Dirava Hesiai Henia Taudia Idia “Lalotamona”

IUDA bona idau bese taudia be Iesu Keriso ena aposetolo taudia idia hagegea. Unai be Pentekoste dinana, bona unai vadivadi taudia​​—⁠Roma ena kahana amo bona Patia ena kahana amo idia mai taudia⁠​—⁠​be Ierusalema dekenai idia lao. Unai hebou gabuna ai, Iesu ena hahediba taudia be gado idauidau ai idia hereva. To, idia be Galilea taudia. Unai dainai, vadivadi taudia idia henanadai: “Edena bamona idia be iseda gado ai idia hereva bona ita kamonai diba?”​​—⁠Kara 2:⁠8.

Aposetolo Petero be ia toreisi bona hebou idia lao taudia dekenai unai hoa karana ena anina ia herevalaia. Karaharaga, idia kamonai taudia be unai sivarai namona idia abia dae. Tatau bona hahine 3,000 bamona be bapatiso idia abia! (Kara 2:​41) Ena be kongrigeisen  taudia edia namba ia bada daekau haraga, to idia ibounai be idia lalotamona noho. Baibel ia torea tauna Luka, ia gwau, “Idia abidadama taudia hutuma be edia kudouna ai idia lalotamona.”​​—⁠Kara 4:​32.

Pentekoste 33 C.E. ai bapatiso idia abia taudia tausen momo be idia ura Ierusalema ai idia noho daudau, unai amo edia diba idia habadaia. To, edia aniani be do hegeregere lasi, badina matamanai palani idia karaia lasi Ierusalema dekenai idia noho daudau totona. Unai dainai, kontribusen moni idia haboua. Keristani taudia haida be edia kohu idia hoihoilaia bona idia abia monina be aposetolo taudia idia henia unai taudia idia durua totona. (Kara 2:​42-​47) Idia be lalokau bona hariharibada karana idia hahedinaraia namo herea unai!

Hanaihanai Keristani taudia momokanidia be lalokau bona hariharibada karana idia hahedinaraia. Hari inai negai, Keristani kongrigeisen taudia be mai “lalotamona” ida Iehova idia hesiai henia noho. Bona idia ta ta be edia nega, goada, kohu bona moni idia gaukaralaia sivarai namona harorolaia gaukarana bona Dirava ena Basileia ena gaukara ma haida idia durua totona.​​—⁠“Haida ese Henia Karana Idia Hahedinaraia Daladia” mauana itaia.

[Box on page 6, 7]

HAIDA ESE HENIA KARANA IDIA HAHEDINARAIA DALADIA

TANOBADA IBOUNAI GAUKARANA DURUA KONTRIBUSEN MONINA

Momo ese edia moni idia atoa hegaegae, maua ta ladana “Tanobada Ibounai Gaukarana Durua Monina” lalonai do idia udaia totona.

Hua ta ta iboudiai, kongrigeisen ese unai moni be Iehova ena Witnes taudia edia hedikwota Brooklyn, New York dekenai, eiava ena brens opesi ta dekenai idia siaia. Taunimanima idia ura neganai kontribusen monina be International Bible Students Association of Papua New Guinea Inc., PO Box 636, Boroko, NCD 111 dekenai idia siaia diba. Mai dava bada herahera gaudia bona dava bada gaudia ma haida idia henia diba danu. Unai kontribusen gaudia ida revareva kwadogina idia siaia be namo, unai gaudia be harihari gaudia idia hahedinaraia totona.

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona. To bema nega ta henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Kontribusen monina bona kontribusen monina mai taravatuna sibona lasi, to dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens opesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona.

Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., PO Box 636, Boroko, NCD 111. Telefon 325 3011.