Duahia Taudia Edia Henanadai

Kongrigeisen heboudia o hebouhebou badadia ai tadikaka ese idia henia tok be taihu ta ese sain gado ai ia hahanaia neganai, ena kwarana ia koua be maoro, a?

Bema Keristani taihu ta be ena adavana o kongrigeisen ai tadikaka ta ese ia karaia gaukara ta ia karaia, ena kwarana ia koua be namo. Unai be Paulo ese ia torea hakaua hereva bamona, ia gwau “hahine ta bema mai kwara gauna lasi ese Dirava ia guriguri henia, o Dirava ena hereva ia harorolaia neganai, ia be iena kwarana, iena adavana ia hahemaraia,” badina “hahine edia kwarana be edia tau.” (1 Kor. 11:​3-​10) Unai bamona negadia ai taihu ta be dabua namona amo ena kwarana ia koua neganai, ia hahedinaraia ia be Keristani kongrigeisen ena tiokratik dalana ia matauraia.​​—⁠1 Tim. 2:​11, 12. *

To, bema tadikaka ta ese ia henia tok be taihu ta ese sain gado ai ia hahanaia be edena bamona? Momokani, unai taihu be helai taudia dekenai tadikaka ena hereva ia hahanaia sibona. Ia hadibaia herevadia be iena lasi to tadikaka ena. To, sain gado hahanaia gaukara bona taunimanima ese idia herevalaia gadona be gado ma ta ai hahanaia gaukarana be idau. Idia herevalaia gadona idia hahanaia neganai, helai taudia be hereva henia tadikaka idia raraia bona gado hahanaia tauna idia kamonai henia. Danu, idia herevalaia gado ia hahanaia taihu be helai taudia ese idia raraia momo lasi. Nega haida gado idia hahanaia neganai, idia helai diba bona bema idia gini, hereva ia henia tadikaka idia vaira henia bena ena hereva idia hahanaia diba. Unai dainai edia kwarana idia koua be badina lasi.

Ma danu, hari tadikaka ena tok be taihu ese sain gado ai ia hahanaia neganai, taihu ena laulau be screen badadia ai idia halasia dainai, toana be taihu be gaukara badana ia karaia.  Bona danu, iena laulau be screen badadia ai ia hedinarai dainai, nega momo helai taudia be tok ia henia tadikaka idia itaia lasi. Unai dainai, sain gado ia hahanaia taihu ese ena kwarana ia koua be gau badana, unai amo ia hahedinaraia ia be tadikaka ena tok ia hahanaia sibona.

Vadaeni, Tiokratik Haroro Sikuli, haheitalai, Kongrigeisen Baibel Stadi, Hesiai Hebou, bona Gima Kohorona Stadi kahadia be sain gado ai ita hahanaia neganai, inai lalohadai matamatana be edena dala ai ita badinaia diba? Bema taihu ta ese unai bamona negadiai kahana haida be sain gado ai ia hahanaia, ena kwarana ia koua be maoro, a? Toana be unai hebou edia kahana haida ai sain gado ia hahanaia taihu be ena kwarana do ia koua lasi, badina helai taudia be do idia laloparara hebou be ia ese ia hakaua lasi. Hegeregere, helai taudia edia haere, o taihu ta ena tok o haheitalai be sain gado ai ia hahanaia neganai, iena kwarana ia koua lasi be namo. To, hebou lalonai tadikaka ese idia henia tok, Gima Kohorona Stadi o Kongrigeisen Baibel Stadi ia naria tadikaka ena hereva ia hahanaia, o ane abia karana ia gunalaia neganai, ena kwarana ia koua be maoro. Hebou ai sain gado ia hahanaia taihu ese tadikaka, taihu, natu maragidia, bona elda taudia edia hereva ia hahanaia. Unai dainai, hebou ena program ibounai lalonai ena kwarana ia koua be maoro.

[Footnote]