Iehova ese Eda Kara Ibounai Ia Itaia
Iehova ese Eda Kara Ibounai Ia Itaia
“Gabu ibounai dekenai idia noho taunimanima, be [Iehova] ese ia itaia noho, bona edia kara ibounai ia diba.”—SAL. 11:4.
1. Ita be edena bamona taudia ita ura henidia?
OI IDIA laloa bada taudia be edena bamona oi lalodia? Bema oi ura edia lalohadai oi diba, idia be mai momokani ida edia lalohadai idia gwauraia hedinarai. Oi ura idia ese oi idia durua neganai, mai edia ura bada ida oi do idia durua. Oi ura idia ese oi dekenai dala maorona idia hadibaia neganai, idia be mai lalokau ida sisiba idia henia. (Sal. 141:5; Gal. 6:1) Bema unai bamona taudia be emu turadia ai idia lao, do oi moale. Iehova bona iena Natuna be unai bamona turadia. Oibe, idia ese oi idia laloa bada, bona edia lalokau ese oi diba taudia haida edia lalokau ia hereaia. Iehova bona Iesu be sibodia edia namo idia laloa lasi, to idia ura oi idia durua “mauri” korikorina oi abia totona.—1 Tim. 6:19; Apok. 3:19.
2. Salamo 11:4 ena anina be dahaka, bona Davida be dahaka ia diba?
2 Salamo torea tauna, Davida be Iehova ese ita ia laloa bada karana ia herevalaia: “Gabu ibounai dekenai idia noho taunimanima, be [Iehova] ese ia itaia noho, bona edia kara ibounai ia diba.” (Sal. 11:4) Oibe, Dirava be eda kara ia itaia sibona lasi, to iseda kudouna lalonai idia noho gaudia ia diba danu. Davida ma ia gwau: “Oi ese egu kudouna oi diba. Oi ese hanuaboi neganai, lau dekenai oi vadivadi henia. . . . Bona ura dikana ta, be lau dekenai oi davaria lasi.” (Sal. 17:3) Salamo 11:4 ese ia hahedinaraia goevagoeva, Davida ia diba Iehova ese ia laloa bada. Davida ia diba Iehova do ia lalohisihisi bada, bema ia be lalohadai mirodia ia laloa o ena kudouna dekenai kara dikana ta ia lalohadailaia. Davida hegeregerena, oi abia dae Iehova be ia noho momokani, a?
Iehova be Iseda Kudouna Ia Itaia
3. Edena dala ai Iehova be mai laloa maoromaoro ida iseda kerere ia laloa?
3 Iehova be iseda kudouna lalonai idia noho gaudia ia laloa bada. (Sal. 19:14; 26:2) To, Iehova be mai lalokau ida iseda kerere maragimaragidia ia laloa momo lasi. Hegeregere, Aberahamo adavana, Sara be aneru dekenai hereva momokani ia gwauraia lasi neganai, aneru ia itaia Sara be ia gari bona hemarai dainai unai bamona ia karaia. Unai dainai, aneru ese Sara ia sisiba auka henia lasi. (Gen. 18:12-15) Ena be Iobu ese “sibona maoromaoro ia gwauraia, to ia ese Dirava be maoromaoro ia gwauraia lasi,” to Iehova ese Iobu dekenai hahenamo ia henia, badina ia diba Satani ese Iobu ia hahisia bada vadaeni. (Iobu 32:2; 42:12) Unai hegeregerena, Sarepata hanua ena vabu ese peroveta tauna Elia ia hereva auka henia neganai, Iehova ese ia badu henia lasi. Dirava ia laloparara unai vabu be ia lalohisihisi bada, badina iena natuna tamona ia mase.—1 Kin. 17:8-24.
4, 5. Edena dala ai Iehova be mai hebogahisi ida Abimeleka ia kara henia?
4 Iehova be taunimanima edia kudouna lalonai idia noho gaudia ia diba dainai, Ia idia diba lasi taudia edia kara ia laloa bada danu. Mani, Abimeleka, Pilistia hanuana Gerara ena King ia kara henia dalana ita laloa. Abimeleka, ia diba lasi Sara be Aberahamo ena adavana, unai dainai Sara ia abia ena adavana ai ia halaoa totona. To, Abimeleka be Sara ida ia do mahuta hebou lasi neganai, Iehova ese nihi amo ia hereva henia: “Lau diba oiemu laloa be kerere lasi inai kara oi karaia neganai. Unai dekenai lauegu vairana dekenai do oi kerere garina lau koua oi, do oi sihari henia lasi totona. Unai dainai unai tau dekenai iena adavana do oi henia lou, badina ia be peroveta tauna, vadaeni ia ese oi totona do ia guriguri, vadaeni do oi mauri.”—Gen. 20:1-7.
5 Iehova ese Abimeleka ia hamasea diba, badina ia be kaivakuku ia tomadiho henia tauna. To, Dirava ia itaia Abimeleka be mai kudouna ibounai ida unai ia karaia lasi. Unai dainai Iehova be king ia hamaoroa dahaka do ia karaia ena kara do ia gwauatao bona do ia “mauri” noho totona. Oi ura unai bamona Dirava oi tomadiho henia, a?
6. Edena dala ai Iesu be iena Tamana ia tohotohoa?
6 Iesu be ena Tamana ia tohotohoa goevagoeva, hegeregere ena hahediba taudia edia kara namodia ia laloa bada bona edia kerere ia gwauatao. (Mar. 10:35-45; 14:66-72; Luka 22:31, 32; Ioa. 15:15) Iesu ena kara be Ioane 3:17 dekenai ia gwauraia hereva hegeregerena: “Badina be Dirava ese iena Natuna tanobada dekenai ia siaia mai, be tanobada ia kota henia totona ia mai lasi, to tanobada be ia dainai mauri do ia abia.” Oibe, Iehova bona Iesu be hanaihanai ita idia lalokau henia. Bona idia ura mauri do ita abia. (Iobu 14:15) Unai bamona lalokau ese ia hahedinaraia dahaka dainai Iehova be iseda kara ia tahua, iseda kara namodia ia itaia bona iseda kara ia hamaoromaoroa.—1 Ioane 4:8, 19 duahia.
Mai Lalokau ida Iseda Kara Ia Tahua
7. Dahaka dainai Iehova be ita ia itaia noho?
7 Namo lasi ita laloa Iehova be pulisi tauna bamona, guba amo ita ia itaia bona ita kara dika neganai, ita do ia dogoatao! Lasi. To, unai bamona ia karaia tauna be Satani, ia be ita ia itaia noho bona ia gwau, ita be Iehova ita tomadiho henia badina ita be sibona iseda namo ita laloa bada. (Apok. 12:10) Ia ese koikoi herevadia amo ita ia samania! (Iobu 1:9-11; 2:4, 5) Salamo torea tauna ese Dirava ena kara be inai bamona ia torea: “Bema oi ese aiemai kara dika ibounai oi duahia neganai, daika ese oiemu kota lalonai ia kwalimu diba?” (Sal. 130:3) Haere be, tau ta do ia kwalimu diba lasi! (Had. 7:20) To, Iehova be ita ia lalokau henia bada, ia be hebogahisi tama ta bamona ita ia itaia noho, dika amo ita ia gimaia totona. Ita be goevadae lasi bona mai iseda manoka gaudia, unai dainai dika ita dadaraia totona Ia ese ita ia sisiba henia.—Sal. 103:10-14; Mat. 26:41.
8. Edena dala ai Iehova ese iena hesiai taudia ia hadibaia bona matahakani henia?
8 Baibel bona “hesiai tauna mai ena kamonai, bona mai ena kara maoromaoro” ese ia halasia buka bona magasin lalonai idia noho sisiba bona matahakani herevadia ese Dirava ena lalokau karana idia hahedinaraia. (Mat. 24:45; Heb. 12:5, 6) Iehova ena lalokau be Keristani kongrigeisen bona elda taudia amo ia hahedinaraia danu. (Efe. 4:8) Danu, Iehova be tamana ta bamona ita ia hadibaia, bona ia itaia ita be iena sisiba ita badinaia eiava lasi, bona ia ura ita ia durua. Salamo 32:8 ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.” Unai dainai, hanaihanai Iehova ita kamonai henia be gau badana! Namona be ita manau be namo, bona ita abia dae ia be iseda lalokau Tamana bona Hahediba Tauna.—Mataio 18:4 duahia.
9. Edena kara ita dadaraia be namo bona dahaka dainai?
9 Namo lasi iseda abidadama ia manoka, ita hekokoroku eiava ‘kara dika ese ita ia koia.’ (Heb. 3:13; Iam. 4:6) To, unai bamona ia vara diba, bema ta be lalohadai o ura dikadia ia laloa momo. Reana, ia ese Baibel ena sisiba maorodia do ia dadaraia danu. To, gau dikana be, ena lalohadai o ura dikana ia dogoatao auka eiava kara dika ta ia manadalaia dainai, ia be Dirava ena inai tauna ai ia lao diba—unai be gari gauna! (Aon. 1:22-31) Mani, Adamu bona Heva edia natuna roboana Kaino ena sivarai ita laloa.
Iehova be Gau Ibounai Ia Itaia Bena Kara ta Ia Karaia
10. Dahaka dainai Iehova ese Kaino ena boubou gauna ia abia dae lasi, bona Kaino be dahaka ia karaia?
10 Kaino bona Abela be Iehova dekenai boubou gauna idia henia neganai, Iehova be edia boubou gauna ia laloa sibona lasi, to edia lalohadai ia laloa bada danu. Dirava be edia kudouna ia itaia dainai, Abela ese mai abidadama ida ia henia boubou gauna ia abia dae. To, Kaino be abidadama ia hahedinaraia lasi dainai, Dirava ese ena boubou gauna ia dadaraia. (Gen. 4:4, 5; Heb. 11:4) Kaino be ena lalohadai ia haidaua lasi, to ena tadina dekenai ia badu dikadika.—Gen. 4:6.
11. Edena dala ai Kaino be ena kudouna ese ia koia, bona unai amo dahaka ita dibaia?
11 Iehova ia itaia Kaino be lalohadai dikana ia abia dainai, Kaino ia sisiba henia kara namo ia karaia totona. To, madi, Kaino be ena Havaraia Tauna ena sisiba ia dadaraia bona ena tadina ia alaia. Dirava ese Kaino ia nanadaia: “Oiemu tadina Abela be edeseni?” Kaino be mai hemataurai lasi ida Dirava ia haere henia dalana amo ena lalohadai dikana ia hahedinaraia danu, Kaino ia haere: “Lau diba lasi. Be, lau be egu tadina ena naria tauna, a?” (Gen. 4:7-9) Oibe, iseda kudouna be ia koikoi momo bona Dirava ena sisiba ia dadaraia diba! (Ier. 17:9) Namona be unai sivarai amo diba ita abia, bona lalohadai o ura dikadia ita dadaraia haraga be namo. (Iamesi 1:14, 15 duahia.) Bema Baibel amo sisiba ita abia, namona be ita abia dae bona ita diba unai ese ia hamomokania Iehova be ita ia lalokau henia.
Kara Dika Ita Hunia Diba Lasi
12. Iehova be edena dala ai kara dika tauna ia kara henia?
12 Haida idia laloa bema kara dika idia karaia, to tau ta ese idia ia itaia lasi, vadaeni panisi do idia abia lasi. (Sal. 19:12) To, Iehova amo kara dika ta ita hunia diba lasi. “Gau ta Dirava dekena amo ita hunia diba lasi. . . . Idia be hanaihanai iena matana edia vairanai idia noho. Bona Dirava ese danu iseda kara do ia kota henia.” (Heb. 4:13) Diadi Tauna, Iehova be iseda kudouna ena ura gaudia ia tahua diba, unai dainai ta ia kara dika neganai, hahemaoro goeva dalanai ia kota henia. Iehova ‘be bogahisihisi bona hariharibada Diravana. Ia be badu dekenai ia haraga lasi, to bogahisihisi bona lalokau dekenai ia be haraga.’ To, bema tau ta be koikoi bona hunia dalanai ‘mai ena ura ida kara dika ia karaia noho,’ bona ia helalo-kerehai lasi, vadaeni Dirava ese unai tauna do ia “panisia.” (Eso. 34:6, 7; Heb. 10:26) Iehova ese Akana, Anania bona Sapira be unai bamona ia kara henidia.
13. Akana be lalohadai kereredia ia laloa momo dainai, dahaka kara dikana ia karaia?
13 Akana be Dirava ena taravatu ia utua, bona Ieriko hanuana amo kohu haida ia abia bona ena palai ruma henunai ia hunia. Reana, iena ruma bese taudia danu be unai kara lalonai idia vareai. Taunimanima ibounai ese iena henaohenao karana idia diba neganai, Akana be ia laloparara ia be kara dika bada herea ia karaia, ia gwau: “Momokani, lau be lau kerere vadaeni, Lohiabada, Israela ena Dirava, ena vairanai.” (Ios. 7:20) Kaino hegeregerena, Akana be ena kudouna dekenai lalohadai kereredia ia laloa momo. Akana be kohu ia mataganigani henia dainai, henaohenao bona koikoi karana ia karaia. Ieriko amo idia abia kohu be Iehova ena dainai, Akana be Iehova amo ia henaohenao, bona unai dainai ia bona iena ruma bese taudia idia mase.—Ios. 7:25.
14, 15. Dahaka dainai Dirava ese Anania bona Sapira ia hamasea be maoro, bona edia sivarai amo dahaka ita dibaia?
14 Anania bona ena adavana, Sapira be Ierusalema ena Keristani kongrigeisen taudia. Lagani 33 C.E. ena Pentekoste murinai, Ierusalema dekenai daudau hanua amo idia mai kamonai matamata taudia momo idia do noho bona idia durua totona tadikaka be moni idia haboua. Tadikaka taihu ta ta be edia moni hegeregerena kontribusen idia henia. Anania be ena tano ia hoihoilaia bona tadikaka dekenai moni kahana ia henia. To, Anania ia koikoi bona ia gwau ia be tano ena davana amo ia abia moni ibounai ia hariharilaia. Sapira be Anania ena koikoi karana ia diba, to idia ruaosi idia ura kongrigeisen lalonai ladana bada do idia abia, unai dainai idia koikoi. Hoa dalana ai, Iehova ese Anania ena koikoi karana be aposetolo Petero dekenai ia hahedinaraia, bona Petero ese ia nanadaia dahaka dainai ia be unai kara ia karaia. Unai nega ai, Anania ia moru bona ia mase. Daudau lasi murinai Sapira danu ia mase.—Kara 5:1-11.
15 To, Anania bona Sapira be unai kara dika idia karaia neganai, unai be nega kwadogina lalonai idia laloa gauna lasi. Lasi, to idia palanilaia bona aposetolo taudia idia koia. To, gau dikana be, idia ese ‘Dirava bona lauma helaga idia koia.’ Iehova ena kara ese ia hahedinaraia, Ia be kongrigeisen ia gimaia bona ia ura lasi koikoi taudia be kongrigeisen lalonai idia noho. “Mauri Dirava ena imana ese bema ita do ia panisi henia, be mai gari bada momokani.”—Heb. 10:31.
Nega Iboudiai Kara Maoromaoro Ita Karaia
16. (a) Edena dala amo Satani ia ura Dirava ena taunimanima ia hamorua? (b) Oiemu noho gabuna dekenai Satani be dahaka gaudia ia gaukaralaia taunimanima ia hamorua totona?
16 Satani ia hekwarahi bada noho, ia ura ita do ia hamorua bena Iehova be ita dekenai do ia moale lasi. (Apok. 12:12, 17) Diabolo ena ura dikadia be tanobada taudia ese idia hahedinaraia goevagoeva, idia be matabodaga bona dagedage karadia. Hari, ponografi be kompiuta bona gau ma haida dekenai idia itaia haraga diba. Namona be ita gini goada bona Satani ena tarapu lalonai ita moru lasi. Davida bamona do ita gwau: “Lau ese kara maoromaoro dalana sibona do lau badinaia. . . . Egu ruma dekenai do lau noho namonamo, mai egu kerere ta lasi.”—Sal. 101:2.
17. (a) Dahaka dainai Iehova ese idia hunia kara dika ia hahedinaraia? (b) Iseda lalona ita hadaia dahaka do ita karaia be namo?
17 Hari inai negai, Iehova be hoa dalana ai kara dika rohoroho eiava kara dika ma haida ia hahedinaraia lasi, guna ia karaia bamona. To, Ia be unai hunia gaudia ibounai ia itaia bona iena nega korikori ai, do ia hahedinaraia. Paulo ia gwau: “Tau haida edia dika idia hedinarai namonamo, ia gunalaidia bamona, ia lao bona kota gabunai. To haida edia dika ita itaia diba lasi ela bona dina ta.” (1 Tim. 5:24) Iehova ese ta ena kara dika ia hahedinaraia ena badina badana be lalokau. Ia ese kongrigeisen ia lalokau henia bona ia ura kongrigeisen be do ia goeva noho. Danu, kara dika idia karaia to idia helalo-kerehai taudia dekenai hebogahisi ia hahedinaraia. (Aon. 28:13) Unai dainai, namona be ita hekwarahi mai iseda kudouna ibounai ida Dirava ita badinaia bona dika idia havaraia gaudia ibounai ita dadaraia.
Mai Eda Kudouna Ibounai Ida
18. King Davida ia ura ena natuna ese edena dala ai Dirava do ia laloa?
18 King Davida be iena natuna Solomona dekenai ia gwau: “Oiemu tamana ena Dirava dekenai do oi manada momokani, bona iena hesiai gaukara do oi karaia mai oiemu kudouna ibounai, bona mai oiemu lalona tamona danu. Dirava ese iseda laloa ibounai bona iseda ura ibounai ia diba.” (1 Siv. 28:9) Davida ia ura ena natuna Solomona be Dirava do ia abia dae sibona lasi, to do ia diba Iehova ese ena hesiai taudia ia laloa bada bona lalokau henia. Iehova be ena hesiai taudia ia laloa bada bona lalokau henia dainai, Ia oi tanikiu henia, a?
19, 20. Salamo 19:7-11 ena hereva hegeregerena, dahaka ese Davida ia durua Dirava kahirakahira ia lao totona, bona edena bamona Davida ita tohotohoa diba?
19 Iehova ia diba idia ura Ia idia tura henia taudia be ia kahirakahira do idia lao bona iena kara namodia dainai Ia do idia lalokau henia. Unai dainai, Iehova ia ura ita ese Ia bona iena kara namodia do ita diba namonamo. Edena dala ai unai ita karaia diba? Iena Hereva ita stadilaia bona iseda mauri lalonai iena hahenamo ita itaia karadia amo.—Aon. 10:22; Ioa. 14:9.
20 Dina ta ta ai mai guriguri ida Dirava ena Hereva oi duahia bona oi moalelaia, a? Oi abia dae Baibel ena hakaua herevadia badinaia karana be mai ena namo, a? (Salamo 19:7-11 duahia.) Bema unai bamona oi karaia, emu abidadama bona lalokau Iehova dekenai do ia bada ia lao. Bona Ia be oi kahirakahira do ia raka mai, emu imana do ia dogoatao bona oi ida do ia raka. (Isa. 42:6; Iam. 4:8) Oibe, Iehova be oi do ia hanamoa bona gimaia, bema mauri ia lao henia dala maragina ai oi raka. Unai amo Iehova do ia hahedinaraia ia be oi ia lalokau henia.—Sal. 91:1, 2; Mat. 7:13, 14.
Edena Bamona Do Oi Haere?
• Dahaka dainai Iehova be iseda kudouna lalonai ia noho gaudia ia tahua?
• Dahaka kara ese haida ia veria Dirava ena inai taudia ai idia lao totona?
• Edena dala ai ita hahedinaraia ita abia dae Iehova be ia noho momokani?
• Edena dala ai mai iseda kudouna ibounai ida Dirava ita badinaia diba?
[Study Questions]
[Picture on page 4]
Edena dala ai Iehova be tama ta bamona ita ia naria?
[Picture on page 5]
Anania ena sivarai amo dahaka ita dibaia?
[Picture on page 6]
Dahaka ese ita do ia durua mai iseda kudouna ibounai ida Iehova ita hesiai henia noho totona?