“Dala Be Inai, Ia Dekenai Do Umui Raka Lao”

Emilia Pederson ena sivarai

Ruth E. Pappas ese ia sivarailaia

EGU sinana, Emilia Pederson, be lagani 1878 ai ia vara. Ena be sikuli tisa ta ai ia lao, to ia ura bada taunimanima ia durua Dirava idia dibaia totona. Unai dainai, egu Sinana be ai noho taoni maragina Jasper, Minnesota, U.S.A. dekenai, kohu udaia maua badana ta ia abia. Unai amo ena kohu be China dekenai do ia siaia lao unuseniai Dirava ena sivarai be taunimanima dekenai do ia hadibaia totona. To, ena sinana ia mase neganai, China dekenai ia lao lasi, to ena tadina ia naridia. Lagani 1907 ai ia be Theodore Holien ia adavaia. Lau be December 2, 1925 ai lau vara​​—⁠emai ruma bese ibounai seven amo lau be dokona.

Egu Sinana be mai ena Baibel henanadai momo bona ia ura edia haere ia diba. Iena henanadai ta be, hel ena hahediba herevana, unuseniai kara dika taudia ese hisihisi do idia abia. Ia ese Luteran dubu ena tau badana ta ia nanadaia, bona ia ura diba Baibel dekenai edena kahana ai hel ena hahediba herevana ia noho. To unai tau ese ia hamaoroa, herevana Baibel ese unai ia gwauraia lasi, to taunimanima ese hel ena hahediba herevana idia hadibaia noho be namo.

Ia Ura Bada Hereva Momokani Ia Diba

Lagani 1900 murinai, egu Sinana ena tadina, Emma be Northfield, Minnesota dekenai ia lao miusiki ia stadilaia totona. Ia be ena tisa, Milius Christianson ena ruma dekenai ia noho. Bona unai tisa ena adavana be Bible Student ta, unai nega ai Iehova ena Witnes taudia ese unai ladana idia gaukaralaia. Emma ese idia ia hamaoroa iena kakana be Baibel ia duahia momo. Daudau lasi murinai, Mrs. Christianson be egu Sinana dekenai revareva ta ia torea bona unai revareva lalonai be Sinana ena Baibel henanadai edia haere idia noho.

Dina ta, Lora Oathout, Bible Student ta, be Sioux Falls, South Dakota ai, trein dekenai ia guia bona Jasper dekenai ia lao haroro gaukara ia karaia totona. Egu Sinana be ia abia bukadia ia stadilaia, bona lagani 1915 ai, ma haida dekenai Baibel ena hereva momokani ia harorolaia, bona Lora ese ia henia bukadia ia hariharilaia.

Lagani 1916 ai, egu Sinana ia kamonai tadikaka Charles Taze Russell be Sioux City, Iowa ai do idia karaia hebouhebou dekenai do ia lao. Sinana ia ura unai hebouhebou dekenai ia lao. Unai negai, egu kakadia be faiv, bona Marvin ena mauri lagani be hua faiv sibona. Sinana bona natudia ibounai be trein dekenai idia guia bona Sioux siti dekenai hebouhebou totona idia lao, bona trein amo ena daudau be kilomita 160 bamona. Sinana be Tadikaka Russell ena tok ia kamonai, “Photo-Drama of Creation” ena laulau ia itaia, bona bapatiso ia abia. Ruma dekenai ia giroa lou neganai, hebouhebou ena sivarai ibounai ia torea bona Jasper Journal ena nius dekenai idia halasia.

Lagani 1922 ai, Cedar Point, Ohio dekenai idia karaia hebouhebou ta dekenai idia lao taudia ibounai be 18,000 mai kahana, Sinana danu be unai hebouhebou dekenai ia lao. Unai hebouhebou murinai, Dirava ena Basileia harorolaia gaukarana ia karaia noho. Iena haheitalai namona ese ai ia hagoadaia inai hereva ai laloa bada totona:  “Dala be inai, ia dekenai do umui raka lao.”​​—⁠Isa. 30:⁠21.

Basileia Harorolaia Gaukarana amo Anina Namona Ia Vara

Lagani 1920 ena matamana ai, egu tama sina be Jasper idia rakatania bona ma gabu ta dekenai idia lao. Egu tamana be mai ena bisinesi namona ta bona ena ruma bese ia naria. Ena be Baibel ia stadilaia momo lasi, to mai ena ura bada ida haroro gaukara ia durua bona ena ruma dekenai loaloa naria taudia ia abidia dae. Nega haida, loaloa naria tauna be emai ruma dekenai tok ia henia neganai, taunimanima 100 mai kahana idia hebou.

Egu mauri lagani be seven neganai, egu lalana Lettie be ai dekenai ia ringi bona ia gwau iena ruma badinai idia noho taudia, Ed Larson bona ena adavana be idia ura Baibel idia stadilaia. Idia be Baibel ena hereva idia abia dae bona edia dekena taudia, Martha Van Daalen bona ena natuna 8 idia stadi henia. Martha bona ena ruma bese ibounai be Bible Student taudia ai idia lao. *

Unai nega ai, matamata tauna ta Gordon Kammerud, be egu Tamana ida ia gaukara hebou. Taunimanima ese Gordon idia hamaoroa: “Emu bosi ena natuna kekenidia dekenai oi naria namonamo. Edia tomadiho be idau momokani.” To, Gordon be Baibel ia stadilaia matamaia bona daudau lasi murinai ia abia dae ia be hereva momokani ia dibaia. Hua toi murinai bapatiso ia abia. Iena tama sina, Holien ruma bese, Kammerud ruma bese, bona Van Daalen ruma bese taudia be hereva momokani idia abia dae bona emai turana namodia ai idia lao.

Hebouhebou ese Ai Idia Hagoadaia Bada

Cedar Point ai idia karaia hebouhebou ese Sinana ia hagoadaia bada dainai, ia ura lasi hebouhebou ma ta ia reaia. Unai dainai, hebouhebou totona gabu daudau ai lao negadia lau do laloatao noho. Lagani 1931 ai, Columbus, Ohio ai idia karaia hebouhebou be mai anina bada, badina unai nega ai inai ladana, Iehova ena Witnes taudia idia abia dae. (Isa. 43:​10-12) Lagani 1935 ai, Washington, D.C. dekenai idia karaia hebouhebou lau laloatao, unai hebouhebou ena tok ta dekenai Apokalupo ese ia herevalaia “hutuma bada herea” idia herevalaia namonamo. (Apok. 7:⁠9) Unai hebouhebou ai bapatiso idia abia taudia ibounai be 800 mai kahana, bona egu kakana ruaosi Lilian bona Eunice danu bapatiso idia abia.

Ai lao henia hebouhebou gabudia be inai: Lagani 1937 ai be Columbus, Ohio dekenai; lagani 1938 ai be Seattle, Washington dekenai; bona lagani 1939 ai be New York dekenai. Van Daalen bona Kammerud ruma bese bona ma haida be ai idia bamoa, bona emai laolao dekenai kamepa ai karaia bona ai mahuta. Lagani 1940 ai, egu kakana Eunice be Leo Van Daalen ia adavaia, bona painia gaukara idia karaia. Unai lagani tamona ai, egu kakana ma ta Lilian be Gordon Kammerud ia adavaia, bona idia danu be painia gaukara idia karaia.

Lagani 1941 ai, St. Louis, Missouri ai, hebouhebou ta idia karaia. Unai hebouhebou dekenai matamata taudia tausen momo ese buka ladana  Children idia abia. Unai hebouhebou ese lau ia hagoadaia bada. September 1, 1941 ai, lau, egu kakana Marvin bona iena adavana, Joyce, be regula painia gaukara ai karaia. Unai neganai egu mauri lagani be 15.

Tadikaka momo be mai edia uma gabudia bona nega momo hebouhebou idia lao be auka, badina unai nega be uma aniani gogoa negana. Unai dainai hebouhebou idia ore murinai, emai ruma badinai unai hebouhebou herevadia ai riviulaia, hebouhebou idia lao lasi taudia be unai hereva namodia idia kamonai totona. Unai be moale bada negadia.

Gilead Sikuli Bona Tano Idauidau Dekenai Ai Karaia Hesiai Gaukaradia

February 1943 ai, Gilead Sikuli idia hamatamaia, unai amo painia taudia idia hadibaia misinari gaukara idia karaia totona. Unai sikuli ena klas ginigunana ai Van Daalen ena ruma bese amo siks idia lao, idia be Emil, Arthur, Homer, bona Leo; bona edia kasin Donald; Leo ena adavana Eunice, ia be egu kakana. Mai moale ida idia ai bamahuta henia, to ai hebogahisi badina ai diba lasi idia do ai itaia lou eiava. Gilead Sikuli ena gradueisen murinai, idia siks be Puerto Rico dekenai hesiai gaukara idia karaia, unai negai unai gabu dekenai Witnes taudia be momo lasi.

Lagani ta murinai, Lilian bona ena adavana Gordon, Marvin bona ena adavana Joyce be Gilead Sikuli ihatoina dekenai idia lao. Idia danu be Puerto Rico dekenai idia siaia lao. Bena September 1944 ai, egu mauri lagani be 18 neganai, Gilead Sikuli ena klas namba foa dekenai lau lao. February 1945 ai, Gilead gradueisen lau haorea murinai, Puerto Rico dekenai lau lao bona egu kakadia ida hesiai gaukara ai karaia hebou. Lau dekenai unai be ekspiriens namona! Ena be Spanish gado dibaia be auka, to daudau lasi murinai ai haida be Baibel stadi 20 mai kahana ai karaia. Iehova be emai gaukara ia hanamoa bada. Hari, Puerto Rico ai Witnes taudia 25,000 bamona idia noho!

Emai Ruma Bese be Hekwakwanai Ia Davaria

Lagani 1950 ai, Leo bona Eunice be Puerto Rico dekenai idia noho neganai, edia natuna mero Mark ia vara. Lagani 1952 ai, palani idia karaia edia varavara do idia vadivadi henia totona. April 11 ai, peleini dekenai idia guia bona idia lao. Peleini ia roho bena daudau lasi murinai davara dekenai ia moru. Leo bona Eunice idia mase. Mauri lagani rua merona, Mark be davara latanai ia hure lalonai idia davaria. Unai dika amo ia roho mauri tauna ta ese Mark be plastik dingi ai ia udaia bona ena uduna amo laga ia henia dainai Mark ia mauri. *

Lagani faiv murinai, March 7, 1957 ai, egu Sinana bona Tamana be motuka amo Kingdom Hall dekenai idia lao lalonai motuka ena taea ia dika dainai idia stopu. Tamana be dala ai taea ia hanamoa lalonai motuka ta ese ia bampaia bona maoromaoro ia mase. Taunimanima 600 mai kahana be egu Tamana ena fineral tok totona idia mai, bona unai ese emai gabu ai Tamana idia matauraia bada taudia dekenai haroro namona ia henia.

Gaukara Matamatadia

Tamana ia do mase lasi neganai, lau idia siaia lao Argentina dekenai hesiai gaukara lau karaia totona. August 1957 ai, lau be Andes Ororo ena badinai ia noho siti, Mendoza dekenai lau lao. Lagani 1958 ai, George Pappas, Gilead Sikuli ena klas namba 30 ia haorea tadikakana be Argentina dekenai ia lao danu. George bona lau be turana namodia ai ai lao, bona April 1960 ai ai headava. Lagani 1961 ai, egu Sinana ena mauri lagani be 83 neganai ia mase. Sinana be tomadiho momokani ena dala ia badinaia bona taunimanima momo ia durua unai bamona idia karaia totona.

 Lagani 10 lalonai, George bona lau be misinari taudia ma haida ida misinari rumadia dekenai ai gaukara hebou. Lagani seven lalonai sekit gaukara ai karaia. Lagani 1975 ai, United States dekenai ai giroa lou emai ruma bese lalonai idia gorere taudia ai naria totona. Lagani 1980 ai, egu adavana be Spanish gado idia herevalaia gabuna ai sekit gaukara ia karaia. Unai nega ai, United States ai Spanish gado idia herevalaia kongrigeisen be 600 bamona. Lagani 26 bamona lalonai ai be unai kongrigeisen momo ai vadivadi henia bona ai itaia kongrigeisen edia namba be 3,000 ia hanaia.

Idia be Unai “Dala” Dekenai Idia Raka

Sinana ia itaia ena ruma bese lalonai matamata taudia be ful-taim hesiai gaukara idia karaia neganai, ia moale bada. Hegeregere, egu kakana, Ester ena natuna, Carol be lagani 1953 ai painia gaukara ia karaia. Carol be Dennis Trumbore ia adavaia, bona idia headava negana amo idia ruaosi be ful-taim hesiai gaukara idia karaia. Ester ena natuna ma ta, Lois, be Wendell Jensen ia adavaia. Idia ruaosi be Gilead Sikuli ena klas namba 41 dekenai idia lao bona Nigeria dekenai lagani 15 lalonai misinari gaukara idia karaia. Mark ena tama sina be peleini ena aksiden dekenai idia mase. To ia be Leo ena kakana, Ruth La Londe bona iena tau Curtiss ese idia ubua bona naria. Mark bona iena hahine, Lavonne be lagani daudau lalonai idia painia bona edia natudia foa be inai “dala” dekenai idia hadibaia namonamo.​​—⁠Isa. 30:⁠21.

Egu kakana tamona ia do mauri noho, Orlen, ena mauri lagana be 95 bamona. Ia be Iehova ena hesiai gaukara ia do karaia noho. George bona lau be mai moale ida ful-taim hesiai gaukara ai do karaia noho.

Sinana ese Ia Rakatania Gaudia

Lau be egu Sinana ena kohu badana ta​—⁠unai be teibolo ta mai ena kabodi haida​—⁠lau naria. Unai be egu tamana bona sinana edia headava neganai, egu tamana ese sinana dekenai ia henia harihari gauna ta. Unai kabodi ta lalonai be Sinana ena buka gunana ta, unai buka ai Sinana ese ia torea revareva bona niuspepa ena hereva haida be Basileia ena sivarai namona idia herevalaia. Unai revareva haida be lagani 1900 bamona ai ia torea. Danu, egu Sinana ese ia durudia bona ena natudia ai idia lao misinari taudia edia revareva haida be unai kabodi lalonai idia noho. Nega ibounai iena revareva lau duahia loulou. Iena revareva ai idia noho hereva namodia ese ai idia hagoadaia bada! Ena be egu Sinana be misinari ta ai ia lao lasi, to misinari gaukara karaia urana be ia goada dainai ma haida ia hagoadaia. Tanobada Paradaisona ai, lau bona emai ruma bese ibounai be emai Tama Sina ida do ai hedavari lou negana lau naria noho!​​—⁠Apok. 21:​3, 4.

[Footnotes]

[Picture on page 17]

Emilia Pederson

[Picture on page 18]

1916: Sinana, Tamana (Marvin ia dogoatao); henunai, laurina amo ia lao idibana kahana, Orlen, Ester, Lilian, Mildred

[Picture on page 19]

Leo bona Eunice, idia do mase lasi neganai

[Picture on page 20]

1950: Laurina amo ia lao idibana kahana, ataiai: Ester, Mildred, Lilian, Eunice, Ruth; henunai: Orlen, Sinana, Tamana, bona Marvin

[Picture on page 20]

2001: George bona Ruth Pappas, sekit gaukara ai