Dahaka Do Oi Henia, Mauri Hanaihanai Oi Abia Totona?

“Tau ta be dahaka davana do ia henia iena mauri do ia davaria lou totona?”​​—⁠MAT. 16:⁠26.

1. Dahaka dainai Iesu be Petero ena hereva ia dadaraia?

APOSETOLO Petero be Iesu Keriso ena hereva dekenai ia hoa. Iena Lohiabada be “mai gari lasi ida” ia gwau, kahirakahira ia be hisihisi do ia abia bona do ia mase! Petero be Iesu ia hamaoroa, ia gwau: “Lohiabada e, oi sibona oi hebogahisi henia, oi dekenai unai bamona do ia vara lasi.” To, Iesu be Petero dekenai ena doruna ia henia bona hahediba taudia ma haida ia itaia. Reana idia danu be unai lalohadai kererena idia abia. Bena Iesu ese Petero ia hamaoroa: “Satani e, lauegu murina kahana oi lao. Lau hamorua totona oi hereva, badina oiemu laloa be Dirava ena lasi, to taunimanima edia.”​​—⁠Mar. 8:​32, 33; Mat. 16:​21-​23.

2. Iesu ia ura ena hahediba tauna momokanina ese dahaka ia karaia be namo?

² Reana Iesu ena hereva gabena ese Petero ia durua ia laloparara dahaka dainai Iesu ese ena hereva ia dadaraia. “Iesu ese taunimanima ia boiria, bona ena diba tahua taudia danu” bona ia gwau: “Bema tau ta ia ura lauegu murinai ia raka, ia sibona kopina ena namo do ia laloa lasi, to iena satauro do ia abia isi, bona lauegu murinai do ia mai [‘do ia raka noho’ NW ]. Badina be ia sibona ena mauri dogoatao tauna ese iena mauri dohore ia halusia, to iena mauri ia halusia lau dainai, bona Sivarai Namona dainai tauna ese iena mauri do ia davaria.” (Mar. 8:​34, 35) Momokani, Iesu be ena mauri do ia bouboulaia sibona lasi, to ia ura ia murinai idia raka taudia danu be edia mauri lalonai Dirava idia hesiai henia. Bema unai bamona idia karaia, hahenamo momo do idia abia.​​—⁠Mataio 16:27 duahia.

3. (a) Iesu ese edena henanadai rua be ena kamonai taudia dekenai ia gwauraia? (b) Kamonai taudia be Iesu ena henanadai iharuana idia kamonai neganai, daika ena hereva idia laloatao?

³ Unai nega ai, Iesu be inai henanadai rua ia henia: “Bema tau ta ese tanobada ibounai ia abia, to ena mauri ia haboioa, ena namo be dahaka?,” “Eiava tau ta ese dahaka do ia henia ena mauri ia abia lou totona?” (Mar. 8:​36, 37, NW ) Henanadai ginigunana ena haere be ita diba. Bema tau ta ese tanobada ibounai ia abia, to ena mauri ia haboioa, ia be namo ta do ia abia lasi. Mase tauna be ena kohu ia moalelaia diba lasi. Iesu ena henanadai iharuana ita laloa, ia gwau: “Tau ta ese dahaka do ia henia ena mauri ia abia lou totona?” Iesu ena henanadai idia kamonai taudia be reana Satani ese Iobu ena nega ai ia gwauraia herevana idia laloatao, ia gwau: “Tau ta ese iena gau ibounai do ia negea, iena mauri do ia dogoatao totona.” (Iobu 2:⁠4) Iehova idia tomadiho henia lasi taudia haida be Satani ena hereva idia abia dae.  Momo be edia gau ibounai​—⁠kara maoromaoro taravatudia danu​—⁠do idia negea, edia mauri idia dogoatao totona. To, Keristani taudia be unai bamona idia laloa lasi.

4. Dahaka dainai Keristani taudia dekenai Iesu ena henanadai be mai anina bada?

⁴ Ita diba Iesu be inai tanobada ai eda gorere ia hanamoa, eda kohu ia habadaia, bona ita mauri daudau totona ia mai lasi. To, dala ia kehoa tanobada matamatana ai mauri hanaihanai ita abia totona, bona ita be unai helaro ita laloa bada. (Ioa. 3:​16) Ita gwau diba Iesu ena henanadai ginigunana ena anina be inai: “Bema tau ta ese tanobada ibounai ia abia, to mauri hanaihanai ena helaro ia haboioa, ena namo be dahaka?” Haere be inai: Ia be namo do ia abia lasi. (1 Ioa. 2:​15-​17) Iesu ena henanadai iharuana ita haerelaia totona, reana ita sibona ita nanadaia, ‘Dahaka do lau henia tanobada matamata ai mauri hanaihanai lau abia totona?’ Haere be inai: Eda mauri dalana amo do ita hahedinaraia, eda kudouna dekenai unai helaro ia goada o lasi.​​—⁠Ioane 12:25 hahegeregerea.

5. Edena dala ai mauri hanaihanai ita abia diba?

⁵ Momokani, Iesu ia gwau lasi mauri hanaihanai be eda hesiai gaukara ena davana. Lasi, to mauri​​—⁠hari inai negai ita abia mauri kwadogina danu​​—⁠be harihari gauna. Mauri be moni o gau ma ta amo ita hoia diba lasi. Mauri hanaihanai ita abia dalana tamona be inai: Iehova​—⁠Ia idia tahua taudia edia davana namona ia henia Diravana​—⁠bona “Keriso Iesu” ita abidadama henidia. (Gal. 2:​16; Heb. 11:⁠6) To, namona be kara namodia amo abidadama ita hahedinaraia, badina Baibel ia gwau: “Abidadama mai ena kara namodia lasi, be mase gauna.” (Iam. 2:​26) Unai dainai, Iesu ena henanadai ita laloa dobu neganai, reana ita sibona do ita nanadaia: ‘Inai tanobada ai dahaka do lau dadaraia?’ Bona ‘Iehova ena hesiai gaukara lalonai dahaka do lau karaia, bena do lau hahedinaraia Iehova lau abidadama henia noho?’

“Keriso ese Sibona Ena Namo Ia Tahua Lasi”

6. Iesu be dahaka ia laloa guna?

⁶ Iesu be tanobada gaudia o kohu namodia ia tahua lasi, to mai anina bada gaudia ia laloa guna. Oibe, Iesu be sibona ena namo ia tahua lasi to Dirava ia badinaia. Unai dainai, ia gwau: ‘[Dirava ena] ura be nega ibounai lau karaia.’ (Ioa. 8:​29) Iesu be Dirava ena ura ia karaia totona, dahaka gaudia ia dadaraia?

7, 8. (a) Iesu be dahaka ia dadaraia, bona dahaka hahenamo ia abia? (b) Edena henanadai be sibona dekenai ita henia?

⁷ Nega ta ai, Iesu be ena hahediba taudia ia hamaoroa: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai, bona iena mauri do ia atoa diho, taunimanima momo edia dika davana karaia totona.” (Mat. 20:28) Paragraf 1 ai ita itaia bamona, Iesu ese  ena hahediba taudia ia hamaoroa ena “mauri do ia atoa diho” neganai, Petero ese Iesu ia hamaoroa sibona ia hebogahisi henia be namo. To, Iesu ia gini goada. Bona mai ena ura ida ena mauri goevadaena be taunimanima totona ia atoa diho. Unai dainai, Iesu be hahenamo badana ia abia. Ia be mase amo ia toreisi lou bona “Dirava ese ia abia daekau vadaeni, iena imana idibana kahana dekenai” ia helai. (Kara 2:​32, 33) Oibe, ita dekenai Iesu be haheitalai namona.

⁸ Paulo be Roma Keristani taudia ia sisiba henia, ia gwau: “Ita sibona iseda moale do ita tahua lasi. . . . Badina be Keriso ese sibona ena namo ia tahua lasi.” (Roma 15:​1-3) Edena dala ai unai sisiba ita badinaia bona ita ura henia gaudia ita dadaraia, Keriso bamona?

Iehova Ia Ura Gau Namodia Ita Henia

9. Dirava dekenai gwauhamata ita karaia neganai, ena anina be dahaka?

⁹ Idaunegai Israela dekenai, Mose ena Taravatu ia gwau, lagani 7 murinai o Iubili laganina ai Heberu hesiai taudia idia ruhaia be namo. To, unai hesiai taudia be abia hidi ta idia karaia diba. Anina be, bema hesiai tauna ta be ena biaguna ia lalokau henia, vadaeni ia noho diba to ena mauri ibounai lalonai ena biaguna ena hesiai gaukara do ia karaia. (Deuteronomi 15:​12, 16, 17 duahia.) Dirava dekenai gwauhamata ita karaia neganai, ita be unai bamona abia hidi ita karaia. Anina be iseda ura gaudia ita dadaraia, bona mai iseda kudouna ibounai ida Dirava ena ura ita karaia. Unai amo ita hahedinaraia Iehova ita lalokau henia bada, bona ita ura Ia ita hesiai henia ela bona hanaihanai.

10. Edena dala ai Dirava be iseda biaguna? Bona dahaka ita laloa bona karaia be namo?

¹⁰ Bema oi be Iehova ena Witnes taudia ida Baibel oi stadilaia, sivarai namona oi harorolaia, bona kongrigeisen heboudia dekenai oi lao, unai be namo herea. Ai diba gabeai oi be Iehova dekenai gwauhamata do oi karaia bona Eunuko tauna ese Filipo dekenai ia henia henanadai do oi gwauraia: “Dahaka ese egu bapatiso ia koua?” (Kara 8:​35, 36) Bapatiso oi abia neganai, Dirava ena turana ai do oi lao; unai be Paulo ese ia herevalaia Keristani taudia bamona, ia gwau: “Umui be umui sibona emui lasi, to Dirava ena. Badina be Dirava ese umui ia hoia, mai davana.” (1 Kor. 6:​19, 20) Herevana iseda helaro be guba eiava tanobada ai, to bema ita be Iehova dekenai gwauhamata ita karaia vadaeni, anina be eda biaguna be Iehova. Unai dainai, ita sibona eda namo ita tahua lasi bona ‘taunimanima edia hesiai mai guia taudia ita lao lasi’! (1 Kor. 7:​23) Hesiai taudia bamona Iehova ena ura ita karaia be hahenamo ta!

11. Keristani taudia ese dahaka boubou gaudia idia henia be namo? Bona Mose ena Taravatu hegeregerena idia bouboulaia animal amo dahaka ita dibaia?

¹¹ Paulo be ena tadikaka ia hagoadaia: “Emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona. Inai bamona tomadiho momokani Dirava dekenai umui henia be namo.” (Roma 12:⁠1) Iuda Keristani taudia be unai hereva idia kamonai neganai, reana idia ese guna​—⁠Iesu ena murinai idia do raka lasi neganai​—⁠edia tomadiho lalonai idia karaia boubou karadia idia laloatao. Idia diba vadaeni, Mose ena Taravatu ia gwau animal goevadaedia sibona be Iehova ena boubou patana latanai do idia bouboulaia. Iehova be animal dikadia ia abia dae lasi. (Mal. 1:​8, 13) Unai dainai, eda tauanina be boubou gauna bamona Iehova dekenai ita henia neganai, ia helaga be namo. Iseda nega bada bona goada bada ita gaukaralaia iseda ura gaudia ibounai ita karaia to nega sisina bona goada sisina ita gaukaralaia Iehova ita hesiai henia totona be maoro lasi. Dirava ita gwauhamata henia neganai, anina be eda mauri ibounai​​—⁠eda goada, kohu, moni, bona aonega​—⁠be Iehova dekenai ita henia. (Kol. 3:​23) Unai ena anina be dahaka?

Nega Gaukaralaia Namonamo

12, 13. Iehova dekenai ita henia gauna ta be dahaka?

¹² Iehova dekenai ita henia gauna ta be inai: Nega ita gaukaralaia namonamo. (Efeso 5:​15,  16 duahia.) To unai bamona ita karaia totona, sibona eda ura ita biagua namonamo be gau badana. Tanobada gaudia bona eda goevadae lasi tauanina ena ura gaudia ese ita idia biagua neganai, nega bada be moale gaudia idauidau dekenai do ita haorea kava. To, gau “ibounai be mai edia nega korikori,” hegeregere, moale karadia be mai ena nega, bona Keristani maduna hagugurua totona moni gaukara ita karaia be mai ena nega. (Had. 3:⁠1) Unai dainai, Keristani tauna ia laloa namonamo bona nega ia gaukaralaia namonamo be gau badana.

¹³ Paulo be Atena hanuana ia vadivadi henia neganai, ia itaia “Atena taudia ibounai, bona idau gabu taudia Atena dekenai idia noho, idia edia kara be dina ibounai gau matamata idia herevalaia, bona idia kamonai.” (Kara 17:21) Hari, momo be Atena taudia bamona idia karaia. Idia ese nega bada lalonai TV idia raraia, vidio gadara idia gadaralaia, bona Internet idia gaukaralaia. Iseda nega haorea kava gaudia be momo herea. Bema unai gaudia ita tahua guna, vadaeni Iehova ena diba abia karana do ita rakatania. Namo lasi ita laloa ita bisi bada dainai, ita be nega lasi “mai anina bada gaudia”​​—⁠Iehova ena hesiai gaukara idauidau​​—⁠ita karaia totona.​​—⁠Fili. 1:​9, 10, NW.

14. Edena henanadai ita lalodia be namo?

¹⁴ Iehova dekenai emui mauri umui gwauhamatalaia tadikaka bona taihu e, sibona umui nanadaia, ‘Dina ta ta lau badinaia sediual dekenai, lau be mai egu nega Baibel lau duahia, lau laloa dobu, bona lau guriguri totona, a?’ (Sal. 77:12; 119:97; 1 Tes. 5:​17) ‘Lau be mai egu nega kongrigeisen heboudia totona lau hegaegae, a? Hebou ai egu haere karana amo ma haida lau hagoadaia, a?’ (Sal. 122:1; Heb. 2:​12) Baibel ia gwau, Paulo bona ena turadia “be nega daudau unuseni idia noho. Idia hereva goada [Iehova] ena siahu dekenai.” (Kara 14:⁠3) Oi ura emu noho dalana oi hamaoromaoroa, unai amo oi be mai emu nega haroro gaukara o painia gaukara oi karaia totona, a?​​—⁠Heberu 13:15 duahia.

15. Edena dala ai elda taudia be edia nega idia gaukaralaia namonamo?

¹⁵ Paulo bona kamonai taudia ma haida be Antioka tadikaka idia vadivadi henia neganai, idia be “nega sisina daudau . . . diba tahua taudia danu” idia noho, idia hagoadaia totona. (Kara 14:28) Hari inai negai, elda taudia be edia nega idia gaukaralaia ma haida idia hagoadaia totona. Ma danu, idia be haroro gaukara idia karaia, mamoe idia naria, idia boio mamoe idia tahua, gorere taudia idia durua, bona kongrigeisen lalonai maduna ma haida idia huaia. Bema oi be bapatiso tadikaka ta, oi gaukara goada elda o hesiai tauna ena maduna oi abia totona, a?

16. Edena dala haida ai ita be ‘Keriso ena abidadama henia taudia ita durua bada herea’ diba?

¹⁶ Tano mareremarere bamona gaudia ese edia mauri idia hadikaia tadikaka taihu idia durua taudia momo idia moale. Hegeregere, taihu ta ena mauri lagani be 60 mai kahana bona Betele ai ia gaukara, to nega momo gabu daudau ia lao tadikaka taihu ia durua totona. Dahaka dainai unai taihu be Betele gaukara amo ia holide bona tadikaka taihu ia durua? Ia gwau: “Ena be egu aonega be ia bada lasi, to lau moale badina ma haida lau durua diba. Edia kohu idia haboioa tadikaka bona taihu edia  abidadama goadana be lau ia hagoadaia bada.” Ma danu, tanobada hegegemadai tadikaka taihu tausen momo be Kingdom Hall o Assembly Hall haginia gaukara idia durua. Unai bamona gaukara idauidau ita durua neganai, ita be ‘Keriso ena abidadama henia taudia ita durua bada herea’ unai.​​—⁠Gal. 6:​10.

“Lau be Hanaihanai Umui Danu Ita Noho”

17. Oi be dahaka do oi karaia mauri hanaihanai oi abia totona?

¹⁷ Dirava inai henia taudia ibounai be kahirakahira do idia ore. Ita diba lasi unai be edena nega ai do ia vara. To, ita diba “nega be kwadogi,” bona ita itaia tanobada ena toana be ia idau noho. (1 Korinto 7:​29-​31 duahia.) Unai dainai, Iesu ena henanadai be mai anina bada, ia gwau: “Tau ta ese dahaka do ia henia ena mauri ia abia lou totona?” “Mauri korikori” abia totona, gau badana be Iehova ia ura gaudia ibounai ita karaia. (1 Tim. 6:​19, BHğ) Momokani, Iesu ena sisiba hegeregerena, namona be ena ‘murinai ita raka noho’ bona ‘hanaihanai Dirava ena Basileia ita tahua guna.’​​—⁠Mat. 6:​31-​33; 24:⁠13.

18. Dahaka ita abia dae momokani, bona dahaka dainai?

¹⁸ Vaia, Iesu badinaia karana be auka, badina Iesu ena hereva hegeregerena, haida be edia mauri idia haboioa. To, Iesu bamona, namo lasi ‘ita sibona ita hebogahisi henia.’ Iesu ese aposetolo edia negai idia noho horoa tadikaka dekenai ia henia herevana ita abidadama henia be namo, ia gwau: “Lau be hanaihanai umui danu ita noho ela bona tanobada dokona.” (Mat. 28:20) Unai dainai, namona be iseda nega bona goada ibounai ita gaukaralaia hesiai gaukara helagadia ita karaia totona. Unai bamona ita karaia neganai, anina be ita abia dae momokani Iehova ese hisihisi badana lalonai ita do ia hamauria, bona tanobada matamata ai mauri hanaihanai do ia henia. (Heb. 6:​10) Unai amo do ita hahedinaraia ita be harihari gauna, mauri hanaihanai ita laloa bada.

Emu Haere be Dahaka?

• Edena dala ai Iesu ia hahedinaraia ia ura Dirava bona taunimanima edia hesiai gaukara ia karaia?

• Dahaka dainai sibona eda namo ita laloa lasi, bona edena dala ai unai ita karaia diba?

• Idaunegai Israela dekenai, Iehova be edena bamona boubou gaudia ia abia dae? Bona unai haheitalai ese ita dekenai dahaka ia hadibaia?

• Edena dala ai iseda nega ita gaukaralaia namonamo diba?

[Study Questions]

[Pictures on page 26]

Nega ibounai Iesu be Dirava ena ura ia karaia

[Picture on page 28]

Israela taudia ese gau namodia be tomadiho momokani totona idia gaukaralaia

[Pictures on page 29]

Nega ita gaukaralaia namonamo, Iehova ena ura ita karaia totona