“Badina Aukana Latanai Oi Gini Goada, Au Ena Ramuna Ia Goada Hegeregerena,” A?

NEGA ta oi itaia au badana ta be lai gubadia ese idia odaia lao odaia mai, a? Herevana lai gubana ia goada momokani, to au ia hamorua lasi. Dahaka dainai? Badina au ena ramuna be tano lalonai ia goada momokani. Ita danu be unai au bamona ita karaia diba. Eda mauri lalonai lai gubana bamona hahetoho badadia ita haheaukalaia diba, bema ita be ‘badina aukana latanai ita gini goada, au ena ramuna ia goada hegeregerena.’ (Efe. 3:​14-​17, NW ) Unai badina aukana be dahaka?

Baibel ia gwau Keristani kongrigeisen “ena kona nadina be Keriso Iesu sibona.” (Efe. 2:​20; 1 Kor. 3:​11) Unai dainai, Baibel ese ita Keristani taudia ia hagoadaia Iesu ‘ida do ita raka hebou noho. Au ena ramuna ia goada hegeregerena, Iesu lalonai do ita gini goada bona iseda abidadama do ia goada.’ Bema unai bamona ita karaia, iseda abidadama idia tohoa gaudia, hegeregere taunimanima edia “anina lasi hereva koikoidia” o “laloani herevadia” do ita haheaukalaia.​​—⁠Kol. 2:​4-8, NW.

“Ena Lababa, Bona Ena Lata, Bona Ena Ataiai, Bona Ena Dobu”

Edena dala ai “ita gini goada” bona iseda “abidadama do ia goada” diba? Dala namona ta be Dirava ena Hereva ita stadilaia namonamo, au ramuna be tano lalonai ia vareai momokani bamona. Iehova ia ura ita be iena ‘helaga taudia ida hereva momokani ena lababa, ena lata, ena ataiai, bona ena dobu do ita lalopararalaia momokani.’ (Efe. 3:​18, NW ) Unai dainai, Keristani taudia ibounai ese diba sisina eiava Dirava ena Hereva lalonai idia noho “diba hamatamaia gaudia” sibona, idia dibaia be hegeregere lasi. (Heb. 5:⁠12; 6:⁠1) To, namona be mai iseda ura ida hereva momokanidia dekenai eda diba ita habadaia noho.​​—⁠Aon. 2:​1-5.

Anina be Baibel amo gau momo ita diba neganai, unai ese ita do ia durua hereva momokani lalonai ita gini goada totona, a? Lasi. Satani danu be Baibel ena hereva ia diba. Unai dainai, dahaka gau ma ta ita diba be namo? Namona be ‘Keriso ena lalokau ita diba, unai lalokau ese diba ia hereaia.’ (Efe. 3:​19, NW ) Bema ita stadi badina Iehova bona hereva momokani ita lalokau henia, Dirava ena hereva amo ita abia  diba maoromaoro ese iseda abidadama do ia hagoadaia.​​—⁠Kol. 2:⁠2.

Emu Laloparara Oi Tohoa

Mani henunai idia noho Baibel ena hereva badadia amo emu laloparara oi tohoa. Reana unai ese oi do ia durua emu stadi karana oi goadalaia bona oi karaia namonamo totona. Hegeregere, mani aposetolo Paulo ese Efeso taudia dekenai ia torea revareva ena siri ginigunadia oi duahia. (Maua ladana “Paulo Ena Revareva Efeso Taudia Dekenai” itaia.) Unai siri ibounai oi duahia murinai, oi sibona oi nanadaia, ‘Maua lalonai idia noho herevadia edia anina lau lalopararalaia, a?’ Mani unai hereva ta ta ita laloa.

“Tanobada Ia Do Karaia Lasi Neganai,” Dirava ese Haida Ia Makaia Vadaeni

Paulo be ena tadikaka dekenai ia gwau: “Dirava ese gunaguna ita ia makaia vadaeni iena. Iena ura be Iesu Keriso dekena amo, ia ese iena natuna ita do ia halaoa.” Oibe, Iehova ia ura taunimanima haida ia abia hidi iena natuna ai do ia halaodia, o iena guba ruma bese goevadaena ai do idia lao. Idia be Dirava ena natudia dainai, Keriso ida king bona hahelaga gaukara do idia karaia. (Roma 8:​19-​23; Apok. 5:​9, 10) Matamanai Satani be Iehova ena lohia siahuna ia hepapahuahulaia neganai, ia gwau Iehova ese ia karaia taudia ibounai be kara dika sibona do idia karaia. Unai dainai, Iehova ese unai tanobada taudia ia abia hidi guba bona tanobada ai kara dika ibounai do idia kokia totona be maoro, bona idia ese Satani do idia haorea badina ia be dika ibounai ia havaraia tauna. To Iehova ese gunaguna iena natuna ai do ia halaoa taudia be ta ta ia makaia lasi. Dirava ia ura grup ta o tanobada taudia haida be Keriso ida guba dekenai do idia lohia.​​—⁠Apok. 14:​3, 4.

Paulo be Keristani taudia ia tore henia  neganai, ia gwau Dirava ese “tanobada ia do karaia lasi neganai,” ia ese grup ta ia makaia. To Paulo be edena “tanobada” ia herevalaia? Ia be Dirava ese matamanai tanobada bona taunimanima ia do karaia lasi negana ta ia herevalaia lasi. Badina bema unai bamona ia hereva, anina be Paulo ese Iehova ena hahemaoro goeva karana ia hakoikoia. Hegeregere, bema Dirava ese Adamu bona Heva ia do karaia lasi neganai, ia be palani ia karaia vadaeni Adamu bona Heva be vaira neganai do idia kara dika, edia kara dika ena davana ia henia be maoro lasi, ani? To edena negai Dirava be palani ia karaia Adamu, Heva bona Satani edia gwau-edeede karana ese ia havaraia dika do ia hamaoromaoroa totona? Adamu bona Heva idia gwau-edeede murinai Iehova be unai ia palanilaia; to unai neganai Adamu bona Heva be natudia idia do havaraia lasi.

“Dirava Ena Hariharibada be Bada Herea Momokani”

Dahaka dainai Paulo ese Efeso bukana ena matamaia siridia ai ia herevalaia gaudia ia gwauraia “Dirava ena hariharibada” dainai idia vara? Paulo ia ura hahedinaraia Iehova be hariharibada Diravana dainai, kara dika taudia edia mauri davana ia karaia.

Momokani, ita ibounai be hegeregere lasi iseda mauri davana ita karaia totona. To, Iehova be taunimanima ia lalokau henia bada dainai, dala ia karaia ita ia hamauria totona. Ita diba ita be goevadae lasi taudia bona mai eda kara dika dainai, Paulo ena hereva bamona, hahemauri ita abia be Dirava ena hariharibada karana.

Dirava Ena Palani, Hunia Gauna

Matamanai, Dirava be Satani ese ia havaraia dika do ia hamaoromaoroa dalana ia hahedinaraia lasi. Ia be “hunia gauna.” (Efe. 3:​4, 5) Gabeai, Keristani kongrigeisen ia gini neganai, Iehova ese ena palani, taunimanima bona tanobada totona, do ia hagugurua dalana ibounai ia gwauraia hedinarai namonamo. Paulo ia gwau, “inai palani do ia haorea nega korikori ia ginidae neganai,” Dirava ese “gaukara haheaua dalana” ta amo ena guba taudia bona tanobada taudia do ia haboua.

Unai haboua gaukara ginigunana be Pentekoste 33 C.E. ai ia matamaia, unai negai Iehova be Keriso ida guba dekenai do idia lohia taudia ia haboua matamaia. (Kara 1:​13-​15; 2:​1-4) Haboua gaukara iharuana be tanobada paradaisona ai Keriso ena Mesia Basileiana henunai do idia noho taudia idia haboua. (Apok. 7:​14-​17; 21:​1-5) Inai hereva “gaukara haheaua dalana” be Mesia Basileiana ia herevalaia lasi, badina unai Basileia be Paulo ena negai ia gini lasi to lagani 1914 ai ia gini. To ita gwau diba “gaukara haheaua dalana” be Dirava ese gaukara idauidau ia karaia amo ena ura​​—⁠guba bona tanobada ai lalotamona do ia havaraia karana​​—⁠ia hagugurua karana ia herevalaia.

“Tau Badadia Bamona . . . Do Umui Laloa”

Momokani, sibona emu stadi oi karaia hanaihanai neganai, unai ese oi do ia durua ‘hereva momokani ena lababa, ena lata, ena ataiai, bona ena dobu do oi lalopararalaia momokani.’ To bema ta be tauanina gaudia dekenai ia bisi momo, Satani ese unai tauna ena stadi hanaihanai karana ia hamanokaia haraga o hadikaia diba. Namo lasi unai ia vara oi dekenai. Dirava amo oi abia “laloparara” oi gaukaralaia, unai amo ‘tau badadia bamona do oi laloa.’ (1 Ioa. 5:​20, NW; 1 Kor. 14:20) Danu, namona be oi laloparara dahaka dainai gau ta oi abia dae, bona nega ibounai ‘emu helaro dainai idia henanadai taudia ibounai oi haere henia’ diba.​​—⁠1 Pet. 3:​15, NW.

Mani oi laloa: Efeso dekenai nega ginigunana Paulo ena revareva idia duahia negana ai oi danu oi noho. Reana Paulo ena hereva ese emu ura do ia hagoadaia “diba maoromaoro Dirava ena Natuna dekenai” oi abia totona, ani? (Efe. 4:​13, 14, NW ) Oibe, hari unai hereva ese oi ia hagoadaia danu be namo. Iehova ita lalokau henia bona Baibel amo diba maoromaoro ita abia karana ese ita do ia durua Keriso ena ‘badina aukana latanai ita gini goada, au ena ramuna ia goada hegeregerena.’ Unai amo inai tanobada dikana ia do ore lasi lalonai, Satani ena hahetoho idauidau ita haheaukalaia diba.​​—⁠Sal. 1:​1-3; Ier. 17:​7, 8.

[Box/Picture on page 27]

“Paulo Ena Revareva Efeso Taudia Dekenai”

“Dirava ita tanikiu henia be namo, ia be iseda Lohiabada Iesu Keriso ena Tamana. Bona Keriso danu ita hakapua dainai Dirava ese guba ena hanamoa gaudia ibounai ita dekenai ia henia, iseda lauma durua totona. Tanobada ia do karaia lasi neganai, Dirava ese ita ia abia hidi, ita be iena taudia, Keriso lalonai ita noho dainai. Unai dekena amo, Dirava ena vairanai ita be helaga bona mai kerere ta lasi. Iena lalokau dainai, Dirava ese gunaguna ita ia makaia vadaeni iena. Iena ura be Iesu Keriso dekena amo, ia ese iena natuna ita do ia halaoa. Inai be sibona ena palani, bona sibona ena ura. Namona be Dirava ita hanamoa, iena hariharibada namo herea momokani dainai! Inai hariharibada ita dekenai ia henia davana lasi, iena Natuna lalokau dekena amo! Badina be Keriso ese iena mase dekena amo ita ia hoia lou vadaeni, iena rarana dainai. Iseda dika danu ia ese ia gwauatao vadaeni. Dirava ena hariharibada be bada herea momokani, ani? Inai hariharibada ita dekenai ia henia badabada. Bona iena aonega bona diba bada hegeregerena, Dirava ese sibona ena ura gauna, iena palani, gunaguna ia laloa, hunia gauna, ita dekenai ia hadibaia. Inai palani be Keriso dekena amo Dirava ese do ia karaia haorea. Inai palani do ia haorea nega korikori ia ginidae neganai, Dirava ese do ia karaia haorea [“gaukara haheaua dalana ia haginia,” NW ]. Inai palani ena anina be, Dirava ia karaia gaudia ibounai, guba dekenai bona tanobada dekenai, be Keriso ese do ia biagua [“gau ibounai do ia haboua” NW ].”​​—⁠Efe. 1:​3-​10.