Lalokau Lasi Tanobadana ai Hetura Karana Hagoadaia Dalana
Lalokau Lasi Tanobadana ai Hetura Karana Hagoadaia Dalana
“Lauegu taravatu be inai: Umui ta ta do umui lalokau henia.”—IOA. 15:17.
1. Dahaka dainai Keristani taudia ginigunadia edia hetura karana ia goada noho be gau badana?
IESU ena hanuaboi ginigabena ai, ena hahediba taudia ia hamaoroa edia hetura karana ia goada noho be namo. Unai adorahi ai, ia gwau edia lalokau heheni karana ese do ia hahedinaraia idia be ia murinai idia raka taudia. (Ioa. 13:35) Gabeai do idia davaria hekwakwanai idia haheaukalaia bona Iesu ese do ia henia gaukarana idia hagugurua totona, aposetolo taudia idia hetura heheni namonamo be gau badana. Oibe, Keristani taudia ginigunadia edia hetura karana Dirava ida bona edia tadikaka ida be gau ta ese ia hadikaia diba lasi.
2. (a) Eda lalona ita hadaia dahaka do ita karaia, bona dahaka dainai? (b) Edena henanadai do ita laloa?
2 Hari inai negai, ita moale badina ita be tanobada hegegemadai ia noho oreana ita bamoa, bona ita ese Keristani taudia ginigunadia edia kara ita tohotohoa! Iseda lalona ita hadaia vadaeni Iesu ena hahegani hegeregerena, ta ta do ita lalokau henia. To, inai nega dokona ai, taunimanima momo be ta ta badinaia bona lalokau henia karana idia hahedinaraia lasi. (2 Tim. 3:1-3) Taunimanima be edia hetura karana lalonai sibona edia namo idia tahua bona edia turana idia laloa bada lasi. Ita be Keristani taudia momokanidia dainai, unai kara ita dadaraia be namo. Mani inai ita laloa: Tura namodia edia hebamo karana be dahaka latanai idia haginia? Edena dala ai tura namodia ita davaria diba? Edena nega ai iseda turana bamoa karana do ita hadokoa? Bona edena dala ai eda hetura karana ita hagoadaia diba?
Tura Namodia be Dahaka Latanai Edia Hebamo Karana Idia Haginia?
3, 4. Tura namodia be dahaka latanai edia hebamo karana idia haginia?
3 Iehova ita lalokau henia neganai, iseda tura heheni karana ia goada. King Solomona ia gwau: “Tau tamona be tau ta ese do ia halusia diba, to tau rua ese unai heatu tauna idia koua diba. Varo toi dekena amo idia hatua varona be do idia makohia haraga lasi.” (Had. 4:12) Bema hetura karana lalonai Iehova be unai varo ihatoina, unai hebamo karana do ia noho daudau.
4 Momokani, Iehova idia lalokau henia lasi taudia be tura namodia idia davaria danu. To, bema turadia ta ta be Dirava idia lalokau henia, vadaeni edia hetura karana be gau ta ese ia hadikaia diba lasi. Bema tura korikoridia huanai hekwakwanai idia vara, Iehova ia moalelaia dalanai unai hekwakwanai idia hamaoromaoroa. Dirava inai henia taudia ese Keristani taudia edia hetura karana idia ura hadikaia neganai, idia kwalimu lasi. Idaunega amo ema bona hari, Iehova ena hesiai taudia be sibona edia mauri idia henia ta ta idia durua totona.—1 Ioane 3:16 duahia.
5. Dahaka dainai Ruta bona Naomi edia hetura karana be ia goada?
5 Ita diba momokani, Iehova idia lalokau henia taudia ita tura henidia neganai, moale korikori do ita davaria. Mani, Ruta bona Naomi edia sivarai oi laloa. Baibel lalonai unai hahine rua edia hetura karana be haheitalai namona. Dahaka dainai edia hetura karana be ia goada? Ruta ena hereva Naomi dekenai ese unai ia hahedinaraia, ia gwau: “Oiemu bese be lauegu bese do idia lao, bona oiemu Dirava be lauegu Dirava do ia lao. . . . Gau ta lasi ese ita do ia hapararaia. Mase sibona ese ita do ia hapararaia. Lau hereva momokani, bema inai mauri lalonai oi lau rakatania neganai, Dirava ese egu dika davana bada lau dekenai do ia henia, bona do ia hametaua danu.” (Ruta 1:16, 17) Ia hedinarai goevagoeva, Ruta bona Naomi be Dirava idia lalokau henia bada bona unai lalokau ese ta ta idia kara henia dalana ia biagua. Unai dainai, Iehova ese unai hahine rua ia hanamoa.
Tura Namodia Oi Davaria Dalana
6-8. (a) Dahaka ita karaia be namo, iseda hetura karadia idia noho daudau totona? (b) Edena dala ai ma haida oi tura henia diba?
6 Ruta bona Naomi edia haheitalai ese ia hahedinaraia, tura namodia be idia vara kava lasi. Idia ta ta ese Iehova idia lalokau henia be gau badana. To, namona be ita gaukara goada bona sibona eda ura ita dadaraia, unai amo iseda hetura karana do ia noho daudau. Iehova idia tomadiho henia ruma bese lalodiai, namona be natudia idia tura heheni namonamo be gau badana. Edena dala ai tura namodia oi davaria diba?
7 Oi ese kara ta oi karaia. Aposetolo Paulo ese Roma kongrigeisen ai ena turadia ia hagoadaia, namona be edia ruma dekenai taunimanima “do idia abidia dae.” (Roma 12:13) Unai dainai tura namodia ita davaria totona, namona be ma haida dekenai heabidae karana ita hahedinaraia. Ma ta ese oi totona heabidae karana do ia karaia lasi. (Aonega Herevadia 3:27 duahia.) Ta oi tura henia dalana ma ta be, kongrigeisen ai idia noho tadikaka taihu idauidau oi boiria emu ruma dekenai umui aniani hebou totona. Namona be emu tadikaka taihu dekenai hanaihanai heabidae karana oi hahedinaraia, ani?
8 Ta oi tura henia dalana ma ta be, haroro gaukara ai tadikaka taihu idauidau ida oi gaukara hebou. Haroro gaukara ai emu turana ese ruma tauna dekenai ena lalokau Iehova totona ia gwauraia hedinarai oi kamonai neganai, unai ese emui hetura karana do ia hagoadaia.
9, 10. Paulo be dahaka haheitalai namona ia hahedinaraia, bona edena dala ai ita tohotohoa diba?
9 Tadikaka taihu ma haida oi tura henia. (2 Korinto 6:12, 13 duahia.) Oi mamia kongrigeisen lalonai oi be turana ta oi davaria diba lasi, a? Bema unai bamona oi laloa, reana oi be haida sibona oi tura henia, to ma haida oi dadaraia, a? Aposetolo Paulo be tadikaka taihu ma haida tura henia karana dekenai haheitalai namona ia hahedinaraia. Guna, ia laloa ia ese Iuda lasi taudia do ia tura henia lasi. To gabeai, ia be ‘Iuda lasi taudia totona aposetolo gaukara ia karaia.’—Roma 11:13.
10 Ma danu, Paulo be ena uru taudia sibona ia tura henidia lasi. Hegeregere, ena be ia bona Timoteo edia mauri lagani be idauidau, to idia ruaosi be tura namodia ai idia lao. Hari inai negai, kongrigeisen lalonai matamata taudia momo be buruka taudia idia tura henia dainai idia moale. Vanessa, ena mauri lagani be 20 kekenina, ia gwau, “Lau be mai egu tura namona ta, ena mauri lagani be 50 bamona. Bona lau ese ia dekenai gau idauidau lau herevalaia diba. Bona ia be lau ia laloa bada.” Unai bamona hetura karadia be edena bamona idia vara? Vanessa ia gwau: “Lau hekwarahi unai bamona hebamo karana lau davaria totona.” Oi be emu uru taudia sibona lasi, to oi ura ma haida oi tura henia danu, a? Unai bamona oi karaia neganai, Iehova ese oi do ia hanamoa.
11. Ionatana bona Davida edia haheitalai amo dahaka ita dibaia?
11 Nega ibounai emu turana oi durua. Solomona ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” (Aon. 17:17) Solomona ese unai hereva ia torea neganai, reana ia be ena tamana Davida bona Ionatana huanai ia noho hetura karana ia laloa. (1 Sam. 18:1) King Saulo ia ura ena natuna Ionatana be Israela ena lohia dagina do ia abia. To, Ionatana ia diba Iehova ese Davida ia abia hidi king ai do ia lao totona. Saulo be Davida dekenai ia mama, to Ionatana be unai bamona ia karaia lasi. Israela taudia be Davida ena ladana idia abia isi neganai Ionatana ia mama lasi, bona Saulo ese Davida ena ladana ia hadikaia neganai, Ionatana be unai hereva ia abia dae lasi. (1 Sam. 20:24-34) Ita be Ionatana bamona, a? Eda turana be hahenamo ta ia abia neganai, ia dainai ita moale, a? Lalometau o hisihisi ia davaria neganai, ita hagoadaia bona durua, a? Haida ese eda turana idia udu maurilaia neganai, unai ita abia dae haraga, a? O Ionatana hegeregerena, iseda turana ita durua?
Eda Turana Bamoa Karana Ita Hadokoa Negana
12-14. Baibel stiuden be edena bamona hekwakwanai idia davaria, bona edena dala ai ita durudia diba?
12 Baibel stiuden ta be ena mauri lalonai kara haida ia haidaua gwauraia neganai, do ia hekwarahi bada ena tura gunadia ia rakatania totona. Reana, iena turadia be Baibel ena kara maoromaoro taravatudia idia badinaia lasi. Guna, ena nega bada be unai turadia ia bamoa. To, hari ia itaia unai turadia edia kara dikadia ese iena kara namodia idia hadikaia diba, unai dainai ia ura lasi idia do ia bamoa momo. (1 Kor. 15:33) To, idia ia bamoa momo lasi neganai, ia mamia ia be ena turadia ia durua lasi.
13 Bema oi be Baibel stiuden ta, bona unai hekwakwanai oi davaria, namona be oi laloatao emu tura korikorina be mai moale ida oi do ia durua emu mauri oi hanamoa totona. Bona, reana do ia ura oi ia bamoa Iehova umui dibaia totona. To, tura koikoidia be ‘idia edia kara dekena amo oi raka siri’ dainai, oi “idia hereva dika henia noho.” (1 Pet. 4:3, 4) Momokani, unai bamona turadia ese oi idia durua lasi.
14 Baibel stiuden taudia be edia tura gunadia—Dirava idia lalokau henia lasi taudia unai—idia rakatania neganai, kongrigeisen tadikaka taihu ese idia tura henidia be namo. (Gal. 6:10) Emu kongrigeisen dekenai unai bamona Baibel stiuden haida oi diba, a? Nega haida oi ese idia oi bamoa oi durudia totona, a?
15, 16. (a) Bema iseda turana ta be Iehova tomadiho henia karana ia rakatania, dahaka do ita karaia? (b) Edena dala ai ita hahedinaraia Dirava ita lalokau henia?
15 To, bema kongrigeisen ai emu tura namona ta be Iehova ena taravatu ia dadaraia bona kongrigeisen amo idia atoa siri, emu hemami be edena bamona? Unai bamona negadiai, do oi lalohisihisi bada. Taihu ta ena tura namona ta be Iehova tomadiho henia karana ia rakatania neganai, unai taihu ia gwau: “Lau lalohisihisi bada. Lau laloa egu turana be hereva momokani lalonai ia gini goada, to lasi. Lau laloa reana ia ura ena ruma bese ia hamoalea sibona dainai Iehova ia tomadiho henia. Gabeai, lau danu be egu lalona lau tahua namonamo. Lau be badina maorona dainai Iehova lau tomadiho henia, eiava?” Dahaka ese unai taihu ia durua? Ia gwau, “Egu lalohisihisi be Iehova dekenai lau gwauraia hedinarai. Lau ura hahedinaraia lau be Iehova lau tomadiho henia badina Ia lau lalokau henia, bona orea lalonai tura namodia sibona lau davaria dainai unai lau karaia lasi.”
16 Bema ita be tanobada idia tura henia taudia ita bamoa, vadaeni ita be Dirava ena turana lasi. Hahediba tauna Iamesi ia gwau: “Umui diba lasi, a, bema umui ura tanobada danu umui turana karaia neganai, inai be umui ese Dirava umui tuari henia noho?” (Iam. 4:4) Bema iseda turana namona ta be unai bamona ita haboioa, Iehova do ita abidadama henia noho badina Ia ita lalokau henia bona Ia ese ita do ia durua. (Salamo 31:23 duahia.) Ataiai ita herevalaia taihu ia gwau: “Lau laloparara ta ita doria diba lasi Iehova ia lalokau henia o ita ia lalokau henia totona. Unai abia hidi be ia sibona ese do ia karaia.” To, kongrigeisen lalonai tadikaka taihu ida eda hetura karana be edena bamona ita hagoadaia diba?
Hetura Karadia Hagoadaia
17. Tura namodia be edena bamona idia herevahereva hebou be namo?
17 Herevahereva namonamo karana ese hetura karana ia hagoadaia. Baibel ai Ruta bona Naomi, Davida bona Ionatana, bona Paulo bona Timoteo edia sivarai oi duahia neganai, do oi itaia tura namodia be mai hemataurai ida idia herevahereva hebou. Ma haida ita hereva henia dalana dekenai, Paulo ia gwau: “Nega ibounai mai laloa namona bona mai gado namo do umui hereva.” Paulo ia hahedinaraia ‘abidadama lasi taudia’ o murimuri taudia be unai bamona do ita hereva henia. (Kol. 4:5, 6) Momokani, bema murimuri taudia be unai bamona ita hereva henidia, vadaeni kongrigeisen tadikaka taihu dekenai unai bamona ita karaia danu be namo!
18, 19. Keristani turana ta ese ita ia sisiba henia neganai, edena bamona ita laloa? Bona Efeso elda taudia be dahaka haheitalai namona idia hahedinaraia?
18 Tura namodia be ta ta edia lalohadai idia laloa bada dainai, mai momokani bona mai gado namo ida idia herevahereva hebou be namo. Aonega tauna King Solomona ia gwau: “Dehoro bona bonana namo muramura ese, taunimanima edia kudouna idia hamoalea noho. Unai bamona danu tau ta ena hereva namona ese, iena turana ia hamoalea noho.” (Aon. 27:9) Emu turana amo oi abia sisiba be edena bamona oi laloa? (Salamo 141:5 duahia.) Bema emu turana ese oi ia hamaoroa, oi abia hidi karana ta ia moalelaia lasi, emu hemami be edena bamona? Oi laloa ia be unai bamona ia hereva badina oi ia laloa bada, eiava oi be iena hereva dainai do oi badu?
19 Aposetolo Paulo be Efeso kongrigeisen ena elda taudia ia tura henia namonamo. Unai taudia haida be Keristani taudia ai idia lao matamaia neganai, idia ia diba. Idia ida hebou ginigabena ia karaia neganai, idia ia sisiba henia. Idia be dahaka idia karaia? Paulo ena turadia be idia badu lasi. To idia laloparara ia be idia ia laloa bada, bona do idia itaia lou lasi dainai idia tai.—Kara 20:17, 29, 30, 36-38.
20. Tura namona be dahaka do ia karaia?
20 Tura namodia be sisiba idia abia dae sibona lasi, to sisiba idia henia danu. To, do ita naria namonamo, “ma haida edia mauri ai idia vara gaudia lalonai do [ita] vareai lasi.” (1 Tes. 4:11, NW ) Bona namona be ita laloparara “ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.” (Roma 14:12) To nega haida, tura namona be mai manau ida iena turana do ia sisiba henia Iehova ena taravatu ia laloatao totona. (1 Kor. 7:39) Hegeregere, dahaka do oi karaia, bema oi itaia headava lasi Keristani turana ta be murimuri tauna o hahinena ta ia tura henia? Oi ura lasi emui hetura karana ia dika dainai, do oi sisiba henia lasi, a? Bema emu turana ese emu sisiba ia dadaraia neganai, dahaka do oi karaia? Tura namona be elda taudia do ia hereva henia, bona elda taudia ese dala kererena ia badinaia turana do idia durua. Unai bamona oi karaia totona, lalogoada karana be gau badana. Bema emui hetura karana be Iehova lalokau henia karana latanai umui haginia, gau ta ese do ia hadikaia lasi.
21. Nega haida dahaka do ia vara, to dahaka dainai kongrigeisen ai hetura karadia ita hagoadaia be mai anina bada?
21 Kolose 3:13, 14 duahia. Nega haida, iseda kara o hereva dainai eda turana ese ita do “ia maumauraia,” bona ia karaia kara ta o gwauraia herevana ta ese ita do ia habadua danu. Iamesi ia gwau: “Ita ibounai ese nega momo kerere ita karaia.” (Iam. 3:2) Hetura karana lalonai, herevana nega hida turana ta be ita ia kara dika henia, to gau badana be iena kara dika do ita gwauatao momokani. Unai amo ita hahedinaraia ita be tura korikorina ta. Momokani, hetura karadia idia goada totona, ita herevahereva namonamo bona dika ita gwauatao heheni be mai anina bada! Bema unai bamona lalokau ita hahedinaraia, vadaeni ‘do ita noho hebou namo herea, mai laloa tamona danu.’
Edena Bamona Do Oi Haere?
• Edena dala ai tura namodia ita davaria diba?
• Edena negai iseda turana bamoa karana do ita hadokoa?
• Edena dala ai iseda hetura karadia ita hagoadaia diba?
[Study Questions]
[Picture on page 18]
Ruta bona Naomi edia hetura karana be dahaka latanai idia haginia?
[Picture on page 19]
Oi be hanaihanai ma haida dekenai heabidae karana oi hahedinaraia, a?