“Oi Mai, Lauegu Murinai Oi Raka”

“Tau ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.”​​—⁠LUKA 9:​23.

1, 2. (a) Iesu be dahaka boiboi herevana ia halasia? (b) Edena dala ai oi be Iesu ena boiboi herevana oi abia dae?

IESU ena haroro gaukara ena dina ginigabedia be Perea ai ia karaia​​—⁠Perea be Ioridane Sinavaina ena ist bona Iudea ena notist kahanai ia noho. Unuseniai, tau ta be Iesu dekenai ia lao bona ia henanadai, dahaka do ia karaia mauri hanaihanai ia abia totona. Iesu ia itaia unai tau be Mose ena Taravatu ia badinaia namonamo dainai, inai boiboi herevana ia gwauraia: “Oi lao, oiemu kohu oi hoia, ogogami taudia dekenai oi henia, gabeai kohu namona do oi davaria guba dekenai, bona oi mai, lauegu murinai oi raka.” (Mar. 10:21) Mani oi laloa: Ataiai Momokani Diravana ese ia havaraia Natuna tamona, Iesu, be unai tau ia boiria ia murinai ia raka totona!

² Unai tau be Iesu ena boiboi herevana ia dadaraia, to ma haida be unai boiboi herevana idia abia dae. Matamanai, Iesu be Filipo dekenai ia gwau: “Lauegu murinai oi raka mai.” (Ioa. 1:​43) Filipo be unai boiboi herevana ia abia dae, bona gabeai, aposetolo tauna ta ai ia lao. Iesu ese Mataio dekenai danu unai boiboi herevana ia gwauraia lou, bona ia abia dae. (Mat. 9:9; 10:​2-4) Oibe, Iesu ese unai boiboi hereva tamona be kara maoromaoro idia ura henia taudia ibounai dekenai ia halasia lou, ia gwau: “Tau ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.” (Luka 9:​23) Momokani, bema tau ta ia ura Iesu murinai ia raka, vadaeni unai bamona ia karaia diba. Oi ura Iesu murinai oi raka, a? Ita momo be Iesu ena boiboi herevana ita abia dae vadaeni, bona haroro gaukara dekenai ita ese unai boiboi herevana be ma haida dekenai ita halasia noho.

3. Iesu murinai ita raka noho totona, dahaka ita karaia be namo?

³ Madi, matamanai haida be Baibel ena hereva momokani idia ura henia bada, to gabeai unai ura ia maragi ia lao. Bena metairametaira Iesu idia rakatania bona idia “boio” vaitani. (Heb. 2:⁠1) Unai bamona hekwakwanai ia vara lasi totona, dahaka ita karaia be namo? Namona be ita sibona ita nanadaia: ‘Dahaka dainai matamanai egu lalona lau hadaia Iesu murinai lau raka totona? Iesu murinai ita raka ena anina be dahaka?’ Unai henanadai rua edia haere ita laloatao karana ese ita do ia durua, ita abia hidi vadaeni dala maorona dekenai ita raka noho totona. Danu, unai ese ita do ia durua ma haida ita hagoadaia Iesu murinai idia raka totona.

Iesu Murinai Ita Raka Ena Badina

4, 5. Dahaka dainai Iesu ese ita ia gunalaia be maoro?

⁴ Peroveta tauna Ieremia ia gwau: “Lohiabada e, lau diba taunimanima edia mauri dalana, be idia sibona ese idia naria lasi, bona taunimanima ta lasi ese iena mauri ia biagua noho.” (Ier. 10:23) Guna bona hari idia vara gaudia ese idia hamomokania, Ieremia ena hereva be momokani. Taunimanima ese idia haginia gavamani be do idia kwalimu lasi. Ita be Iesu ena boiboi herevana ita abia dae badina ita diba Iesu be iseda Gunalaia Tauna, ia be taunimanima ia hereaia. Iesu ia hegeregere ena badina haida mani ita itaia.

⁵ Ginigunana be, Iehova ese Iesu ia abia hidi Mesia, Gunalaia Tauna, ai ia halaoa. Momokani, eda Havaraia Tauna ia diba namonamo daika be ia hegeregere iseda Gunalaia Tauna ai ia lao totona, ani? Iharuana be, Iesu be kara namodia ia hahedinaraia bona ita tohotohoa diba. (Isaia 11:​2, 3 duahia.) Ia be haheitalai namona. (1 Pet. 2:​21) Ihatoina be, Iesu be ia murinai idia raka taudia ia  lalokau henia dainai, sibona ena mauri ia atoa diho. (Ioane 10:​14, 15 duahia.) Ia be mamoe naria tauna namona dainai, ita be mauri namona dekenai do ia hakaua lao, hari inai negai ela bona hanaihanai. (Ioa. 10:​10, 11; Apok. 7:​16, 17) Unai bona badina ma haida dainai, bema eda lalona ita hadaia Iesu murinai ita raka noho, unai be aonega karana. To, Iesu ena murinai ita raka ena anina be dahaka?

6. Iesu murinai ita raka ena anina be dahaka?

⁶ Keriso murinai ita raka ena anina be, iseda uduna sibona amo ita gwau lasi ita be Keristani tauna ta, to namona be kara ma haida ita karaia danu. Hari, taunimanima bilioni rua mai kahana idia gwau, idia be Keristani taudia, to edia kara ese ia hahedinaraia idia be “dika karaia taudia.” (Mataio 7:​21-​23 duahia.) Kamonai taudia be boiboi herevana idia abia dae bona Iesu murinai idia ura raka neganai, idia dekenai ita hadibaia Keristani taudia momokanidia be edia mauri dinadia ta ta lalonai, Iesu ena hahediba herevadia idia badinaia bona ia idia tohotohoa. Unai ita hahedinaraia totona, mani Iesu ena kara haida ita laloa.

Iesu Ena Aonega Tohotohoa

7, 8. (a) Aonega ena anina be dahaka, bona dahaka dainai Iesu ena aonega be bada? (b) Edena dala ai Iesu be aonega ia hahedinaraia, bona edena bamona ia ita tohotohoa diba?

⁷ Iesu be kara namodia momo ia hahedinaraia, to hari, ena kara foa sibona do ita kikilaia: Idia be aonega, manau, goada, bona lalokau. Ginigunana be, ena aonega mani ita laloa​​—⁠Iesu ena aonega dainai, ia ese ena diba bona laloparara ia gaukaralaia namonamo. Aposetolo Paulo ia gwau: “Keriso be ki bamona, ia ese Dirava ena aonega ibounai bona diba ibounai, hunia gaudia, ia kehoa noho.” (Kol. 2:⁠3) Iesu be edeseni amo aonega ia abia? Ia sibona ia haere: “Tamana ese lau dekenai ia hadibaia hegeregerena lau hereva.” (Ioa. 8:​28) Iehova ese Iesu dekenai aonega ia henia dainai, ita hoa lasi, Iesu ena hereva bona kara amo aonega ia hahedinaraia.

⁸ Hegeregere, Iesu be mai ena laloa maoromaoro ida ena mauri dalana ia abia hidi. Ia be kohu momo lasi maurina ia abia hidi bona ia laloa bada gauna tamona be inai: Dirava ena ura ia karaia. Ia be mai aonega ida ena nega bona goada ia gaukaralaia, Basileia ena gaukara idauidau ia karaia totona. Kohu momo lasi maurina ita abia hidi o iseda nega bona goada idia haorea kava gaudia ita dadaraia neganai, ita be Iesu ena haheitalai ita tohotohoa unai. (Mat. 6:​22) Keristani taudia momo be edia mauri dalana idia haidaua, unai amo nega bada ia noho haroro gaukara idia karaia totona. Haida be painia gaukara idia karaia. Bema oi be unai bamona oi karaia, unai be namo herea. Dirava ena Basileia idia tahua guna taudia be idia noho namonamo bona idia moale.​​—⁠Mat. 6:​33.

Iesu Ena Manau Tohotohoa

9, 10. Edena dala ai Iesu ese manau karana ia hahedinaraia?

⁹ Iesu ena kara iharuana mani ita laloa: Ena manau karana. Goevadae lasi taudia be dagi o siahu idia abia neganai, idia laloa idia be tau badadia momokani. To, Iesu be idau! Ena be Iehova ena palani lalonai Iesu be mai ena dagi badana, to ia hekokoroku lasi. Baibel be ita ia hagoadaia Iesu ena manau karana ita tohotohoa totona. Aposetolo Paulo ia gwau: “Keriso Iesu ena laloa bamona umui danu do umui laloa be namo. Ia be nega ibounai Dirava bamona ia noho. Oibe, Keriso be Dirava danu ia hegeregere, to ia laloa lasi unai bamona do ia noho, ia sibona do ia dogoatao gauna. Lasi, to ia ese sibona ena ura dainai, iena dagi badana ia negea, bona hesiai tauna momokani ia lao. Ia be taunimanima hegeregerena  ia vara, bona taunimanima edia toana ia abia.” (Fili. 2:​5-7) Iesu be dahaka ia karaia?

¹⁰ Iesu be mai moale danu ena Tamana ida guba ai ia noho, “to ia ese sibona ena ura dainai, iena dagi badana ia negea.” Iehova ese Iesu ena mauri be Iuda rami-hebou kekenina ena bogana dekenai ia atoa, unai amo hua 9 lalonai Maria bogana lalonai ia tubu bena beibi bamona ia vara, ogogami kapenta tauna ena ruma bese lalonai ia noho. Iosepa ena ruma dekenai, Iesu be beibi maragina amo ia tubu daekau bona tauhau ai ia lao. Iesu be goevadae. To ia mero maragi negana amo, ia be ena goevadae lasi tama sina ia matauraia bada. (Luka 2:​51, 52) Unai be manau karana momokani!

11. Edena dala haida ai Iesu ena manau karana ita tohotohoa diba?

¹¹ Ladana maragi gaukara ta ita abia dae neganai, ita be Iesu ena manau karana ita tohotohoa unai. Haheitalai ta be inai: Sivarai namona harorolaia gaukarana ita laloa. Unai gaukara dekenai taunimanima be ita idia hadikaia, badu henia, o dagedage henia neganai, ita mamia diba inai gaukara be ladana maragi gaukarana. To, ita haheauka bona haroro gaukara ita karaia noho neganai, ita ese ma haida ita durua Iesu ena boiboi herevana idia abia dae bona ia murinai idia raka totona. Unai amo taunimanima ita durua mauri idia abia totona. (2 Timoteo 4:​1-5 duahia.) Haheitalai ma ta be, eda Kingdom Hall naria bona hanamoa gaukarana. Ita be momoru ita gogoa, foloa ita daroa o mopua, bona toileti ita huria; unai gaukara ibounai ita gwauraia diba, ladana maragi gaukaradia. To, ita laloparara Kingdom Hall​​—⁠tomadiho goevadaena gabuna​​—⁠naria bona hanamoa gaukarana be iseda hesiai gaukara ena kahana ta. Mai eda ura ibounai ida unai bamona ladana maragi gaukara idauidau ita durua neganai, ita hahedinaraia ita manau bona Keriso ena aena gabudia dekenai ita raka noho.

Iesu Bamona, Ita Gaukara Goada

12, 13. (a) Iesu be edena gaukara ia ura henia bada, bona dahaka ese ia hagoadaia? (b) Dahaka ese ita do ia hagoadaia haroro gaukara ita goadalaia totona?

¹² Iesu be mai ena goada ibounai ida haroro gaukara ia karaia be mani ita laloa. Tanobada ai Iesu be gau momo ia karaia. Ia do matamata neganai, kapenta gaukara be ena ubua tamana Iosepa amo ia dibaia. Ena haroro gaukara lalonai, Iesu be hoa karadia momo ia karaia, hegeregere gorere taudia ia hanamodia bona mase taudia ia hatoredia isi lou. To, ena gaukara badadia rua be, sivarai namona ia harorolaia bona kamonai taudia ia hadibaia. (Mat. 4:​23) Ita be iena murinai ita raka dainai, unai gaukara ruaosi ita karaia. To, edena dala ai Iesu ena haheitalai ita tohotohoa diba? Dala ta be, Iesu ena lalohadai ita abia be namo.

¹³ Iesu ese haroro bona hadibaia gaukara ia karaia ena badina badana be inai: Ia be Dirava ia  lalokau henia. Unai sibona lasi, to ia be ia hadibaia hereva momokanidia ia ura henia bada. Ia dekenai, hereva momokani be dava bada gauna bamona, bona ia ura ma haida dekenai ia henia danu. Ita be hadibaia taudia dainai, Iesu bamona ita laloa be namo. Dirava ena Hereva amo ita dibaia hereva momokani haida mani ita laloa! Hegeregere, ita ese Iehova ena lohia siahuna ena hepapahuahu bona do ia hamaoromaoroa dalana ita diba. Mase taudia dekenai dahaka ia vara bona Dirava ena tanobada matamatana lalonai do idia vara hahenamo idauidau be Baibel amo ita lalopararalaia namonamo. Herevana, unai hereva momokanidia be idaunegai o hari sibona oi dibaia, to idia be mai anina bada. Baibel ia gwau idia be dava bada kohudia bamona. (Mataio 13:52 duahia.) Mai eda kudouna ibounai ida haroro gaukara ita karaia neganai, ma haida dekenai ita hahedinaraia ita be Iehova ese ita dekenai ia hadibaia gaudia ita laloa bada.

14. Edena dala ai Iesu ena hadibaia dalana ita tohotohoa diba?

¹⁴ Iesu ese taunimanima ia hadibaia dalana mani ita laloa. Ia be kamonai taudia ia hereva henia neganai, nega momo Buka Helaga ia gaukaralaia. Point badana ta ia herevalaia gwauraia neganai, nega momo ia gwau: “Buka Helaga lalonai ia torea vadaeni.” (Mat. 4:4; 21:13) Ia ese Heberu Revarevadia ena siri momo ia gaukaralaia eiava ia gwauraia lou. Iesu hegeregerena, haroro gaukara ita karaia neganai, bema dala ia kehoa, namona be Baibel siri ta ita duahia. Unai amo kudou-maoro taudia do idia itaia, ita be idia dekenai Dirava ena lalohadai ita hadibaia, iseda lasi. Tau ta ia ura Baibel ena siri ta ia duahia bona ena namo o anina ia kikilaia neganai, ita moale, ani? Bona unai bamona taudia ese Iesu ena boiboi herevana idia abia dae bona ia murinai idia raka neganai, ita moale bada.

Iesu Murinai Ita Raka Anina be Ma Haida Ita Lalokau Henia

15. Iesu ena kara namona ta be dahaka, bona unai kara namona ita laloa dobu ena namo be dahaka?

¹⁵ Hari, ita ese Iesu ena mauri lalonai ia hahedinaraia kara namo hereana do ita herevalaia​​—⁠taunimanima ia lalokau henia karana. Paulo ia gwau: “Keriso ena lalokau ese ai ia biagua noho.” (2 Kor. 5:​14) Iesu ese ita bona taunimanima ma haida dekenai ia hahedinaraia lalokauna ita laloa dobu neganai, unai ese eda kudouna ia hamarerea bona ita do ia hagoadaia iena haheitalai ita tohotohoa totona.

16, 17. Edena dala ai Iesu ese ma haida dekenai lalokau ia hahedinaraia?

¹⁶ Edena dala ai Iesu ese ma haida dekenai lalokau ia hahedinaraia? Iena lalokau karana hereadaena be, mai ena ura ida taunimanima totona iena ‘mauri ia atoa diho.’ (Ioa. 15:13) To, ena haroro gaukara lalonai, Iesu be dala ma haida amo lalokau ia hahedinaraia danu. Hegeregere, nega momo Iesu be idia hisihisi taudia edia hemami ia laloa bada. Iesu ia itaia Maria bona ma haida be Lasaro ia mase dainai idia taitai noho neganai, Iesu be edia hemami ia lalopararalaia bona ia hebogahisi  henidia. Ena be nega sisina murinai ia ese Lasaro do ia hatorea isi lou, to Iesu be ia hebogahisi bona “ia tai.”​​—⁠Ioa. 11:​32-35.

¹⁷ Iesu ena haroro gaukara ena matamanai, lepera tauna ta be Iesu dekenai ia lao bona ia gwau: “Bema oi ura, mani oi hanamoa lau, badina oiemu siahu be ia hegeregere.” Iesu be dahaka ia karaia? Baibel ia gwau, Iesu be unai tau ia hebogahisi henia dainai, hoa karana ta ia karaia. “Iena imana ia atoa lepera tauna ena kopina dekenai. Ia gwau, ‘Lau ura. Hari oi goeva.’ Nega tamona, lepera gorere ia ore, unai tau ia goeva vadaeni.” Mose ena Taravatu ia gwau lepera taudia be miro dainai, bema Iesu ia ura, unai tau ia dogoatao lasi to daudau amo ia hanamoa sibona. To lasi, Iesu be lepera tauna ena hemami ia laloa bada dainai ia dogoatao bona ia hanamoa​​—⁠reana unai be nega ginigunana tau ta ese lepera tauna ia dogoatao. Iesu be hebogahisi bada ia hahedinaraia unai!​​—⁠Mar. 1:​40-​42.

18. Edena dala ai ‘ta ta dekenai do ita lalokau henia, tadikaka bamona’?

¹⁸ Ita be Keriso murinai ita raka taudia dainai, Baibel ese ita ia hagoadaia ‘ta ta dekenai do ita lalokau henia, tadikaka bamona.’ (1 Pet. 3:⁠8) Bema tadikaka ta ia gorere o ia lalometau, nega haida ena hemami ita lalopararalaia be auka, badina ita be unai bamona ita gorere lasi o ita lalometau lasi. Iesu mani ita laloa, ena be ia gorere diba lasi, to ia ese gorere taudia edia hemami ia laloa bada. Edena dala ai ita be unai bamona ita karaia diba? Dala ta be, gorere taudia ese edia hemami idia herevalaia neganai, ita kamonai namonamo. Reana ita sibona ita henanadai, ‘Bema lau be unai bamona lau gorere, egu hemami be edena bamona?’ Bema ita ese ma haida edia hemami ita laloa bada, ‘manoka taudia do ita durua diba.’ (1 Tes. 5:​14) Unai amo, ita be Iesu ena aena gabudia dekenai ita raka noho.

19. Edena dala ai Iesu ena haheitalai ese ita ia durua diba?

¹⁹ Iesu Keriso ena hereva bona kara ita stadilaia be moale gauna momokani, ani? Iena kara idauidau ita dibaia neganai, ita ura ia ita tohotohoa bona ma haida ita durua unai bamona idia karaia totona. Vadaeni, namona be mai moale ida iseda Mesia King murinai ita raka​​—⁠hari ela bona hanaihanai!

Anina Oi Gwauraia Diba, A?

• Edena dala ai aonega ita hahedinaraia diba, Iesu bamona?

• Edena dala ai manau karana ita hahedinaraia diba?

• Edena dala ai haroro gaukara ita goadalaia diba?

• Edena dala ai Iesu bamona ma haida ita lalokau henia diba?

[Study Questions]

[Box/Picture on page 5]

BUKA MATAMATANA​—⁠ITA IA DURUA KERISO ITA TOHOTOHOA TOTONA

Lagani 2007 ena distrik hebouhebou dekenai be rau 192 bukana idia halasia, ena ladana be “Come Be My Follower.” Inai buka ese Keristani taudia do ia durua Iesu ena kara namodia bona ia karaia gaudia idia diba namonamo totona. Karoa rua edia hamatamaia herevadia murinai, kahana ginigunadia be Iesu ena manau, gari lasi, aonega, kamonai bona haheauka idia herevalaia.

Kahana haida be Iesu ena hadibaia gaukarana, sivarai namona harorolaia gaukarana, bona ena lalokau bada ia hahedinaraia daladia ma haida ia herevalaia. Inai buka ena hereva ese Keristani tauna ta do ia durua Iesu ia tohotohoa totona.

Ai diba momokani, inai buka ese ita ibounai do ia durua eda kara ita tahua namonamo bona ita sibona ita nanadaia: ‘Lau be Iesu lau badinaia momokani, a? Edena dala ai ia lau badinaia namonamo diba?’ Danu, inai buka be “mauri hanaihanai idia ura kudou-maoro taudia ibounai” do ia durua Keriso murinai idia raka totona.

[Picture on page 4]

Iesu ia ura tanobada ia mai bona beibi ta bamona ia vara. To unai ia karaia totona, edena kara be mai anina bada?

[Picture on page 6]

Dahaka ese ita do ia durua haroro gaukara ita goadalaia totona?