Oi Laloatao, A?

Gima Kohorona matamatadia oi duahia neganai oi moalelaia, a? Bema oibe, henunai idia noho henanadai mani oi haerelaia:

• Edena dala ai Dirava bona iena ura, “gado goevadaena” unai, ita herevalaia diba? (Sep. 3:⁠9)

Gado matamata ta dibaia karana hegeregerena, bema ita ura “gado goevadaena” ita herevalaia namonamo, namona be ita kamonai namonamo, gado idia diba taudia ita tohotohoa, Baibel bukadia edia ladana bona siri haida ita laloatao, ita dibaia gaudia ita gwauraia loulou, ita duahia hedinarai, grama ita stadilaia, diba ita abia noho, stadi negadia ita abia hidi, bona ita herevalaia noho be gau badana.​​—⁠8/15, rau 21-​5.

• Headava lalonai “varo toi” ena anina be dahaka?

“Varo toi” be laulau herevana. (Had. 4:​12) Unai haheitalai be headava dekenai ita gaukaralaia neganai, anina be tau bona hahine be varo ginigunadia rua bona idia be Dirava, varo badana ida idia hatua o mogea hebou. Bema tau bona hahine be Dirava idia tura henia namonamo, vadaeni do idia hegeregere hekwakwanai momo idia hanaia totona, unai amo edia headava lalonai do idia moale.​​—⁠9/15, rau 16.

• Heberu 6:2 ai inai hereva “imana kwarana dekenai atoa,” ena anina be dahaka?

Unai be elda taudia abia hidi karana ia herevalaia lasi, to lauma helaga ena harihari gaudia henia karana ia herevalaia. (Kara 8:​14-​17; 19:⁠6)​​—⁠9/15, rau 32.

• Edena dala ai kongrigeisen elda taudia ese ma haida idia matauraia diba?

Kongrigeisen elda taudia ese ma haida idia matauraia dalana ta be, namo lasi tadikaka idia noia idia karaia diba lasi gaudia idia karaia totona. Bona danu, namona be elda tauna ese ena noinoi o hakaua herevana ia henia ena badina ia gwauraia.​​—⁠10/15, rau 22.

• Israela mamoe naria taudia ese itotohi o au latana ta idia gaukaralaia dalana amo elda taudia be dahaka idia dibaia diba?

Israela taudia edia negai, mamoe naria taudia be itotohi o au latana ta idia gaukaralaia edia mamoe oreana idia hakaua totona. Mamoe be magu lalonai idia vareai eiava raka-lasi neganai, mamoe naria tauna ena “itotohi henuna amo idia raka hanai,” unai amo ia ese mamoe ibounai ia duahia namonamo diba. (Lev. 27:32) Unai hegeregerena, namona be Keristani naria tauna be Dirava ena mamoe ia diba bona ia naridia.​​—⁠11/15, rau 9.