Iehova ese Salamo Torea Tauna Ena Guriguri Ia Haerelaia
Iehova ese Salamo Torea Tauna Ena Guriguri Ia Haerelaia
“Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”—SAL. 83:18.
1, 2. Momo be edena bamona Dirava ena ladana idia dibaia, bona edena henanadai haida do ita laloa?
LAGANI haida gunanai, hahine ta be iena gabu dekenai ia vara dika badana ta dainai ia lalohisihisi bada. Iena ruma bese be Katolik taudia, unai dainai pris dekenai heduru ia tahua, to pris ia ura lasi unai hahine ia hereva henia. Unai dainai Dirava ia guriguri henia, ia gwau: “Lau diba lasi oi be daika . . . , to lau diba oi noho. Mani lau oi durua oi lau dibaia totona!” Daudau lasi murinai, Iehova ena Witnes taudia ese unai hahine idia vadivadi henia, idia hagoadaia bona idia durua Baibel amo diba ia abia totona. Ia dekenai gau ma haida bona Dirava ena ladana Iehova idia hadibaia. Unai ese ena lalona ia hamarerea. Ia gwau: “Lau maragi neganai lau ura dibaia Diravana be hari lau dibaia inai!”
2 Momo be unai bamona ekspiriens idia davaria danu. Nega momo, Baibel ai Salamo 83:18 idia duahia neganai, unai be edia nega ginigunana Iehova ena ladana idia itaia totona. Unai siri ia gwau: “Vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.” To, nega ta oi laloa, dahaka dainai Salamo 83 idia torea? Dahaka do idia vara bena taunimanima ibounai do idia abia dae Iehova be Dirava momokani tamona? Hari inai negai, Salamo 83 ena anina be dahaka ita dekenai? Unai henanadai be inai stadi lalonai do ita herevalaia. *
Idia Ura Iehova Ena Taunimanima Idia Hadikaia
3, 4. Daika ese Salamo 83 ia torea, bona edena dika ia herevalaia?
3 Heberu Revarevana dekenai, Salamo 83 ena hereva kwarana ia gwau: “Asapa ena ane.” Reana, unai ane ia torea tauna be Levi tauna Asapa—King Davida ena lohia negana lalonai miusiki gadaralaia tauna namona—ena bese tauna ta. Unai ane lalonai, salamo torea tauna be Iehova ia noia kara ta ia karaia totona, unai amo Iena lohia siahuna bona ladana do ia abia isi. Reana Solomona ia mase murinai, unai ane idia torea. Dahaka dainai? Badina Davida bona Solomona idia lohia neganai, Turo ena king be Israela besena ia tura henia. To Salamo 83 idia torea haorea neganai, Turo taudia be Israela besena ena inai taudia ida idia turana karaia.
4 Salamo torea tauna ese Iehova ena taunimanima idia ura hadikaia besedia 10 ia herevalaia. Unai bese 10 be Israela besena ena kahana kahana ai idia noho: “Edoma bona Isamaela bese taudia ibounai, bona Moaba taudia, bona Hagara bese taudia danu, Gebala, bona Amono bona Amaleka, bona Pilistia, bona Turo taudia danu. Asuria danu be idia danu ia haboua vadaeni.” Sal. 83:6-8) Salamo torea tauna be edena sivarai ia herevalaia? Haida idia gwau, salamo torea tauna be Iehosapata ena negai Amono, Moaba, bona Seiri Ororona kahanai idia noho besedia ese Israela idia tuari henia negana ia herevalaia. (2 Siv. 20:1-26) Ma haida idia laloa Israela ena histori lalonai bese idaudia ese Israela taudia idia dagedage henia karana ia herevalaia.
(5. Hari inai negai, Salamo 83 ena hereva ese edena dala ai Keristani taudia ia durua?
5 Herevana edena sivarai ia gwauraia, to ia hamomokania Israela besena be dika ia davaria gwauraia neganai, Iehova Dirava ena lauma helaga amo salamo torea tauna ese unai ane ia torea. Salamo 83 ese Dirava ena hesiai taudia hari inai negai ia hagoadaia, badina idia danu be edia inai taudia ese idia dagedage henia noho. Bona vaira negana ai, Magoga tauna Goga ese iena taunimanima do ia siaia, mai lauma bona momokani ida Dirava idia tomadiho henia taudia ibounai ia haorea toho totona, unai dainai unai karoa ese ita ia hagoadaia.—Esekiela 38:2, 8, 9, 16 duahia.
Salamo Torea Tauna ese Ia Laloa Bada Gauna
6, 7. (a) Salamo 83 ena siri ginigunadia bamona, salamo torea tauna be dahaka totona ia guriguri? (b) Salamo torea tauna be dahaka ia laloa bada?
6 Salamo torea tauna be ena lalohekwarahi ia gwauraia neganai, ia gwau: “Dirava e, do oi laga-ani lasi. Dirava e, oiemu hereva do oi koua lasi, bona do oi helai kava lasi. Oi itaia, oi dekenai idia tuari henia gwauraia taudia, ese tuari totona idia toreisi noho. Oi idia badu henia taudia be idia dagedage noho. Oiemu bese taudia hadikaia totona, idia ese dala idia tahua noho. . . . Idia ese mai laloa tamona edia palani idia karaia, bona oi hadikaia totona, idia ese ta ta ibounai dekenai gwauhamata idia henia.”—Sal. 83:1-3, 5.
7 Salamo torea tauna be dahaka ia laloa bada? Momokani, ia be ia bona ena ruma bese taudia idia roho mauri diba eiava lasi ia laloa momo. To, ia laloa bada gauna be ia ura lasi Iehova ena ladana bona Iena bese idia hadikaia. Namona be ita ibounai be unai bamona ita karaia, mai laloa maoromaoro ida inai tanobada ena metau negana ita haheaukalaia noho.—Mataio 6:9, 10 duahia.
8. Bese haida idia ura Israela besena idia hadikaia ena badina be dahaka?
8 Salamo torea tauna ese Israela ena inai taudia edia hereva be inai bamona ia gwauraia: “Umui mai, unai bese do ita hadikaia ore, vadaeni Israela ena ladana be, taunimanima ese do idia laloaboio ela bona hanaihanai.” (Sal. 83:4) Unai bese taudia be Dirava ena abia hidi taudia idia inai henia momokani! To, idia ura Israela besena idia hadikaia ena badina ta ia noho. Unai badina be, idia ura Israela ena tano idia abia bona idia hekokoroku idia gwau: “Dirava ena rei gabudia be do ita abia, iseda tano.” (Sal. 83:12) Iseda negai unai bamona ia vara danu, a? Oibe!
“Oiemu Gabu Helagana”
9, 10. (a) Idaunegai, Dirava ena gabu helagana be edeseniai? (b) Hari, horoa orena taudia bona “mamoe idaudia” be dahaka hahenamo idia abia?
9 Idaunegai, Israela taudia ese Gwauhamata Tanona idia gwauraia Dirava ena gabu helagana. Israela taudia be Aigupito ena igui amo idia roho mauri neganai, idia abia kwalimu ane mani ita laloa, idia gwau: “Oi hamauria vadaeni besena oi ese oi gunalaia, oiemu gwauhamata hegeregerena. Oiemu goada dekenai oi hakaudia vadaeni, ia mai bona oiemu gabu helagana.” (Eso. 15:13) Gabeai unai “gabu helagana” ai Ierusalema hanuana idia haginia mai ena dubu helaga bona hahelaga taudia. Danu, unuseniai King Davida ena bese amo idia vara king taudia be Iehova ena terona dekenai idia helai. (1 Siv. 29:23) Unai dainai, Iesu ese Ierusalema ia gwauraia “King badana ena hanua.”—Mat. 5:35.
10 Iseda nega be edena bamona? Lagani 33 C.E. ai, bese matamata ta ia vara, unai be “Dirava ena Israela.” (Gal. 6:16) Unai bese be Iesu Keriso ena horoa tadikakadia, bona idia ese Dirava ena ladana idia harorolaia, Israela besena korikorina be unai bamona ia karaia lasi. (Isa. 43:10; 1 Pet. 2:9) Idia dekenai, Iehova be idaunegai Israela dekenai ia karaia gwauhamatana ia henia: Ia gwau: “Lau be edia Dirava do lau lao, bona idia be lauegu bese taudia do lau halaodia.” (2 Kor. 6:16; Lev. 26:12) Lagani 1919 ai, Iehova ese “Dirava ena Israela” taudia oredia tanobada ai be iena bese taudia ai ia halaodia, bona unai negai laulau dalanai idia be “tano” ta idia abia, unai be hegeregere paradaiso bamona gabuna bona unuseniai gaukara idia karaia. (Isa. 66:8, BHğ) Lagani 1930 amo, “mamoe idaudia” milioni momo be Dirava ena Israela taudia idia bamoa. (Ioa. 10:16) Hari, Iehova ese Keristani taudia edia gaukara ia hanamoa dainai, edia namba ia bada daekau, bona idia ia gimaia karana ese ia hamomokania Iehova ia lohia be maoro. (Salamo 91:1, 2 duahia.) Unai ese Satani ia habadua dikadika!
11. Dirava ena inai taudia ese idia tahua gauna badana be dahaka?
11 Dokona negadiai, Satani be ena taunimanima ia gaukaralaia tanobada ai horoa orena taudia bona edia bamodia idia dagedage henia totona. Unai be Western Europe ena Nazi gavamani bona Eastern Europe ai, Soviet Union ena Komiunis gavamani edia nega ai idia vara. Tano momo dekenai unai bamona ia vara danu, bona Magoga tauna Goga ena nega ginigabena ai Iehova ena taunimanima ia tuari henia neganai, unai do ia vara lou. Unai nega ai, inai taudia be mai mataganigani ida Iehova ena taunimanima edia kohu do idia dadia, guna idia karaia bamona. To, Satani ena ura badana be iseda orea do ia hadikaia, unai amo Dirava ena ladana be taunimanima ese do idia laloatao lasi. Iehova be ena lohia siahuna ia abia isi totona dahaka do ia karaia? Mani salamo torea tauna ena hereva ita laloa lou.
Iehova Do Ia Kwalimu
12-14. Salamo torea be edena tuari rua ia herevalaia?
12 Salamo torea tauna ia diba momokani Iehova ese ena inai taudia edia palani do ia hadikaia. Salamo torea tauna ese idaunegai hanuana Megido dekenai Israela besena be tuari rua lalonai ia kwalimu sivaraina ia herevalaia, unai Megido hanua be ena ladana hegeregerena kourana ai ia noho. Kisona Sinavai be unai koura huanai ia aru lao, siahu negana ai, unai sinavai ia kaukau. To, medu bada ia diho neganai, unai sinavai ia abata. Reana unai dainai unai sinavai idia gwauraia ‘Megido ena ranu gabuna.’—Gun. 4:13; 5:19.
13 Megido kourana ena kahanai More Ororona ia noho. Hahemaoro Tauna Gideona ena nega ai, Midiana taudia, Amaleka taudia, bona dina ia daekau kahana taudia ibounai be unuseniai idia haboua, Israela taudia idia tuari henia totona. (Gun. 7:1, 12) Gideona ena tuari orea maragina be tatau 300 sibona, to Iehova ese idia ia durua bona edia inai taudia edia tuari orea badana idia halusia. Edena dala ai? Dirava ena hereva hegeregerena, hanuaboi ai, edia inai taudia edia kamepa idia hagegea bona edia kede be hodu dekenai idia hunia. Gideona ese gwaumaoro ia henia neganai, iena tuari taudia be hodu idia hamakohidia bona edia kede idia hahedinaraia. Unai nega ai, kibi idia hiriria bona idia boiboi: “Lohiabada ena tuari kaia, bona Gideona ena!” Edia inai taudia idia daradara bona idia giroa bona sibodia idia alaia heheni, bona idia heau mauri taudia be Ioridane Sinavaina dekenai idia heau lao. To, Israela taudia momo ese idia luludia. Bona unai nega ai edia inai taudia 120,000 idia hamasea.—Gun. 7:19-25; 8:10.
14 More Ororona amo kilomita 6 bamona be Taboro Ororona ia noho, Megido kourana be ma kahana dekenai ia noho. Unuseniai, Hahemaoro Tauna Baraki be Israela ena tuari taudia 10,000 ia haboua Kanana ena king Hasoro idia tuari henia totona, Kanana ena tuari oreana be
Sisera ese ia gunalaia. Unai Kanana tuari oreana edia kariota ibounai be 900 bona kariota ena wili dekenai auri amo idia karaia kaia idia noho. Israela ena tuari orea maragina be Taboro Ororona ai idia hebou neganai, Sisera ena tuari oreana idia laloa do idia kwalimu dainai koura dekenai idia diho lao. Vadaeni, “Lohiabada ese Sisera mai ena tuari orea taudia bona kariota dekenai daradara ia havaraia.” Bona medu bada ia diho bona Kisona Sinavai ia abata dainai, kariota be kopukopu dekenai idia diho. Unai tuari orea taudia ibounai be Israela taudia ese idia hamasedia ore.—Gun. 4:13-16; 5:19-21.15. (a) Salamo torea tauna ese Iehova ia noia dahaka ia karaia totona? (b) Dirava ena tuari ginigabena ena ladana ese ita dekenai dahaka ia hadibaia?
15 Salamo torea tauna ese Iehova ia noia guna Israela taudia totona ia karaia karana be iena nega ai do ia karaia danu. Ena guriguri lalonai, ia gwau: “Midiana taudia dekenai oi karaia hegeregerena, be Asuria taudia dekenai danu do oi karaia. Sisera bona Iabina dekenai, Kisona Sinavai dekenai oi karaia hegeregerena, unai Asuria taudia mani do oi halusia. Ene Doro dekenai oi ese idia oi hadikaia ore, bona edia mase tauanidia be tano dekenai idia bodaga lao.” (Sal. 83:9, 10) Unai dainai, Dirava ese Satani ena tanobada danu do ia karaia tuari ginigabena ena ladana idia gwauraia Aramagedono (anina be “Megido Ororona”). Unai ladana ita kamonai neganai, Megido ai idia karaia tuari idauidau ita laloatao. Iehova be unai idaunegai tuari lalonai ia kwalimu dainai, ita diba Aramagedono ai do ia kwalimu momokani.—Apok. 16:13-16.
Iehova Ena Lohia Siahuna Abia Isi Totona Ita Guriguri
16. Hari, edena dala ai dagedage taudia be ‘hemarai dekena amo edia vairadia idia koua’?
16 Inai “nega ena dokona” ai, haida idia ura Iehova ena taunimanima ibounai idia hadikaia ore, to Iehova ese unai ia koua. (2 Tim. 3:1) Unai dainai Dirava ena taunimanima idia inai henia taudia idia hemarai. Salamo 83:16 ia gwau: “Lohiabada e, hemarai dekena amo edia vairadia do oi koua. Unai bamona do oi karaia, taunimanima ese oiemu ladana do idia tahua totona.” Tano momo ai, dagedage taudia idia hekwarahi bada Iehova ena Witnes taudia edia gaukara idia koua totona, to idia hegeregere lasi. Unai tano ai, Dirava momokani idia tomadiho henia taudia edia haheauka karana dainai, kudou-maoro taudia dekenai haroro namona idia henia, bona momo be Iehova ena ‘ladana idia tahua.’ Guna Iehova ena Witnes taudia idia dagedage henia tanodia momo ai, taunimanima handred tausen momo be hari mai moale ida Iehova idia hanamoa noho. Iehova ia kwalimu unai! Bona ena inai taudia idia hemarai!—Ieremia 1:19 duahia.
17. Taunimanima dekenai dahaka dika do ia vara, bona daudau lasi edena hereva do ita laloatao?
17 Ita diba iseda tuari be ia do ore lasi. Bona sivarai namona do ita harorolaia noho—ita idia inai henia taudia dekenai danu. (Mat. 24:14, 21) To, iseda haroro gaukara amo kamonai taudia dekenai dala ita kehoa idia helalo-kerehai bona mauri hanaihanai idia abia totona, be kahirakahira Iehova ese do ia koua. Iehova ena ladana abia isi karana ese taunimanima hamauria gaukarana ia hereaia momokani. (Esekiela 38:23 duahia.) Tanobada besedia ibounai idia haboua Dirava ena taunimanima idia hadikaia gwauraia neganai, salamo torea tauna ena guriguri herevana do ita laloatao: “Lau ura idia be do idia hemarai, bona do idia gari noho ela bona hanaihanai. Oi ese idia do oi alaia mase, mai edia hemarai danu.”—Sal. 83:17.
18, 19. (a) Iehova ena lohia siahuna idia dagedage henia taudia dekenai dahaka do ia vara? (b) Kahirakahira Iehova ese ena lohia siahuna do ia abia isi, edena dala ai unai ese oi ia durua?
18 Iehova ena lohia siahuna idia dagedage henia taudia be Ia ese do ia haorea momokani. Baibel ese ia hahedinaraia “Sivarai Namona idia abia dae lasi taudia” be Dirava ese Aramagedono ai do ia haoredia momokani. (2 Tes. 1:7-9) Iehova ese kara dika taudia ia haorea bona mai momokani ida Ia idia tomadiho henia taudia ia hamauria karana ese do ia hahedinaraia, Iehova be Dirava momokani tamona. Tanobada matamata ai, unai kwalimu karana be do idia laloaboio lasi. Do idia “toreisi lou, kara maoromaoro taudia, bona kara maoromaoro lasi taudia” be Iehova ese ia karaia gaudia do idia dibaia. (Kara 24:15) Tanobada matamata ai, do idia itaia Iehova ena lohia siahuna henunai idia noho be aonega karana. Bona edia huanai idia noho manau taudia do idia diba Iehova be Dirava momokani tamona.
19 Iseda lalokau guba Tamana be iena kamonai hesiai taudia totona, vaira negana namona ia hegaegaelaia! Unai ese emu lalona ia veria Iehova oi noia salamo torea tauna ena guriguri herevana ia haerelaia totona: “Oi ese idia do oi alaia mase, mai edia hemarai danu. Lau ura inai bamona do oi karaia, vadaeni idia be do idia diba oiemu ladana be Iehova. Bona oi sibona, Ataiai Momokani Diravana, ese tanobada oi biagua noho.”—Sal. 83:17, 18.
[Footnote]
^ par. 2 Inai kahana ita do stadilaia lasi neganai, Salamo 83 oi duahia be namo ena hereva oi diba totona.
Anina Oi Gwauraia Diba, A?
• Salamo 83 idia torea neganai, Israela besena be edena bamona?
• Salamo 83 ia torea tauna be dahaka ia laloa bada?
• Hari inai negai, Satani ena inai taudia be daidia?
• Edena dala ai Iehova ese Salamo 83:18 ena guriguri herevana do ia haerelaia?
[Study Questions]
[Map on page 15]
(For fully formatted text, see publication)
Edena dala ai idaunegai Megido ai idia karaia tuari be vaira negana ai do ia vara gauna ida idia hegeregere?
Kisona Sinavaina
Haroseta
Karamele Ororo
Ieserele Ena Koura
Megido
Tanaka
Gileboa Ororo
Haroda Ranu Gabuna
More
Ene Doro
Taboro Ororo
Galilea Ena Davara
Ioridane Sinavaina
[Picture on page 12]
Dahaka ese salamo torea tauna ena lalona ia veria Salamo 83 ia torea totona?