Dahaka Dainai Kara Maoromaoro Ita Karaia Noho be Namo?

“Lohiabada e, egu kara maoromaoro hegeregerena, lau do oi kota henia.”​​—⁠SAL. 7:⁠8.

1, 2. Dahaka gau haida ese Keristani tauna ta ena kara maoromaoro idia tohoa diba?

HAHEITALAI toi mani oi laloa: Sikuli gabunai, tadikaka ta be turana haida ese idia kirikirilaia. Reana idia ura tadikaka ia badu, hereva dikadia ia gwauraia eiava ia heatu. Tadikaka be dahaka do ia karaia? Moni gaukara gabunai, headava tadikaka ta be Internet ai gau haida ia tahua. Ena kompiuta dekenai, laulau dikadia idia hahedinaraia Web sait ta ia hedinarai. Tadikaka be unai Web sait do ia kehoa, eiava? Taihu ta be ma taihu haida ida idia herevahereva lalonai, idia haida be taihu ma ta idia maumauraia matamaia. Taihu be dahaka do ia karaia?

² Ena be unai pablisa toi ese idia davaria hahetoho be idauidau, to dala ta ai idia be hegeregere: Idia be Keristani taudia dainai idia ura kara maoromaoro idia karaia noho. Emu mauri lalonai lalohekwarahi, abia hidi bona tahua gaudia idia hedinarai neganai, oi diba kara maoromaoro oi karaia noho be namo, a? Dina ta ta ai, taunimanima be edia uma, kohu o aniani edia davana idia bada daekau karana, ruma bona gorere idia laloa momo. Reana ita danu be unai gaudia ita laloa momo. To, Iehova be eda kudouna dekenai dahaka gau ia tahua? (Sal. 139:​23, 24) Gauna be inai: Ita be kara maoromaoro ita karaia noho o lasi.

3. Iehova be ita ia doria kara maoromaoro ita badinaia totona, a? Dahaka be inai stadi lalonai do ita kikilaia?

³ Iehova be ita ta ta dekenai “gau namodia ibounai, bona harihari gaudia namodia momokani ibounai” ia henia. (Iam. 1:​17) Unai harihari gaudia haida be inai: Iseda tauanina, darana, bona ma haida. (1 Kor. 4:⁠7) To, Iehova be ita ia doria lasi kara maoromaoro ita karaia noho totona. Ia ese ita ia rakatania, ita sibona ese unai kara ita abia hidi totona. (Deu. 30:19) Vadaeni, kara maoromaoro ena anina ita diba be namo. Danu, kara maoromaoro ita karaia noho ena badina badadia toi do ita kikilaia.

Kara Maoromaoro Ena Anina be Dahaka?

4. Heberu gado herevadia idia hahanaia “kara maoromaoro” ena anina ma haida be dahaka, bona Iehova ena taravatu animal bouboulaia karana dekenai dahaka ita dibaia?

⁴ Heberu gado herevadia idia hahanaia “kara maoromaoro” (English, integrity) ena anina haida be inai: Bero lasi, toto lasi, ibounai ia namo sibona, eiava kerere lasi. Unai hereva be idia gaukaralaia Iehova dekenai idia bouboulaia animal idia herevalaia totona. Boubou lalodiai, Iehova be bero lasi o toto lasi animal sibona ia abia dae. (Levitiko 22:​19, 20 duahia.) Iehova ese aena dika animal, gorere animal, o matakepulu animal idia bouboulaia taudia ia gwau henidia.​​—⁠Mal. 1:​6-8.

5, 6. (a) Dahaka haheitalai ese ia hahedinaraia nega momo ita be gau namodia sibona ita tahua bona abia hidi? (b)  Goevadae lasi taudia be kara maoromaoro idia karaia noho diba, a? Gwauraia hedinarai.

⁵ Nega momo ita be gau namodia sibona ita tahua bona abia hidi. Hegeregere, tau ta be mai anina bada bukana ta ia kehoa bona gau haida ia sekea gwauraia, to mai anina bada rau haida be idia noho lasi. Vadaeni, mai badu ida buka be ena gabunai ia atoa lou. Eiava hahine ta be kone ai ia raka lao noho bona shell haida ia gogoa. Shell haida edia toana bona kala be namo herea dainai, ia gini bona ta ta ia stadilaia. Edena shell do ia abia hidi? Shell namodia sibona. Unai hegeregerena, Dirava be kara namodia sibona idia karaia taudia ia tahua, ani?​​—⁠2 Siv. 16:​9, NW.

 ⁶ To reana oi henanadai, goevadae lasi taudia be kara maoromaoro idia karaia noho diba, a? Ita be goevadae lasi bona kara dika taudia dainai, ita laloa ita be buka ta ena rau haida idia boio o shell dikana ta bamona. Nega ta unai bamona oi laloa, a? Namona be oi laloparara, Iehova ia diba ita be goevadae lasi. Unai dainai, Ia be gau momo ia ura lasi, to ita henia diba gaudia sibona ia ura. * (Sal. 103:14; Iam. 3:⁠2) To, Ia ura ita be kara maoromaoro ita karaia noho. Ita goevadae be idau bona kara maoromaoro ita karaia noho be ma idau, a? Oibe. Haheitalai ta oi laloa: Tau matamata ta be do ia adavaia hahinena ia lalokau henia. To unai tau ia ura unai hahine ia goevadae be namo, a? Lasi, ia ura hahine be mai ena kudouna ibounai ida ena adavana sibona ia lalokau henia. Unai hegeregerena, Iehova ‘eda Dirava be ia ura ita be ia sibona ena.’ (Eso. 20:⁠5) Herevana ita goevadae lasi, to Iehova ia ura mai eda kudouna ibounai ida Ia sibona do ita tomadiho henia.

7, 8. (a) Edena dala ai kara maoromaoro dekenai Iesu be haheitalai namona? (b) Baibel ai inai hereva kara maoromaoro karaia noho ena anina be dahaka?

⁷ Tau ta ia henanadai: “Taravatu ibounai dekenai, edena be taravatu badana?” Iesu ena haere dalana mani ita laloa. (Mareko 12:​28-​30 duahia.) Ia be haere sibona ia henia lasi, to ia haerelaia gaudia ia badinaia. Iena haheitalai namona be inai: Mai ena lalona, kudouna, lauma bona goada ibounai ida Iehova ia lalokau henia. Ia be kara maoromaoro ia herevalaia sibona lasi, to lalohadai maorona ia abia bona kara amo ia hahedinaraia. Unai dainai, bema ita ura kara maoromaoro ita karaia noho, Iesu ita tohotohoa be gau badana.​​—⁠1 Pet. 2:​21.

⁸ Vadaeni ita gwau diba, Baibel ai inai hereva kara maoromaoro ita karaia noho ena anina be inai: Mai iseda kudouna ibounai ida guba Tauna Badana tamona, Iehova Dirava, bona ena ura ita badinaia. Kara maoromaoro ita karaia noho ena anina be, ita ura dina ta ta ai ita karaia gaudia amo Iehova Dirava ita hamoalea. Eiava, Iehova ia laloa bada gaudia sibona ita laloa bada. Unai bamona ita karaia ena badina badadia toi mani ita herevalaia.

1. Kara Maoromaoro Bona Iehova Ena Lohia Siahuna Hepapahuahulaia Karana

9. Dahaka dainai lohia siahuna ena hepapahuahu lalonai iseda kara maoromaoro be mai anina bada?

⁹ Iehova ia lohia be maoro, herevana kara maoromaoro ita karaia noho eiava lasi. Ia be King maoromaorona, ia lohia hanaihanai, bona gau ibounai ia biagua. Taunimanima ta o aneru ta ena hereva o kara ese Iehova ia koua diba lasi. To, guba bona tanobada taudia haida idia gwau Dirava ia lohia be maoro lasi. Unai dainai, gau badana be ibounai idia diba Iehova ena lohia dalana be maoromaoro bona mai lalokau ida ia lohia. Ita be Iehova ena Witnes taudia dainai, ita ura kamonai taudia ibounai dekenai guba bona tanobada edia King badana ita kikilaia. To, edena dala ai ita hahedinaraia diba lohia siahuna ena hepapahuahu lalonai ita be daika ena kahanai ita gini? Edena dala ai ita hahedinaraia Iehova be eda King Badana ai ita halaoa? Bema kara maoromaoro ita karaia noho.

10. Satani ese kara maoromaoro taudia be edena bamona ia samania, bona edena dala ai Satani ena hereva oi hakoikoi diba?

¹⁰ Edena dala ai oi hahedinaraia emu kara maoromaoro be mai anina bada? Satani ia gwau, momo be Dirava ena lohia siahuna do idia dadaraia, Iehova do idia lalokau henia lasi bona do idia hesiai henia lasi. Guba taudia ibounai edia vairanai, Diabolo ese Iehova ia hamaoroa: “Kopina ena davana be kopina. Tau ta ese iena gau ibounai do ia negea, iena mauri do ia dogoatao totona.” (Iobu 2:⁠4) Laloatao: Satani ese kara maoromaoro tauna Iobu sibona lasi, to taunimanima ibounai ia herevalaia. Baibel ia gwau, Satani be “iseda varavara ia samania” tauna. (Apok. 12:10) Ia ese Iehova ia hamaoroa, Keristani taudia​​—⁠oi danu​​—⁠be Iehova do idia rakatania. Ia gwau, oi be emu mauri oi laloa bada dainai, Iehova do oi hadikaia. Satani ena hereva be edena bamona oi laloa? Oi ura Satani ena hereva oi hakoikoia, a? Vadaeni kara maoromaoro oi karaia  noho be namo, unai amo Satani ena hereva oi hakoikoia diba.

11, 12. (a) Edena haheitalai toi ese idia hahedinaraia dina ta ta ai kara maoromaoro ita karaia noho be mai anina bada? (b) Dahaka dainai kara maoromaoro ita karaia noho be hahenamo badana?

¹¹ Satani ena samania herevana dainai, gau badana be dina ta ta ai kara maorodia o abia hidi maorodia ita karaia. Paragraf 1 ai ita kikilaia pablisa toi mani ita lalodia lou. Edena dala ai kara maoromaoro idia karaia noho? Sikuli dekenai, tadikaka be ena turadia edia hereva dainai dika ta ia havaraia diba, to ia be inai Baibel sisibana ia laloatao: “Lauegu lalokau taudia e, dika ena davana do umui henia lasi, davana henia be, Dirava sibona. Badina be Buka Helaga ia gwau: ‘Lohiabada ia gwau, ‘Dika ena davana be lau sibona ese do lau karaia.’ ” (Roma 12:19) Unai dainai, ia raka siri. Moni gaukara gabunai, headava tadikaka be Internet ai matabodaga laulau dikadia ia itaia diba, to inai Baibel sisibana ia laloatao: “Lauegu matana dekenai taravatu lau atoa vadaeni, nega ta kekeni do lau itaia noho lasi, matabodaga kara totona?” (Iobu 31:⁠1) Iobu bamona, tadikaka ia ura lasi matabodaga laulau dikadia ia itaia dainai, poisini bamona gaudia ia dadaraidia. Taihu be taihu ma haida edia maumau herevadia ia kamonai neganai, inai Baibel sisibana ia laloatao: “Ita ibounai ta ta ese iseda badibadinai ia noho tauna do ita hamoalea, iena namo bona iena goada havaraia totona, bona iena abidadama do ia goada totona.” (Roma 15:⁠2) Ia diba, maumau herevadia ese ta do ia hagoadaia lasi. Danu, ia diba bema maumau herevadia ia gwauraia, ia be Keristani dalana do ia badinaia lasi o ena guba Tamana do ia hamoalea lasi. Unai dainai, ena malana ia biagua namonamo bona ma haida hagoadaia sivaraidia sibona ia kikilaia.

¹² Unai pablisa toi be abia hidi idia karaia neganai, toana be ta ta idia gwau: ‘Iehova be egu King. Unai dainai, Iehova ese ia moalelaia gauna sibona do lau abia hidi.’ Abia hidi oi karaia neganai, unai bamona oi laloa danu, a? Bema oibe, vadaeni Aonega Herevadia 27:11 ena sisiba oi badinaia  unai, ia gwau: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” Momokani, Dirava ita hamoalea be hahenamo badana! Mai eda goada ibounai ida kara maoromaoro ita karaia noho ena namo be unai, ani?

2. Dirava be Eda Kara Maoromaoro Hegeregerena Ita Do Ia Kota Henia

13. Iobu bona Davida be edena bamona idia hahedinaraia Iehova be iseda kara maoromaoro hegeregerena ita do ia kota henia?

¹³ Ita diba, kara maoromaoro ita karaia noho neganai, Iehova ena lohia siahuna ita abia isi. Danu, Dirava be eda kara maoromaoro hegeregerena ita do ia kota henia. Iobu ia diba unai be momokani. (Iobu 31:6 duahia.) Ia diba Dirava ese taunimanima ibounai edia kara be “sikele maoromaoro” dekenai ia tohoa​—⁠Iehova ia itaia eda kara maoromaoro be Iena taravatu maoromaorodia hegeregerena o lasi. Davida ia gwau: “Lohiabada e, oi be bese ibounai, bona taunimanima ibounai edia kota biaguna. Lohiabada e, egu kara maoromaoro hegeregerena, lau do oi kota henia. Oi diba vadaeni lau be kerere lasi. Oi be kara maoromaoro Diravana, bona oi ese aiemai laloa, bona aiemai ura oi tahua noho.” (Sal. 7:​8, 9) Ita diba Dirava be eda lalona bona ura gaudia ibounai ia diba. To Iehova ia tahua eiava sikelea gauna ita laloatao be namo. Davida ia gwau, Iehova be iseda kara maoromaoro hegeregerena ita do ia kota henia.

14. Herevana ita goevadae lasi, to edena bamona ita diba kara maoromaoro ita karaia noho diba?

¹⁴ Mani oi laloa: Hari, Iehova Dirava be taunimanima bilioni momo edia kudouna ia tahua noho. (1 Siv. 28:​9, BHğ) Nega momo kara maoromaoro taudia ia davaria, a? Lasi, nega ta ta sibona! To, namo lasi ita gwau ita be goevadae lasi bona kara maoromaoro ita karaia noho be ia auka. Davida bona Iobu bamona, badina namona ia noho dainai ita diba, Iehova do ia itaia ita be kara maoromaoro ita karaia noho, herevana ita goevadae lasi. Ita laloatao: Goevadae taudia haida danu be kara maoromaoro idia dadaraia. Hegeregere, guna tanobada dekenai be goevadae taudia toi idia noho; idia rua​​—⁠Adamu bona Heva⁠​—⁠​be kara maoromaoro idia dadaraia, bona tamona sibona​​—⁠Iesu​​—⁠be kara maoromaoro ia karaia noho. Hari, goevadae lasi taudia momo danu be kara maoromaoro idia karaia noho. Oi be unai bamona oi karaia noho diba.

3. Kara Maoromaoro Ita Karaia Noho Bona Iseda Helaro

15. Edena dala ai Davida ese ia hahedinaraia vaira negana ena helaro ita abia totona, kara maoromaoro ita karaia noho be gau badana?

¹⁵ Iehova be eda kara maoromaoro hegeregerena ita do ia kota henia dainai, vaira negana ena helaro ita abia totona, kara maoromaoro ita karaia noho be gau badana. Davida ia diba unai be momokani. (Salamo 41:12 duahia.) Ia be Dirava ena lalonamo ena helaro ia laloa bada. Hari idia noho Keristani taudia momokanidia bamona, Davida ia ura mauri hanaihanai helarona ia abia, Dirava kahirakahira ia noho bona ia hesiai henia. Ia diba kara maoromaoro ia karaia noho be namo, unai amo unai helaro ena guguru karana do ia itaia. Unai hegeregerena, kara maoromaoro ita karaia noho neganai, Iehova be ita ia gimaia, hadibaia, hakaua bona hanamoa.

16, 17. (a) Dahaka dainai nega ibounai kara maoromaoro oi karaia noho be namo? (b) Edena henanadai be stadi gabena ai do ita kikilaia?

¹⁶ Hari inai negai, helaro ese ita ia durua ita moale totona. Metau negadiai danu, helaro be ita do ia durua ita moale totona. Helaro be eda lalona ia gimaia diba. Laloatao, Baibel ese helaro be kwara gauna ta ida ia hahegeregerea. (1 Tes. 5:​8, BHğ) Tuari lalonai kwara gauna ese tuari tauna ena kwarana ia gimaia hegeregerena, helaro ese ita ia gimaia Satani ena taunimanima edia lalohadai kereredia ita dadaraia totona. Helaro ia  noho dainai, eda mauri be mai anina. Namona be eda kara ita tahua namonamo, ita be kara maoromaoro ita karaia noho bona helaro ita laloa noho eiava. Laloatao, kara maoromaoro oi karaia neganai, Iehova ena lohia siahuna oi abia isi bona unai ese oi ia durua vaira negana ena helaro oi laloa noho totona. Momokani, nega ibounai kara maoromaoro oi karaia noho be namo!

¹⁷ Kara maoromaoro ita karaia noho be gau badana dainai, namona be henanadai ma haida ita laloa. Edena dala ai kara maoromaoro taudia ai ita lao diba? Dahaka gau be ita ia durua diba kara maoromaoro ita karaia noho totona? Dahaka ita karaia diba bema ta be kara maoromaoro ia karaia noho lasi? Unai henanadai be stadi gabena ai do ita haerelaia.

[Footnote]

Edena Bamona Do Oi Haere?

• Kara maoromaoro ena anina be dahaka?

• Dahaka dainai lohia siahuna ena hepapahuahu lalonai kara maoromaoro ita karaia noho be mai anina bada?

• Edena dala ai kara maoromaoro ita karaia noho karana ese ita ia durua iseda helaro ita laloa totona?

[Study Questions]

[Pictures on page 5]

Hanaihanai gau momo ese iseda kara maoromaoro idia tohoa