Headava Taudia ese Iehova Idia Laloa be Namo

“Varo toi dekena amo idia hatua varona be do idia makohia haraga lasi.”​​—HAD. 4:​12.

1. Daika ese Adamu bona Heva edia headava ia karaia?

IEHOVA DIRAVA be tubutubu gaudia bona animal ia havaraia murinai, tau ginigunana, Adamu ia karaia. Gabeai, Dirava ese Adamu ia hamahutaia mase bona ena ruduna turiana amo hahine goevana ia karaia, Adamu ia durua totona. Adamu be Heva ia itaia neganai, ia gwau: “Ia be lauegu turia ena turia, bona lauegu hidio ena hidio.” (Gen. 1:​27; 2:​18, 21-​23) Iehova ese hahine ginigunana ia karaia namo herea. Bena, Adamu bona Heva ruaosi edia headava ia karaia bona ia hanamodia.​​—Gen. 1:​28; 2:​24.

2. Edena dala ai Satani ese Adamu bona Heva huanai heiriheiri ia havaraia?

² To, madi daudau lasi murinai, tau ta ese Dirava ia karaia headava dalana ia hadikaia. Unai be daika? Lauma dikana ta, gabeai ena ladana be Satani, ese Heva ia koia bona Dirava ese ia taravatua auna ena huahua ia ania. Unai murinai, Adamu danu be ena adavana ia badinaia bona idia ruaosi ese Dirava ena lohia bona hakaua dalana maorona idia dadaraia. (Gen. 3:​1-7) Iehova ia henanadai dahaka ia vara neganai, Adamu ena haere amo ia hedinarai Adamu bona Heva edia hetura karana be ia dika, badina ia gwau: “Oi ese oi karaia lau dekenai hahine ese unai au huahua lau dekenai ia henia, bona lau ania.”​​—Gen. 3:​11-​13.

3. Iuda taudia haida be dahaka lalohadai kererena idia abia?

³ Lagani handred momo lalonai, Satani be koikoi daladia idauidau ia gaukaralaia headava taudia huanai heiriheiri ia havaraia totona. Hegeregere, nega haida Satani ese tomadiho gunalaia taudia amo Baibel ena taravatu headava dekenai idia hadibaia kerere. Iuda gunalaia taudia haida ese Dirava ena taravatu idia dadaraia, bona idia gwau bema hahine ese aniani dekenai damena bada herea ia atoa, tau ese headava ia hadokoa diba. To, Iesu ia gwau: “Bema tau ta be matabodaga karadia dainai lasi, to badina ma ta dainai ena headava ia hadokoa, bona hahine ma ta ia adavaia ia be ia heudahanai.”​​—Mat. 19:​9, NW.

4. Satani be edena dala ai headava momo ia hadikaia noho?

⁴ Satani be ia hekwarahi bada headava namodia ia hadikaia totona bona ia kwalimu noho. Hegeregere, tatau rua eiava hahine rua idia headava, headava lasi tau bona hahine idia noho hebou bona headava hadokoa karadia idia bada idia lao noho. (Heberu 13:4 duahia.) Ita Keristani taudia be dahaka ita karaia diba, unai kara dikadia ita dadaraia totona? Tau bona hahine idia moale bona edia headava ia goada daladia haida mani ita tahua.

Headava Lalonai Iehova Tura Henia be Namo

5. Headava lalonai “varo toi” ena anina be dahaka?

⁵ Headava ia goada totona, namona be Iehova be headava lalonai ia noho. Baibel ia gwau: “Varo toi dekena amo idia hatua varona be do idia makohia haraga lasi.” (Had. 4:​12) “Varo toi” be laulau herevana. Unai haheitalai be headava dekenai ita gaukaralaia neganai, anina be tau bona hahine be varo ginigunadia rua bona idia be Iehova, varo badana ida idia hatua o mogea hebou. Bema tau bona hahine be Dirava idia tura henia namonamo, vadaeni do idia hegeregere hekwakwanai momo idia hanaia totona, unai amo edia headava lalonai do idia moale.

6, 7. (a) Iehova be edia headava lalonai ia noho totona, Keristani taudia be dahaka do idia karaia? (b) Taihu ta be edena dala ai ena adavana ia herevalaia?

⁶ To, headava lalonai Iehova ia noho totona, tau bona hahine ese dahaka idia karaia be namo? Salamo torea tauna Davida ia gwau: “Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia  noho.” (Sal. 40:8) Iehova ita lalokau henia dainai, mai iseda kudouna ibounai ida ita ura iena hesiai gaukara ita karaia. Unai dainai, namona be tau bona hahine be Iehova idia tura henia namonamo bona mai moale ida ena ura do idia karaia. Danu, headava taudia ese ta ta do idia hagoadaia Dirava do idia lalokau henia noho totona.​​—Aon. 27:17.

⁷ Bema Dirava ena taravatu ita laloa bada, kara namodia hegeregere abidadama, Dirava ena gwauhamata naria karana, bona lalokau do ita hahedinaraia, unai amo iseda headava do ia goada. (1 Kor. 13:13) Sandra, lagani 50 lalonai ia headava taihu ia gwau: “Egu adavana ena kara namodia lau moalelaia bada, hegeregere Baibel ena hereva amo lau ia hakaua bona sisiba namodia ia henia bona ia be Iehova ia lalokau henia bada.” Tatau e, emu adavana ese oi be unai bamona ia herevalaia diba, a?

8. ‘Davana namona’ abia totona tau bona hahine be dahaka do idia karaia?

⁸ Oi bona emu adavana be mai lalotamona ida Dirava tomadiho henia karadia bona Basileia ena hesiai gaukara umui atoa guna, a? Danu, Iehova hesiai henia gaukarana lalonai, oi abia dae emu adavana be emu gaukara turana namona, a? (Gen. 2:​24) Aonega King Solomona ia gwau: “Tau rua ese tau tamona idia hereaia noho, badina rua edia gaukara davana be namo.” (Had. 4:9) Oibe, tau bona hahine do idia gaukara goada unai amo ‘davana namona’ do idia abia, anina be Dirava ese edia headava do ia hagoadaia bona ia hanamoa.

9. (a) Tatau edia maduna idauidau be dahaka? (b) Kolose 3:​19 ena hereva hegeregerena, tau ese edena dala ai ena adavana do ia kara henia?

⁹ Tau bona hahine be mai lalotamona ida Dirava ena taravatu idia badinaia neganai, unai ese ia hahedinaraia Dirava be edia headava lalonai ia noho. Tau ena maduna badana be tauanina bona tomadiho dalanai ena ruma bese do ia naria. (1 Tim. 5:8) Danu, Baibel ese tatau ia sisiba henidia edia adavadia edia hemami do idia laloa bada totona. Kolose 3:​19, ia gwau: “Tatau e, emui adavana do umui lalokau henia, idia do umui dagedage henia lasi.” Baibel ia diba bada tauna ta ia gwau, unai siri ai tau ese adavana ia “dagedage henia” herevana anina be, tau ese hahine ia “hereva dika henia, ia botaia, ia lalokau henia lasi, ia naria lasi, aniani ia henia lasi, ia gimaia lasi bona ia durua lasi.” Oibe, namo lasi unai bamona kara be Keristani ruma besena lalonai ia vara. Mai lalokau ida ena kwara dagina ia gaukaralaia tauna be adavana ese do ia matauraia haraga diba.

10. Keristani hahine ese edena bamona kara idia hahedinaraia be namo?

¹⁰ Idia ura Iehova be edia headava lalonai ia noho Keristani hahinedia ese Dirava ena taravatu idia badinaia be namo. Aposetolo Paulo ia gwau: “Hahine e, emui adavana do umui kamonai henia, Lohiabada umui kamonai henia hegeregerena. Badina tau be iena adavana ena kwarana, Keriso be ekalesia ena kwarana bamona.” (Efe. 5:​22, 23) Satani ese Heva ia koia, ia gwau Dirava ia dadaraia bona sibona ia naria karana ese moale do ia mailaia. Ita itaia headava momo lalonai hahine be edia adavadia idia kamonai henia lasi. To, Keristani hahinedia be mai moale ida edia tatau idia matauraia. Badina idia laloatao Iehova ese Heva ia karaia ena adavana ia “durua” totona, bona Dirava matanai unai be maduna namo hereana. (Gen. 2:​18) Keristani hahine be mai ena ura ida ena adavana ia durua neganai, ena adavana ese ia moale henia bada.​​—Aon. 12:4.

11. Dahaka ese tadikaka ta ena headava ia durua?

¹¹ Dirava be headava lalonai ia noho dalana ma ta be, tau bona hahine ese Baibel idia stadilaia hebou. Gerald, lagani 55 lalonai ia headava bona ena headava ia moalelaia tadikaka, ia gwau: “Headava ia goada totona, gau badana be tau bona hahine ese Baibel do idia duahia bona idia stadilaia hebou.” Ma ia gwau: “Bema headava taudia be tomadiho karadia idia karaia hebou, unai ese idia ia durua idia hetura heheni namonamo bona Iehova kahirakahira idia noho totona.” Ruma bese be Baibel idia stadilaia hebou neganai, Iehova ena taravatu idia laloatao, edia hetura karana Iehova ida ia goada, bona edia abidadama ia goada ia lao.

12, 13. (a) Dahaka dainai tau bona hahine idia guriguri hebou be mai anina bada? (b) Edena dala ma haida ese headava idia hagoadaia diba?

¹² Edia headava idia moalelaia tau bona  hahine be idia guriguri hebou. Bema tau bona adavana huanai hekwakwanai ta ia vara, bona tau ese Iehova ia noia idia do ia durua unai hekwakwanai hamaoromaoroa totona, unai ese edia headava do ia hagoadaia. (Sal. 62:8) Hegeregere, oi bona emu adavana be Siahu Ibounai Diravana ena heduru totona umui guriguri hebou neganai, ta ta ena dika umui gwauatao karana be do ia auka lasi! (Mat. 6:​14, 15) Unai guriguri hegeregerena, namona be tau bona hahine be edia lalona idia hadaia ta ta do idia durua bona ‘bema ta ese iena bamona tauna ia maumauraia, ia kara dika henia dainai, namona be unai dika do ia gwauatao.’ (Kol. 3:​13) Namona be ita laloatao, Dirava ita guriguri henia karana amo ita hahedinaraia ita be Ia ita tabekau henia. King Davida ia gwau: “Lohiabada e, idia mauri noho gaudia ibounai ese oi dekenai idia itaia noho.” (Sal. 145:15) Mai abidadama ida Dirava ita guriguri henia neganai, ita lalohekwarahilaia gaudia idia maragi bamona, badina ita diba Dirava be ita ia laloa bada.​—1 Pet. 5:7.

¹³ Headava lalonai Iehova ia noho dalana ma ta be, tau bona hahine be kongrigeisen ena hebou ibounai dekenai idia lao bona idia haroro hebou. Iseda hebou dekenai, headava taudia be diba idia abia, unai amo Satani ese ruma bese ia hapararaia totona ia karaia “koikoi karadia” idia koua diba. (Efe. 6:​11) Danu, hanaihanai haroro gaukara lalonai idia gaukara hebou tau bona hahine be do idia ‘gini goada, bona idia marere lasi.’​​—1 Kor. 15:58.

Hekwakwanai Negadiai

14. Headava lalonai dahaka gaudia ese hekwakwanai idia havaraia diba?

¹⁴ Momokani, ita herevalaia gaudia be lalohadai matamata lasi, to namona be emu adavana ida oi herevalaia. Emui headava lalonai edena gaudia haida umui hanamoa diba? Oibe, Baibel ia hahedinaraia, Keristani headava taudia danu be “tanobada ena metau bada do idia abia.” (1 Kor. 7:​28) Taunimanima ibounai be idia goevadae lasi, inai matabodaga tanobada dekenai lalona veria karadia be bada, bona Diabolo ena hahetoho idauidau dainai, Dirava ena hesiai taudia edia headava lalonai hekwakwanai badadia idia davaria danu. (2 Kor. 2:​11) To, Iehova ena heduru amo ita ese unai hekwakwanai ita hanaia. Oibe, iseda headava lalonai moale ita davaria diba. Dirava ia badinaia tauna Iobu ena animal, ena hesiai taudia, bona ena natudia idia mase.  To, Baibel ia gwau: “Dika momokani be Iobu dekenai idia vara, to Iobu ese kerere ta ia karaia lasi, bona ia ese Dirava dekenai ia badu henia lasi.”​​—Iobu 1:​13-​22.

15. Hekwakwanai dainai taunimanima be dahaka idia karaia diba? Headava lalonai ta ia badu neganai, ta be edena bamona ia kara be namo?

¹⁵ To, Iobu ena hahine be Iobu dekenai ia gwau: “Dirava dekenai oi abidadama henia noho, a? Namona be Dirava ena ladana do oi hadikaia, vadaeni oi mase!” (Iobu 2:9) Momokani, hekwakwanai idia vara neganai, ta be do ia badu dainai ia laloa namonamo lasi o kara ta ia karaia kava diba. Aonega tauna ta ia gwau: “Hisihisi ese aonega tauna be kavakava tauna ai ia halaoa.” (Had. 7:​7, BHğ) Bema hekwakwanai ta dainai emu adavana be mai badu ida oi ia hereva henia, namona be oi kamonai sibona, mai badu ida oi hereva lasi. Badina unai bamona oi karaia neganai, emui hepapahuahu do ia habadaia. (Salamo 37:8 duahia.) Unai dainai, ta ia lalohisihisi bona “badu kava” neganai, unai oi gwauatao be namo.​​—Iobu 6:3.

16. (a) Headava taudia ese Iesu ena hereva Mataio 7:​1-5 ai be edena bamona idia badinaia diba? (b) Dahaka dainai headava lalonai laloa maoromaoro karana be mai anina bada?

¹⁶ Namona be headava taudia be do idia laloa maoromaoro. Reana, ta ia itaia ena adavana ena kara haida be namo lasi bona ia gwau, ‘Iena kara do lau haidaua diba.’ Bema mai lalokau bona haheauka ida emu adavana oi durua, reana ena kara haida ia haidaua diba. To, laloaboio lasi, Iesu ia gwau ta ena kerere maragidia ia herevalaia momo tauna be hegeregere ena tadikaka ena matana dekenai “au ena momoru” ia herevalaia, to ia sibona iena matana ai ia noho “au badana” ia itaia lasi. Iesu be ita ia sisiba henia, ia gwau: “Umui emui lalona dekenai taunimanima umui gwauraia kerere lasi, vadaeni Dirava ese umui do ia gwauraia kerere lasi.” (Mataio 7:​1-5 duahia.) To, kerere badadia umui itaia neganai, umui herevalaia hebou be gau badana. Robert, lagani 40 lalonai ia headava tadikaka, ia gwau: “Headava tau bona hahine be mai gari lasi ida ta ta edia kara idia herevalaia hebou bona ta ta edia lalohadai idia abia dae neganai, unai ese do ia durudia edia mauri lalonai gau haida idia haidaua totona.” Unai dainai, laloa maoromaoro karana be mai anina bada. Namo lasi emu adavana ese gau haida ia karaia lasi dainai oi badu henia, to namona be emu adavana ese hari ia karaia kara namodia oi moalelaia.​​—Had. 9:9.

17, 18. Lalohisihisi gaudia idia momo neganai, daika ena heduru ita tahua diba?

¹⁷ Headava taudia edia mauri ia idau ia lao neganai, hahetoho idia vara diba. Reana, natudia idia vara neganai, tau bona hahine be hekwakwanai haida idia davaria diba. Reana, idia ta eiava edia natuna ta ia gorere. Reana, edia buruka tama sina do idia naria, edia natudia idia tubu daekau bona ruma idia rakatania, eiava tau be kongrigeisen lalonai maduna haida ia abia. Unai gau idauidau ese tau bona hahine huanai lalometau ia havaraia diba.

¹⁸ Bema emu headava maurina be ia dika ia lao bona oi mamia oi haheauka diba lasi, dahaka oi karaia be namo? (Aon. 24:10) Namo lasi kara kererena ta oi karaia! Satani ia ura dikadika Dirava ena hesiai tauna be tomadiho momokanina ia rakatania. Bona, bema headava taudia rua be unai bamona idia karaia, Satani be do ia moale bada herea. Unai dainai, namona be umui hekwarahi emui headava lalonai varo toi idia hatua o mogea noho be gau badana. Baibel lalonai hisihisi negadiai idia gini goada taudia edia sivarai momo idia noho. Hegeregere, nega ta Davida be Iehova dekenai ena lalohisihisi herevana ia gwauraia: “Dirava e, lau dekenai do oi bogahisihisi henia, badina be taunimanima ese . . . lau idia tuari henia noho.” (Sal. 56:1) “Taunimanima” ese oi idia hahisia, a? Herevana oi mamia lalohisihisina be idau tauna ta amo eiava oiemu  ruma bese tauna amo, namona be inai oi laloatao: Davida be goada ia abia unai lalohisihisi ia haheaukalaia totona, bona oi danu be unai oi karaia diba. Davida ia gwau: “Lohiabada dekenai lau guriguri, bona ia ese lau dekenai ia haere. Ia ese egu gari ibounai dekena amo, lau ia hamauria.”​​—Sal. 34:4.

Hahenamo Ma Haida

19. Edena dala ai Satani ena hahetoho idauidau ita koua diba?

¹⁹ Inai nega dokona ai, headava taudia be ‘ta ta dekenai goada do idia henia bona durua’ be gau badana. (1 Tes. 5:​11) Laloaboio lasi, Satani ia gwau ita be Iehova ita badinaia badina ia ese gau namodia ia henia ita dekenai. Ia be hahetoho idauidau do ia gaukaralaia, headava do ia hadikaia danu, badina ia ura iseda abidadama Dirava dekenai ia hadikaia. Satani ena hahetoho idauidau ita koua totona, mai iseda lalona ibounai ida Iehova do ita abidadama henia momokani. (Aon. 3:​5, 6) Paulo ia gwau: “Keriso ese lau ia hasiahua, vadaeni gau ibounai lau goadalaia diba.”​​—Fili. 4:​13.

20. Iehova be headava lalonai ia noho neganai, Keristani tau bona hahine ese dahaka hahenamo do idia davaria?

²⁰ Dirava be headava lalonai ia noho neganai, headava taudia be hahenamo momo do idia davaria. Joel bona ena adavana be lagani 51 lalonai idia headava vadaeni bona idia davaria unai be momokani. Joel ia gwau: “Nega ibounai egu adavana bona emai hetura karana namona dainai, Iehova lau tanikiu henia. Egu adavana be egu turana namona momokani.” Dahaka ese edia headava ia hagoadaia? Ia gwau: “Nega ibounai ai hekwarahi hebogahisi, haheauka bona lalokau ai hahedinaraia totona.” Inai nega lalonai, unai kara do ita hahedinaraia be mai ena hekwarahi. To, namona be ita hekwarahi Baibel ena hakaua herevadia ita badinaia totona bona Iehova be iseda headava lalonai do ia noho. Unai ita karaia neganai, iseda headava be “varo toi dekena amo idia hatua varona be do idia makohia haraga lasi” gauna bamona.​​—Had. 4:​12.

Oi Laloatao, A?

• Iehova be headava lalonai ia noho ena anina be dahaka?

• Hekwakwanai negadiai headava taudia ese dahaka idia karaia be namo?

• Edena bamona ita diba Dirava be headava lalonai ia noho?

[Study Questions]

[Picture on page 18]

Hekwakwanai negadiai, guriguri hebou karana ese headava taudia do ia durua bada