Dirava Ena Hesiai Taudia Be Hemataurai Karadia Idia Karaia

“Dirava ena kara bamona do umui karaia be namo.”​​—⁠EFE. 5:⁠1.

1, 2. (a) Dahaka dainai hemataurai karadia ita karaia be gau badana? (b) Dahaka be inai stadi dekenai do ita herevalaia?

BUKA torea hahine ta, Sue Fox, ese hemataurai karana be inai bamona ia herevalaia: “Hanaihanai hemataurai karadia ita hahedinaraia be namo. Gabu bona nega ibounai dekenai unai kara ita hahedinaraia neganai, anina namodia idia vara.” Taunimanima be unai kara idia manadalaia neganai, hekwakwanai badadia idia vara lasi o idia ore haraga. To bema haida ita matauraia lasi, nega momo hepapahuahu, badu, bona lalohisihisi idia vara.

² Keristani kongrigeisen lalonai idia noho taudia be hemataurai karadia idia karaia. To ita naria namonamo​—⁠namo lasi taunimanima momo ese hari idia karaia hemataurai lasi karadia ita tohotohoa. Namona be ita itaia edena dala ai Baibel ena hakaua herevadia​—⁠hemataurai ia kikilaia herevadia​—⁠ita badinaia neganai, unai ese ita do ia gimaia bona taunimanima do ia veria tomadiho momokani lalonai idia vareai  totona. Hemataurai karadia haida ita diba totona, namona be Iehova Dirava bona ena Natuna edia haheitalai ita herevalaia.

Iehova Bona Ena Natuna be Hemataurai Karadia Idia Haheitalaia

3. Iehova Dirava ese hemataurai karana be edena bamona ia hahedinaraia?

³ Iehova Dirava be hemataurai karadia ia haheitalaia namonamo. Ena be Iehova be guba bona tanobada edia King Badana, to taunimanima ia kara namo henia bona matauraia bada. Ia ese Aberahamo bona Mose ia hereva henia neganai, Heberu gado herevana ta idia hahanaia “pilisi” ia gaukaralaia. (Gen. 13:​14, NW; Eso. 4:⁠6, NW ) Iena hesiai taudia idia kerere neganai, Iehova be hebogahisi bona hariharibada ia hahedinaraia, iena ‘badu be haraga lasi, to ena lalokau bona maoromaoro be bada herea momokani.’ (Sal. 86:15) Taunimanima be edia ura gauna o karana be ma haida ese idia karaia lasi neganai, mai badu ida idia hereva badabada, to Iehova be unai bamona lasi.

4. Haida be ita idia hereva henia neganai, edena dala ai Iehova ita tohotohoa?

⁴ Dirava ese taunimanima ia kamonai henia dalana ese ia hahedinaraia, ia be ma haida ia matauraia. Aberahamo be Sodoma taudia totona henanadai ta ta ia henia neganai, Iehova be ia hesiku lasi to mai manau ida haere ia henia. (Gen. 18:​23-​32) Ia gwau lasi Ena nega be Aberahamo ese ia halusia kava. Iehova be ena hesiai taudia edia guriguri bona kara dika amo idia helalo-kerehai taudia edia taitai ia kamonai. (Salamo 51:​11, 17 duahia.) Namona be Iehova ita tohotohoa; haida ese ita idia hereva henia neganai ita kamonai.

5. Edena dala ai Iesu ena hemataurai karana ita tohotohoa karana ese iseda hetura karana ma haida ida ia hanamoa diba?

⁵ Iesu Keriso be ena Tamana amo hemataurai bona kara namodia momo ia dibaia. Ena be nega haida Iesu be ena haroro gaukara ai nega bona goada bada ia gaukaralaia, to nega ibounai ia hesiku lasi bona kara namodia ia karaia. Iesu ia ura bada lepera taudia, moni totona idia noinoi matakepulu taudia, bona ma haida ia durua. Haida be Iesu idia hadibaia guna lasi bena ia idia vadivadi henia sibona, to Iesu be idia ia lulua lasi. Nega momo ia karaia gauna ia rakatania, ia lalometau tauna ia durua totona. Iesu be ia idia abidadama henia taudia ia laloa bada momokani. (Mar. 5:​30-​34; Luka 18:​35-​41) Ita be Keristani taudia dainai, ma haida ita durua bona kara namo henia be namo, Iesu ia karaia bamona. Eda varavara, dekena taudia, bona ma haida be unai kara namodia idia itaia danu. Ma danu, unai bamona karadia ese Iehova ia hanamoa bona ita ia hamoalea.

6. Edena dala ai Iesu be ma haida tura henia karana ia hahedinaraia?

⁶ Iesu be taunimanima edia ladana ia gwauraia​—⁠unai be hemataurai karana ta danu. Iuda ena tomadiho gunalaia taudia be unai bamona idia karaia, a? Lasi. Idia laloa Taravatu idia diba lasi taudia be “Dirava dekena amo dika davana do idia davaria” bona idia kara namo henidia lasi. (Ioa. 7:​49) Dirava ena Natuna be taunimanima ibounai ia kara namo henia. Ia ese Mareta, Maria, Sakaio, bona ma haida edia ladana ia gwauraia. (Luka 10:​41, 42; 19:⁠5) Ena be hari hanua ena kastom ese taunimanima edia ladana ita gwauraia dalana idia biagua, to Iehova ena hesiai taudia idia gaukara goada ma haida idia tura henia totona. * Momokani, edia tadikaka bona ma haida dekenai hemataurai idia hahedinaraia, bona idia gwau lasi edia orea o bese ese ma ta ena ia hanaia.​​—⁠Iamesi 2:​1-4 duahia.

7. Edena dala ai Baibel ena hakaua herevadia ese ita idia durua taunimanima ibounai ita matauraia totona?

⁷ Dirava bona ena Natuna be taunimanima ibounai idia matauraia dainai, unai ese hereva momokani idia ura henia taudia edia lalona ia veria. Momokani, tano ta ta ai taunimanima edia lalohadai hemataurai karana dekenai be idauidau. Unai dainai, namo lasi kara haida dekenai taravatu aukadia ita atoa bena ita badinaia. Lasi, namona be Baibel ena hakaua herevadia ita badinaia dainai, taunimanima ibounai  ita matauraia. Namona be ita itaia edena dala ai haroro gaukara ai taunimanima ita matauraia neganai, unai ese anina namona ia havaraia diba.

Taunimanima Hanamoa Bona Hereva Henia

8, 9. (a) Edena bamona kara be maoro lasi? (b) Dahaka dainai ma haida ita kara henia neganai, Iesu ena hereva Mataio 5:​47 ai ita badinaia be namo?

⁸ Hari, gabu momo dekenai, taunimanima be idia haragaharaga momo dainai, ta ese ma ta ia rakaia hanai neganai, nega momo “daba namona” o “oi namo?” ia gwauraia lasi. Momokani, reana hutuma dainai haida sibona do ita hanamoa. To nega momo, ma haida ita hanamoa be maoro bona namo. Nega momo unai bamona hanamoa hereva oi gwauraia, a? Eiava nega momo ta oi rakaia hanai neganai, ia oi kiri henia lasi o hanamoa lasi, a? Ena be ta do ia laloa kerere lasi, to reana ia karaia karana be ma ta ese ia moalelaia lasi.

⁹ Iesu ese ita ia hadibaia herevana be inai: “Bema emui tadikaka sibona umui hanamodia, ena namo be dahaka? Bese idauidau taudia danu be unai bamona idia karaia noho, ani?” (Mat. 5:​47, NW ) Profesa ta ladana Donald Weiss ia gwau: “Taunimanima idia moale lasi bema ta ese idia ia laloa bada lasi o hereva henia lasi. Unai bamona ita karaia be maoro lasi. Taunimanima ita hanamoa. Idia ida ita herevahereva.” Bema eda vairana ia auka lasi o ma haida ita kara namo henia, unai ese anina namona do ia havaraia.

10. Edena dala ai hemataurai karana ese ita ia durua haroro gaukara ai anina namona ita havaraia totona? (“Kiri Bona Hamatamaia Hereva” mauana itaia.)

¹⁰ Tom bona Carol mani ita laloa​—⁠unai Keristani headava taudia be North America ena siti badana ta ai idia noho. Edia haroro gaukara ena kahana ta be, edia dekena taudia ida idia herevahereva. Edena bamona unai idia karaia? Tom be Iamesi 3:​18 ena hereva ia gwauraia: “Taunimanima ai tura henia bona maino ai karaia. Ruma murimuri ai idia helai taudia bona teritori ai idia gaukara taudia dekenai ai lao. Idia ai kiri henia bona hanamoa. Idia laloa bada gaudia ai herevalaia​​—⁠edia natudia, edia sisia, edia ruma bona edia moni gaukara. Gabeai, edia turana ai ai lao.” Carol ma ia gwau: “Gabeai, emai ladana ai gwauraia bona idia ai nanadaia edia ladana be daika. Aiemai gaukara ena badina ai gwauraia to ai hereva daudau lasi. Bena, unai ese dala ia kehoa idia ai haroro henia totona.” Unai dainai, dekena taudia momo be Tom bona Carol idia matauraia. Haida be Baibel idia herevalaia bukadia  bona magasin idia abia, to ma haida idia ura dikadika hereva momokani idia dibaia.

Hekwakwanai Negadiai Ita Hemataurai

11, 12. Dahaka dainai ita diba sivarai namona ita harorolaia neganai, haida be ita do idia dagedage henia? Edena bamona ita kara be namo?

¹¹ Nega haida, sivarai namona ita harorolaia neganai, haida be hemataurai lasi herevadia idia gwauraia. Ita diba unai do ia vara, badina Keriso Iesu be aposetolo taudia ia hadibaia: “Bema idia ese lau dekenai idia dagedage henia, umui dekenai danu do idia dagedage henia.” (Ioa. 15:20) To bema taunimanima edia hereva dikadia dainai ita danu be hereva dikadia ita gwauraia, unai ese namo ta do ia havaraia lasi. Vadaeni, dahaka ita karaia be namo? Petero ia gwau: “Emui kudouna dekenai Keriso do umui abia dae, do umui matauraia, bona ia tamona emui Lohiabada do umui halaoa. Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.” (1 Pet. 3:​15) Mai hemataurai bona manau ida ita haere neganai, reana ita idia hadikaia taudia be edia kara do idia haidaua.​​—⁠Tito 2:​7, 8.

¹² Taunimanima be hadikaia hereva idia gwauraia neganai, ita hegaegae diba Dirava ese ia moalelaia dalana dekenai ita haere totona, a? Oibe. Paulo ia gwau: “Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kol. 4:⁠6) Bema eda ruma bese, sikuli turadia, gaukara turadia, kongrigeisen taudia, bona dekena taudia matauraia karana ita manadalaia, ita hahedinaraia ita be Keristani taudia bona ita hegaegae ita idia kirikirilaia o hadikaia taudia ita haere henidia totona.​​—⁠Roma 12:​17-​21 duahia.

13. Ekspiriens ta amo oi hahedinaraia edena dala ai hemataurai karana ese dagedage taudia edia kara ia haidaua.

¹³ Hekwakwanai negadiai ita hemataurai neganai, unai ese namo ia havaraia. Haheitalai ta be inai: Japan ai, ruma tauna ta bona ena vadivadi turana be tadikaka ta idia hevasehalaia. To, tadikaka be mai hemataurai ida unai ruma ia rakatania. Teritori ai ia haroro noho lalonai, tadikaka ia itaia unai vadivadi tauna be ia gini noho bona tadikaka ia itaia noho. Tadikaka be ia dekenai ia raka lao neganai, unai tauna ia gwau: “Ia vara karana dainai lau ura oi lau sori henia. Ena be ai ese oi dekenai hemataurai lasi hereva ai  gwauraia, to lau itaia oi kiri sibona. Dahaka do lau karaia oi bamona lau karaia totona?” Unai tau be ena moni gaukara ia haboioa bona ena sinana be vanegai sibona ia mase dainai, ia laloa moale dalana ta be lasi. Tadikaka ese ia dekenai Baibel stadi ia herevalaia neganai ia abia dae. Hari, wiki ta ta lalonai ia be nega rua ena stadi ia karaia.

Ita Hemataurai Dala Namona Ta

14, 15. Baibel negadiai, edena dala ai Iehova ena hesiai taudia be edia natudia idia hadibaia?

¹⁴ Baibel negadiai, Dirava gari henia tama sina be edia natudia idia hadibaia edia ruma taudia idia matauraia totona. Aberahamo bona ena natuna Isako idia hemataurai heheni dalana be Genese 22:7 lalonai do oi duahia. Danu, Iosepa ena sivarai amo ita diba iena tama sina ese ia idia hadibaia namonamo. Dibura ruma ai, ia be mai hemataurai ida dibura taudia ma haida ia hereva henia. (Gen. 40:​8, 14) Farao ia haere henia dalana amo ia hahedinaraia, ia be ladana bada taudia hereva henia dala maorona ia dibaia.​​—⁠Gen. 41:​16, 33, 34.

¹⁵ Dirava be Israela taudia dekenai Taravatu Ten ia henia bona idia ta ia gwau: “Oiemu tamana bona sinana dekenai do oi matauraia. Unai dekena amo oiemu mauri nega do ia daudau, Lohiabada oiemu Dirava ese oi dekenai ia henia tano dekenai.” (Eso. 20:12) Natudia ese edia tama sina idia matauraia dalana ta be, ruma dekenai hemataurai karadia idia karaia be namo. Iepeta ena natuna kekeni be ena tamana ia matauraia dainai, ia ura tamana ena gwauhamata ia hamomokania, herevana unai be gwauhamata aukana.​​—⁠Gun. 11:​35-​40.

16-18. (a) Edena dala ai natudia dekenai hemataurai karana ita hadibaia diba? (b) Natudia dekenai hemataurai karana ita hadibaia ena namo haida be dahaka?

¹⁶ Eda natudia dekenai hemataurai karana ita hadibaia be gau badana. Namona be natudia idia diba edena dala ai vadivadi taudia idia hanamoa, telefon idia haerelaia, bona ma haida ida idia aniani hebou totona​—⁠natudia idia bada neganai unai bamona idia karaia diba. Namona be idia laloparara dahaka dainai iduara idia kehoa ma haida idia vareai totona, buruka bona gorere taudia idia hebogahisi henia totona, bona metau gaudia idia huaia taudia idia durua totona. Namona be idia laloparara inai hereva idia gwauraia be gau badana: “Pilisi,” “tanikiu,” “namo, gau ta lasi,” “ia namo oi lau durua?,” bona “sori.”

¹⁷ Natudia dekenai hemataurai dalana hadibaia be ia auka lasi. Dala namona be inai: Tama sina ese natudia dekenai haheitalai namona idia hahedinaraia. Kurt ena mauri lagani be 25 bona ena tadikaka toi ida hemataurai karana idia dibaia dalana be inai bamona ia kikilaia: “Ai itaia bona ai kamonai Tamagu bona Sinagu be hemataurai  dalanai idia hereva heheni, bona ma haida edia namo idia laloa bona idia hesiku haraga lasi. Kingdom Hall ai, hebou vairanai bona murinai, Tamagu ese lau ia hakaua lao tadikaka taihu burukadia ida ai herevahereva totona. Idia ia hanamoa dalana lau kamonai bona idia ia matauraia dalana lau itaia.” Kurt ma ia gwau: “Gabeai, ena kara lau tohotohoa. Taunimanima matauraia karana lau manadalaia. Unai be egu kara ta sibona lasi, to lau ura unai kara lau hahedinaraia.”

¹⁸ Dahaka do ia vara bema tama sina be natudia dekenai hemataurai karana idia hadibaia? Natudia be ma haida do idia tura henia bona maino do idia karaia. Danu, edia gaukara biagudia bona turadia ida do idia gaukara namonamo. Ma danu, natudia be kara namodia idia karaia o idia hemataurai neganai, tama sina idia moale.​​—⁠Aonega Herevadia 23:​24, 25 duahia.

Hemataurai Karadia Ita Karaia Dainai Ita be Idau

19, 20. Dahaka dainai ita gaukara goada eda Dirava bona ena Natuna edia kara namodia ita tohotohoa totona?

¹⁹ Paulo ia gwau: “Umui be Dirava ena natuna taudia, iena lalokau. Unai dainai, Dirava ena kara bamona do umui karaia be namo.” (Efe. 5:⁠1) Iehova Dirava bona ena Natuna edia kara ita tohotohoa totona, Baibel ena hakaua hereva, hegeregere hari stadi ai ita kikilaia gaudia ita badinaia be namo. Namo lasi hemataurai koikoina do ita hahedinaraia, dagi bada tauna ese ita ia ura henia o kohu momo ita abia totona.​​—⁠Iuda 16.

²⁰ Satani ena lohia dalana dikana be kahirakahira do ia ore dainai, ia gaukara goada hemataurai karana​—⁠Iehova ena kara​—⁠ia haorea totona. To, Satani be Keristani taudia momokanidia edia hemataurai karana ia haorea diba lasi. Namona be ita ta ta ita gaukara goada eda Dirava bona ena Natuna edia kara namona ita tohotohoa totona. Unai dala amo, eda hereva bona kara do idia idau momokani, kara namodia idia ura henia lasi taudia edia do ia hanaia. Unai ese eda hemataurai Diravana, Iehova, ladana do ia hanamoa bona kudou-maoro taudia do ia veria tomadiho momokani lalonai idia vareai totona.

[Footnote]

Oi Laloatao, A?

• Iehova bona ena Natuna edia hemataurai karana amo dahaka ita dibaia?

• Taunimanima ita hanamoa neganai, dahaka dainai unai amo ita hahedinaraia ita be Keristani taudia?

• Edena dala ai hemataurai karana ese haroro gaukara ai anina namona ia havaraia?

• Edena dala ai tama sina ese natudia dekenai hemataurai karana idia hadibaia diba?

[Study Questions]

[Box on page 27]

Kiri Bona Hamatamaia Hereva

Momo idia ura lasi idau taudia ida herevahereva idia hamatamaia. To, Iehova ena Witnes taudia be Dirava bona edia dekena taudia idia lalokau henia dainai, idia gaukara goada herevahereva dalana idia dibaia totona, unai amo ma haida dekenai Baibel ena hereva momokani idia harorolaia. Dahaka ese oi ia durua diba unai kahana oi hanamoa totona?

Filipi 2:4 ena hakaua herevana be mai anina bada, ia gwau: “Umui ese umui emui namo sibona do umui tahua lasi. Lasi, to umui ta ta ibounai ese haida edia namo do umui tahua, bona do umui durudia noho.” Unai hereva be inai bamona oi laloa diba: Bema tau ta be guna oi hedavari henia lasi, ia dekenai oi be idau tauna. To edena bamona oi durua oi ia tura henia totona? Ia oi kiri henia bona oi hanamoa. To, kara ma haida oi karaia be namo.

Reana oi ura herevahereva oi hamatamaia dainai, ta be gau ta ia laloa lalonai oi hereva. Bema oi ura emu lalohadai umui herevalaia hebou bona iena lalohadai oi laloa bada lasi, reana do ia ura lasi umui herevahereva. Unai dainai, bema ta ia laloa gauna oi dibaia, vadaeni unai gauna amo herevahereva oi hamatamaia. Iesu be ranu utua gabunai Samaria hahine ia davaria neganai, unai bamona ia kara. (Ioa. 4:​7-​26) Unai hahine ia laloa gauna be ranu do ia utua. Iesu ese herevahereva karana be unai gauna amo ia hamatamaia, bona unai murinai hereva namodia momo ia kikilaia.

[Pictures on page 26]

Hanamoa herevadia ese dala ia kehoa diba taunimanima ita haroro henia totona

[Picture on page 28]

Nega ibounai hemataurai karadia ita karaia be maoro