Iesu Tohotohoa​​—Dirava Ia Ura Henia Dalana ai Tomadiho Henia

Dirava be mai lalokau ida “bese idauidau, iduhu idauidau, kopina idauidau, bona gado idauidau” taudia ia boiria Ia idia tomadiho henia totona. (Apok. 7:​9, 10; 15:​3, 4) Unai boiboi herevana idia abia dae taudia ese Iehova ena “namo” idia itaia diba. (Sal. 27:4; 90:17) Salamo torea tauna bamona, mai boiboi bada ida Dirava idia hanamoa bona idia gwau: “Umui mai, iseda kwarana do ita atoa diho, Lohiabada do ita tomadiho henia. Lohiabada ena vairanai do ita tui diho. Ia ese ita ia karaia vadaeni.”​​—Sal. 95:6.

Iehova be Iesu Ena Tomadiho Karana Ia Laloa Bada

Iesu be Dirava ena Natuna roboana dainai, iena Tamana ena lalohadai, hakaua herevadia bona taravatu ia dibaia namonamo. Unai dainai, Iesu ese Iehova tomadiho henia dalana maorona ia hahedinaraia diba. Ia gwau: “Dala be lau, hereva momokani be lau, mauri danu lau. Tamana dekenai do idia lao taudia ibounai edia dala ta be lasi, lau sibona.”​​—Ioa. 1:​14; 14:6.

Iesu be haheitalai goevadaena ia hahedinaraia, mai manau ida iena Tamana ia badinaia. Iesu ia gwau: “Kara ta danu lau sibona lau karaia lasi, to Tamana ese lau dekenai ia hadibaia hegeregerena lau hereva.” Ma ia gwau: “Iena ura be nega ibounai lau karaia.” (Ioa. 8:​28, 29) Edena dala ai Iesu ese iena Tamana ia hamoalea?

Dala ta be, Iesu be mai ena kudouna ibounai ida ena Tamana ia badinaia, bona Dirava tomadiho  henia karana dekenai unai be mai anina bada. Iesu ese ena Tamana ia lalokau henia bada dainai, ia kamonai henia, bona iena ura ia karaia ena be hisihisi bada ia davaria. (Fili. 2:​7, 8) Dirava tomadiho henia karana dekenai, Iesu be hanaihanai hahediba taudia halaoa gaukarana ia karaia. Unai dainai abidadama taudia bona abidadama lasi taudia ese idia gwauraia hadibaia tauna. (Mat. 22:​23, 24; Ioa. 3:2) Danu, Iesu be mai moale ida ena nega bona goada ia gaukaralaia ma haida ia durua totona, to sibona ena ura gaudia ia laloa bada lasi. (Mat. 14:​13, 14; 20:28) Ena be Iesu ia bisi, to nega ia atoa iena guba Tamana ia guriguri henia totona. (Luka 6:​12) Iesu dekenai Dirava tomadiho henia karana be mai anina bada!

Ia Hekwarahi Dirava Ena Ura Ia Badinaia Totona

Iehova be iena Natuna ena kara ia itaia bona ia dekenai ia moale. (Mat. 17:5) To, Satani Diabolo ia itaia Iesu be mai abidadama ida Dirava ia badinaia. Unai dainai, Satani ia ura Iesu do ia hamorua. Dahaka dainai? Badina tau ta be mai kudouna ibounai ida Dirava ia badinaia goevagoeva lasi. Satani ia ura Iesu ia koua, unai amo Iehova do ia tomadiho henia lasi.​​—Apok. 4:​11.

Satani ia ura Iesu ena tomadiho karana ia hadikaia dainai, Iesu ia dibagania toho. Satani ese Iesu be “ororo bada herea ta ena atai dekenai ia hakaua daekau, tanobada edia basileia ibounai mai edia hairaina danu ia itaia.” Bena ia gwau: “Bema oiemu kwarana oi atoa diho, bona bema lau dekenai oi tomadiho, vadaeni inai ibounai be oi dekenai do lau henia.” Iesu be dahaka ia karaia? Iesu ia gwau: “Satani e, idau gabu dekenai oi lao, badina be Buka Helaga lalonai ia torea, ia gwau, ‘Lohiabada oiemu Dirava do oi tomadiho henia, ia sibona dekenai hesiai gaukara do ia karaia.’ ” (Mat. 4:​8-​10) Oibe, Iesu ia diba, bema Satani dekenai ia igo diho, unai be kaivakuku tomadiho henia karana, unai dainai ia dadaraia momokani, ena be Satani ese basileia ibounai do ia henia. Iesu ia ura lasi tau ta do ia tomadiho henia, to Iehova sibona do ia tomadiho henia.

Reana, Satani be ia ita tomadiho henia totona, tanobada ena basileia bona ena hairai ibounai be ita dekenai do ia henia lasi. To, ia ura Keristani taudia momokani edia Dirava tomadiho henia karana ia hadikaia. Satani ia ura tau ta eiava gau ta ita tomadiho henia.​​—2 Kor. 4:4.

Keriso Iesu be Dirava ia badinaia ela bona ia mase. Iesu be Dirava ia badinaia dainai, Iehova ia hanamoa, bona tau ta be unai bamona ia karaia lasi. Hari inai negai, namona be ita Keristani taudia ese Keriso ita tohotohoa bona iseda Havaraia Tauna tomadiho henia karana do ita atoa guna. Momokani, Dirava ita tura henia namonamo karana be dava bada gauna.

Dirava Ia Ura Henia Dalana ai Ita Tomadiho Henia Ena Hahenamo

Dirava ena ura hegeregerena tomadiho goevana bona momokanina ese hahenamo momo  ia mailaia. (Iam. 1:​27) Hegeregere, ita noho negana ai taunimanima momo be ‘edia ura sibona idia tahua, moni idia mataganigani henia, idia hekokoroku,’ bona ‘kara namodia idia ura henia lasi.’ (2 Tim. 3:​1-5) To, Dirava ena orea lalonai, ita be Dirava ena taravatu idia badinaia bona idia goeva taudia ida ita noho diba. Unai be hahenamo ta, ani?

Hahenamo ma ta be, ita be inai tanobada ena kara mirodia ita dadaraia dainai, iseda lalomamina be ia goeva. Ita be Dirava ena kara maoromaoro taravatudia bona Dirava ena taravatu idia utua lasi gavamani edia taravatu ita badinaia dainai, iseda lalomamina ia goeva.​​—Mar. 12:17; Kara 5:​27-​29.

Mai eda kudouna ibounai ida Iehova ita tomadiho henia karana ena hahenamo ma ta be inai: Mai eda ura ibounai ida Dirava ena ura ita karaia neganai, iseda mauri be mai anina bona ita moale. Namo lasi ita gwau: “Ita aniani bona ita inuinu, badina be kerukeru do ita mase,” to ita be mai eda helaro, unai be tanobada paradaisona ai mauri hanaihanai do ita abia.​​—1 Kor. 15:32.

Apokalupo bukana ese Iehova vairanai idia goeva taudia be ‘hisihisi bada herea’ amo do idia roho mauri negana ia herevalaia. Baibel ia gwau, “helai gabuna badana dekenai ia helai Diravana be idia dekenai ia noho, bona ia ese idia ia naria noho.” (Apok. 7:​13-​15) Helai gabuna badana dekenai ia helai tauna be Iehova Dirava, ia be iunives ai hairai bada Diravana. Mani oi laloa, Iehova ese ena kalaga dekenai oi ia abia dae, bona oi ia gimaia, unai amo gau dikana ta ese oi do ia hadikaia lasi! Bona hari, Iehova ese ita ia gimaia bona ia naria danu.

Danu, Dirava ena ura dalana ai ia idia tomadiho henia taudia ibounai be “mauri ranuna, ia lohilohi gauna” dekenai idia lao noho. Unai mauri ranuna be Iehova ese kongrigeisen amo ita dekenai ia henia gaudia idauidau, unai amo ita be mauri hanaihanai ita abia diba. Keriso ena mauri davalaia boubouna dainai, “Dirava ese edia taitai ena ranu ibounai edia matana dekena amo do ia dahua ore.” (Apok. 7:​17) Tanobada ai mauri hanaihanai idia abia taudia do idia goevadae, bona do idia moale bada herea. Hari danu, Dirava ena hesiai taudia be mai moale ida idia boiboi, Iehova dekenai edia tanikiu herevadia idia gwauraia, bona guba ai idia noho taudia ida Iehova idia tomadiho henia bona idia gwau: “Lohiabada Dirava e, Siahu Ibounai Dirava e, oiemu gaukara be bada herea momokani. Oiemu hoa karadia be idau momokani. Oi be bese ibounai edia King! Oiemu kara ibounai be maoromaoro bona momokani. Lohiabada e, daika ese oi dekenai do ia gari henia lasi? Daika ese oiemu ladana do ia hanamoa lasi? Badina be oi sibona be helaga. Bese ibounai oi dekenai do idia mai, oi dekenai do idia tomadiho henia, badina be oiemu kara maoromaoro be ibounai idia itaia vadaeni.”​​—Apok. 15:​3, 4.

[Picture on page 27]

Satani ia ura ia ita tomadiho henia dainai, ita dekenai dahaka ia henia?