Emu Harihari Gauna Oi Gaukaralaia Namonamo, A?
Emu Harihari Gauna Oi Gaukaralaia Namonamo, A?
“Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.”—ROMA 12:10.
1. Baibel be dahaka gwauhamata herevadia ia gwauraia?
HANAIHANAI Baibel be ita ia hagoadaia, lalomanoka negadiai Iehova be ita do ia durua. Inai gwauhamata herevadia mani oi laloa: “Hisihisi idia abia noho taudia, be Lohiabada ese ia durua noho, bona dagedage taudia ese tau haida idia hahisia neganai, Lohiabada ese unai hisihisi taudia ia abia isi noho.” “Edia kudoudia idia makohia taudia, be Lohiabada ese ia hagoadaia lou noho, bona edia bero ia kumia noho.” (Sal. 145:14; 147:3) Ma danu, iseda guba Tamana ia gwau: “Lau be Lohiabada, emui Dirava. Lau ese umui lau hagoadaia noho, lau gwau, ‘Do umui gari lasi, lau ese umui do lau durua.’ ”—Isa. 41:13.
2. Edena dala ai Iehova be ena hesiai taudia ia durua?
2 Edena dala ai guba ai ia noho Diravana, Iehova be ita ia hagoadaia diba? Hisihisi ita abia neganai, Ia be edena dala ai ita ia durua diba? Iehova Dirava be dala idauidau ai heduru ia henia. Hegeregere, Ia ese ena lauma helaga amo ena taunimanima dekenai “siahu badana” ia henia. (2 Kor. 4:7; Ioa. 14:16, 17) Ma danu, Ia ese Baibel amo ena hesiai taudia ia durua bona hagoadaia. (Heb. 4:12) Edena dala ma ta ai Iehova be ita ia hagoadaia? Petero Ginigunana be unai ia haerelaia.
“Dirava Ena Hariharibada Idauidau Umui Hedinaraia Noho”
3. (a) Petero ese hedibagani be edena dala ai ia gwauraia? (b) Petero Ginigunana karoa 4 be dahaka ia herevalaia?
3 Aposetolo Petero be horoa taudia ia tore henia neganai, ia gwau idia moale ena badina be ahuna namona do idia abia. Bena ia gwau: “Inai nega sisina lalonai be sedira dibagani idauidau ese umui do idia hisihisi henia.” (1 Pet. 1:1-6) Inai hereva “idauidau” mani oi laloa. Ia hahedinaraia hedibagani idauidau do ita davaria. To iena tadikaka idia daradara lasi totona, Petero be hereva ma haida ia gwauraia danu. Ia gwau, namona be Keristani taudia idia diba unai hedibagani idauidau lalonai Iehova be idia do ia durua idia haheauka totona. Unai gwauhamata herevana be Petero ese “gau ibounai edia dokona ena nega” ia herevalaia murinai ia gwauraia.—1 Pet. 4:7.
4. Dahaka dainai 1 Petero 4:10 be ita ia hagoadaia bada?
4 Petero ia gwau: “Iena hariharibada dekena amo, Dirava ese umui ta ta ibounai dekenai harihari gaudia idauidau ia henia vadaeni. Unai dainai, umui ese inai harihari gaudia do umui gaukaralaia, emui Keristani varavara taudia [“ta ta,” NW ] do umui durua totona. Unai dekena amo umui be Dirava ena hesiai taudia namodia, bona iena hariharibada idauidau umui hedinaraia noho.” (1 Pet. 4:10) Petero ese inai hereva, “idauidau” be nega rua ia gaukaralaia. Ia gwau, ‘hedibagani be dala idauidau ai do idia vara, to Dirava ena hariharibada karadia danu be idauidau.’ Dahaka dainai unai be hagoadaia herevana? Unai hereva ese ia hahedinaraia, herevana dahaka hedibagani do ia vara, to nega ibounai Dirava ena hariharibada karana be ita do ia durua unai ita haheaukalaia totona. To, Petero ia gwau Iehova be edena dala ai ita dekenai ena hariharibada karana ia hahedinaraia? Gauna be inai: Iseda tadikaka bona taihu amo.
“Ta Ta Do Umui Durua”
5. (a) Kongrigeisen taudia ta ta ese dahaka idia karaia be namo? (b) Edena henanadai idia vara?
5 Petero be kongrigeisen dekenai idia noho taudia ibounai ia hamaoroa: “Gau badana momokani be inai: Umui ta ta dekenai do umui lalokau henia, mai emui lalona ibounai.” Ma ia gwau: “Iena hariharibada dekena amo, Dirava ese umui ta ta ibounai dekenai harihari gaudia idauidau ia henia vadaeni. Unai dainai, umui ese inai harihari gaudia do umui gaukaralaia, emui Keristani varavara taudia [“ta ta,” NW ] do umui durua totona.” (1 Pet. 4:8, 10) Momokani, kongrigeisen taudia ta ta ese edia tadikaka bona taihu ma haida idia hagoadaia be namo. Iehova ese ena dava bada gaudia haida be ita dekenai ia henia, bona eda maduna be unai gaudia be ma haida dekenai do ita hariharilaia. Unai dava bada gaudia be dahaka? Petero ia gwau unai be “harihari” gauna ta. To, unai harihari gauna be dahaka? Edena dala ai unai ‘harihari gauna do ita gaukaralaia, ta ta ita durua totona’?
6. Dahaka harihari gaudia be Dirava ese Keristani taudia dekenai ia henia?
6 Baibel ia gwau: “Gau namodia ibounai, bona harihari gaudia namodia momokani ibounai, be Dirava dekena amo idia diho mai.” (Iam. 1:17) Momokani, Iehova be hariharibada Diravana dainai, Iena taunimanima dekenai harihari gaudia momo ia henia. Unai bamona harihari gauna namona ta be inai: Lauma helaga. Unai harihari gauna be ita ia durua Dirava ese ia ura henia karadia—lalokau, abidadama momokani kara, manau bona ma haida—ita hahedinaraia totona. Bona unai bamona karadia ese ita idia doria iseda tadikaka bona taihu ita ura henia bona durua totona. Harihari gaudia namodia haida, hegeregere aonega bona diba be lauma helaga ena heduru amo ita abia diba. (1 Kor. 2:10-16; Gal. 5:22, 23) Harihari gaudia ma haida—eda goada ibounai—be ita gaukaralaia iseda guba Tamana ita hanamoa totona. Dirava be ita dekenai maduna ia henia, ia ura eda diba bona kara namodia amo eda tadikaka bona taihu ita durua totona, unai amo Iena hariharibada karana ita hahedinaraia.
Harihari Gaudia amo Ma Haida Ita Durua Dalana
7. (a) Petero Ginigunana 4:10 ese Dirava ia henia harihari gaudia be edena bamona ia herevalaia? (b) Edena henanadai be ita sibona dekena ita henia be namo, bona dahaka dainai?
7 Petero Ginigunana 4:10 ese ia hahedinaraia, Dirava be ita ta ta dekenai ‘harihari gaudia,’ diba bona kara namodia unai, ia henia. Unai diba bona kara namodia be dala idauidau ai ita gaukaralaia diba. Petero be ita ta ta ia hamaoroa, namona be iseda ‘harihari gaudia [anina be, harihari gaudia idauidau] do ita gaukaralaia, ta ta do ita durua totona.’ Danu, Petero ia gwau, “harihari gaudia do umui gaukaralaia . . . Unai dekenai amo umui be Dirava ena hesiai taudia namodia”—unai be oda herevana ta. To, ita sibona ita nanadaia: ‘Dirava ese lau dekenai ia henia harihari gaudia lau gaukaralaia egu tadikaka bona taihu lau durua totona, a?’ (1 Timoteo 5:9, 10 hahegeregerea.) ‘Eiava Iehova amo lau abia dibana lau gaukaralaia moni o ladana bada lau abia totona, a?’ (1 Kor. 4:7) Bema eda harihari gaudia ita gaukaralaia ‘ta ta ita durua totona,’ Iehova be do ia moale.—Aon. 19:17; Heberu 13:16 duahia.
8, 9. (a) Edena dala haida ai Keristani taudia momokanidia ese edia tadikaka bona taihu idia durua diba? (b) Edena dala ai emu kongrigeisen tadikaka bona taihu be ta ta idia durua heheni?
8 Dirava ena Hereva ese ia hahedinaraia, aposetolo edia negai idia noho Keristani taudia be dala idauidau ai ma haida idia durua. (Roma 15:25, 26; 2 Timoteo 1:16-18 duahia.) Hari, Keristani taudia momokanidia be 1 Petero 4:10 ena oda idia badinaia dainai, edia harihari gaudia idia gaukaralaia edia tadikaka bona taihu idia durua totona. Unai bamona idia karaia daladia haida mani ita itaia.
9 Hua iboudiai, tadikaka (o taihu) momo be hora momo lalodiai Keristani heboudia totona idia hegaegae. Hebou lalonai, idia be Baibel stadi amo idia dibaia gaudia o hagoadaia herevadia idia gwauraia neganai, unai ese kongrigeisen taudia ibounai ia durua hedibagani idia haheaukalaia totona. (1 Tim. 5:17) Tadikaka bona taihu momo be edia tadikaka ma haida dekenai hebogahisi karadia idia hahedinaraia dainai, ladana namona idia abia. (Roma 12:15) Ma haida be hanaihanai lalometau taudia idia vadivadi henia bona idia guriguri hebou. (1 Tes. 5:14) Haida be revareva idia siaia, hahetoho bada idia davaria tadikaka bona taihu idia hagoadaia totona. Ma haida be gorere tadikaka bona taihu idia durua kongrigeisen heboudia dekenai idia mai totona. Tano mareremarere bamona gaudia idia ore neganai, Iehova ena Witnes taudia tausen momo be heduru idia henia, hegeregere tadikaka bona taihu edia ruma idia haginia—unai tadikaka bona taihu edia heduru karadia be Dirava ena ‘hariharibada idauidau idia hedinaraia noho.’—1 Petero 4:11 duahia.
Edena Gaukara be mai Anina Bada?
10. (a) Paulo ia laloa edena gaukara rua ia karaia be mai anina bada? (b) Edena dala ai Paulo ena kara ita tohotohoa diba?
10 Dirava ena hesiai taudia ese edia tadikaka totona edia harihari gaudia idia gaukaralaia sibona lasi, to danu taunimanima ma haida dekenai sivarai namona idia harorolaia be namo. Paulo ia laloparara, unai gaukara ruaosi be Iehova ena hesiai gaukara bona ia karaia be mai anina bada. Ia ese Efeso kongrigeisen taudia ia hamaoroa, “Dirava ese iena hariharibada dekena amo, umui durua totona, inai gaukara badana lau dekenai ia henia vadaeni.” (Efe. 3:2) Ma ia gwau: “Dirava . . . ese ai ia abia hidi, Sivarai Namona do ai harorolaia.” (1 Tes. 2:4) Paulo bamona, ita diba Dirava ena Basileia ita harorolaia be gau badana. Paulo be ia hesiku lasi to sivarai namona ia harorolaia goadagoada—iena kara ita tohotohoa be namo. (Kara 20:20, 21; 1 Kor. 11:1) Ita diba Basileia sivarai namona ita harorolaia gaukarana ese taunimanima ia hamauria diba. To danu, Paulo bamona, ita hekwarahi Dirava ia henia harihari gaudia haida amo tadikaka bona taihu ita hagoadaia totona.—Roma 1:11, 12; 10:13-15 duahia.
11. Sivarai namona ita harorolaia bona tadikaka ita durua gaukarana be edena bamona ita laloa be namo?
11 Tadikaka durua gaukarana bona haroro gaukara amo, edena be mai anina bada? Inai henanadai mani ita laloa: Manu ta ena apena rua amo, edena apena be mai anina bada? Haere ita diba vadaeni. Manu ia roho namonamo totona, ena apena ruaosi ia gaukaralaia be mai anina bada. Unai hegeregerena, Keristani taudia momokanidia ese edia tadikaka idia durua bona haroro gaukara idia karaia danu be gau badana. Petero bona Paulo be sivarai namona idia harorolaia bona tadikaka idia durua hegeregerena, namona be ita danu be unai maduna ruaosi ita laloa bada bona ita huaia. Edena dala ai?
12. Edena dala ai Iehova ese ita ia gaukaralaia?
12 Haroro gaukara ita karaia neganai, ita be eda hadibaia daladia idauidau amo ma haida edia lalona ita veria Dirava ena Basileia ena sivarai namona idia abia dae totona. Unai bamona ita karaia, badina ita ura idia be Keriso ena hahediba taudia ai idia lao. Ma danu, ita ura iseda diba, hagoadaia herevadia bona harihari gaudia idauidau amo eda tadikaka bona taihu ita durua—unai amo Dirava ena hariharibada karadia idauidau ita hahedinaraia noho. (Aon. 3:27; 12:25) Momokani, ita ura idia be Keriso ena hahediba taudia ela bona hanaihanai. Tadikaka ita durua bona haroro gaukara ita karaia neganai, ita diba Iehova be ita ia gaukaralaia bona unai be hahenamo hereadaena.—Gal. 6:10.
“Ta Ta Do Umui Lalokau Henia”
13. Dahaka do ia vara bema ‘ta ta ita durua’ lasi?
13 Paulo be ena tadikaka ia hagoadaia: “Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.” (Roma 12:10) Oibe, iseda tadikaka ita lalokau henia neganai, unai ese ita ia durua Dirava ena hesiai taudia namodia ai ita lao bona ena hariharibada karadia idauidau ita hahedinaraia noho totona. Ita diba bema Satani ese ita ia koua ‘ta ta ita durua’ lasi totona, anina be ia ura eda lalotamona do ia hadikaia. (Kol. 3:14) Oibe, bema ia ese eda lalotamona ia hadikaia, vadaeni haroro gaukara do ia dika danu. Satani ia diba bema eda hesiai gaukara tamona sibona ia hadikaia, vadaeni do ita manoka—unai be hegeregere, manu ena apena ta ia dika bona ia roho diba lasi.
14. Ma haida durua gaukarana amo daidia idia moale? Haheitalai ta gwauraia.
14 Dirava ena hariharibada idia abia taudia be ma haida idia durua neganai, idia bona idia durua taudia idia moale. (Aon. 11:25) Illinois, U.S.A. ai, Ryan bona ena adavana Roni edia haheitalai mani ita laloa. Idia kamonai lai gubana ta (Hurricane Katrina) be edia tadikaka taihu edia ruma ia hadikaia. Edia tadikaka idia lalokau henia dainai, edia moni gaukara idia rakatania, edia ruma idia hoihoilaia, bena motuka ese ia veria loaloa rumana ta idia hoia, idia hanamoa, bona kilomita 1,400 idia heau ela bona Louisiana dekenai idia ginidae. Unai gabu dekenai idia be lagani ta mai kahana idia noho, bona edia nega, goada bona kohu idia gaukaralaia edia tadikaka idia durua totona. Ryan (ena mauri lagani be 29) ia gwau: “Unai gaukara ese lau ia durua Dirava kahirakahira lau lao totona. Iehova ese ena taunimanima ia naria dalana lau itaia. Buruka tadikaka ida lau gaukara hebou dainai tadikaka naria dalana lau dibaia. Danu lau itaia, Iehova ena orea lalonai gaukara momo idia noho ai matamata taudia ese ai karaia totona.” Roni, (ena mauri lagani be 25) ia gwau: “Lau tanikiu badina ma haida lau durua. Lau abia moalena be guna lau abia moalena ia hanaia. Lau diba inai gaukara namona lau karaia dainai, vaira negana ena hahenamo ese lau do ia durua noho.”
15. Dahaka dainai Dirava ena hesiai tauna namona ai ita lao bona iena hariharibada karana ita hahedinaraia noho be namo?
15 Momokani, Dirava ena oda hegeregerena sivarai namona ita harorolaia bona tadikaka ita durua be mai ena namo. Ita durua taudia be Iehova idia hesiai henia noho diba, to ita be henia karana amo moale ita abia noho diba. (Kara 20:35) Kongrigeisen ai ma haida edia namo laloa bona lalokau heheni karana ia noho neganai, kongrigeisen taudia ibounai idia hebamo namonamo. Ma danu, ita lalokau heheni dainai ita hahedinaraia ita be Keristani taudia momokanidia. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioa. 13:35) Gau badana be, eda lalokau Tamana, Iehova, ita hanamoa be namo—Iena ura be tanobada ai ena hesiai taudia ese manoka taudia idia durua. Unai dainai, namona be iseda ‘harihari gaudia do ita gaukaralaia, ta ta do ita durua totona. Unai dekena amo ita be Dirava ena hesiai taudia namodia, bona iena hariharibada idauidau ita hedinaraia noho’! Ma haida durua gaukarana do oi karaia noho, a?—Heberu 6:10 duahia.
Oi Laloatao, A?
• Edena dala haida ai Iehova be ena hesiai taudia ia hagoadaia?
• Iehova be ita dekenai dahaka harihari gauna ia henia?
• Edena dala haida ai iseda tadikaka bona taihu ita durua diba?
• Dahaka ese ita do ia durua ta ta ita durua totona?
[Study Questions]
[Pictures on page 13]
Emu “harihari” gauna oi gaukaralaia oi sibona totona eiava ma haida oi durua totona?
[Pictures on page 15]
Ma haida dekenai sivarai namona ita harorolaia bona iseda tadikaka ita durua
[Picture on page 16]
Tadikaka idia durua taudia ita tanikiu henia bada badina gau momo idia dadaraia edia tadikaka idia durua totona