Kudouna Ibounai ida Dirava Oi Badinaia

“Lau be oiemu momokani lalonai do lau raka. Lauegu lalona [“kudouna,” NW] do oi hatamonaia momokani, vadaeni lau ese oiemu ladana do lau matauraia bona gari henia.”​​—SAL. 86:11.

1, 2. (a) Salamo 86:​2, 11 ena hereva hegeregerena, hahetoho neganai, dahaka ese ita do ia durua Iehova ita badinaia noho totona? (b) Edena nega ai mai kudouna ibounai ida Iehova badinaia karana ita hagoadaia be namo?

DAHAKA dainai Keristani taudia haida be lagani momo lalodiai dagedage karadia bona dibura rumana lalonai idia gini goada, to gabeai moni bona kohu ena tarapu dekenai idia moru? Badina be edia kudouna idia naria namonamo lasi. Unai dainai, Salamo karoa 86 ese ia hahedinaraia mai kudouna ibounai ida Dirava ita badinaia be namo. Davida ia guriguri ia gwau: “Mase dekena amo lau do oi hamauria [“gimaia,” NW ] badina lau ese oi lau badinaia noho, mai momokani danu. Mani emu kara, lau do oi hamauria, badina lau be oiemu hesiai tauna, bona lau ese oi lau abidadama henia noho.” Ma ia gwau: “Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona [“kudouna,” NW ] do oi hatamonaia momokani, vadaeni lau ese oiemu ladana do lau matauraia bona gari henia.”​​—Sal. 86:​2, 11.

² Bema mai kudouna ibounai ida Iehova ita badinaia lasi, gau ma haida ese Iehova ita badinaia karana idia hadikaia diba. Iseda ura kereredia be tano henunai idia hunia bomu bamona. Ena be hahetoho neganai, mai goada ida Iehova ita badinaia diba, to Satani ena tarapu dekenai ita moru diba. Unai dainai, hari hahetoho ita do davaria lasi lalonai, mai iseda kudouna ibounai ida Iehova badinaia karana ita hagoadaia be namo! Baibel ia gwau: “Gau badana momokani, oiemu kudouna, oiemu laloa ia havaraia gauna, do oi naria namonamo.” (Aon. 4:​23) Iehova ese Iuda amo  peroveta tauna ta ia siaia King Ieroboama dekenai; bona unai peroveta tauna ena sivarai amo mai anina bada gaudia haida do ita dibaia.

“Oiemu Gaukara Ena Davana Oi Dekenai Do Lau Henia”

3. King Ieroboama ese peroveta tauna ena hereva ia moalelaia, a?

³ Mani inai oi laloa. Dirava ena peroveta tauna ese King Ieroboama dekenai hahemaoro hereva aukana ia henia, badina King be boromakau kaivakuku ta ia haginia, bona not kahana ena iduhu 10 ese idia tomadiho henia. King be ia badu dikadika, bona ena tuari taudia ia oda henidia peroveta tauna do idia dogoatao. To, Iehova ese iena peroveta tauna ia durua. Nega tamona, hoa dalanai king ena imana ia duduia gauna ia auka bona boubou patana ia makohi. Karaharaga, Ieroboama ena kara ia haidaua. Peroveta tauna ia noinoi henia, ia gwau: “Lohiabada, oiemu Dirava do oi noia, lau dainai do oi guriguri, egu imana do ia namo lou totona.” Peroveta tauna ia guriguri bena king ena imana ia namo.​​—1 Kin. 13:​1-6.

4. (a) Dahaka dainai king ena heabidae karana peroveta tauna dekenai be hedibagani ta bamona? (b) Peroveta tauna be edena bamona ia haere?

⁴ Vadaeni, Ieroboama ese peroveta tauna ia hamaoroa: “Egu ruma dekenai do ita lao, do oi laga-ani, bona oiemu gaukara ena davana oi dekenai do lau henia.” (1 Kin. 13:7) Peroveta tauna be dahaka do ia karaia? King ena heabidae karana do ia abia dae, ena be King dekenai hahemaoro hereva aukana ia gwauraia, a? (Sal. 119:113) Eiava, king ena heabidae karana do ia dadaraia, ena be king ena kara ia haidaua? Ieroboama be taga tauna dainai, dava bada harihari gaudia be iena turadia dekenai ia henia diba. Bema peroveta tauna be kudouna ai kohu ia mataganigani henia, king ena harihari gaudia ese ia idia dibagania diba. To, Iehova ese peroveta tauna ia oda henia: “Aniani do oi ania lasi, bona ranu do oi inua lasi, bona oi mai dalana dekena amo do oi lou lao lasi.” Unai dainai, peroveta tauna be mai goada ida ia haere: “Bema oiemu ruma kahana lau dekenai oi henia, to oi danu do lau raka vareai hebou lasi. Aniani do lau ania lasi, ranu danu do lau inua lasi inai gabu dekenai.” Bona peroveta tauna be ma dala idauna amo Betele ia rakatania. (1 Kin. 13:​8-​10) Peroveta tauna ese mai kudouna ibounai ida Dirava ia badinaia karana amo dahaka ita dibaia?​​—Roma 15:4.

“Laloa Momo Lasi”

5. Edena dala ai moni bona kohu momo ese iseda Dirava badinaia karana ia hadikaia diba?

⁵ Reana ita laloa, moni bona kohu ese iseda Dirava badinaia karana idia hadikaia diba lasi, to unai be lalohadai kererena. Ita abidadama momokani Iehova ese iseda dabu gaudia do ia henia, a? (Mat. 6:​33; Heb. 13:5) Ena be iseda moni be hegeregere lasi kohu matamatadia ita hoia totona, to unai ita laloa momo lasi, a? (Filipi 4:​11-​13 duahia.) Eiava, ita ura Dirava ena hesiai gaukara ita rakatania, bona hari ita ura abia gaudia ita tahua, a? Iseda mauri lalonai Iehova ena hesiai gaukara ita atoa guna, a? Iseda haere amo do ita hahedinaraia ita be mai iseda kudouna ibounai ida Dirava ita hesiai henia eiava lasi. Paulo ia gwau: “Dirava ia badinaia tauna ese kohu momokani do ia davaria. Oibe, ia davaria, badina unai tau be mai ena kohu namona, gauna be, iena lalona be namo. Badina be gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.”​​—1 Tim. 6:​6-8.

6. Dahaka hahenamo ita abia diba? Dahaka ese ita do ia durua dala maorona ita abia hidi totona?

⁶ Haheitalai ta be, reana iseda bosi ia ura ita dekenai dagi badana ta, ena pei be bada bona gau namodia ma haida danu, ia henia. Eiava, ita laloa tano o gabu ma ta dekenai ita lao bona moni gaukara ita karaia neganai, moni bada do ita abia diba. Matamanai, do ita laloa Iehova amo unai hahenamo idia mai. To, abia hidi ta ita do karaia lasi neganai, namona be sibona ita nanadaia dahaka dainai ita ura unai gaukara ita abia dae. Namona be ita laloa bada gauna be inai: “Lau abia hidi gauna ese egu hetura karana Iehova ida do ia hanamoa eiava hadikaia?”

7. Dahaka dainai kohu ura henia bada urana ita dadaraia be namo?

⁷ Satani ena tanobada ese ita ia veria moni bona kohu momo ita laloa totona. (1 Ioane 2:​15, 16 duahia.) Diabolo ia ura iseda kudouna do ia hadikaia. Unai dainai, bema ita davaria iseda kudouna lalonai kohu ura henia bada urana ia noho, namona  be ita gaukara goada unai ura dikana ita dadaraia totona. (Apok. 3:​15-​17) Satani ese tanobada ena basileia ibounai amo Iesu ia tohoa neganai, Iesu be ia daradara lasi, to karaharaga unai hedibagani ia dadaraia. (Mat. 4:​8-​10) Iesu ese ita ia sisiba henia: “Do umui naria namonamo, kohu dekenai do umui ura henia dikadika garina. Badina taunimanima edia mauri badina be kohu momo dekena amo lasi, lasi momokani.” (Luka 12:15) Iehova abidadama henia karana ese ita do ia durua Dirava ita tabekau henia totona.

Tau Burukana ta ese “Hereva Koikoi Ia Gwauraia”

8. Peroveta tauna ena Dirava badinaia karana dekenai dahaka hahetoho ia davaria?

⁸ Bema Dirava ena peroveta tauna be maoromaoro iena ruma dekenai ia lao, dika ta ia davaria lasi. To daudau lasi murinai, hahetoho ma ta ia davaria. Baibel ia gwau: “Betele dekenai peroveta tauna burukana ta ia noho. Vadaeni iena natuna haida idia mai, Dirava ena tau ese unai dina dekenai Betele dekenai ia karaia vadaeni gaudia ibounai edia sivarai idia hamaoroa.” Unai tau buruka be unai sivarai ia kamonai neganai, ena natudia ia hamaoroa doniki ta idia hegaegae bena ia ese peroveta tauna murinai ia lao. Daudau lasi murinai, ia ese peroveta tauna ia davaria au badana henunai ia laga-ani noho bona ia gwau: “Egu ruma dekenai do ita lao, do ita aniani.” To, peroveta tauna ese unai heabidae karana ia dadaraia neganai, tau buruka ia gwau: “Lau danu be peroveta tauna, oi hegeregerena, bona aneru ta ese lau dekenai ia hereva, Lohiabada ena hereva dainai, ia gwau, ‘Unai Dirava ena tau oiemu ruma dekenai do oi hakaua lou, do ia aniani, bona ranu do ia inua totona.’ ” To unai siri ma ia gwau: “Ia ese hereva koikoi ia gwauraia.”​​—1 Kin. 13:​11-​18.

9. Baibel ese kara gageva taudia be edena bamona ia herevalaia bona edia kara amo daidia idia hahisia?

⁹ Unai tau buruka ena ura be dahaka be ita diba lasi, to ia ese koikoi herevana ia gwauraia. Reana, guna unai tau buruka be Iehova ia badinaia peroveta tauna ta. To, unai nega ai, peroveta tauna dekenai koikoi hereva ta ia gwauraia. Baibel be unai bamona kara gageva ia gwauraia dika. (Aonega Herevadia 3:​32 duahia.) Koikoi taudia be edia hetura karana Dirava ida idia hadikaia sibona lasi, to ma haida dekenai dika idia havaraia danu.

“Idia Ruaosi Idia Giroa Lou”

10. Peroveta tauna be edena dala ai tau buruka ena hereva ia abia dae bona dahaka ia vara?

¹⁰ Peroveta tauna be tau buruka ena koikoi karana ia lalopararalaia be namo. Reana ia sibona dekenai ia henanadai diba: ‘Dahaka dainai Iehova be aneru ta amo lau dekenai hadibaia hereva matamatana ia henia lasi, to idau tauna ma ta dekenai ia henia?’ Toana be peroveta tauna ese Iehova ena heduru ia noia lasi, to Baibel ia gwau, “idia ruaosi idia giroa lou, bona peroveta tauna buruka ena ruma lalonai idia aniani, bona ranu idia  inua.” Iehova be ia moale lasi. Peroveta tauna be Iuda dekenai ia giroa lou noho lalonai, laiona ta ese ia alaia. Madi, iena peroveta gaukarana ia hadikaia unai!​​—1 Kin. 13:​19-​25. *

11. Ahaisa be dahaka haheitalai namona ia hahedinaraia?

¹¹ To, Iehova ese Ieroboama horoa totona ia siaia peroveta tauna Ahaisa, be Iehova ia badinaia ela bona ia buruka. Ahaisa ia buruka bona matana ia kepulu vadaeni lalonai, Ieroboama ena natuna mero be ia gorere bona Ieroboama ese ena adavana ia siaia Ahaisa do ia nanadaia mero be do ia namo eiava lasi. Ahaisa be mai gari lasi ida ia gwau, Ieroboama ena natuna be do ia mase. (1 Kin. 14:​1-​18) Ahaisa ese ia abia hahenamo ta be, Dirava ena Hereva torea gaukarana ia durua. Edena dala ai? Hahelaga tauna, Esera be ena Baibel bukana ia torea neganai, ia be Ahaisa ese ia torea gaudia ia gaukaralaia.​​—2 Siv. 9:​29.

12-14. (a) Peroveta tauna matamata dekenai ia vara gauna amo dahaka ita dibaia? (b) Dahaka dainai mai guriguri ida Baibel ena sisiba ita lalohadailaia namonamo? Haheitalai rua mani oi gwauraia.

¹² Baibel ia hahedinaraia lasi dahaka dainai peroveta tauna be Iehova ia hereva henia lasi, to tau buruka danu ia lao bona idia aniani bona ranu idia inua. Reana, ia be tau buruka ese ia gwauraia herevadia ia ura henia, a? Unai sivarai amo dahaka ita dibaia? Namona be ita abia dae momokani Iehova ena dala iboudiai be maoromaoro sibona. Herevana dahaka ia vara, namona be mai eda lalona ibounai ida Iehova ena hereva ibounai do ita badinaia.

¹³ Haida be idia ura henia sisiba sibona idia badinaia, to sisiba ma haida idia dadaraia. Hegeregere, pablisa ta be gaukara matamata ta ia davaria, to bema unai gaukara ia abia dae, ia be nega lasi iena ruma bese ida do ia noho bona tiokratik gaukara haida do ia reaia danu. Reana, elda ta dekenai ia lao heduru herevadia ia abia totona. Sedira elda tauna ena hereva matamana be inai bamona: ‘Lau be maoro lasi oi do lau hamaoroa edena moni gaukara do oi abia emu ruma bese oi naria totona.’ Bena, elda be tadikaka ida unai gaukara dainai, do idia vara hekwakwanai idia herevalaia hebou. To, tadikaka be elda ese matamanai ia gwauraia herevana sibona do ia laloatao, o tadikaka ese gabeai ia herevalaia hekwakwanai gaudia danu do ia lalohadailaia? Namona be tadikaka ese ia bona Iehova edia hetura karana do ia hanamoa dalana ia lalohadailaia guna, bena dala ta ia abia hidi.

¹⁴ Haheitalai ma ta mani oi laloa. Taihu ta ese elda ta ia hamaoroa ia ura ena Witnes lasi adavana amo do ia parara. Elda ena hereva matamanai, ia gwau: ‘Emu adavana amo do oi parara eiava lasi be  oi sibona ese do oi abia hidi.’ Bena, elda ese Baibel ena taravatu headava hapararaia karana dekenai ia herevalaia. (1 Kor. 7:​10-​16) Taihu be elda ese ia gwauraia Baibel sisiba herevadia do ia lalohadailaia, a? Eiava, lalona ia hadaia vadaeni ena adavana do ia rakatania? Taihu be abia hidi ia ura karaia neganai, aonega dalana be mai guriguri ida Baibel ena sisiba ia lalohadailaia guna be namo.

Oi Manau

15. Peroveta tauna ena kerere amo dahaka gau ma haida ita dibaia?

¹⁵ Peroveta tauna ena kerere amo dahaka gau ma haida ita dibaia? Aonega Herevadia 3:5 ia gwau: “Lohiabada do oi abidadama henia, mai emu kudouna ibounai. Oi sibona oiemu diba do oi abidadama henia lasi.” Peroveta tauna be Iehova dekenai ia tabekau lasi, to sibona ena diba dekenai ia tabekau dainai, iena ladana namona Dirava dekenai ia hadikaia bona ena mauri ia haboioa. Ia dekenai ia vara gauna ese ia hahedinaraia, Iehova ita badinaia noho bona mai manau ida Iena hesiai gaukara ita karaia be mai anina bada!

16, 17. Dahaka ese ita do ia durua Iehova ita abidadama henia noho totona?

¹⁶ Iseda kudouna lalonai ia noho ura dikana, sibona laloa bada karana unai, ese ita ia hakaua kerere diba. “Taunimanima edia kudouna be mai koikoi bada, bona mai dika rohoroho danu.” (Ier. 17:9) To Iehova ita badinaia noho totona, namona be ita hekwarahi mauri gunana hegeregere, hekokoroku eiava sibona dekenai tabekau karana do ita kokia. Namona be mauri matamata do ita atoa, ia be “Dirava ena toana bamona, ia ese ia karaia gauna. Inai mauri matamata ena kara be maoromaoro, helaga bona momokani.”​​—Efeso 4:​22-​24 duahia.

¹⁷ Aonega Herevadia 11:2 ia gwau: “Manau taudia ese aonega idia davaria noho.” Mai manau ida Iehova dekenai ita tabekau neganai, unai ese ita ia durua dala maorodia ita abia hidi bona dika ita dadaraia diba. Hegeregere, nega haida hekwakwanai idia vara neganai, lalohadai kereredia ita abia diba. (Aon. 24:10) Reana ita laloa, lagani momo lalonai hesiai gaukara helagadia haida ita karaia vadaeni, bona hari do ita laga-ani bona ma haida ese unai maduna idia huaia be namo. Eiava ita ura hesiai gaukara do ita rakatania, bona vaia taunimanima ese idia noholaia mauri dalana ita badinaia. To, ‘Lohiabada ena gaukara ita karaia goadagoada’ neganai, unai ese iseda kudouna do ia gimaia.​​—1 Kor. 15:58.

18. Bema ita diba lasi edena dala be maoro, vadaeni dahaka ita karaia diba?

¹⁸ Nega haida, ita ura dala ta ita abia hidi, to ita diba lasi edena be maoro. Ita sibona eda diba hegeregerena abia hidi do ita karaia, a? Bema, ita daradara, Iehova ena heduru ita noia be aonega karana. Iamesi 1:5 ia gwau: “Bema umui ta be aonega lasi, namona be Dirava do ia noia, vadaeni Dirava ese aonega ia dekenai do ia henia. Badina be Dirava ese taunimanima ibounai dekenai gau namodia ia henia noho.” Iseda guba Tamana ese lauma helaga do ia henia ita dekenai, unai amo dala maorodia ita abia hidi diba.​​—Luka 11:​9, 13 duahia.

Emu Lalona Oi Hadaia Dirava Do Oi Badinaia Noho

19, 20. Namona be dahaka do ita karaia noho?

¹⁹ Solomona be tomadiho goevana ia rakatania murinai, Iehova ena hesiai taudia be Dirava badinaia karana dekenai hahetoho momo idia davaria. Momokani, momo be gau haida dekenai Dirava idia badinaia to ma gau haida dekenai Dirava idia badinaia lasi. To, ma haida be Iehova idia badinaia noho.

²⁰ Dina ta ta ai, ita ura abia hidi gaudia idauidau ese iseda Dirava badinaia karana idia tohoa diba. To, ita ese Dirava ita badinaia noho diba. Namona be iseda kudouna ibounai ida Iehova ita badinaia noho, bona ita abia dae momokani Iehova ese Ia idia abidadama henia taudia do ia hanamoa noho.​​—2 Sam. 22:26.

[Footnote]

Edena Bamona Do Oi Haere?

• Dahaka dainai moni o kohu momo ura henia urana be iseda kudouna amo ita kokia be namo?

• Dahaka ese ita do ia durua Iehova ita badinaia noho totona?

• Manau karana ese edena dala ai ita ia durua Dirava ita badinaia noho totona?

[Study Questions]

[Pictures on page 9]

Hedibagani oi dadaraia be auka, a?

[Pictures on page 10]

Mai guriguri ida Baibel ena sisiba do oi lalohadailaia namonamo, a?