Iehova Ena Hesiai Tauna—“Iseda Kara Dika Dainai, Idia Haberoa”
Iehova Ena Hesiai Tauna—“Iseda Kara Dika Dainai, Idia Haberoa”
“Iseda kara dika dainai, idia haberoa, bona iseda kerere dainai, idia hisihisi henia. . . . Bona idia haberoa dainai, mauri ita davaria.”—ISA. 53:5.
1. Memorial ita karaia neganai, dahaka gaudia ita laloatao be namo, bona edena peroveta herevana ese ita do ia durua unai ita karaia totona?
MEMORIAL ita karaia neganai, Iesu ena mase bona toreisi lou karana ese ia havaraia hahenamo idauidau ita laloatao. Unai hahenamo haida be inai: Iesu ese Iehova ena lohia siahuna ia abia isi, Iehova ena ladana ia hahelagaia, Iehova ena ura ia hagugurua, bona taunimanima ibounai dekenai hahemauri ia mailaia. Baibel lalonai Isaia 53:3-12 ena peroveta herevana ese Keriso ena tauanina ia bouboulaia, bona unai kara dainai idia vara hahenamo idauidau ia gwauraia hedinarai namo herea. Isaia ese Hesiai Tauna do ia davaria hisihisi, ena mase dalana, bona ena mase dainai iena horoa tadikakadia bona “mamoe idaudia” ese do idia abia hahenamo ia gwauraia hedinarai goevagoeva.—Ioa. 10:16.
2. Isaia ena peroveta herevana ese dahaka ia hahedinaraia, bona edena dala ai unai ese ita ia durua diba?
2 Iesu be tanobada ai ia do vara lasi neganai, lagani 732 B.C.E. bamona ai, Iehova be lauma helaga amo peroveta tauna Isaia ia hasiahua dainai, ia gwau Hesiai Tauna be ena Dirava do ia badinaia noho ela bona mase. Unai hereva ese ia hahedinaraia Iehova ia diba iena Natuna ese Ia do ia badinaia momokani. Isaia ena peroveta herevana ita stadilaia neganai, unai ese iseda abidadama do ia hagoadaia bona ita ura Iehova bona Iesu do ita tanikiu henia.
Idia “Ura Henia Lasi” Bona “Matauraia Lasi”
3. Iuda taudia ese Iesu be edena bamona idia kara henia?
3Isaia 53:3 duahia. Mani oi laloa, Dirava ena Natuna tamona be mai moale ida ena Tamana ida ia gaukara hebou, to unai ia rakatania bona tanobada dekenai ia diho mai, ena mauri be boubou gauna bamona ia henia, taunimanima be kara dika bona mase amo ia ruhadia totona! (Fili. 2:5-8) Mose ena Taravatu henunai idia karaia animal boubou ese Iesu ena boubou gauna idia laulaulaia, to Iesu ena boubou gauna sibona ese kara dika ia gwauatao diba. (Heb. 10:1-4) Iuda taudia be Mesia idia naria noho dainai, idia ese Iesu idia abia dae bona idia matauraia be maoro, ani? (Ioa. 6:14) To, Isaia ena peroveta herevana hegeregerena, Iuda taudia ese Iesu idia “ura henia lasi” bona idia “matauraia lasi.” Aposetolo Ioane ia gwau: “Iena tano korikori dekenai ia mai, to iena bese taudia ese idia abia dae lasi.” (Ioa. 1:11) Aposetolo Petero ese Iuda taudia ia hamaoroa: “Iseda sene taudia edia Dirava ese iena hesiai tauna Iesu ia hanamoa vadaeni, to umui ese Pilato ena imana dekenai umui atoa, bona Pilato ia ura ruhaia neganai umui ura lasi ia. Helaga bona Kara Maoromaoro Tauna umui ura lasi.”—Kara 3:13, 14.
4. Edena dala ai Iesu be taunimanima edia gorere ia lalopararalaia?
4 Isaia ia gwau danu Iesu be “iseda hisihisi dikadia” eiava gorere do ia huaia. Haroro gaukara ia karaia neganai, nega haida Iesu ena tauanina ia manoka, to Baibel be ia gwau lasi ia gorere. (Ioa. 4:6) To, iena haroro gaukara lalonai ia ese gorere taudia momo ia hedavari henidia. Ia hebogahisi henidia bona momo edia gorere ia hanamoa. (Mar. 1:32-34) Iesu ese inai peroveta herevana ia hagugurua: “Inai Hesiai Tauna ese, iseda hisihisi dikadia [eiava gorere], bona iseda lalohisihisi danu, be ia ese ia huaia.”—Isa. 53:4a; Mat. 8:16, 17.
Idia Laloa “Dirava ese Hisihisi Ia Henia”
5. Iuda taudia momo ese Iesu ena mase be edena bamona idia gwauraia, bona dahaka dainai unai ese Iesu ena lalona ia hahisia bada?
5Isaia 53:4b duahia. Iuda taudia momo idia laloparara lasi, dahaka dainai Iesu be hisihisi do ia davaria bona do ia mase. Idia laloa Dirava ese Iesu ia panisia, hegeregere gorere dikana ta ia henia bamona. (Mat. 27:38-44) Iuda taudia ese Iesu idia samania, idia gwau ia be Dirava ena ladana ia hadikaia. (Mar. 14:61-64; Ioa. 10:33) To, Iesu be kara dika tauna lasi bona Dirava ena ladana ia hadikaia lasi. Bona iena Tamana ia lalokau henia bada dainai, Iuda taudia edia samania herevana ese ena lalona ia hahisia bada. Herevana dahaka do idia vara, to Iesu ia ura bada Iehova ena ura ia badinaia noho.—Mat. 26:39.
6, 7. Edena dala ai Hesiai Tauna ese ia davaria “hisihisi” be Iehova ena “ura” bona ia moalelaia?
6 Isaia ia gwau: “Ita laloa ia be mai ena kerere dainai, Dirava ese hisihisi ia henia.” Unai hereva ita abia dae diba. To, unai peroveta herevana lalonai, Dirava ia gwau, “Lauegu Hesiai Tauna ena hisihisi be lauegu ura.” Reana, unai hereva dekenai ita daradara. (Isa. 53:10) Badina Iehova be ia gwau: “Lauegu Hesiai Tauna, . . . lau ese ia lau abia hidi, bona ia dekenai lau ura henia bada noho,” to edena bamona ma ia gwau, “Lauegu Hesiai Tauna ena hisihisi be lauegu ura”? (Isa. 42:1) Edena dala ai Iesu ena hisihisi be Iehova ena ura?
7 Unai peroveta herevana ita lalopararalaia totona, namona be ita laloatao Satani be Dirava ena lohia siahuna ia hepapahuahulaia neganai, ia gwau guba bona tanobada ai Dirava ena hesiai taudia be mai edia ura ibounai ida Dirava idia hesiai henia lasi. (Iobu 1:9-11; 2:3-5) Unai dainai, Iesu be Dirava ia badinaia noho ela bona ia mase neganai, ia ese Satani ena hepapahuahu herevana ia hakoikoia. Ena be Iesu ena inai taudia ese ia idia alaia karana be Iehova ese ia koua lasi, to ita diba unai taudia ese Iesu idia hamasea neganai, Iehova ena kudouna ia hisihisi bada herea. To, Iehova ese iena Natuna ena abidadama goada karana ia itaia neganai, ia moale bada. (Aon. 27:11) Ma danu, Iehova ia moale bada badina ia diba ena natuna ena mase ese helalo-kerehai taudia dekenai hahenamo ia mailaia.—Luka 15:7.
“Iseda Kara Dika Dainai, Idia Haberoa”
8, 9. (a) Edena dala ai Iesu be “iseda kara dika dainai, idia haberoa”? (b) Petero ese edena dala ai unai ia hamomokania?
8Isaia 53:6 duahia. Goevadae lasi taudia be idia boio mamoe bamona, Adamu amo idia abia gorere bona mase amo roho mauri dalana idia tahua noho. (1 Pet. 2:25) Idia be mai edia kara dika dainai, Adamu ena natudia ta ese Adamu ia haboioa gauna idia hoia lou diba lasi. (Sal. 49:7) To, Iehova ena lalokau bada dainai, “ita ibounai iseda kara dika be, iena Hesiai Tauna [ena Natuna bona ia abia hidi tauna] ena latanai, ia atoa vadaeni.” Keriso be satauro dekenai iseda kara dika ia huaia bona ia mase, badina ia ura “iseda kara dika dainai, idia haberoa” bona “iseda kerere dainai, idia hisihisi henia.”
9 Aposetolo Petero ia gwau: “Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka. Keriso ese sibona ena tauanina dekenai, iseda kara dika ia huaia, satauro ena latanai. Unai bamona ia karaia, kara dika dekenai do ita mase totona, bona kara maoromaoro dekenai do ita mauri totona.” Bena, Petero ese Isaia ena peroveta herevana ia gwauraia, ia gwau: “Keriso ena bero ese ita idia hamauria vadaeni.” (1 Pet. 2:21, 24; Isa. 53:5) Petero ma ia hahedinaraia Iesu ena mase ese kara dika taudia edia dala ia kehoa Dirava idia lou henia totona, ia gwau: “Keriso nega tamona ia mase, kara dika kokia totona. Ia be kara maoromaoro momokani. To ita kara gagevagageva taudia dainai ia ese ia hisihisi bada, Dirava dekenai ita do ia hakaua totona.”—1 Pet. 3:18.
“Mamoe Ena Natuna be, Idia Alaia Gabuna Dekenai Idia Hakaua Lao Bamona”
10. (a) Ioane Bapatiso ese Iesu be edena bamona ia gwauraia? (b) Dahaka dainai Ioane ena hereva be maoro?
10Isaia 53:7, 8 duahia. Ioane Bapatiso be Iesu ia itaia neganai, ia gwau: “Itaia, Dirava ena Mamoe Natuna ia mai inai, ia be tanobada ena dika kokia tauna.” (Ioa. 1:29) Ioane ese Iesu be mamoe bamona ia gwauraia neganai, reana ia ese Isaia ena hereva ia laloa. Unai siri ia gwau: “Mamoe ena natuna be, idia alaia gabuna dekenai idia hakaua lao bamona.” (Isa. 53:7) Isaia ia peroveta: “Iena mauri ia atoa diho.” (Isa. 53:12) Ita laloatao danu, Iesu be iena mase laloatao Memorial ariana ia hamatamaia neganai, wain kapusi be ena aposetolo taudia 11 dekenai ia henia bona ia gwau: “Inai be lauegu rara, ia be ‘taravatu gwauhamatana ena rara’ ia laulaulaia, taunimanima edia kara dika gwauatao totona do ia bubua.”—Mat. 26:28, NW.
11, 12. (a) Isako ia ura ena mauri do ia henia karana ese edena dala ai Iesu ena mauri ia bouboulaia karana ia laulaulaia? (b) Dahaka dainai Memorial ita karaia neganai, Aberahamo Badana, Iehova do ita laloaboio lasi?
11 Isako hegeregerena, Iesu ia ura Iehova ena ura karaia totona, ena mauri be boubou gauna bamona do ia henia. (Gen. 22:1, 2, 9-13; Heb. 10:5-10) Ena be Isako ia ura iena mauri do ia henia, to Aberahamo ese unai boubou gauna karaia lalohadaina ia abia guna. (Heb. 11:17) Unai hegeregerena, ena be Iesu ia ura ena mauri do henia, to Iehova ese unai mase davalaia boubouna karaia lalohadaina ia abia guna. Iena Natuna do ia bouboulaia karana be Dirava ena lalokau bada karana ia hahedinaraia.
12 Iesu sibona ia gwau: “Badina be Dirava ese inai tanobada ia lalokau henia bada dainai, iena Natuna tamona sibona ia vara, ia henia vadaeni ita dekenai, do idia abidadama henia taudia ibounai be do idia mase lasi, to mauri hanaihanai do idia abia.” (Ioa. 3:16) Aposetolo Paulo ia gwau: “To Dirava ese iena lalokau badana ia hedinaraia ita dekenai, badina ita be do kara dika noho taudia neganai, Keriso be ita dainai ia mase.” (Roma 5:8) Unai dainai, ena be Iesu ena mase ita laloatao bona ita matauraia, namona be ita laloaboio lasi Aberahamo Badana, Iehova ese unai mauri davalaia boubouna ena dala ia lalohadailaia guna. Memorial ita karaia neganai, Iehova ita hanamoa be namo.
Hesiai Tauna ese “Taunimanima Momo Edia Kerere Davana Do Ia Karaia”
13, 14. Edena dala ai Iehova ena Hesiai Tauna ese ‘taunimanima momo edia kerere davana ia karaia’?
13Isaia 53:11, 12 duahia. Iehova ese ena abia hidi Hesiai Tauna be inai bamona ia gwauraia: “Lauegu Hesiai Tauna, lau ura henia bada Tauna ese, taunimanima momo edia kerere davana do ia karaia.” Edena dala ai? Isaia Karoa 53 Siri 12 ena dokona ese haere ia henia. Ia gwau: “Bona [Hesiai Tauna] ia guriguri, idia edia kerere be lau Dirava ese do lau gwauatao totona.” Adamu ena natudia ibounai be “kerere taudia,” unai dainai “kara dika ena davana,” mase idia abia. (Roma 5:12; 6:23) Iehova bona kara dika taudia idia hetura namonamo be mai anina bada. Isaia karoa 53 ena peroveta herevana ese Iesu be goevadae lasi taudia edia “kerere davana do ia karaia” dalana ia herevalaia, ia gwau: “Idia dadabaia dainai, ita ese maino ita abia noho, bona idia haberoa dainai, mauri ita davaria noho.”—Isa. 53:5.
14 Iseda kara dika ia huaia bona ita totona ia mase dainai, Keriso ese “taunimanima momo edia kerere davana do ia karaia.” Paulo ia gwau: “Dirava ena ura be inai: Sibona ena mauri ibounai be iena Natuna lalonai do ia noho. Unai dainai, iena Natuna dekena amo Dirava ese maino karaia dalana ta ia laloa. Inai maino be ia bona tanobada taudia bona guba taudia edia huanai. Keriso ena rarana satauro dekenai ia bubua dekena amo, Dirava ese ibounai danu maino ia karaia, bona ia dekenai idia mai dalana ia ese ia kehoa vadaeni.”—Kol. 1:19, 20.
15. (a) Paulo ese ia gwauraia “guba taudia” be daidia? (b) Daidia sibona be Memorial ena paraoa idia ania bona wain idia inua diba, bona dahaka dainai?
15 “Guba taudia” be Iehova ese Iesu ena rara amo ia hoia horoa Keristani taudia, bona idia be Keriso ida guba dekenai do idia lohia. “Guba maurina totona ia boiria taudia” edia kerere ibounai ia kokia vadaeni, idia be kara maoromaoro taudia bona ‘mauri do idia abia.’ (Heb. 3:1, NW; Roma 5:1, 18) Iehova ese ia abidia dae bona Iena lauma natudia ai idia lao. Lauma helaga be idia ia makaia bona ‘Dirava ese Keriso ia henia hanamoa gaudia do idia abia danu,’ bona Iesu ida iena guba Basileia lalonai king bona hahelaga gaukara do idia karaia. (Roma 8:15-17; Apok. 5:9, 10) Idia be “Dirava ena Israela” taudia ai idia lao bona “gwauhamata taravatu matamatana” lalonai idia noho. (Ier. 31:31-34; Gal. 6:16) Idia be unai gwauhamata lalonai idia noho dainai, Memorial gaudia hegeregere, wain kakakakana idia inua diba. Iesu ese wain be inai bamona ia gwauraia: “Inai kapusi ese taravatu matamata ena gwauhamatana ia laulaulaia, egu rara dainai ia vara bona umui totona do ia bubua.”—Luka 22:20, NW.
16. “Tanobada taudia” be daidia, bona edena dala ai Iehova vairanai idia be kara maoromaoro taudia ai idia lao?
16 “Tanobada taudia” be Keriso ena mamoe idaudia bona idia be tanobada ai mauri hanaihanai do idia abia. Idia danu be Hesiai Tauna ese ‘edia kara dika davana ia karaia,’ unai dainai idia be Iehova vairanai kara maoromaoro taudia ai ia halaodia. Keriso ena mauri davalaia boubouna idia abidadama henia bona “edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani.” Unai dainai, Iehova ia gwau idia be kara maoromaoro taudia, ena be idia be iena lauma natudia ai ia halaodia lasi, to iena natudia o turadia ai idia lao bona idia be hisihisi badana amo do idia roho mauri. (Apok. 7:9, 10, 14; Iam. 2:23) Mamoe idaudia be gwauhamata matamatana lalonai idia noho lasi bona guba dekenai do idia lao lasi dainai, Memorial ena paraoa idia ania bona wain idia inua lasi to Memorial dekenai idia mai bona idia kamonai sibona.
Iehova Bona Ia Abia Hidi Hesiai Tauna Ita Tanikiu Henia!
17. Isaia bukana lalonai idia noho Hesiai Tauna ena peroveta herevadia ese edena dala ai ita idia durua, Keriso ena mase ita laloa dobu totona?
17 Isaia bukana lalonai idia noho Hesiai Tauna ena peroveta herevadia ita stadilaia karana ese ita idia durua Keriso ena mase ita laloa dobu totona. Ita ia durua “iseda matana be Iesu dekenai do ita negea lao” totona. (Heb. 12:2) Ita diba Dirava ena Natuna ia gwau-edeede lasi. Iesu be Iehova ese ia hadibaia neganai ia moale, badina ia diba Iehova be Lohiabada. Satani be unai bamona lasi. Ita diba Iesu ena haroro gaukara lalonai, ia haroro henia taudia ia hebogahisi henia, edia gorere amo ia hanamodia bona ia durudia Dirava idia tura henia namonamo totona. Unai amo ia hahedinaraia ia be Mesia King ai ia lao neganai, tanobada matamatana lalonai “kota maoromaorona do ia haginia.” (Isa. 42:4) Iesu be Basileia sivaraina ia harorolaia goadagoada bona ‘bese idauidau dekenai diari ia henia’ ese ita ia hadibaia, namona be tanobada hegegemadai sivarai namona do ita harorolaia goadagoada.—Isa. 42:6.
18. Dahaka dainai Isaia ena peroveta herevana ita stadilaia murinai, ita ura Iehova bona iena abidadama Hesiai Tauna ita tanikiu henia?
18 Isaia ena peroveta herevana amo ita laloparara, Iehova ese ena Natuna lalokauna ia siaia tanobada dekenai hisihisi ia davaria bona ia mase neganai, Iehova be ia lalohisihisi bada. Iehova be iena Natuna ena hisihisi dekenai ia moale lasi, to ia moale badina Iesu be ena abidadama dekenai ia gini goada ela bona ia mase. Namona be Iehova ida ita moale hebou, badina ita itaia Iesu ese ia karaia gaudia ibounai amo Satani ia hakoikoia bona Iehova ena lohia siahuna ia abia isi. Danu, Iesu be iseda kara dika ia huaia bona ita dainai ia mase. Unai amo, Iehova vairanai iena horoa tadikaka bona mamoe idaudia be kara maoromaoro taudia ai ia halaodia. Memorial totona ita hebou neganai, namona be mai iseda lalona ibounai ida, Iehova bona iena abidadama Hesiai Tauna ita tanikiu henia bada.
Riviu
• Edena dala ai Iehova ena Natuna ese ia davaria “hisihisi” be Iehova ena “ura” bona ia moalelaia?
• Edena dala ai Iesu be “iseda kara dika dainai, idia haberoa”?
• Hesiai Tauna be edena dala ai taunimanima momo be kara maoromaoro taudia ai ia halaodia?
• Hesiai Tauna idia herevalaia peroveta herevadia stadilaia karana ese edena dala ai oi idia durua Memorial oi laloa dobu totona?
[Study Questions]
[Picture on page 26]
Idia “ura henia lasi” bona “matauraia lasi”
[Picture on page 28]
“Iena mauri ia atoa diho”
[Picture on page 29]
“Mamoe idaudia” be Memorial idia mai bona idia kamonai sibona