Oi be Nega Oi Atoa Baibel Oi Stadilaia Totona, A?

LAGANI 2008 ai, Hakaua Oreana be ita idia hadibaia kongrigeisen hebou karaia dalana idia haidaua, unai amo nega bada ia noho ruma bese be Baibel idia stadilaia bona herevalaia hebou totona. Bema oi be ruma bese kwarana ta, namona be hanaihanai emu adavana bona natuna ida Ruma Bese Ena Tomadiho umui karaia, bona idia do ia durua gaudia umui herevalaia. Natuna lasi headava taudia be do idia ura unai nega idia gaukaralaia Baibel idia stadilaia hebou totona. Headava lasi tadikaka bona taihu, ruma bese ena maduna idia huaia lasi taudia unai, be unai nega idia gaukaralaia namonamo diba Baibel idia stadilaia totona.

Momo be Ruma Bese Ena Tomadiho negana karaia dalana dainai edia tanikiu karana idia hahedinaraia. Hegeregere, elda tauna ta, Kevin ia gwau: “Kongrigeisen lalonai ai noho taudia ibounai ai moale dainai, ‘tanikiu’ hereva ai gwauraia be hegeregere lasi. Ai elda taudia ai herevahereva hebou, Hakaua Oreana ese idia gwauraia dalana hegeregerena ai unai nega do ai gaukaralaia emai ruma bese ida ai stadi totona.”

Jodi, ena adavana be elda tauna ta, ia gwau: “Emai natudia kekeni be toi, edia mauri lagani be 15, 11, bona 2. Vanegai sibona ai be saini gado kongrigeisen ta dekenai ai hanaia. Ai be nega bada ai atoa bona ai hekwarahi hebou iboudiai ai hegaegaelaia totona. To hari, kongrigeisen hebou karaia dalana idia haidaua dainai, nega bada ia noho emai ruma bese ena tomadiho ai karaia totona!”

Regula painia gaukara idia karaia headava taudia, John bona JoAnn idia gwau: “Kongrigeisen ena gaukara idauidau ai karaia dainai, emai ruma bese Baibel stadi be nega ta ta sibona ai karaia. To inai dala matamatana be Iehova ena harihari gauna dainai, bema unai nega ai gaukaralaia namonamo, unai ese ai do ia hagoadaia bada.”

Tony, headava lasi tadikaka ta bona ena mauri lagani be 20 bamona, be nega ia atoa Tuesday hanuaboi ibounai sibona ena stadi ia karaia totona. To wiki lalonai dina ma ta ia abia hidi kongrigeisen heboudia ia hegaegaelaia totona. Tony ia gwau, “Lau ura bada Tuesday ia mai haraga.” Dahaka dainai? Ia gwau: “Badina unai nega be Iehova totona lau atoa. Hora rua lalonai, lau be egu hetura karana Iehova ida ia hagoadaia ena kahana haida lau stadilaia. Stadi totona nega bada lau atoa bona unai ese dala ia kehoa lau duahia Baibel siridia lau laloa dobu totona.” Dahaka namo ia davaria? “Iehova ena sisiba lau lalopararalaia momokani, guna bamona lasi.” Ia ese haheitalai ta ia gwauraia: “Insight bukana lalonai, lau ese Davida bona Ionatana edia hetura karana ena sivarai lau duahia neganai, Ionatana ena kara amo gau momo lau dibaia, hegeregere ia be sibona ena ura ia dadaraia. Iena haheitalai ese lau ia durua turana korikori ena anina lau lalopararalaia namonamo totona. Tuesday hanuaboi ibounai lau ura bada unai bamona gau namodia momo lau dibaia!”

Oibe, bema Iehova ena hesiai taudia ibounai ese hari edia nega idia gaukaralaia namonamo mai anina bada Baibel stadi bona ruma bese ena tomadiho idia karaia, namo bada do idia davaria.