Iehova Ena Hereva be Ia Mauri Noho

Apokalupo Bukana Ena Hereva Badadia​​—⁠I

APOSETOLO Ioane be Patamo motumotu dekenai dibura ruma ai idia atoa neganai, ia ese matahanai 16 ia itaia. Unai matahanai lalodiai, Ioane ese Lohiabada ena dina lagani 1914 ai​​—⁠Dirava ena Basileia ia gini negana amo ela bona Keriso ena Lagani 1,000 Lohia Negana​​—⁠Iehova Dirava bona Iesu Keriso ese idia karaia gaudia ia itaia. Lagani 96 C.E. bamona ai, Ioane ese Apokalupo bukana ia torea bona unai matahanai ia sivarailaia.

Hari Apokalupo 1:1–​12:17 ena hereva badadia haida do ita itaia, unai karoa be Ioane ese ia itaia matahanai ginigunadia 7 idia herevalaia. Unai matahanai be mai anina bada ita dekenai, badina idia ese hari tanobada dekenai idia vara gaudia bona nega vairai Iehova be dahaka do ia karaia idia hahedinaraia. Mai abidadama ida inai matahanai idia duahia taudia be goada do idia abia bona idia moale.​​—⁠Heb. 4:​12.

“MAMOE ENA NATUNA” ESE BUKA KOUA TOANA NAMBA 6 IA KEHOA

(Apok. 1:1–​7:​17)

Ginigunana be, Ioane ese Iesu Keriso mai ena hairai ia itaia, bona ia itaia gaudia bona kamonai herevadia be ‘buka dekenai do ia torea, bona ekalesia orea 7 dekenai inai buka do ia siaia lao.’ (Apok. 1:​10, 11) Iharuana be, Ioane ese guba dekenai helai gabuna badana ta ia itaia. Unai helai gabuna badana latanai ia helai Tauna ena imana idibana ai be buka ta, mai ena koua toana 7 ia dogoatao. “Iuda iduhuna ena Laiona” eiava “Mamoe ena Natuna ta, . . . mai ena doana 7 bona iena matana 7” be “hegeregere inai buka do ia kehoa.”​​—⁠Apok. 4:2; 5:​1, 2, 5, 6.

Matahanai ihatoina be, “Mamoe ena Natuna” ese koua toadia ta ta ia makohia neganai idia vara gaudia ia hahedinaraia. Koua toana namba 6 ia makohia neganai, tano mareremarere bada ia vara bona badu dinana badana ia ginidae. (Apok. 6:​1, 12, 17) To, matahanai ma ta ese ia hahedinaraia ‘aneru 4 be tanobada ena kona 4 dekenai idia gini bona lai 4 edia toa dalana idia koua’ ela bona 144,000 ibounai ese maka idia abia. Hutuma bada taudia​​—⁠maka idia abia lasi taudia​​—⁠be “helai gabuna badana ena vairanai bona Mamoe ena Natuna ena vairanai idia gini.”​​—⁠Apok. 7:​1, 9.

Baibel Henanadaidia Edia Haere:

1:4; 3:1; 4:5; 5:6​​—⁠Inai hereva “laumadia 7” ena anina be dahaka? Dirava ena matana ai namba 7 ese gau ta ena kahana ibounai ia laulaulaia. Unai dainai, “ekalesia orea 7” dekenai ia siaia revareva, ena anina be tanobada hegegemadai Dirava ena taunimanima edia kongrigeisen 100,000 dekenai unai revareva be mai anina bada. (Apok. 1:​11, 20) Iehova be gaukara ta ena bada hegeregerena lauma helaga ia henia, unai gaukara hagugurua totona. Unai dainai “laumadia 7” anina be Dirava ena gaukara siahuna o lauma helaga ena gaukara ibounai. Hari lauma helaga ese unai peroveta herevadia idia kamonai taudia ibounai dekenai laloparara bona hahenamo ia henia. Apokalupo bukana be gau ta ia herevalaia neganai, namba 7 be nega momo ia gaukaralaia. Namba 7 ese gau ta ena kahana ibounai ia laulaulaia, bona unai be maoro badina Apokalupo bukana be “Dirava ese iena palani, hunia gauna, do ia karaia haorea” ia herevalaia.​​—⁠Apok. 10:⁠7.

1:​8, 17​​—⁠“Alepa bona Omega” bona “Matamana bona Dokona” be daika? Inai dagi ladana “Alepa bona Omega” be Iehova ia herevalaia bona ia hahedinaraia ia varanai bona murinai siahu ibounai Diravana ta be lasi. Ia sibona be “matamana bona dokona.” (Apok. 21:6; 22:13) Ena be Apokalupo 22:13 ia gwau, Iehova be “matamana bona dokona” bona ia vairanai bona murinai  Dirava ta be lasi, to Apokalupo karoa 1 lalonai inai dagi ladana “ginigunana bona ginigabena,” be Iesu Keriso ia herevalaia. Badina ia be mase diba lasi lauma maurina ia abia tauna ginigunana, bona Iehova sibona ese lauma tauanina ai ia hatorea isi lou tauna ginigabena.​​—⁠Kol. 1:​18.

2:7​​—⁠Inai hereva “Dirava ena uma gabu” be dahaka? Inai siri ese horoa Keristani taudia ia herevalaia dainai, reana unai uma gabu be guba ai, Dirava ena noho gabuna. Abidadama horoa Keristani taudia be “mauri auna ena huahua do idia ania.” Anina be idia be mase diba lasi maurina do idia abia.​​—⁠1 Kor. 15:⁠53.

3:7​​—⁠Edena negai Iesu be “Davida ena ki” ia abia, bona edena bamona ia gaukaralaia? Lagani 29 C.E. ai Iesu ia bapatiso neganai, Dirava ese ia abia hidi Davida ena bese ena King ai do ia lao. To, Iesu be Davida ena ki ia abia lasi ela bona lagani 33 C.E. ai guba dekenai ia daekau bona Dirava ena imana idibana kahanai ia helai. Unuseniai ia ese Davida ena Basileia ena ki ia abia. Bona unai nega amo, Iesu be unai ki ia gaukaralaia Basileia ena gaukara idauidau ia kehoa totona. Lagani 1919 ai, Iesu ese “Davida ena ruma ena ki” be “hesiai tauna mai ena kamonai, bona mai ena kara maoromaoro” dekenai ia henia, anina be unai orea ia abia hidi “iena kohu” ia naria totona.​​—⁠Isa. 22:22; Mat. 24:​45, 47.

3:​12​​—⁠Iesu ena “ladana matamatana” be dahaka? Unai ladana be Iesu ese ia abia dagi bona hahenamo idauidau ia laulaulaia. (Fili. 2:​9-​11) Tau ta be unai ladana ia diba lasi, Iesu sibona ia diba. To, Iesu ese unai ladana matamatana be guba dekenai idia daekau horoa taudia dekenai ia torea, unai ese ia hahedinaraia idia be ia ida idia hetura namonamo. (Apok. 19:12) Bona Iesu ese ia abia hahenamo idia abia danu.

Ita Dibaia Gaudia:

1:⁠3. “Inai gaudia ibounai do idia vara ena nega [Dirava ese Satani ena tanobada do ia hahemaoro henia] be ia kahirakahira vadaeni,” unai dainai Apokalupo bukana ena hereva edia anina ita lalopararalaia bona kara ta ita karaia haraga be mai anina bada.

3:​17, 18. Iseda abidadama dekenai ita gini goada noho totona, Iesu amo ‘golo do ita hoia, lahi ese ia hagoevaia vadaeni gauna.’ Anina be, ita hekwarahi kara namodia ita karaia totona. (1 Tim. 6:​17-​19) Danu, “dabua kurokurona” ita karaia, anina be ita hahedinaraia ita be Keriso badinaia taudia. Bona “matana muramura” ita gaukaralaia, anina be Gima Kohorona magasin ai idia noho sisiba herevadia ita duahia bona ita lalopararalaia.​​—⁠Apok. 19:⁠8.

7:​13, 14. Elda taudia 24 ese guba dekenai hairai idia abia vadaeni 144,000 taudia idia laulaulaia, idia be king bona hahelaga gaukara idia karaia. King Davida ese hahelaga taudia be orea 24 dekenai ia haria karana ese guba dekenai king bona hahelaga gaukara idia karaia taudia ia laulaulaia. Elda taudia 24 amo, ta ese Ioane dekenai hutuma bada herea taudia be daidia ia gwauraia hedinarai. Unai dainai, reana horoa Keristani taudia edia toreisi lou negana be lagani 1935 do lasi neganai ia matamaia. Dahaka dainai unai bamona ita hereva? Badina unai lagani ai, horoa taudia tanobada dekenai idia laloparara hutuma bada taudia be daidia.​​—⁠Luka 22:​28-​30; Apok. 4:4; 7:​9.

KOUA TOANA NAMBA 7 IA MAKOHIA NEGANAI KIBI 7 IDIA HIRIRIA

(Apok. 8:1–​12:⁠17)

Mamoe Natuna ese koua toana namba 7 ia makohia. Aneru 7 ese kibi 7 idia dogoatao. Aneru 6 be edia kibi idia hiriria, idia ese Dirava ena hahemaoro herevadia be taunimanima “kahana toi dekena amo kahana ta” dekenai idia gwauraia, unai be Kerisendom oreana. (Apok. 8:​1, 2, 7-​12; 9:​15, 18) Ioane ese matahanai namba 5 lalonai unai gaudia ia itaia. Matahanai lalonai, Ioane be buka maragina ta ia ania bona dubu helaga ia hahetohoa. Kibi namba 7 idia hiriria murinai, gado haida idia boiboi badabada: “Tanobada biagua siahuna be iseda Lohiabada bona iena Keriso idia abia vadaeni.”​​—⁠Apok. 10:10; 11:​1, 15.

Apokalupo 11:​15, 17 ena hereva be matahanai namba 7 ese ia hahedinaraia. Guba dekenai hoa kara badana ta ia hedinarai. Hahine be natuna mero ta ia havaraia. Diabolo be guba amo idia negea diho. Bona ia be unai hahine dekenai ia badu dikadika dainai, ia lao “hahine ena natuna oredia, idia do noho taudia, ia tuari henia.”​​—⁠Apok. 12:​1, 5, 9, 17.

 Baibel Henanadaidia Edia Haere:

8:​1-5​​—⁠Dahaka dainai guba dekenai regerege ta be lasi, bona tanobada dekenai dahaka idia negea diho? Laulau dalanai guba dekenai regerege ta be lasi, anina be tanobada ai idia noho “Dirava ena taudia edia guriguri” be Dirava ese ia kamonai diba. Unai be Tanobada Tuarina Ginigunana ena dokonai ia vara. Horoa Keristani taudia be Idau Bese edia nega ia ore murinai guba dekenai idia lao lasi. Tuari negana lalonai idia be dagedage idia davaria. Unai dainai, Dirava idia guriguri henia loulou idia do ia gimaia totona. Dirava ese edia guriguri ia kamonai dainai, aneru be laulau dalanai tanobada dekenai lahi ia negea diho, anina be horoa Keristani taudia be edia haroro gaukara idia habadaia. Ena be idia be momo lasi, to idia ese tanobada ibounai lalonai Dirava ena Basileia idia harorolaia badabada dainai, Kerisendom taudia be lahi ese ia araia bamona. Baibel ena sisiba idia harorolaia, guba ena boiboi ena regena bamona. Baibel ena hereva momokani edia diari idia hedinarai. Bona tomadiho koikoi oreadia idia mareremarere bada, tano marere ese ruma badadia ia hamarerea bamona.

8:​6-​12; 9:​1, 13; 11:15​​—⁠Edena negai aneru 7 idia hegaegae edia kibi idia hiriria totona, bona edena negai unai idia hamatamaia bona kibi edia regena be edena bamona? Lagani 1919 ia lao 1922 ai aneru ese kibi 7 idia hiriria, ena anina be tanobada ai idia noho Ioane oreana idia hagoadaia lou. Unai horoa taudia be edia haroro gaukara idia hegaegaelaia namonamo bona printaia masini matamatadia idia abia. (Apok. 12:​13, 14) Kibi edia regena ese ia laulaulaia gauna be, Dirava ena taunimanima bona aneru be idia gaukara hebou, Iehova ese Satani ena tanobada do ia hahemaoro henia herevana idia harorolaia totona. Oibe, unai gaukara be lagani 1922 ai, Cedar Point, Ohio, dekenai idia karaia hebouhebou negana amo ia matamaia ela bona hisihisi badana do ia vara.

8:​13; 9:​12; 11:14​​—⁠Dahaka dainai idia hiriria kibi oredia toi ese “dika” idia havaraia? Kibi ginigunadia 4 idia hiriria karana ese ia hahedinaraia Kerisendom oreana be Dirava ia dadaraia. To, kibi oredia toi be idau, badina do idia vara hadikaia gaudia idia hahedinaraia. Kibi namba 5 idia hiriria ena anina be, lagani 1919 ai Dirava ena taunimanima be “dobu masemase gurina” amo ia ruhaia bona edia haroro gaukara idia goadalaia lou, unai ese Kerisendom ia hahisia bada. (Apok. 9:⁠1) Kibi namba 6 ese hosi guia tuari taudia bona lagani 1922 ai idia hamatamaia haroro gaukarana ia herevalaia. Kibi namba 7 be Mesia Basileiana ena vara ia herevalaia.

Ita Dibaia Gaudia:

9:​10, 19. “Hesiai tauna mai ena kamonai, bona mai ena kara maoromaoro” ese ia halasia Baibel bukadia bona magasin be taunimanima ia hahisia. (Mat. 24:45) Baibel idia herevalaia buka bona pepapepa momo be kwadi edia iuna mai edia “doadoa bamona” bona tuari totona idia hegaegae hosi, “edia iuna be gaigai bamona.” Dahaka dainai idia be unai bamona? Badina unai Baibel bukadia be Iehova ese “dika davana do ia henia momokani” dinana idia gwauraia hedinarai goevagoeva. (Isa. 34:⁠8) Namona be mai gari lasi ida bona ura bada ida Baibel buka idauidau ita hariharilaia.

9:​20, 21. Keristani lasi tanodia ai idia noho manau taudia momo be ita harorolaia sivarai namona idia kamonai. To, ita diba Kerisendom taudia bona Dirava idia diba lasi taudia ma haida​​—⁠Baibel ese ia gwauraidia “tanobada taudia oredia” unai​​—⁠be idia ura lasi Iehova ena hesiai taudia ai idia lao. Ena be idia ura lasi sivarai namona idia kamonaia, to namona be iseda haroro gaukara ita goadalaia noho.

12:​15, 16. “Tanobada”​​—⁠Satani ena tanobada lalonai idia noho gaudia, eiava tano idauidau edia gavamani​​—⁠ese gwaumaoro idia henia taunimanima be edia ura hegeregerena idia tomadiho totona. Lagani 1940 amo “unai huala ia negea ranuna [dagedage karadia],” be siahu taudia o “tanobada ese ia hadonoa ore.” Momokani, Iehova ia ura kara ta ia karaia neganai, Ia ese tanobada ena siahu o gavamani taudia ia gaukaralaia diba ena ura ia hagugurua totona. Unai dainai, Aonega Herevadia 21:1 ia gwau: “Lohiabada ese king ena lalona ia biagua noho, Lohiabada ese ia hakaua noho, ia ese sinavai ena ranu ia haheaua noho hegeregerena.” Unai ese iseda abidadama Dirava dekenai ia hagoadaia be namo.