umui dekenai ia tuari henia tauna, Satani, be laiona mai ena boiboi bada bamona. Ia ese hunia dekenai ia raka loaloa noho, do ia ania ore taudia ia tahua noho.” To, iseda ‘abidadama dekenai do ita gini goada’ diba, a? (1 Pet. 5:​8, 9) Diba haida ita abia totona, mani lagani 997 B.C.E. ai Ieroboama be king ai ia lao neganai idia vara gaudia ita tahua. Unai nega aukana lalonai, Iehova ena abidadama hesiai taudia be hisihisi bada idia davaria. Edia hesiai gaukara karaia totona idia hekwarahi bada bona danu aposteit taudia amo hahetoho idia davaria. To, unai negadia ai, Iehova ese Iena abidadama taudia ia rakatania lasi, bona hari danu unai bamona do ia karaia.​​—Sal. 37:28.

Dagedage Ita Davaria Neganai

3. Dahaka dainai King Davida ena lohia dalana be ia metau lasi?

³ Ieroboama be king ai ia lao lasi neganai, Israela taudia edia noho dalana mani ita laloa. Aonega Herevadia 29:2 ia gwau: “Bema kara dika tauna ia king neganai, taunimanima idia lalohisihisi momokani.” King Davida ese Israela besena ia lohiaia neganai, taunimanima idia moale. Davida be goevadae lasi tauna, to Dirava ia abidadama henia bona ia badinaia dainai, ena lohia dalana be ia metau lasi. Iehova ese Davida dekenai gwauhamata ta ia karaia, ia gwau: “Oiemu iduhu bona oiemu basileia be do ia gini ela bona hanaihanai, lau dainai. Bona oiemu king dagi do ia noho hanaihanai.”​​—2 Sam. 7:​16.

4. Solomona bona Israela taudia be hahenamo idia abia totona, dahaka idia karaia be namo?

⁴ Matamanai, Davida ena natuna Solomona ena lohia negana be maino bona noho namo negana, bona unai ese Keriso Iesu ena lagani 1,000 ena lohia negana ia laulaulaia. (Sal. 72:​1, 17) Unai dainai, Israela besena ena iduhu 12 amo ta ia gwau-edeede lasi. To, Solomona bona ia lohiaia taudia ese hahenamo idia abia totona, kara ta do idia karaia be namo. Iehova be Solomona ia hamaoroa: “Bema lauegu Taravatu bona oda ibounai oi kamonai henia neganai, lauegu gwauhamata oiemu tamana Davida dekenai be oi dekenai danu do lau hamomokania. Inai Dubu Helaga, oi ese oi haginia noho gauna, lalonai lau  be lauegu bese Israela edia huanai do lau noho, bona idia do lau rakatania lasi.”​​—1 Kin. 6:​11-​13.

5, 6. Solomona be Dirava ia rakatania neganai, dahaka ia vara?

⁵ Solomona ia buruka neganai, ena abidadama Iehova dekenai ia manoka bona dirava koikoidia ia tomadiho henidia. (1 Kin. 11:​4-6) Gabeai, Solomona be Iehova ena taravatu ia dadaraia bona taunimanima ia dagedage henidia. Idia hisihisi bada dainai, ia mase murinai taunimanima be iena natuna, Rehoboama dekenai Solomona idia maumauraia bona Rehoboama idia noia edia metau ia kokia totona. (1 Kin. 12:4) Solomona be Iehova ia rakatania neganai, Iehova be dahaka ia karaia?

⁶ Baibel ia gwau: “Lohiabada, Israela ena Dirava ese nega rua Solomona dekenai ia hedinaraia, bona ia ese Solomona ia oda henia idau bese edia dirava do ia tomadiho henia lasi.” Iehova ese Solomona ia hamaoroa: “Oi ese oiemu gwauhamata lau danu oi negea momokani, bona egu taravatu oi kamonai henia lasi dainai, lau hereva momokani, oiemu basileia be oi dekena amo do lau kokia, oiemu opesa ta dekenai do lau henia.”​​—1 Kin. 11:​9-​11.

7. Ena be Iehova ese Solomona ia dadaraia, to edena dala ai Iehova ese Iena abidadama taudia ia naria?

⁷ Vadaeni, Iehova ese peroveta tauna Ahaisa ia siaia Israela taudia do ia durua tauna ta ia horoa totona. Unai tauna be Ieroboama, ia be Solomona ena gavamani dekenai ia gaukara tau namona ta. Ena be Iehova be Davida ida ia karaia Basileia gwauhamatana ia badinaia noho, to Ia ese gwaumaoro ia henia Israela besena ena iduhu be kahana rua dekenai do idia parara. Iduhu 10 be Ieroboama do ia henia, to iduhu rua be Davida ena bese taudia ida do idia noho bona King Rehoboama ese ia lohiaia. (1 Kin. 11:​29-​37; 12:​16, 17, 21) Iehova ese Ieroboama ia hamaoroa: “Bema oi ese lau do oi kamonai henia momokani, lauegu Taravatu, bona lauegu oda do oi karaia, egu hesiai tauna Davida hegeregerena neganai, lau ese oi dekenai do lau noho nega ibounai. Lau ese king dagi oi dekenai do lau henia, bona oiemu natuna bona tubuna taudia do lau haginia, idia ese danu king dagi do idia dogoatao noho, Davida dekenai lau karaia hegeregerena.” (1 Kin. 11:38) Iehova be iena taunimanima totona kara ta ia karaia bona lohia dalana aukana amo idia ia hamauria.

8. Hari, Dirava ena taunimanima be dahaka hekwakwanai idia davaria?

⁸ Hari, dagedage bona hisihisi be bada herea. Hadibaia Tauna 8:9 ia gwau: “Taunimanima haida ese ma haida idia biagua noho, bona idia hisihisi henidia noho.” Mataganigani bisinesi taudia bona kara gageva lohia taudia dainai, taunimanima idia ogogami bada. Gavamani taudia, bisinesi taudia bona tomadiho gunalaia taudia be kara maoromaoro taravatudia idia badinaia lasi. Unai dainai, kara maoromaoro tauna Lota hegeregerena, hari Dirava idia abidadama henia taudia be unai ‘taudia edia kara dainai edia lalona be ia metau.’ (2 Pet. 2:7) Danu, ena be Dirava ena taravatu ita badinaia goadagoada, to nega momo hekokoroku lohia taudia ese ita idia dagedage henia.​​—2 Tim. 3:​1-5, 12.

9. (a) Iehova be iena taunimanima ia hamauria totona, dahaka ia hegaegaelaia vadaeni? (b) Dahaka dainai ita diba momokani Iesu be hanaihanai Dirava do ia badinaia?

⁹ To, mai anina bada gauna be inai: Iehova be iena abidadama hesiai taudia do ia rakatania lasi! Mani inai oi laloa, Iehova be tau ta ia abia hidi vadaeni tanobada ena lohia taudia dikadia edia gabuna ia abia totona. Oibe, Dirava be ena Mesia Basileiana ia haginia vadaeni, bona ia lohia tauna Keriso Iesu be guba ai kahirakahira lagani 100 ia lohia vadaeni. Kahirakahira, ia ese Dirava ena ladana idia gari henia taudia do ia hamauria. (Apokalupo 11:​15-​18 duahia.) Iesu be Dirava ena ura ia karaia ela bona ia mase, unai amo ia hamomokania ia be Dirava ia badinaia. Unai dainai, Iesu ese ia lohiaia taudia do ia durua; ia be Solomona bamona do ia karaia lasi.​​—Heb. 7:​26; 1 Pet. 2:6.

10. (a) Edena dala ai ita hahedinaraia ita be Dirava ena Basileia ita laloa bada? (b) Hahetoho ita davaria neganai, ita diba momokani Dirava be dahaka do ia karaia?

¹⁰ Dirava ena Basileia be gavamani korikorina bona ia ese dagedage bona hisihisi do ia hadokoa. Ita be Iehova Dirava bona Iena Basileia ita badinaia. Dirava ena Basileia ita abidadama henia dainai, ita be tanobada ena kara dikadia ita dadaraia bona kara namodia ita goadalaia. (Tito 2:​12-​14) Ita hekwarahi mai goevagoeva bona kerere lasi  ida do ita noho totona. (2 Pet. 3:​14) Herevana dahaka hahetoho ita davaria, to ita diba momokani Iehova be iseda abidadama do ia gimaia. (Salamo 97:10 duahia.) Danu, Salamo 116:​15, [NW ] ese ia hahedinaraia, Iehova idia badinaia taudia idia mase neganai, Ia ese idia ia laloa bada. Ena hesiai taudia be dava bada gaudia dainai, Iehova ia ura lasi idia ibounai do idia mase.

Aposteit Taudia ese Ita Idia Dibagania Neganai

11. Edena dala ai Ieroboama ese Iehova ia dadaraia?

¹¹ King Ieroboama ena lohia negana ai, Dirava ena taunimanima be hahenamo idia davaria diba. To lasi, Ieroboama ena kara ese Dirava abidadama henia karana dekenai hedibagani ia havaraia. Ieroboama ia laloa ia abia king dagina be hegeregere lasi, bona ia ura taunimanima ese ena lohia siahuna sibona do idia badinaia. Ia laloa: “Bema lauegu taunimanima be Ierusalema dekenai idia lao, Dubu Helaga dekenai boubou gaudia idia henia neganai, idia ese edia lohia, king Rehoboama dekenai do idia giroa lou, bona lau do idia alaia.” Unai dainai, Ieroboama ese tomadiho matamatana ta ia haginia, bona golo boromakau rua ia karaia. Baibel ia gwau: “Golo boromakau ta be Betele dekenai ia atoa, ma ta be Dano dekenai ia atoa. Bona inai kara ese kerere bada Israela dekenai ia havaraia. Tomadiho totona idia be Betele bona Dano dekenai idia lao. Ieroboama ese danu dubu haida be ataiai gabudia dekenai ia haginia, bona unai dubu edia hahelagaia taudia, taunimanima edia huanai dekena amo ia abia hidi, to Levi taudia lasi.” Danu, Ieroboama ese “Israela taudia totona aria ta ia gwauraia, bona ia sibona ese boubou gauna ia gabua.”​​—1 Kin. 12:​26-​33.

12. Ieroboama be Israela tanona ai boromakau tomadiho henia karana ia haginia neganai, Dirava idia abidadama henia taudia be dahaka idia karaia?

¹² Vadaeni, not kahana basileiana ai idia noho Dirava abidadama henia taudia be dahaka do idia karaia? Not kahana basileiana henunai idia noho Levi taudia be edia tubudia edia abidadama karana idia tohotohoa. (Eso. 32:​26-​28; Num. 35:​6-8; Deu. 33:​8, 9) Edia ahuna idia rakatania bona edia ruma bese ida saut kahana basileiana Iuda dekenai idia lao, bona unuseniai Iehova idia tomadiho henia noho diba. (2 Siv. 11:​13, 14) Iuda dekenai idia noho Israela taudia haida be edia tano korikorina dekenai idia giroa lasi, to Iuda dekenai idia noho. (2 Siv. 10:17) Iehova be tomadiho momokani lou henia ena dala ia kehoa noho, unai amo gabeai uru taudia ese not basileia ena boromakau tomadiho henia karana idia rakatania bona Iuda dekenai idia giroa lou diba.​​—2 Siv. 15:​9-​15.

13. Hari, aposteit taudia ese edena dala ai Dirava ena taunimanima idia dibagania?

¹³ Hari, aposteit taudia ese Dirava ena taunimanima idia dibagania danu. Gavamani haida be edia tano dekenai sibona edia tomadiho idia haginia, bona  taunimanima idia doria unai tomadiho idia badinaia totona. Kerisendom ena dubu gunalaia taudia bona hekokoroku taudia ma haida be sibodia idia gwauraia Dirava “ena hahelaga taudia.” To, Keristani taudia momokanidia sibona edia huanai, unai hahelaga taudia o horoa taudia ita davaria diba.​​—1 Pet. 2:9; Apok. 14:​1-5.

14. Aposteit taudia edia lalohadai koikoidia dekenai dahaka ita karaia be namo?

¹⁴ Hari inai negai, Dirava idia badinaia taudia be abidadama Levi taudia idia tohotohoa. Horoa taudia bona edia bamodia be aposteit taudia edia lalohadai koikoidia idia dadaraia. (Roma 16:17 duahia.) Ena be mai moale ida gavamani edia taravatu ita badinaia bona tanobada ena hepapahuahu amo ita gini siri, to ita be Dirava ena Basileia sibona ita badinaia. (Ioa. 18:36; Roma 13:​1-8) Haida idia gwau idia be Dirava ena hesiai taudia to edia kara amo Dirava idia matauraia lasi, unai bamona taudia ita dadaraia be namo.​​—Tito 1:16.

15. Dahaka dainai “hesiai tauna mai ena kamonai, bona mai ena kara maoromaoro” ita badinaia be maoro?

¹⁵ Mani oi laloa, Iehova ese kudou-maoro taudia be tanobada dikana amo ia hakaudia siri bona ena orea namona lalonai ia hakaudia vareai. (2 Kor. 12:​1-4) Keriso ese hesiai tauna ta ia abia hidi “iena kohu ibounai” ia naria totona, unai “hesiai tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona biaguna ena natuna edia aniani neganai edia aniani do ia henia.” Namona be mai moale ida unai hesiai tauna ita badinaia. (Mat. 24:​45-​47) Unai dainai, bema ita ta be hesiai oreana ese idia halasia hereva ta ita lalopararalaia lasi, namo lasi ita ese unai hereva ita dadaraia eiava Satani ena tanobada dekenai ita giroa lou. Lasi, to, ita be Iehova ita badinaia dainai, mai manau ida do ita naria ela bona Iehova ese unai hereva ena anina do ia hahedinaraia goevagoeva.

Dirava Ena Hesiai Gaukara Ita Karaia Neganai

16. Iuda dekenai Iehova ese peroveta tauna ta dekenai dahaka gaukara ia henia?

¹⁶ Ieroboama ena aposteit karadia dainai Iehova ese ia hahemaoro henia. Iehova ese Iuda amo peroveta tauna ta be Betele dekenai ia siaia lao. Peroveta tauna ia ginidae neganai, Ieroboama be boubou patana dekenai boubou ia karaia noho. Peroveta tauna ese Ieroboama dekenai hahemaoro hereva aukana ta do ia gwauraia. Oibe, peroveta tauna ese unai do ia karaia be auka.​​—1 Kin. 13:​1-3.

17. Iehova ese iena peroveta tauna be edena bamona ia gimaia?

¹⁷ Ieroboama ia kamonai Iehova ese ia dadaraia neganai, ia badu dikadika. Ieroboama ese peroveta tauna dekenai imana ia duduia bona ena tuari taudia dekenai ia boiboi bada, ia gwau: “Unai tau do umui dogoatao.” To, karaharaga “iena imana, ia duduia gauna, be nega tamona ia auka lao, bona Ieroboama be dala lasi iena imana do ia veria lou. Ma danu, boubou patana be maoromaoro ia makohia parara, bona iena latanai kahu be idia bubua.” Ieroboama be dala lasi, to peroveta tauna ma ia noia Dirava do ia guriguri henia, unai amo Iehova ena lalonamo do ia abia bona ena imana dikana ia namo lou totona. Peroveta tauna ia guriguri bena Ieroboama ena imana ia namo lou. Unai kara amo, Iehova ese ena peroveta tauna ia gimaia.​​—1 Kin. 13:​4-6.

18. Mai gari lasi ida Iehova ita hesiai henia dainai, edena dala ai ita ia gimaia?

¹⁸ Basileia ena sivarai ita harorolaia bona kamonai taudia be hahediba taudia ai ita halaoa gaukarana lalonai, nega haida dagedage taudia ita davaria. (Mat. 24:14; 28:​19, 20) To, namo lasi ita laloa taunimanima do idia ura lasi kamonai dainai, iseda haroro gaukara ita karaia lasi. Ieroboama ena nega ai Iehova ena peroveta tauna hegeregerena, ita be “mai helaga danu, bona mai maoromaoro danu, iena [Iehova] vairana dekenai  do ita raka.” * (Luka 1:​74, 75) Ena be hari Iehova ese hoa dalanai ita do ia hamauria lasi, to ita gwau diba Iehova be iena lauma helaga bona aneru amo iena Witnes taudia ia hakaua bona gimaia noho. (Ioane 14:​15-​17; Apokalupo 14:6 duahia.) Dirava ese mai gari lasi ida iena hereva idia harorolaia taudia do ia rakatania lasi.​​—Fili. 1:​14, 28.

Iehova ese Ia Idia Abidadama Henia Taudia Do Ia Gimaia

19, 20. (a) Dahaka dainai ita diba momokani Iehova be ita do ia rakatania lasi? (b) Stadi gabena ai edena henanadai edia haere do ita tahua?

¹⁹ Iehova be kara maoromaoro Diravana. Baibel ese Iehova be inai bamona ia gwauraia: “Kara maoromaoro tauna dekenai, kara maoromaoro oi henia noho.” (Sal. 18:25) Iseda stadi ena siri badana ese ita ia hagoadaia: “Lohiabada ese, kara maoromaoro ia ura henia noho. Iena abidadama taudia, be ia ese do ia rakatania lasi. Kara maoromaoro taudia be, Lohiabada ese do ia naridia namonamo ela bona hanaihanai.” (Sal. 37:28) Unai dainai, Dirava idia badinaia taudia idia diba hahetoho idia davaria, aposteit taudia idia hereva koikoi bona hesiai gaukara idia karaia be auka neganai, Iehova be idia do ia durua bona hakaua noho.

²⁰ Ita ta ta ese inai gauna do ita laloa: Ena be hahetoho eiava hedibagani lau davaria, to dahaka ese lau do ia durua Iehova lau badinaia noho totona? Eiava ita gwau diba, edena dala ai egu abidadama Dirava dekenai lau hagoadaia diba?

[Footnote]

Edena Bamona Do Oi Haere?

• Dagedage idia vara neganai, Iehova be edena dala ai Ia idia badinaia taudia ia rakatania lasi?

• Aposteit taudia edia lalohadai koikoidia dekenai dahaka ita karaia be namo?

• Haroro gaukara lalonai Iehova be edena dala ai ena abidadama hesiai taudia ia gimaia?

[Study Questions]

[Map/Picture on page 5]

(For fully formatted text, see publication)

NOT KAHANA BASILEIANA (Ieroboama)

Dano

SEKEMA

Betele

SAUT KAHANA BASILEIANA (Rehoboama)

IERUSALEMA

[Picture]

Ieroboama be boromakau tomadiho henia karana ia haginia neganai, Iehova be Ia idia abidadama henia taudia ia rakatania lasi

[Picture on page 3]

Solomona bona ia lohiaia taudia be hahenamo idia abia totona, kara ta idia karaia be namo