Oi Laloatao, A?

Gima Kohorona matamatadia oi duahia neganai oi moalelaidia, a? Henunai idia noho henanadai mani oi haerelaidia:

• Keristani taudia haida be idia headava murinai dahaka hekwakwanai badadia idia davaria, bona dahaka idia karaia be namo?

Keristani taudia haida idia davaria idia bona edia adavana edia ura bona lalohadai be idauidau bona idia lalotamona lasi. To, idia diba headava hadokoa karana be hekwakwanai hamaoromaoroa dalana lasi, unai dainai namona be idia hekwarahi edia headava idia hanamoa totona.​​—4/15, rau 17.

• Buruka taudia naria rumana ai ia noho tadikaka o taihu burukana be reana dahaka hekwakwanai ia davaria?

Bema unai tadikaka o taihu burukana be buruka taudia edia ruma dekenai ia lao, reana unai teritori dekenai, idia noho kongrigeisen taudia be ia idia diba lasi. Unai ruma ai idia noho buruka taudia momo be tomadiho idauidau taudia dainai, reana idia ese buruka tadikaka o taihu do idia doria edia tomadiho karadia lalonai ia vareai totona. Namona be Keristani ruma bese bona kongrigeisen taudia be unai hekwakwanai idia diba bona edia buruka tadikaka taihu idia naria bona durua.​​—4/15, rau 25-​27.

• Iesu ese ia hadibaia gurigurina hegeregerena, edena kara namona ta do ita hahedinaraia?

Bema ita dekenai ia kara dika tauna ena dika be mai hebogahisi ida ita gwauatao, ita be kara namo ita hahedinaraia noho. Iesu ese ia hadibaia gurigurina, Mataio 6:12 dekenai be inai hereva ia noho: “Aiemai dika mani oi gwauatao, badina be ai dekenai idia hadikaia taudia edia dika ai gwauatao.”​​—5/15, rau 9.

• Hakaua Oreana taudia be edena komiti idauidau dekenai idia gaukara?

Kodineita Edia Komiti; Gaukara Taudia Naria Komiti; Buka Karaia Komiti; Hesiai Komiti; Hadibaia Komiti; Toretore Komiti.​​—5/15, rau 29.

• Paulo ese Roma 1:​24-​32 ai kara haida ia herevalaia neganai, ia be Iuda taudia eiava Idau Bese taudia ia gwauraia?

Aposetolo Paulo ese unai hereva be Iuda taudia eiava Idau Bese taudia dekenai ia gwauraia diba, to unai siri lalonai ia ese Iehova ena Taravatu idia badinaia lasi idaunegai Israela besena ia gwauraia. Ena be Dirava ena kara maoromaoro taravatudia idia diba to idia badinaia lasi.​​—6/15, rau 29.

• Dahaka dainai eda goada hegeregerena ita gaukara neganai, unai ese iseda moale ia habadaia diba?

Bema iseda goada be hegeregere lasi gau ta ita karaia guguru totona, to sibona ita fosia, do ita lalohisihisi. To, ita ura lasi ita be sibona dekenai ita hebogahisi bona ekskius ita karaia dainai, Keristani hesiai gaukarana ita karaia badabada lasi.​​—7/15, rau 29.