“Umui be Lauegu Turadia”
“Umui be Lauegu Turadia”
“Bema umui dekenai lau gwauraia taravatu umui badinaia, umui be lauegu turadia.”—IOA. 15:14, NW.
1, 2. (a) Iesu be edena bamona taudia ia tura henidia? (b) Dahaka dainai Iesu ita tura henia be mai anina bada?
IESU ida atai daiutuna ai idia helai taudia edia mauri dalana, edia diba bona edia gaukara be idauidau. Petero bona Andrea be guna haoda taudia. Mataio be guna takisi moni gogoa tauna ta—Iuda taudia ese idia ura henia lasi gaukarana unai. Idia haida, hegeregere Iamesi bona Ioane be idia maragi negana amo Iesu idia diba. Ma haida, hegeregere Natanaela be lagani haida sibona Iesu ia bamoa. (Ioa. 1:43-50) To, Ierusalema ai Pasova hanuaboina totona idia hebou neganai, idia diba momokani Iesu—mauri Diravana ena Natuna unai—be gwauhamata Mesiana. (Ioa. 6:68, 69) Idia mamia Iesu be idia ia lalokau henia, badina ia hamaorodia: “Umui be lauegu turana do lau gwauraia, badina be lauegu Tamana dekena amo lau kamonai herevadia ibounai umui dekenai lau hamaoroa vadaeni.”—Ioa. 15:15.
2 Iesu ese aposetolo taudia dekenai unai hereva ia gwauraia be mai anina bada horoa taudia dekenai bona “mamoe idaudia” dekenai danu. (Ioa. 10:16) Herevana eda mauri daladia, eda diba eiava eda gaukara be idauidau, to ita be Iesu ena turadia ai ita lao diba. Iesu ena turana ai ita lao be mai anina bada, badina unai dala amo ita be Iehova ita tura henia danu. Oibe, Iehova kahirakahira ita lao totona, Keriso kahirakahira do ita lao guna be namo. (Ioane 14:6, 21 duahia.) Vadaeni, Iesu ita tura henia totona, dahaka ita karaia be namo? Unai ita do herevalaia lasi neganai, namona be do ita tahua edena dala ai Iesu be tura namona ta. Bona danu edena dala ai ena hahediba taudia ese idia kara henia bona edia haheitalai amo gau haida do ita dibaia.
Iesu be Tura Namona Ta
3. Iesu be edena bamona taudia ia tura henia?
3 Aonega tauna King Solomona ia gwau: “Kohu momo tauna ena turana be momo herea.” (Aon. 14:20) Unai siri ese goevadae lasi taudia edia lalohadai ia hahedinaraia: Idia ura idia dekenai kohu momo do ia henia tauna idia tura henia, to idia ese ma haida dekenai gau ta idia henia karana idia laloa lasi. Iesu be unai bamona lasi. Ia be ta ena moni eiava ladana bada dainai ia tura henia lasi. Momokani, Iesu be kohu momo tau matamata ta ia ura henia bona ia boiria iena murinai ia raka totona. To, Iesu ese ia hamaoroa iena kohu do ia hoihoilaia bona ogogami taudia ia henia. (Mar. 10:17-22; Luka 18:18, 23) Iesu be kohu momo bona ladana bada taudia ia tura henia lasi, to ogogami bona taunimanima ese idia ura henia lasi taudia ia tura henia.—Mat. 11:19.
4. Iesu ena turadia be mai edia kerere, a?
4 Momokani, Iesu ena turadia be mai edia kerere danu. Nega haida Petero ena lalohadai be Dirava ena lalohadai hegeregerena lasi. (Mat. 16:21-23) Iamesi bona Ioane be hekokoroku taudia, badina Basileia lalonai dagi idia abia totona Iesu dekenai idia noinoi. Edia kara dainai aposetolo taudia ma haida idia badu, bona nega momo daika do ia bada idia hepapahuahulaia. To, Iesu be mai haheauka ida ena turadia edia lalohadai kereredia ia hamaoromaoroa bona ia badu haraga lasi.—Mat. 20:20-28.
5, 6. (a) Dahaka dainai Iesu be ena aposetolo taudia ia tura henia noho? (b) Dahaka dainai Iesu ese ena hetura karana Iuda ida ia hadokoa?
5 Iesu be unai goevadae lasi taudia edia kara dika ia itaia lasi dainai ia tura henidia, a? Lasi, ena be idia be goevadae lasi, to Iesu ese edia kara namo sibona ia laloa bada. Hegeregere, Iesu ena hanuaboi ginigabena ai ia lalohisihisi bada neganai, Petero, Iamesi, bona Ioane be Iesu idia hagoadaia lasi to idia mahuta. Ena be idia dekenai ia lalohisihisi, to ia laloparara edia matana ia mahuta, unai dainai ia hamaorodia: “Emui lauma be ia ura, to emui tauanina be ia manoka vadaeni.”—Mat. 26:41.
6 To, Iesu ese ena hetura karana Iuda Iskariote ida ia hadokoa. Ena be matamanai Iuda be tura namona ena toana ia hahedinaraia, to Iesu ese ia itaia ena kudouna be ia dika ia lao. Iuda be tanobada ia tura henia dainai, ia sibona be Dirava inai henia tauna ai ia lao. (Iam. 4:4) Unai dainai, Iesu ese Iuda ia siaia lao murinai, ena aposetolo taudia 11 dekenai ia hahedinaraia idia be iena tura korikoridia.—Ioa. 13:21-35.
7, 8. Edena dala ai Iesu ia hahedinaraia ena turadia ia lalokau henia?
7 Iesu be ena tura namodia edia kerere gunadia ia laloa lasi, to kara haida ia karaia idia ia durua totona. Hegeregere, ena Tamana ia guriguri henia, hahetoho negadia ai idia do ia durua totona. (Ioane 17:11 duahia.) Iesu ia laloparara ena hahediba taudia be do idia aniani bona laga-ani be namo. (Mar. 6:30-32) Bona idia dekenai ena lalohadai sibona ia gwauraia lasi, to edia lalohadai bona hemami idia gwauraia neganai ia kamonai danu.—Mat. 16:13-16; 17:24-26.
8 Iesu ia mauri noho lalonai ena turadia ia durua bona ia mase neganai idia dekenai hahenamo ia mailaia danu. Momokani, ia diba iena Tamana ena taravatu maoromaorona ia hagugurua totona, ena mauri be boubou gauna bamona do ia henia. (Mat. 26:27, 28; Heb. 9:22, 28) To Iesu be ena lalokau ia hahedinaraia totona, unai ia karaia. Ia gwau: “Lalokau namo herea momokani be inai, tau ta ese ena mauri do ia atoa diho, iena turana totona.”—Ioa. 15:13.
Iesu ese Hahediba Taudia Ia Tura Henia Namonamo Dainai, Dahaka Idia Karaia?
9, 10. Iesu ena hariharibada karana dainai taunimanima be dahaka idia karaia?
9 Iesu be ena nega bona ena kohu ia gaukaralaia ma haida ia durua totona. Unai dainai, taunimanima be ia idia ura henia bona mai moale ida ia idia durua danu. (Luka 8:1-3) Iesu be sibona ena mauri lalonai ia davaria gaudia dainai, ia gwau: “Henia kara do umui manadalaia, vadaeni taunimanima ese umui dekenai do idia henia. Emui rami do idia hahonua, do idia pataia diho, bona do idia hamarerea, bona do idia hahonua noho ela bona do ia bubua. Badina ma haida dekenai umui henia sikele hegeregerena, umui dekenai unai bamona sikele do idia henia.”—Luka 6:38, NW.
10 Momokani haida be idia ura Iesu amo gau haida idia abia dainai, ia idia bamoa. To, unai tura koikoidia be Iesu ena hereva ta idia lalopararalaia lasi neganai, ia idia rakatania. Ena be ia gwauraia herevadia idia lalopararalaia lasi, to gau badana be ia idia abidadama henia bona lalohadai kereredia do idia dadaraia. To, aposetolo taudia be Iesu idia badinaia noho. Keriso ida idia hetura lalonai nega momo hahetoho idia davaria, to idia hekwarahi nega namodia bona nega dikadia ai Iesu idia badinaia noho. (Ioane 6:26, 56, 60, 66-68 duahia.) Iesu ena hanuaboi ginigabena ai, ia hahedinaraia edia hetura karana ia laloa bada, ia gwau: “Metau bona dibagani be lau dekenai idia ginidae negadia lalonai, umui ese lau umui badinaia noho, lau umui rakatania lasi.”—Luka 22:28.
11, 12. Edena dala ai Iesu ia hahedinaraia ena hahediba taudia ia laloa bada, bona idia be dahaka idia karaia?
11 Iesu be ena aposetolo taudia edia badinaia karana dainai ia hanamodia murinai, idia ese ia idia rakatania. Idia be taunimanima idia gari henia bada dainai, unai bamona idia karaia. To Iesu ese edia kerere ia gwauatao. Ia mase bena ia toreisi lou murinai, idia dekenai ia hedinarai bona ia hahedinaraia ia be edia tura korikorina. Danu, ia ese idia dekenai gaukara helagana ta ia henia—“bese ibounai” be diba tahua taudia ai idia halaoa bona “tanobada ena kahana ibounai” dekenai haroro gaukara do idia karaia. (Mat. 28:19; Kara 1:8) Hahediba taudia be dahaka idia karaia?
12 Hahediba taudia be mai edia lalona ibounai ida Basileia sivaraina be gabu ibounai dekenai idia harorolaia. Iehova ena lauma helaga ena heduru dainai, edia hadibaia hereva be Ierusalema ena gabu ibounai dekenai ia lao. (Kara 5:27-29) Ena be haida idia gwau do idia hamasedia, to unai ese idia ia koua lasi Iesu ena oda herevana, hahediba taudia halaoa gaukarana idia karaia totona. Iesu ena hahegani idia abia bona lagani haida murinai, aposetolo Paulo ia gwau sivarai namona be “tanobada ibounai dekenai ai harorolaia vadaeni.” (Kol. 1:23) Oibe, unai hahediba taudia idia hamomokania edia hebamo karana Iesu ida idia laloa bada!
13. Iesu ena hahediba herevadia idia abia dae taudia be dahaka idia karaia?
13 Iesu ena hahediba herevadia idia abia dae taudia be edia mauri idia haidaua danu. Idia momo be idia manadalaia kara bona lalohadai do idia haidaua. Hahediba taudia matamatadia haida be guna idia heudahanai, idia inuinu kekero, idia henaohenao bona tatau be tatau danu matabodaga karadia idia karaia. (1 Kor. 6:9-11) Ma haida be idau bese taudia dekenai edia lalohadai o kara do idia haidaua. (Kara 10:25-28) To, idia be Iesu idia kamonai henia dainai, edia mauri gunana idia rakatania bona mauri matamatana idia badinaia. (Efe. 4:20-24) Idia be “Keriso ena laloa” idia diba dainai, iena kara bona lalohadai idia lalopararalaia bona ia idia tohotohoa.—1 Kor. 2:16.
Keriso Tura Henia Karana
14. Iesu ia gwauhamata “tanobada dokona” negana ai, dahaka do ia karaia?
14 Keristani taudia ginigunadia momo be Iesu idia diba namonamo eiava ia toreisi lou murinai idia itaia. Ita dekenai unai ia vara lasi. To, edena dala ai ita be Keriso ena turana ai ita lao diba? Dala ta be, Iesu ena horoa tadikaka, tanobada ai idia do noho hesiai tauna mai ena kamonai bona mai ena kara maoromaoro oreana ena hakaua herevadia do ita badinaia. Iesu ia gwauhamata “tanobada dokona” negana ai, ia ese unai hesiai tauna oreana do ia abia hidi “iena kohu ibounai naria” totona. (Mat. 24:3, 45-47) Hari inai negai, Keriso idia tura henia taudia momo be hesiai tauna oreana lalonai idia noho lasi. Edena dala ai hesiai tauna oreana amo idia abia hakaua daladia ese edia hetura karana Keriso ida ia hanamoa diba?
15. Dahaka ese ia hahedinaraia Iesu ese tau ta be mamoe o nanigosi bamona do ia hahemaoro henia?
15 Mataio 25:31-40 duahia. Iesu be unai hesiai tauna mai ena kamonai oreana ia gwauraia iena tadikaka. Mamoe bona nanigosi hapararaia haheitalaina lalonai, Iesu ia gwau iena horoa tadikakana ita kara henia be ia ita kara henia bamona. Ma ia gwau taunimanima ese iena “tadikakana ogogami herea” idia kara henia dalana amo do ia hahemaoro henidia daika be mamoe bona daika be nanigosi. Unai dainai, tanobada helarona idia abia taudia be hesiai tauna oreana ida idia gaukara hebou dalana amo, idia hahedinaraia idia be Keriso idia tura henia.
16, 17. Edena dala ai ita hahedinaraia ita be Keriso ena tadikaka ita tura henidia?
16 Bema oi ura tanobada ai Dirava ena Basileia henunai oi noho, edena dala ai oi hahedinaraia oi be Keriso ena tadikaka oi tura henidia? Mani inai dala toi ita laloa. Ginigunana be: Mai emu kudouna ibounai ida haroro gaukara oi karaia. Keriso be ena tadikaka ia hamaoroa tanobada ibounai dekenai sivarai namona idia harorolaia totona. (Mat. 24:14) To Keriso ena tadikaka oredia ese unai gaukara idia karaia diba lasi, unai dainai mamoe idaudia ese idia durudia. Oibe, nega ibounai mamoe idaudia be haroro gaukara idia karaia neganai, Keriso ena tadikaka idia durua edia hesiai gaukara helagana idia hagugurua totona. Keriso bona hesiai tauna oreana ese unai hetura karana namona idia moalelaia.
17 Mamoe idaudia ese Keriso ena tadikaka idia durua dala iharuana be: Edia kohu o moni idia gaukaralaia haroro gaukarana idia durua totona. Iesu ese ena murinai idia raka taudia ia hagoadaia “kara maoromaoro lasi taga amo” ma haida idia tura henia be namo. (Luka 16:9, NW ) Unai ese ia hahedinaraia lasi, iseda hetura karana Iesu o Iehova ida be kohu amo ita hoia. To, anina be eda kohu ita gaukaralaia Basileia gaukaradia ita durua neganai, ita hahedinaraia eda hetura karana bona lalokau be “mai kara, bona mai momokani danu.” (1 Ioa. 3:16-18) Hegeregere iseda moni ita gaukaralaia haroro gaukarana ita karaia, eda hebou gabudia ita hanamoa o haginia lou, bona tanobada hegegemadai haroro gaukarana ita durua totona. Ena be ita henia moni be bada o maragi, to mai moale ida ita henia harihari gauna be Iehova bona Iesu ese idia abia dae.—2 Kor. 9:7.
18. Dahaka dainai elda taudia edia hakaua herevadia ita badinaia be namo?
18 Ita hamomokania ita be Keriso ena turana ai ita lao dala ihatoina be: Elda taudia ese idia henia hakaua herevadia ita badinaia. Unai tatau be Dirava ena lauma helaga ese ia abia hidi, badina Keriso be kongrigeisen ena kwarana bona ia ese edia gaukara ia hakaua. (Efe. 5:23) Aposetolo Paulo ia gwau: “Umui idia hakaua taudia do umui kamonai henia, bona edia hereva do umui badinaia.” (Heb. 13:17) Nega haida, elda taudia ese idia henia Baibel ena hakaua herevadia ita badinaia be auka. Reana ita ese edia kerere ita diba dainai, idia henia sisiba ita laloa kerere. To, Keriso—kongrigeisen ena Kwarana—be mai ena ura ida unai goevadae lasi taudia ia gaukaralaia. Unai dainai, edia hakaua herevadia ita abia dae o lasi ese do ia hahedinaraia ita be Keriso ena turana o lasi. Bema elda taudia edia kerere ita laloa lasi bona mai moale ida edia hakaua herevadia ita badinaia, vadaeni ita hamomokania ita be Keriso ita lalokau henia.
Tura Namodia be Edeseniai Ita Davaria Diba?
19, 20. Kongrigeisen lalonai daidia idia noho, bona stadi iharuana ai dahaka do ita herevalaia?
19 Iesu be elda taudia sibona amo ita ia naria lasi, to kongrigeisen lalonai sina, tadikaka bona taihu ita davaria danu. (Mareko 10:29, 30 duahia.) Iehova ena orea oi bamoa matamaia neganai, emu varavara be dahaka idia karaia? Oi idia durua Dirava bona Keriso kahirakahira oi lao totona be namo. To Iesu ia gwau, nega haida “tau ta ena inai taudia be ena ruma bese taudia.” (Mat. 10:36, NW ) To ita moale badina kongrigeisen lalonai, ita davaria turana ena lalokau ese iseda ruma bese tauna korikorina ena lalokau ia hereaia!—Aon. 18:24.
20 Paulo ese Roma kongrigeisen dekenai ia torea revareva ena dokonai ia gwauraia hanamoa herevadia ese idia hahedinaraia ena turana be momo. (Roma 16:8-16) Aposetolo Ioane ena revareva ihatoina ena dokonai ia gwau: “Iseda turadia ta ta dekenai egu hanamoa herevana oi henia.” (3 Ioa. 14, NW ) Unai ese ia hahedinaraia ia danu be mai ena turana momo. Edena dala ai Iesu bona ena hahediba taudia edia haheitalai ita tohotohoa, bona kongrigeisen lalonai tadikaka taihu ida ita hetura namonamo diba? Stadi iharuana ese unai henanadai do ia haerelaia.
Edena Bamona Do Oi Haere?
• Edena dala ai Iesu ia hahedinaraia ia be tura namona ta?
• Iesu ena hetura karana dainai, hahediba taudia be edena bamona ia idia kara henia?
• Edena dala ai ita hamomokania ita be Keriso ena turadia?
[Study Questions]
[Picture on page 14]
Iesu be ena turadia edia lalohadai bona hemami idia gwauraia neganai, ia kamonai namonamo
[Pictures on page 16]
Edena dala ai ita hahedinaraia ita ura Keriso ita tura henia?