Ma Haida Oi Matauraia, A?
Ma Haida Oi Matauraia, A?
“Umui ta ta dekenai danu do umui matauraia.”—ROMA 12:10.
1. Hari inai negai, tano momo dekenai, taunimanima be dahaka kara idia karaia lasi?
TANO haida ai, taunimanima badadia idia helai neganai, namona be natudia ese hemataurai idia hahedinaraia. Hegeregere taunimanima badadia vairanai idia tui diho neganai, idia hahedinaraia idia be maragi. Ma danu, bema natuna ena doruna be taunimanima badana ta ia henia, unai be hemataurai karana lasi. Momokani, tano idauidau ai taunimanima be dala idauidau ai hemataurai idia hahedinaraia. Mose ena Taravatu ita laloa be namo, badina ia be unai kara ia gwauraia. Ia gwau: “Tau buruka edia vairanai do umui toreisi, bona buruka taudia ibounai do umui matauraia.” (Lev. 19:32) To, hari inai negai, tano momo dekenai, taunimanima be ma haida idia matauraia lasi.
2. Baibel ia gwau daika ita matauraia be namo?
2 Baibel be ia hahedinaraia ma haida matauraia karana be gau badana. Baibel ia gwau Iehova bona Iesu ita matauraia be namo. (Ioa. 5:23) Ma danu, Baibel ia gwau iseda ruma bese taudia, tadikaka taihu bona ma haida ita matauraia be namo. (Roma 12:10; Efe. 6:1, 2; 1 Pet. 2:17) Edena dala haida ai ita hahedinaraia ita be Iehova ita matauraia bada? Edena dala ai ita hahedinaraia iseda tadikaka taihu ita matauraia? Unai henanadai bona henanadai ma haida edia haere ita tahua be namo.
Iehova Bona Iena Ladana Matauraia
3. Iehova ita matauraia dala badana be dahaka?
3 Iehova ita matauraia dala badana be inai: Iena ladana ita matauraia. Mani oi laloa, ita be Iena “ladana” ita abia taudia. (Kara 15:14, BHğ) Oibe, Siahu Ibounai Diravana, Iehova ena ladana ita abia be hahenamo badana. Peroveta tauna Mika ia gwau: “Bese iboudiai be idia raka, ta ta ena dirava ena dirava ena ladana ai; to ita ese Iehova, eda Dirava, ladana ai do ita raka ela bona hanaihanai.” (Mika 4:5, BHğ) Dina ta ta ai ita karaia karadia amo Iehova ena ladana ita hanamoa neganai, ita hahedinaraia ita be ‘Iehova ena ladana ai ita raka.’ Paulo ese Roma tadikaka ia hadibaia, taunimanima be “Dirava ena ladana idia hadikaia” diba bema ita harorolaia sivarai namona ita badinaia lasi.—Roma 2:21-24.
4. Iehova ena sivarai oi harorolaia karana be edena bamona oi laloa?
4 Iehova ita matauraia dalana ma ta be inai: Iseda haroro gaukara. Gunaguna Iehova be Israela besena ia noia ena hesiai gaukara idia karaia totona, to idia karaia lasi. (Isa. 43:1-12) Nega momo, idia ese Iehova, “Israela edia Helaga Dirava idia habadua” o gwau-edeede henia. (Sal. 78:40, 41) Gabeai, Iehova be unai bese ia dadaraia vaitani. To ita moale, badina hari inai negai Iehova bona ena ladana ita harorolaia be hahenamo hereadaena. Unai gaukara ita karaia badina Iehova ita lalokau henia bona ita ura Iena ladana ita hahelagaia. Momokani, unai gaukara ita karaia badina iseda guba Tamana ena kara bona ura ita diba, ani? Ita be aposetolo Paulo ena hereva ita abia dae, ia gwau: “Sivarai Namona lau harorolaia . . . be Dirava ese ia oda vadaeni. Bema Sivarai Namona lau harorolaia lasi neganai, madi, lau be dika momokani!”—1 Kor. 9:16.
5. Edena dala ai Iehova ita abidadama henia bona matauraia be namo?
5 Salamo torea tauna Davida ia gwau: “Lohiabada e, oiemu ladana idia diba taudia ese, oi do idia abidadama henia. Oi dekenai idia mai taudia, be oi ese idia do oi rakatania lasi, lasi momokani.” (Sal. 9:10) Bema Iehova ita diba bona Iena ladana ita matauraia, ita be Ia do ita abidadama henia, gunaguna ena kamonai hesiai taudia idia karaia bamona. Oibe, Iehova ita matauraia dalana ma ta be inai: Ia ita abidadama henia be namo. Baibel ese Iehova abidadama henia karana bona matauraia karana be edena bamona ia herevalaia? Israela taudia ese Iehova idia abidadama henia lasi neganai, Ia be Mose ia nanadaia: “Inai taunimanima be lau dekenai do idia kamonai henia lasi [“matauraia lasi,” NW ] ela bona edena negai? Toa kara momo herea idia dekenai lau karaia vadaeni. Edena negai lau dekenai do idia abidadama henia?” (Num. 14:11) Momokani, bema Iehova ita abidadama henia hisihisi lalonai ita do ia gimaia bona naria, anina be Iehova ita matauraia bada unai.
6. Dahaka ese ita do ia hagoadaia Iehova ita matauraia totona?
6 Iesu ese ia hahedinaraia, namona be mai eda kudouna ibounai ida Iehova ita matauraia. Haida be mai momokani ida Iehova idia tomadiho henia lasi dainai, Iesu be Iehova ena hereva ia gwauraia lou, ia gwau: “Inai bese taudia edia uduna sibona idia hanamoa lau, to edia kudouna be daudau masemase.” (Mat. 15:8) Mai kudouna ibounai ida Iehova ita lalokau henia neganai, mai momokani ida Iehova do ita matauraia. (1 Ioa. 5:3) Ma danu, Iehova ena gwauhamata herevana ita laloatao, ia gwau: “Lau dekenai idia matauraia taudia be do lau matauraidia.”−1 Sam. 2:30.
Kongrigeisen Elda Taudia ese Ma Haida Idia Matauraia be Namo
7. (a) Dahaka dainai kongrigeisen elda taudia ese tadikaka taihu ibounai idia matauraia be gau badana? (b) Edena dala ai Paulo be ena tadikaka ia matauraidia?
7 Paulo be ena tadikaka ia sisiba henia, ia gwau: “Umui ta ta dekenai danu do umui matauraia.” (Roma 12:10) Kongrigeisen elda taudia ese tadikaka taihu ibounai idia matauraia be gau badana. Unai bamona ia karaia elda tauna be Paulo ena haheitalai ia tohotohoa. (1 Tesalonika 2:7, 8 duahia.) Paulo ese ia vadivadi henia kongrigeisen taudia ibounai be Paulo ena kara idia diba. Hegeregere ia karaia diba gaudia sibona be tadikaka ia noia idia karaia totona. Paulo ese tadikaka ia matauraia dainai, tadikaka be ia idia matauraia danu. Nega ta Paulo ia gwau: “Umui lau noia, lauegu kara bamona do umui karaia.” Ita gwau diba, momo be Paulo ena hereva idia kamonai, badina ia be haheitalai namona.—1 Kor. 4:16.
8. (a) Iesu be edena dala ai ia hahedinaraia ia be ena hahediba taudia ia matauraia? (b) Kongrigeisen elda taudia ese edena dala ai Iesu ena haheitalai idia tohotohoa diba?
8 Kongrigeisen elda tauna ta ese tadikaka taihu ia matauraia dalana ma ta be inai: Namona be ena noinoi o hakaua herevana ia henia ena badina ia gwauraia. Unai bamona ia karaia elda tauna be Iesu ia tohotohoa. Hegeregere, nega ta Iesu be ena hahediba taudia ia hamaoroa Iehova idia noia utua taudia ma haida ia siaia totona, bena ena badina ia gwauraia. Ia gwau: “Uiti ena anina abia negana ia ginidae vadaeni, to utua taudia be momo lasi. [Unai dainai,] uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” (Mat. 9:37, 38; NW ) Nega ma ta ai, Iesu ese ena hahediba taudia ia hamaoroa ‘do idia naria’ be namo, bena ena badina ia gwauraia. Ia gwau: “Badina be umui emui Lohiabada do ia mai negana be umui diba lasi.” (Mat. 24:42) Nega momo, Iesu be ena hahediba taudia ese do idia karaia gauna bona ena badina ia gwauraia. Unai amo ia hahedinaraia ia be ena hahediba taudia ia matauraia bada. Kongrigeisen elda taudia ese Iesu ena haheitalai idia tohotohoa be namo!
Iehova Ena Kongrigeisen Bona Ena Hakaua Dalana Matauraia
9. Kongrigeisen bona ena gwaukau taudia ita matauraia neganai, anina be daika ita matauraia? Herevalaia.
9 Iehova ita matauraia dalana ma ta be inai: Kongrigeisen bona ena gwaukau taudia ma haida ita matauraia be namo. Hesiai tauna mai ena kamonai oreana ese Baibel amo idia halasia sisiba ita badinaia neganai, ita hahedinaraia ita be Iehova ena dala ita matauraia. Aposetolo edia negai ia noho Keristani kongrigeisen lalonai, haida be gwaukau taudia idia matauraia lasi dainai, Ioane be sisiba auka ia henia. (3 Ioane 9-11 duahia.) Ia hahedinaraia danu, unai gwau-edeede taudia be gwaukau taudia edia hadibaia hereva o dala idia matauraia lasi. To, ma haida be unai gwau-edeede taudia idia tohotohoa lasi. Aposetolo taudia haida idia do mauri noho neganai, momo be unai gwaukau taudia idia matauraia bada.—Fili. 2:12.
10, 11. Baibel amo oi hahedinaraia dahaka dainai gwaukau taudia ita matauraia be maoro.
10 Haida idia laloa gwaukau taudia idia noho be anina lasi, badina Iesu ia gwau ita “ibounai be tadikaka.” (Mat. 23:8) To Baibel ibounai, Genese ia lao Apokalupo ita duahia amo ita itaia, Dirava be tatau haida dekenai dagi ia henia. Hegeregere Iehova be Israela ena bese kwarana taudia, hahemaoro taudia o king amo Iena hakaua herevadia ia halasia. Bona unai gwaukau taudia ia matauraia lasi tauna be Iehova ese ia panisia.—2 Kin. 1:2-17; 2:19, 23, 24.
11 Aposetolo edia negai, Keristani taudia be aposetolo taudia edia dagi idia matauraia. (Kara 2:42) Paulo be tadikaka dekenai hakaua herevadia ia henia. (1 Kor. 16:1; 1 Tes. 4:2) To, ia danu be gwaukau taudia ia matauraia. (Kara 15:22; Gal. 2:9, 10) Momokani, Paulo ia diba Keristani kongrigeisen ena gwaukau taudia ia matauraia be maoro.
12. Iehova ese ia abia hidi taudia matauraia karana ena haheitalai momo be Baibel ese ia gwauraia. Unai amo dahaka gau rua ita diba?
12 Unai amo gau rua ita diba. Ginigunana be, “hesiai tauna mai ena kamonai, bona mai ena kara maoromaoro” bona ena Hakaua Oreana be Baibel ena taravatu hegeregerena kongrigeisen elda taudia bona ma haida idia abia hidi. (Mat. 24:45-47; 1 Pet. 5:1-3) Iharuana be, ita ibounai, kongrigeisen elda taudia danu, ese ita idia naria taudia ibounai ita matauraia be namo. Edena dala haida ai gwaukau taudia ibounai ita matauraia diba?
Loaloa Naria Taudia Matauraia
13. Edena dala ai loaloa naria taudia ita matauraia diba?
13 Paulo ia gwau: “Aiemai varavara taudia e, umui dekenai ai noinoi, Keriso ena dala umui dekenai idia hadibaia noho taudia, be mai mataurai danu do umui kamonai henidia. Edia gaukara dainai do umui lalokau henidia bona mataurai henidia. Mai lalokau bona mai maino danu do umui noho hebou.” (1 Tes. 5:12, 13) Loaloa naria taudia be idia “gaukara” goada ma haida idia durua totona. Unai dainai, idia ita ‘matauraia.’ Dala ta be, mai eda kudouna ibounai ida edia sisiba o hagoadaia herevadia ita badinaia. Loaloa naria taudia be hesiai tauna mai ena kamonai oreana ese idia siaia tok idia henia neganai, “Dirava dekenai amo aonega” ese ita do ia durua ita “kamonai haraga” o badinaia totona.—Iam. 3:17; NW.
14. Edena dala ai kongrigeisen taudia ese idia hahedinaraia idia be mai edia kudouna ibounai ida loaloa naria taudia idia matauraia, bona unai ena namo be dahaka?
14 Bema loaloa naria tauna ta be ita ia hadibaia dala matamatana ta ita badinaia totona be edena bamona? Namo lasi ita gwau, “Iniseniai ai be unai bamona ai karaia lasi” o, “Gabu ma haida ai be namo to emai kongrigeisen ai unai be ia namo lasi.” To, hemataurai ita hahedinaraia totona, namona be lalohadai kereredia ita negea bona unai tadikaka ena hereva ita badinaia. Namona be ita laloatao, ita be Iehova ena kongrigeisen lalonai ita noho bona Iesu be kongrigeisen Kwarana; unai lalohadai ese ita do ia durua hemataurai ita hahedinaraia totona. Kongrigeisen taudia ese loaloa naria tauna ta ena sisiba idia badinaia neganai, idia hamomokania idia be mai edia kudouna ibounai ida unai tadikaka idia matauraia. Paulo ese Korinto tadikaka ia hanamoa, badina mai hemataurai ida vadivadi elda tauna, Tito, ena sisiba idia badinaia. (2 Kor. 7:13-16) Hari inai negai, ita itaia loaloa naria taudia edia hakaua herevana ita badinaia neganai, eda haroro gaukara lalonai ita moale.—2 Korinto 13:11 duahia.
‘Taunimanima Ibounai Do Ita Matauraia’
15. Edena dala ai ma haida ita matauraia diba?
15 Paulo ia gwau: “Tau badana do oi gwau henia lasi. To mai manau danu do oi hereva henia, ia be oiemu tamana bamona. Eregabe taudia do oi hereva henia, idia be oiemu tadikaka bamona. Hahine badadia do oi hereva henia, idia be oiemu sinana bamona. Kekeni taudia do oi hereva henia, oiemu taihuna do oi hereva henia bamona, mai oiemu laloa goevagoeva danu. Vabu taudia do oi durua, bema idia be vabu korikori.” (1 Tim. 5:1-3) Oibe, Baibel be ita ia sisiba henia, tadikaka taihu ibounai ita matauraia totona. To, bema oi bona tadikaka ta huanai hepapahuahu ia vara be edena bamona? Unai tadikaka do oi matauraia lasi, a? Eiava unai Dirava ena hesiai tauna ena kara namodia oi laloa dainai, emu kara oi haidaua be namo, a? Kongrigeisen naria taudia ese edia tadikaka idia matauraia be mai anina bada, badina Baibel ia gwau: “Lohia mai hekokoroku danu bamona emui orea do umui gunalaia lasi.” (1 Pet. 5:3) Momokani, kongrigeisen lalonai—ta ta dekenai ita lalokau henia dainai—dala idauidau ai ma haida ita matauraia diba.—Ioane 13:34, 35 duahia.
16, 17. (a) Dahaka dainai ita haroro henia taudia sibona lasi, to ita idia inai henia taudia danu ita matauraia be gau badana? (b) Edena dala ai ‘taunimanima ibounai do ita matauraia’?
16 Kongrigeisen taudia sibona lasi, to ma haida danu ita matauraia be namo. Paulo be ena negai idia noho tadikaka dekenai ia gwau: “Dala ita davaria neganai, taunimanima ibounai dekenai kara namodia do ita karaia.” (Gal. 6:10) Vaia, nega momo gaukara o sikuli turadia ita matauraia be auka, badina idia be ita idia matauraia lasi. To, gau badana be inai hereva ita laloatao: “Do umui laloa hekwarahi lasi kara dika taudia dainai.” (Sal. 37:1) Unai sisiba ita badinaia neganai, unai ese ita do ia durua eda inai taudia ita matauraia totona. Ma danu, haroro gaukara lalonai, manau karana ese ita do ia durua “mai mataurai” ida ma haida ita hereva henia namonamo totona. (1 Pet. 3:15) Danu, iseda tauanina ena toana bona dabua namona amo ita hahedinaraia diba, ita haroro henia taudia ita matauraia bada.
17 Momokani, iseda tadikaka taihu o idau taudia ita kara o hereva henia neganai, namona be ita hekwarahi inai sisiba ita badinaia: “Taunimanima ibounai do umui matauraia. Keristani taudia ibounai do umui lalokau henia. Dirava do umui gari henia. King do umui matauraia.”—1 Pet. 2:17.
Edena Bamona Do Oi Haere?
Edena dala ai inai taudia ita matauraia diba:
• Iehova?
• Kongrigeisen elda bona loaloa naria taudia?
• Kongrigeisen taudia ta ta?
• Oi haroro henia taudia?
[Study Questions]
[Picture on page 23]
Aposetolo edia negai, Keristani taudia be hakaua oreana idia matauraia
[Picture on page 24]
Tanobada hegegemadai elda ibounai be Hakaua Oreana ese ia abia hidi loaloa naria taudia idia matauraia