“Maino Daladia Do Ita Tahua”

BEMA motuka ena dala dekenai kolta matamata idia atoa, toana be unai dala do ia dika lasi. To, nega ia hanaia lalonai unai dala dekenai guri maragidia (o pothole) momo idia hedinarai. Unai dainai unai dala idia hanamoa lou be namo.

Unai hegeregerena, nega haida iseda hetura karana ma haida ida be ia dika diba. Aposetolo Paulo ia gwau Roma dekenai idia noho Keristani taudia huanai hekwakwanai haida idia vara danu. Unai dainai, idia ia sisiba henia: “Maino daladia do ita tahua, bona ita ta ta ese iseda bamona ta ta edia abidadama do ita hagoadaia.” (Roma 14:​13, 19) Dahaka dainai “maino daladia do ita tahua” be namo? Edena dala ai maino ita karaia diba?

Maino Ita Karaia Ena Badina

Bema unai dala dekenai idia noho guri maragidia (o pothole) idia hanamoa lasi, vadaeni guri badadia ai idia lao diba. Unai hegeregerena, oi bona emu tadikaka huanai ia vara kerere maragidia umui hamaoromaoroa lasi neganai, hekwakwanai badadia ai idia lao diba. Aposetolo Ioane ia gwau: “Tau ta bema ia gwau, ‘Lau ese Dirava lau lalokau henia,’ to ia ese iena tadikakana ia badu henia, unai tau be koikoi tauna. Badina be iena tadikakana, ia itaia diba tauna, bema ia ura henia lasi, edena bamona ia itaia diba lasi Diravana do ia ura henia diba?” (1 Ioa. 4:​20) Keristani tauna be ena tadikaka ena kerere maragina ta ia hamaoromaoroa lasi neganai, ia ese ena tadikaka do ia inai henia.

Iesu Keriso ese ia hahedinaraia bema ma haida ida maino ita karaia lasi, vadaeni Iehova ese iseda tomadiho karana ia abia dae lasi. Iesu be ena aposetolo taudia ia hadibaia, ia gwau: “Oiemu harihari gauna pata helaga dekenai oi atoa gwauraia neganai be do oi laloa guna, oiemu tadikakana dekenai mai emu kerere. Bema unai bamona, oiemu harihari gauna pata helaga ena vairana dekenai do oi rakatania, oi lao, oiemu tadikakana danu maino do umui ruaosi karaia guna, gabeai oi giroa lou, oiemu harihari gauna Dirava dekenai do oi henia.” (Mat. 5:​23, 24) Oibe, maino ita karaia ena badina badana be, ita ura Iehova Dirava ita hamoalea. *

Filipi kongrigeisen ai ia vara gauna ta ese ia hahedinaraia, ma haida ida maino ita karaia be gau badana. Keristani taihu rua, Euodia bona Sunutuke edia huanai ia vara hekwakwanai ese kongrigeisen ena maino ia hadikaia. (Fili. 4:​2, 3) Bema kerere maragina be umui hamaoromaoro haraga lasi, gabeai momo be unai hekwakwanai  do idia diba. Iseda tadikaka ida maino ita karaia neganai, kongrigeisen lalonai lalokau bona lalotamona do ia havaraia.

Iesu ia gwau: “Taunimanima huanai maino idia karaia taudia be idia namo [“moale,” NW ].” (Mat. 5:​9) Unai dainai, maino ita karaia neganai, do ita moale. Danu, maino daladia ia tahua tauna be ia gorere momo lasi, badina ‘bema iena kudouna be mai ena maino danu neganai, iena tauanina do ia noho namo.’ (Aon. 14:30) To, ita badu momo neganai ita gorere diba.

Ena be Keristani taudia momo idia gwau maino idia karaia be maoro, to reana do oi laloa hekwakwanai be edena bamona lau hamaoromaoroa diba. Baibel ena hakaua daladia haida mani ita itaia.

Mai Manau ida Herevahereva Karana ese Maino Ia Havaraia

Guri maragidia (o pothole) be kolta amo idia koua diba. Iseda tadikaka edia kerere maragidia ita laloaboio bona edia dika ita gwauatao diba, a? Bema unai bamona ita karaia, ita bona iseda tadikaka huanai idia noho kerere maragidia do ita hamaoromaoroa, badina aposetolo Petero ia gwau: “Lalokau tauna be Dirava ese iena kara dika momo do ia gwauatao.”​​—⁠1 Pet. 4:⁠8.

To nega haida, reana ia vara hekwakwanai be ia bada dainai hamaoromaoroa dalana be ia auka. Israela taudia be Gwauhamata Tanona ai idia do vareai lasi neganai, idia dekenai ia vara gauna ta mani ita laloa. “Rubena iduhu, Gado iduhu, bona Manase iduhu kahana taudia” be Ioridane Sinavai idia do raka hanai lasi neganai, idia be “boubou patana badana ta idia haginia.” Israela bese ma haida idia laloa unai bese toi ese idia haginia boubou patana be kaivakuku tomadiho henia totona, bona idia ura lasi unai hekwakwanai ia bada. Unai dainai idia be tuari totona idia hegaegae.​​—⁠Ios. 22:​9-​12.

Reana unai Israela besedia idia itaia unai bese toi be kerere idia karaia vadaeni, unai dainai idia laloa idia tuari henidia neganai unai bese toi idia hamasea haraga diba, bona idia amo haida sibona do idia mase. To, unai Israela bese ma haida be idia haraga lasi, to haida idia siaia lao unai bese toi ida unai hekwakwanai idia hamaoromaoroa totona. Bena idia henanadai: “Inai kerere, umui ese umui havaraia gauna, ena anina be dahaka? Israela ena Dirava dekenai kerere umui karaia vadaeni.” Momokani, boubou patana idia haginia bese toi be kara kererena ta idia karaia lasi. To, unai bese ma haida edia hereva dainai, dahaka idia karaia? Israela bese ma haida do idia badu henidia eiava do idia hereva henidia lasi, a? Lasi, to unai bese toi ese idia karaia karana be mai manau ida idia herevalaia, bona idia gwau unai boubou patana idia karaia ena badina be, idia ura Iehova idia tomadiho henia. Edia manau karana dainai, edia hetura karana Dirava ida idia hadikaia lasi bona idia mauri danu. Mai manau ida unai hekwakwanai idia hamaoromaoroa dainai, maino ia vara.​​—⁠Ios. 22:​13-​34.

Israela bese ma haida be kara ta idia do karaia lasi neganai, idia be unai bese toi​​—⁠Rubena, Gado, bona Manase ena iduhu kahana​​—⁠ida edia  hekwakwanai idia hamaoromaoroa. Baibel ia gwau: “Do oi badu haraga lasi. Bona bema badu be emu lalona dekenai oi dogoatao noho, inai be kavakava taudia edia kara.” (Had. 7:⁠9) Baibel ena hereva hegeregerena, hekwakwanai hamaoromaoroa dalana namona be mai manau ida ia vara hekwakwanai umui herevalaia. Bema hekwakwanai umui hamaoromaoroa lasi bona oi badu noho, oi laloa Iehova ena hahenamo do oi abia, a?

Bema emu Keristani tadikaka ta be oi ia samania koikoi, edena bamona do oi kara? Baibel ia gwau: “Mai manau danu ia haere tauna, ese badu ia koua.” (Aon. 15:⁠1) Israela ena bese toi be mai manau ida idia hereva dainai, idia bona edia varavara huanai ia noho hekwakwanai idia hamaoromaoroa. Hekwakwanai herevalaia totona ita lao tadikaka dekenai o bema ia mai ita dekenai, sibona ita henanadai diba, ‘Edena dala ai do lau gwauraia gaudia, egu gado regena bona egu hereva dalana ese maino ia havaraia diba?’

Mai Aonega ida Oi Hereva

Iehova ia laloparara ita ura ma haida dekenai iseda lalohadai ita gwauraia hedinarai. To, bema oi bona emu tadikaka huanai ia vara kerere maragina umui hamaoromaoroa lasi, do oi ura ma haida dekenai ia vara gauna oi herevalaia. Bona oi badu noho neganai emu hereva dalana do oi naria namonamo lasi. Bema iseda hereva dalana ita naria namonamo lasi, Aonega Herevadia 11:11 ia gwau: “Kara dika taudia edia hereva dekena amo, hanua be do ia dika.” Unai hegeregerena, bema iseda hereva amo tadikaka ita hadikaia, vadaeni unai ese kongrigeisen ena maino ia hadikaia diba.

To, iseda tadikaka taihu edia kara namodia be ma haida dekenai ita herevalaia diba. Paulo be Keristani tadikaka ia sisiba henidia: “Hereva mirodia do umui gwauraia lasi, hereva namodia sibona. Vadaeni emui hereva idia kamonai taudia ese durua bona namo do idia davaria. . . . Umui ibounai ta ta do umui durua, bona ibounai ta ta do umui bogahisihisi henia. Bona ibounai ta ta edia kara dika do umui gwauatao.” (Efe. 4:​29-​32) Guna emu tadikaka be ma haida dekenai emu kara namodia ia herevalaia, to hari, oiemu hereva o kara ta dainai ia lalohisihisi bona ia ura ia hamaoromaoroa neganai, do ia auka ena dika oi gwauatao bona maino oi karaia totona, a? Unai hegeregerena, bema iseda Keristani tadikaka taihu edia kara namodia sibona be ma haida dekenai ita gwauraia, unai ese ita do ia durua hekwakwanai idia vara neganai maino ita karaia haraga totona.​​—⁠Luka 6:⁠31.

Mai Lalotamona ida Dirava Hesiai Henia

Ita be goevadae lasi taudia dainai, bema ta ese ita ia habadua, ita ura lasi unai tauna eiava ma haida ita bamoa. To unai be aonega karana lasi. (Aon. 18:⁠1) Ita be Iehova ena ladana ita harorolaia taudia dainai, namona be ita hekwarahi mai lalotamona ida Dirava ita hesiai henia noho totona.​​—⁠Sep. 3:⁠9.

Namo lasi ma haida edia maumau herevadia o maoro lasi karadia ese iseda tomadiho momokani goadalaia karana ia koua. Dina haida sibona ia noho bena Iesu be ena mauri do ia bouboulaia⁠​—⁠​iena boubou gauna ese dubu dekenai idia karaia boubou karadia edia gabu do ia abia⁠​—⁠​bona Iesu be taravatu hadibaia taudia ia gwau henidia murinai, ia itaia vabu ta be “iena moni ibounai, iena mauri dekenai durua gauna” be dubu ena maua lalonai ia udaia. Iesu be unai vabu ia koua, a? Lasi, ia be unai vabu ese unai negai ia noho kongrigeisen durua totona ia karaia kara namona dainai ia hanamoa. (Luka 21:​1-4) Unai vabu be ma haida edia kara kereredia ese ia koua lasi Iehova tomadiho henia karana ia durua totona.

Ena be ita mamia iseda Keristani tadikaka o taihu ta ese ia karaia karana be maoro lasi, dahaka do ita karaia? Unai kara ese ita ia koua mai kudouna ibounai ida Iehova ita hesiai henia lasi totona, a? Eiava ita hekwarahi ita huanai idia vara kerere maragidia ita hamaoromaoroa totona, unai amo Dirava ena kongrigeisen lalonai maino do ia noho, a?

Baibel ese ita ia sisiba henia: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.” (Roma 12:18) Namona be iseda lalona ita hadaia unai bamona ita karaia bona mauri dalana dekenai do ita raka.

[Footnote]

[Picture on page 17]

Euodia bona Sunutuke be maino idia karaia be namo

[Picture on page 18]

Edena dala ai egu hereva, egu gado regena bona egu hereva dalana ese maino ia havaraia diba?