Kara Maoromaoro Do Oi Karaia Noho, A?

“Harihari ia lao bona do lau mase, egu laloa maoromaoro [“kara maoromaoro,” NW ], bona egu kerere lasi, do lau gwauraia noho.”​​—⁠IOBU 27:⁠5.

1, 2. Dahaka kara ta ita karaia be gau badana, bona edena henanadai do ita kikilaia?

HAHEITALAI ta oi laloa: Oi be ruma ta ena palani oi itaia noho. Unai palani be namo herea. Unai ruma ese oi bona ruma bese taudia do ia durua daladia oi laloa bona oi moale. To, unai palani bona oi laloa gauna ia guguru totona, namona be ruma oi haginia, oi noholaia bona oi naria, ani?

² Unai hegeregerena, reana eda lalona dekenai ita gwau diba kara maoromaoro be kara namona, bona unai kara dainai ita bona ita lalokau henia taudia be namo bada do idia davaria. To, unai ita lalohadailaia sibona be hegeregere lasi; namona be karana ita karaia. Hari inai negai, ruma korikori haginia gaukarana dekenai, nega momo taunimanima be moni bada idia negea. (Luka 14:​28, 29) Unai hegeregerena, kara maoromaoro ita karaia noho totona, iseda nega bona goada ita henia be namo, unai amo namo bada do ita davaria. Unai dainai, hari henanadai toi ita kikilaia: Edena dala ai kara maoromaoro taudia ai ita lao diba? Dahaka gau be ita ia durua diba kara maoromaoro ita karaia noho totona? Dahaka ita karaia diba bema ta be kara maoromaoro ia karaia noho lasi?

Edena Dala ai Kara Maoromaoro Taudia ai Ita Lao Diba?

3, 4. (a) Edena dala ai Iehova be ita ia durua kara maoromaoro ita karaia noho totona? (b) Edena dala ai Iesu ena kara maoromaoro dalana ita tohotohoa diba?

³ Stadi ginigunana ai ita itaia, Iehova be ita ia doria lasi kara maoromaoro taudia ai ita lao totona. To, Ia be ita ia durua danu. Ia ese ita ia hadibaia edena dala ai kara maoromaoro ita karaia noho, bona ena lauma helaga amo ita ia durua ena hadibaia herevadia ita badinaia totona. (Luka 11:13) Ia be kara maoromaoro ena dala idia badinaia noho taudia ia gimaia danu.​​—⁠Aon. 2:⁠7.

⁴ Edena dala ai Iehova be ita ia hadibaia kara maoromaoro taudia ai ita lao totona? Dala ginigunana be inai: Iena Natuna, Iesu be tanobada dekenai ia siaia mai. Iesu be Dirava ena hereva ibounai ia badinaia. Ia be “Dirava ia kamonai henia ela bona ia mase.” (Fili. 2:⁠8) Ia ese ena guba Tamana ena gaukara ibounai ia karaia, herevana gaukara haida be idia auka herea. Ia ese Iehova ia hamaoroa: “Lauegu ura lasi, oiemu ura sibona.” (Luka 22:42) Ita sibona ita nanadaia, ‘Lau danu be Iehova lau badinaia, a?’ Bema badina maorodia dainai Dirava ita badinaia, ita be kara maoromaoro taudia ai do ita lao. Edena negadiai Dirava ita badinaia be gau badana?

5, 6. (a) Edena dala ai Davida ese ia hahedinaraia kara maoromaoro dalana sibona ita badinaia be gau badana, herevana ita sibona ita noho eiava ma haida be ita idia itaia diba? (b) Hari Keristani taudia be idia sibona idia noho neganai, dahaka hahetoho ta idia davaria diba?

 ⁵ Ita sibona ita noho negadiai, Iehova badinaia karana be mai anina bada. Davida be ia sibona ia noho negadiai, ia itaia kara maoromaoro dalana sibona ia badinaia be gau badana. (Salamo 101:2 duahia.) Ia be king dainai, hanaihanai taunimanima momo be ia badibadinai idia noho. Nega momo taunimanima edia namba be reana, handred o tausen momo bamona. (Salamo 26:12 hahegeregerea.) Unai bamona negadiai, king ese kara maoromaoro ia karaia noho be gau badana, badina iena taunimanima be iena haheitalai namona idia tohotohoa diba. (Deu. 17:​18, 19) To Davida ia dibaia gauna ta be, bema sibona ia noho negadiai​​—⁠‘ena ruma dekenai’​​—⁠kara maoromaoro dalana sibona do ia badinaia noho be gau badana. Ita be edena bamona?

⁶ Salamo 101:3 ai, Davida ia gwau: “Lau ese kara dika ta do lau ura henia lasi [“do lau itaia lasi,” NW ], lasi momokani.” Hari inai negai​​—⁠ita sibona ita noho negadiai danu​​—⁠iseda matana ita naria namonamo be namo, gau dikadia ita itaia garina. Momo be Internet gaukaralaia karana dekenai unai bamona hahetoho idia davaria. Internet dekenai maoro lasi gaudia eiava ponografi laulau dikadia itaia karana be ia auka lasi. To, bema unai bamona gaudia ita itaia, ita be Dirava​—⁠Davida ia hamaoroa Salamo 101:3 ena hereva ia torea be namo Diravana​—⁠ena hereva ita badinaia, a? Ponografi laulau dikadia itaia karana be ura kererena o mataganigani urana ia havaraia, lalomamina ia hadikaia, headava ia hadikaia, bona unai laulau idia itaia taudia ibounai ia hadikaia.​​—⁠Aon. 4:​23; 2 Kor. 7:1; 1 Tes. 4:​3-5.

7. Ita sibona ita noho neganai, edena hakaua herevana ese ita ia durua diba kara maoromaoro ita karaia noho totona?

⁷ Momokani, Iehova ena hesiai taudia be idia hunia diba lasi. Iseda guba Tamana be ita ibounai ia itaia noho. (Salamo 11:4 duahia.) Iehova ia moale bema ia itaia hahetoho oi dadaraia! Danu, unai bamona oi karaia neganai, oi be Iesu ena hereva, Mataio 5:​28 ai oi badinaia. Oibe, laulau dikadia itaia loulou karana ese emu lalona do ia veria kara dika ta oi karaia totona. Unai dainai, emu lalona oi biagua namonamo, laulau dikadia oi itaia lasi totona. Ponografi eiava hemarai karadia idia hahedinaraia gaudia oi itaia o duahia karana amo emu kara maoromaoro oi hadikaia be namo lasi!

8, 9. (a) Daniela bona ena turadia be dahaka hahetoho idia davaria? (b) Edena dala ai hari Keristani matamata taudia ese Iehova bona edia tadikaka taihu idia hamoalea?

⁸ Danu, Iehova idia tomadiho henia lasi taudia huanai ita noho negadiai, Dirava badinaia karana be gau badana. Daniela bona ena turadia toi mani ita laloa. Idia maragi neganai, Babulonia ai, idia be hesiai taudia ai idia lao. Unuseniai, Iehova idia tomadiho henia lasi taudia be momo bona idia ese unai Heberu memero foa idia doria  Dirava ese ia taravatua aniani haida idia ania totona. Unai memero foa be Dirava ena Taravatu idia utua diba. Eiava edia tama sina, Iuda ena tau badadia o hahelaga taudia ese idia itaia lasi dainai, Dirava ena taravatu utua karana idia karaia diba. To, idia diba daika be idia ia itaia noho? Iehova. Unai dainai, idia gini goada bona Iehova idia badinaia, herevana edia mauri idia haboioa diba.​​—⁠Dan. 1:​3-9.

⁹ Tanobada hegegemadai, Iehova ena Witnes memero kekeni be idia gini goada, Dirava ena taravatu idia badinaia, bona edia turadia edia laloani herevadia idia dadaraia. Matamata taudia e, buatau, drag, dagedage, hereva mirodia, matabodaga karadia, bona maoro lasi karadia ma haida umui dadaraia neganai, Iehova umui badinaia unai. Anina be umui hahedinaraia, umui be kara maoromaoro umui karaia noho. Unai amo umui sibona be namo umui davaria lasi, to Iehova bona emui tadikaka taihu idia moale danu!​​—⁠Sal. 110:⁠3.

10. (a) Matamata taudia haida be dahaka lalohadai kerere idia abia dainai, kara maoromaoro idia dadaraia? (b) Edena dala ai kara maoromaoro ita karaia noho karana ese ita do ia durua matabodaga karadia ita dadaraia totona?

¹⁰ Danu, ita be tadikaka (o taihu) ta ida ita turana karaia negadiai, Iehova ita badinaia be gau badana. Ita diba, Baibel be matabodaga karadia ibounai ia taravatua. To, lalohadai haida ese ita idia hakaua kerere Dirava badinaia karana ita dadaraia totona. Hegeregere, memero kekeni haida idia laloa, ta ese ena kopina be ma ta ena uduna (o kununa) dekenai ia atoa vareai, eiava ta ese ma ta ena kopina ia gadaralaia be mahuta hebou karana lasi. To, unai bamona matamata taudia ese idia laloaboio gauna be inai: Unai bamona kara be Baibel ena taravatu idia utua matabodaga karadia bona unai bamona kara dika idia karaia noho taudia be kongrigeisen amo idia atoa siri diba. * Momokani, unai bamona matamata taudia be kara maoromaoro idia karaia lasi. To, ita ura bada kara maoromaoro ita karaia noho dainai, kara dika ita karaia neganai, ita ura lasi ekskius herevadia ita gwauraia. Ita ura lasi ita gwau unai be kerere maragina dainai panisi do ita abia lasi. Ita ura lasi ita gwau bema unai kerere lau karaia, elda taudia be hahemaoro sisibana do idia henia. To, ita laloa bada gauna be inai: Ita ura Iehova hamoalea karadia ita karaia, bona Iena hemami ita hahisia lasi. Momokani, ita ura lasi kara dika kahirakahira ita lao, to ita ura ‘matabodaga karana ita heautania.’ (1 Kor. 6:​18, NW ) Unai amo ita hahedinaraia, ita be kara maoromaoro taudia.

Dahaka ese Ita Ia Durua Diba Kara Maoromaoro Ita Karaia Noho Totona?

11. Dahaka dainai gau maragidia dekenai Dirava badinaia karana be mai anina bada? Haheitalai ta gwauraia.

¹¹ Dirava badinaia karana be ita ia durua kara maoromaoro ita karaia noho totona. Gau maragidia dekenai danu, Dirava badinaia karana be mai anina bada. Momokani, unai bamona badinaia karana ese ita do ia durua kara maoromaoro ita karaia noho totona. Inai haheitalai mani oi laloa: Herevana brik o nadi ta be ia maragi, to bema unai bamona brik o nadi momo herea oi atoa hebou namonamo, oi be ruma namona ta oi karaia diba. Unai dainai, Dirava ita badinaia  noho neganai, ita be kara maoromaoro do ita karaia noho.​​—⁠Luka 16:⁠10.

12. Metau eiava hahetoho lalodiai, edena dala ai Davida be kara maoromaoro ia karaia noho?

¹² Metau eiava hahetoho lalodiai, kara maoromaoro ita karaia noho be mai anina bada. Davida ena haheitalai mani ita laloa. Ia matamata neganai, ia be Dirava ese ia abia hidi king Saulo ena dagedage karana ia haheaukalaia. To, King Saulo be Iehova ena hahenamo ia haboioa, bona Dirava ese ia lalonamo henia tauna Davida ia mama henia. To unai nega sisina lalonai, Saulo be king dagina ia do dogoatao dainai, Israela ena ami ia gaukaralaia Davida idia tahua bona hahisia totona. Iehova be unai kara ia koua lasi ela bona lagani haida bamona. Davida be Dirava dekenai ia badu, a? Ia laloa ia haheauka noho be anina lasi, a? Lasi, Davida ia badu lasi bona ia haheauka noho. Ia be Dirava ena horoa tauna Saulo ena dagi ia matauraia bada, bona ena be nega haida dala ia noho Saulo ia hamasea totona, to dika karana ta ia karaia lasi.​​—⁠1 Sam. 24:​2-7.

13. Bema haida ese ita idia hahisia o habadua, dahaka ese ita ia durua diba kara maoromaoro ita karaia noho totona?

¹³ Momokani, Davida ena haheitalai ita tohotohoa be namo! Kongrigeisen lalonai, tadikaka taihu ibounai be goevadae lasi dainai, reana ta ese ita do ia kara namo henia lasi o orea do ita rakatania. Momokani, hari inai negai, Satani be Iehova ena taunimanima ibounai edia kara maoromaoro do ia hadikaia lasi. (Isa. 54:17) To, bema ta ena hereva o kara ese eda lalona ia hahisia, dahaka ita karaia be namo? Bema eda tadikaka ta o taihu ta ita badu henia noho, unai ese eda kara maoromaoro ia hadikaia diba. Haida edia kara o hereva dainai eda Dirava ita badu henia o orea ita rakatania be ekskius kererena. (Sal. 119:165) Hahetoho ita haheaukalaia karana ese ita do ia durua kara maoromaoro ita karaia noho totona.

14. Iehova ena orea ese gau haida ia haidaua neganai, kara maoromaoro taudia be dahaka idia karaia?

¹⁴ Kara maoromaoro ita karaia noho dalana ma ta be inai: Ma haida edia kerere ita tahua lasi o maumauraia lasi. To, Iehova ita badinaia noho be gau badana. Hari, Ia be ena taunimanima ia hanamoa bada noho. Tanobada hegegemadai, taunimanima ibounai be tomadiho momokanina idia abia isi noho, guna bamona lasi. (Isa. 2:​2-4) Iehova ena orea ese Baibel ena hereva haida edia anina ia hamaoromaoroa o gau ta karaia dalana matamatana ia gwauraia neganai, mai eda ura ida unai ita abia dae. Ita moale badina hereva momokani ena diari ia bada ia lao noho. (Aon. 4:​18) Bema ita itaia idia haidaua gauna ta ita lalopararalaia namonamo lasi, Iehova ita noia ita ia durua unai point ita lalopararalaia totona. Herevana dahaka, to namona be Dirava ita badinaia, ita haheauka, bona kara maoromaoro ita karaia noho.

Dahaka Ita Karaia Diba Bema ta be Kara Maoromaoro Ia Karaia Noho Lasi?

15. Daika ese emu kara maoromaoro ia hadikaia diba?

¹⁵ Unai be henanadai namona, ani? Stadi ginigunana ai ita itaia, kara maoromaoro ita karaia noho be mai anina bada. Bema lasi, eda hetura  karana Iehova ida be do ia dika bona iseda helaro korikori be anina lasi gauna ai do ia lao. Laloatao: Tau ta ese emu kara maoromaoro ia hadikaia diba lasi. To, oi sibona ese unai oi hadikaia diba. Iobu ia diba unai be momokani. Ia gwau, ena be ia noho ela bona do ia mase, to iena kara maoromaoro do ia hadikaia lasi. (Iobu 27:​5, NW ) Bema oi danu be Iobu ena lalohadai bamona oi laloa bona Iehova kahirakahira oi noho, vadaeni unai ese oi do ia durua emu kara maoromaoro oi hadikaia lasi totona.​​—⁠Iam. 4:⁠8.

16, 17. (a) Bema tau ta be kara dika badana ia karaia, dahaka ia karaia lasi be namo? (b) Dala maorona be dahaka?

¹⁶ To madi, haida be edia kara maoromaoro idia dadaraia. Aposetolo edia negai, Keristani taudia haida be kara dikadia haida idia karaia loulou. Bema oi be unai bamona, vadaeni hanamoa dalana ta ia noho, a? Oibe. Vadaeni, dahaka oi karaia diba? Emu kara oi hunia lasi. Taunimanima momo be kara dika ta idia karaia neganai, idia hunia noho bona idia ura lasi tama sina, tadikaka taihu, eiava elda taudia idia hadibaia. To, Baibel be ita ia hadibaia: “Bema oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.” (Aon. 28:13) Dirava dekena amo gau ta ita hunia diba lasi dainai, eda kara dika ita hunia be dika momokani. (Heberu 4:​13 duahia.) Haida be Iehova idia hesiai henia, to hehuni dalanai kara dikadia idia karaia noho. Unai bamona taudia be kara maoromaoro idia karaia noho lasi. Bema tadikaka o taihu ta be hehuni dalanai kara dikadia ia karaia noho, iena tomadiho karana be Iehova ese ia abia dae lasi. Danu, Ia be koikoi taudia ia badu henia.​​—⁠Aon. 21:27; Isa. 1:​11-​16.

¹⁷ Tadikaka eiava taihu ta be kerere badana ta ia karaia neganai, Baibel ena hakaua hereva ia badinaia be namo. Hegeregere, elda taudia edia heduru ia tahua haraga be namo. Iehova be elda taudia amo kerere taudia ia hamaoromaoroa o durua. (Iamesi 5:​14 duahia.) Namo lasi matahakani eiava sisiba dekenai oi gari dainai, oi lalometau. Mani oi laloa: Bema tau ta be mase do ia havaraia gorere dikana ta ia abia, ia be mauri totona kodoa eiava opereisen do ia abia, herevana unai gaudia be mai edia hisihisi, ani?​​—⁠Heb. 12:⁠11.

18, 19. (a) Edena dala ai Davida ese ia hahedinaraia kara maoromaoro ita karaia lou diba? (b) Oiemu lalona oi hadaia kara maoromaoro oi karaia noho totona, a?

¹⁸ Ia manoka tauna ese dahaka ia karaia be namo? Kara maoromaoro ia karaia lou diba, a? Davida ena haheitalai ita laloa lou. Ia be kerere badana ia karaia. Ia be tau ma ta ena adavana ia ura henia, idia heudahanai, dala ia karaia hahine ena adavana o kerere lasi tauna ia alaia totona. Ita gwau diba unai negai Davida be kara maoromaoro ia dadaraia, ani? To, gabeai dahaka ia karaia? Davida ese sisiba o matahakani aukana ia abia be namo. Bena ia helalo-kerehai momokani dainai, Iehova ese ia hebogahisi henia. Davida be Dirava ia badinaia dainai, matahakani amo diba ia abia bona kara maoromaoro ia karaia lou. Davida ena sivarai be Aonega Herevadia 24:16 ena hereva bamona, ia gwau: “Kara maoromaoro tauna, be nega momo do ia moru, to ma do ia toreisi.” Dahaka ia vara? Davida ia mase neganai, Iehova ese Solomona dekenai Davida ia herevalaia dalana mani ita laloa. (1 King Taudia 9:4 duahia.) Iehova ia laloatao, Davida be kara maoromaoro tauna. Oibe, Iehova be dika amo idia helalo-kerehai momokani taudia edia dika ia laloaboio diba.​​—⁠Isa. 1:​18.

¹⁹ Oibe, bema Iehova oi lalokau henia bona badinaia, oi be kara maoromaoro tauna. Iehova oi badinaia, oi haheauka bona kara dika badana oi karaia neganai oi helalo-kerehai momokani. Momokani, kara maoromaoro ita karaia be mai ena namo, ani? Vadaeni, namona be ita ta ta be mai iseda lalona ibounai ida Davida ena hereva ita gwauraia, ia gwau: “Lau be kara maoromaoro lau karaia noho.”​​—⁠Sal. 26:⁠11.

[Footnote]

Edena Bamona Do Oi Haere?

• Edena dala ai kara maoromaoro taudia ai ita lao diba?

• Dahaka ese ita ia durua diba kara maoromaoro ita karaia noho totona?

• Edena dala ai ta be kara maoromaoro dalana dekenai ia raka lou diba?

[Study Questions]

[Box on page 8]

“UNAI BE KARA NAMONA”

Hua faiv lalonai ia rogorogo hahine ta ese taihu ta ena kara maoromaoro be unai bamona ia herevalaia. Unai rogorogo hahine be sitoa ta dekenai kofi ia inua, to unai sitoa ia rakatania neganai ena paosi ia rakatania. Paosi lalonai be K4,000 mai kahana ia noho. Unai be moni badana dainai, niuspepa ta dekenai unai rogorogo hahine ia gwau: “Lau lalohisihisi bada.” Taihu be paosi ia davaria neganai, maoromaoro paosi biaguna ia tahua to ia davaria lasi. Unai dainai, taihu ese paosi be pulisi steiseni dekenai ia abia lao, bona pulisi taudia be unai rogorogo hahine idia tahua ela bona idia davaria. Unai paosi biaguna be mai moale ida ia gwau: “Unai be kara namona.” Dahaka dainai taihu ia hekwarahi bada unai paosi ena biaguna ia tahua ela bona ia davaria bona paosi ia henia lou? Niuspepa ia gwau, Iehova ena Witnes hahinena be “ena tomadiho ese ia hadibaia namonamo dainai, kara maoromaoro ia karaia.”

[Picture on page 9]

Hahetoho lalonai, matamata taudia be kara maoromaoro idia karaia noho diba

[Picture on page 10]

Nega ta Davida be kara maoromaoro ia rakatania, to gabeai ia badinaia lou