Mai Ura ida Diba Maoromaoro Tahua

IEHOVA ena hesiai taudia ibounai idia ura Ia ese ia lalonamo henidia. Ena lalonamo ita abia totona, ita ura iseda abidadama ita hagoadaia bona hesiai gaukara ita karaia goadagoada. To, aposetolo Paulo be iseda abidadama ia hadikaia diba gauna ta ia herevalaia, bona unai be iena nega ai idia noho Iuda taudia haida dekenai ia vara. Ia gwau: “Dirava ena hesiai gaukara idia ura karaia namonamo, to karaia dalana be idia diba lasi.” (Roma 10:2) Unai ese ia hahedinaraia, namo lasi Iehova abidadama henia bona tomadiho henia karana be ita karaia kava. Iseda Havaraia Tauna bona Iena ura ita diba be namo.

Paulo ia gwau, iseda diba ita habadaia neganai, iseda kara amo Dirava ita hamoalea diba. Paulo ia guriguri Keriso murinai idia raka taudia be Dirava ena ura do idia diba, unai amo ‘Lohiabada ena ura hegeregerena do idia noho, bona nega ibounai idia ese ia do idia hamoalea.’ Bona ‘edia mauri ese kara namodia edia anina do idia havaraia, bona Dirava ena diba bona diari ese idia do idia hatubua daekau.’ (Kol. 1:​9, 10) Dahaka dainai “Dirava ena diba” maoromaoro ita abia be mai anina bada? Bona dahaka dainai unai diba ita habadaia be namo?

Abidadama Hagoadaia Dalana

Baibel lalonai Dirava ena diba maoromaoro bona ura ita dibaia neganai, unai ese iseda abidadama ia hagoadaia diba. To, bema unai diba ita abia lasi, vadaeni hekwakwanai ta ia vara neganai, iseda abidadama dekenai ita moru haraga diba. Paulo ese ita ia hagoadaia mai iseda laloa maoromaoro ida Dirava ena hesiai gaukara do ita karaia. (Roma 12:​1, 2) Unai ita karaia totona, hanaihanai Baibel ita stadilaia be namo.

Poland dekenai, regula painia ta ladana Ewa, ia gwau: “Bema Dirava ena Hereva lau stadilaia hanaihanai lasi, egu diba maoromaoro Iehova dekenai do ia bada lasi. Egu Keristani toana namona do lau haboioa, bona egu abidadama Dirava dekenai do ia manoka. Unai ia vara neganai egu hetura karana Iehova ida do ia dika.” Namo lasi unai be ita dekenai ia vara! Mani tau ta ena haheitalai ita laloa, ia be ena diba Iehova dekenai ia habadaia bona Iehova ese ia lalonamo henia.

“Oiemu Taravatu Lau Ura Henia”

Baibel ai Salamo 119 ese salamo torea tauna ena hemami Iehova ena taravatu, hakaua herevadia, oda, bona hahegani dekenai ia hahedinaraia. Salamo torea tauna ia gwau: “Oiemu taravatu lau moalelaia noho, . . . Oiemu hadibaia hereva ese lau idia hamoalea noho.” Ma ia gwau: “Oiemu taravatu lau ura henia. Dina ena hora ibounai lalonai, oiemu taravatu lau laloa noho.”​​—Sal. 119:​16, 24, 47, 48, 77, 97.

Inai hereva “moalelaia” bona “laloa noho” ese idia hahedinaraia salamo torea tauna be Dirava ena hereva laloa dobu karana bona ena taravatu stadilaia karana ia ura henia bada. Unai be hemami ta sibona lasi. To, mai ura bada ida Dirava ena taravatu ia stadilaia, laloparara ia abia totona. Iena kara amo ita itaia ia ura Dirava bona Iena ura ia diba namonamo.

Ia hedinarai goevagoeva salamo torea tauna be mai kudouna ibounai ida Dirava ena Hereva ia ura henia. Sibona ita nanadaia diba: ‘Lau danu be unai bamona, a? Dina ta ta Baibel  ena karoa ta lau duahia bona lau lalohadailaia karana lau moalelaia, a? Guriguri lau gwauraia guna bena Dirava ena Hereva lau duahia namonamo, a?’ Bema iseda haere be oibe, ita be diba maoromaoro Dirava dekenai ita habadaia noho.

Ewa ia gwau: “Hanaihanai lau ura sibona egu stadi karana lau hanamoa. ‘See the Good Land’ buklet lau abia neganai, stadi negadia ibounai lalonai lau gaukaralaia. Nega momo lau hekwarahi Insight on the Scriptures bona buka ma haida amo tahua gaukara lau karaia.”

Danu, Wojciech bona Małgorzata mani oi laloa, edia ruma bese ena maduna be momo. To, sibona edia Baibel stadilaia karana be edena bamona idia karaia? Idia gwau: “Ai ta ta be nega ai atoa sibona Baibel ai stadilaia totona. Bena, emai ruma bese stadi lalonai bona herevahereva negadiai, ai davaria mai anina bada point ai kikilaia hebou.” Sibona edia Baibel stadi karana ese moale ia havaraia bona idia ia durua edia diba maoromaoro idia habadaia totona.

Mai Iseda Ura Ibounai ida Ita Stadi

Ita be Keristani taudia dainai, ita abia dae Dirava ia ura “taunimanima ibounai ese mauri do idia davaria, bona hereva momokani do idia diba.” (1 Tim. 2:​3, 4) Unai ese ia hamomokania Baibel duahia bona ‘ena anina lalopararalaia’ karana be mai anina bada. (Mat. 15:10) Unai ita karaia totona, namona be mai iseda ura ibounai ida stadi ita karaia. Paulo ese sivarai namona be Berea taudia dekenai ia harorolaia neganai, Berea taudia be inai bamona idia karaia: “Hereva idia kamonai, bona idia ura henia danu. Dina ibounai Buka Helaga idia tahua, inai hereva be ia momokani o lasi.”​​—Kara 17:11.

Oi be Berea taudia edia haheitalai oi tohotohoa, a? Baibel oi stadilaia neganai, mai emu ura ibounai ida oi stadi bona gau ta ese emu stadi karana ia hadikaia lasi, a? Ena be Keristani tauna ta be guna stadi karana ia moalelaia lasi, to ia ese Berea taudia edia haheitalai ia tohotohoa diba. Taunimanima haida be idia buruka idia lao neganai, duahiduahi bona stadi karana idia laloa bada lasi, to Keristani tauna be unai bamona do ia karaia lasi. Herevana emu mauri lagani be bada eiava maragi, to emu stadi karana idia hadikaia gaudia oi koua diba. Bona oi duahiduahi neganai, ma haida dekenai oi herevalaia diba gaudia oi tahua. Hegeregere, emu adavana o Keristani turana ta dekenai emu stadi lalonai oi dibaia gaudia oi herevalaia, a? Unai bamona oi karaia neganai, unai hereva do oi laloatao bona ma haida oi durua diba.

Emu stadi karana dekenai, namona be Dirava ena hesiai tauna Esera oi tohotohoa, ia be “sibona ena kudouna ia hegaegaelaia Iehova ena taravatu amo sisiba do ia tahua.” (Esr. 7:​10, NW ) Edena bamona oi karaia diba? Stadi gabuna namona ta oi abia hidi be namo. Bena, Iehova oi noia oi do ia hakaua bona aonega ia henia totona. (Iam. 1:5) Sibona oi nanadaia, ‘Inai stadi lalonai dahaka do lau dibaia?’ Oi duahia lalonai, hereva badadia oi tahua. Unai point badadia oi torea diba eiava oi ura laloatao herevadia oi makaia. Bena oi laloa unai point be emu haroro gaukara lalonai, abia hidi oi karaia neganai, eiava tadikaka taihu oi hagoadaia totona edena bamona oi gaukaralaia  diba. Emu stadi dokonai, oi stadilaia gaudia oi riviulaia. Unai ese oi do ia durua oi stadilaia gaudia oi laloatao totona.

Ewa ia gwau: “Baibel lau duahia neganai, hahegeregerea siridia lau duahia, Watch Tower Publications Index, bona Watchtower Library CD-ROM lau gaukaralaia. Haroro gaukara lalonai do lau gaukaralaia diba herevadia lau torea.”

Haida be lagani momo lalonai stadi karana idia moalelaia. (Aon. 2:​1-5) To, idia be mai edia maduna momo bona nega idia atoa sibona edia stadi idia karaia totona be auka. Bema oi dekenai unai ia vara, emu sediual dekenai dahaka oi haidaua diba?

Edena Nega Namona ai Stadi Lau Karaia Diba?

Reana oi abia dae nega oi atoa oi moalelaia gaudia oi karaia totona be auka lasi. Momo idia davaria dala namona ta be, sibona edia stadi idia karaia namonamo totona, tahua gaudia idia atoa, hegeregere Baibel ibounai do idia duahia haorea. Oibe, Baibel lalonai bese taudia edia ladadia edia lista, idaunega ena dubu ena toana ia herevalaia dalana, eiava peroveta herevadia dobudia ita duahia be auka sisina. Namona be gau haida oi karaia oiemu tahua gauna oi hagugurua totona. Hegeregere, Baibel ena karoa ta oi ura duahia be ia auka neganai, ena histori o badinaia daladia oi duahia. Unai bamona hereva be “All Scripture Is Inspired of God and Beneficial”  bukana ai oi davaria diba, unai buka be kahirakahira gado 50 dekenai idia hahanaia vadaeni.

Baibel oi duahia lalonai, emu lalona ena matana amo oi duahia gaudia oi itaia karana ese emu ura do ia habadaia. Unai ese oi do ia durua emu lalona ena matana dekenai Baibel ese ia gwauraia taudia bona ia vara gauna oi itaia totona. Emu stadi negadiai unai bamona oi karaia neganai, emu stadi karana do oi moalelaia bona oi do ia durua. Bona do oi ura bada nega oi atoa stadi oi karaia totona. Danu, dina ta ta ai Baibel duahia karana do oi manadalaia.

Atai dekenai ita herevalaia gaudia ese ita idia durua sibona eda stadi ita karaia totona, to idia bisi bada ruma bese be edena bamona? Namona be ruma bese stadi ena namo be ruma bese  taudia ida umui herevalaia hebou. Nega namona ta umui abia hidi diba, hegeregere daba ta ta eiava dina haida ai umui noga haraga Baibel ena karoa ta umui herevalaia totona. Eiava, reana emui herevahereva karana ese do ia hahedinaraia emui ruma bese sediual umui haidaua be namo. Ruma bese haida idia davaria nega namona be, idia aniani hebou murinai, dina ena siri idia herevalaia eiava Baibel ena karoa ta idia duahia. Ta be teibolo ia do rakatania lasi eiava gau haida ia do karaia lasi neganai, ruma bese taudia be miniti 10 o 15 lalonai, Baibel idia herevalaia eiava Baibel duahiduahi idia karaia. Reana, nega ginigunana do ia auka sisina, to daudau lasi murinai ruma bese taudia ese do idia manadalaia.

Wojciech bona Małgorzata ese edia ruma bese ia durua gauna idia herevalaia: “Guna, anina lasi gaudia dekenai nega bada ai haorea. Emai lalona ai hadaia e-mail gaukaralaia ena nega ai hamaragia totona. Danu, aiemai moale karadia haida edia nega ai hamaragia bona dina ta ai abia hidi Baibel ai stadilaia namonamo totona.” Unai ruma bese be gau haida idia haidaua, to idia lalohisihisi lasi, bona unai ese emu ruma bese ia durua diba danu.

Diba Maoromaoro Ita Tahua Karana be mai Ena Namo!

Baibel stadilaia namonamo karana ese “kara namodia edia anina” ia havaraia. (Kol. 1:​10) Emu mauri lalonai kara namodia oi hahedinaraia neganai, taunimanima ese emu goada do idia itaia. Oi be lo Keristani tauna ai do oi lao bona Baibel ena hereva momokani do oi lalopararalaia namonamo. Abia hidi oi karaia neganai, do oi laloa maoromaoro bona ma haida oi durua namonamo diba, aonega lasi taudia bamona do oi sisiba henia lasi. Mai anina bada gauna be, oi be Iehova kahirakahira do oi lao. Iehova ena kara namodia do oi laloa bada, bona ma haida dekenai Ia oi herevalaia neganai, unai do oi hahedinaraia.​​—1 Tim. 4:​15; Iam. 4:8.

Herevana oi be matamata o buruka, eiava emu aonega be bada o lasi, to Dirava ena hereva oi ura henia be namo bona mai emu ura ibounai ida oi stadilaia. Namona be oi diba, Iehova be emu hekwarahi do ia laloaboio lasi. (Heb. 6:​10) Oi dekenai hahenamo momo do ia henia.

[Box on page 13]

‘DIBA MAOROMAORO ITA ABIA NEGANAI’. . .

Iseda abidadama Dirava dekenai ia hagoadaia bona Iehova ena ura hegeregerena ita raka.​—Kol. 1:​9, 10

Ita laloparara bona abia hidi maorodia ita karaia diba.​—Sal. 119:99

Ita moale bada ma haida ita durua Iehova kahirakahira idia lao totona.​—Mat. 28:​19, 20

[Pictures on page 14]

Stadi gabuna namona abia hidi totona be auka, to ia be mai ena namo

[Picture on page 15]

Ruma bese haida be aniani murinai, edia Baibel duahiduahi idia karaia