Mai Moale Danu Ita Henia

APOSETOLO Paulo ese henia karana be inai bamona ia herevalaia: “Umui ta ta, sibona emui laloa, emui laloa hegeregerena do umui henia, mai maumau danu henia lasi, bona oda dainai lasi. Badina be mai moale danu ia henia tauna be Dirava ese ia lalokau henia noho.” (2 Kor. 9:⁠7) Iehova be ta ia doria lasi tomadiho goevana ia durua totona. Ia ura iena hesiai taudia be mai moale danu idia henia karana amo idia hahedinaraia Ia idia badinaia. Idaunegai amo ema bona hari, Iena hesiai taudia be mai moale ida harihari gaudia idia henia. Mani inai sivarai toi ita laloa.

Iehova ese Israela taudia be Aigupito amo ia hamauria murinai, ia hamaorodia palai dubuna idia haginia totona. Unai idia karaia totona, palai dubu haginia kohu idia abia be namo, unai dainai Mose ese Israela taudia ia noia harihari gaudia idia henia totona. Bona “harihari gaudia idia ura idia henia taudia ibounai” ese golo, siliva bona auri laboralabora idia henia. Taunimanima be harihari gaudia momo herea idia henia dainai, Mose ia gwau harihari gaudia ma haida do idia mailaia lou lasi.​​—⁠Eso. 35:​5, 21; 36:​6, 7.

 Lagani handred haida murinai Dirava ena taunimanima idia ura dubu helaga idia haginia neganai, tomadiho goevana idia durua totona edia henia karana idia hahedinaraia lou. King Davida be kohu momo ia henia unai gaukara ia durua totona, bona ma haida ia hadibaia unai bamona idia karaia totona. Idia be mai edia ura bada ida harihari gaudia idia henia. Idia henia siliva bona golo edia davana be kina 216 bilioni mai kahana! Taunimanima idia moale bada badina mai edia ura ida Iehova dekenai edia kohu idia henia.​​—⁠1 Siv. 29:​3-9; 2 Siv. 5:⁠1.

Iesu Keriso ena hahediba taudia ginigunadia danu be unai bamona idia karaia. Pentekoste 33 C.E. ai, taunimanima 3,000 mai kahana idia bapatiso, unai taudia momo be Ierusalema dekenai idia noho lasi. Unai taudia be Ierusalema ai idia noho daudau bona edia diba idia habadaia totona, Ierusalema ai idia noho Keristani taudia be kontribusen moni idia haboua. Tadikaka haida be edia kohu idia hoihoilaia bona idia abia monina be aposetolo taudia idia henia dabu taudia idia durua totona. Iehova be edia abidadama bona lalokau karana ia itaia neganai, ia moale bada!​​—⁠Kara 2:​41-​47.

Hari, Keristani taudia be mai moale ida edia nega, goada bona kohu amo tomadiho momokanina idia durua noho. Henunai ia noho mauana be kontribusen ita henia daladia haida ia herevalaia.

[Box on page 18,19]

HAIDA ESE HENIA KARANA IDIA HAHEDINARAIA DALADIA

TANOBADA IBOUNAI GAUKARANA DURUA KONTRIBUSEN MONINA

Momo ese edia moni idia atoa hegaegae, maua ta ladana “Tanobada Ibounai Gaukarana” lalonai do idia udaia totona.

Hua ta ta iboudiai, kongrigeisen ese unai moni be Iehova ena Witnes taudia edia brens opesi ta dekenai idia siaia lao. Taunimanima idia ura neganai kontribusen monina be International Bible Students Association of Papua New Guinea Inc., PO Box 636, Boroko, NCD 111 dekenai idia siaia diba. Mai dava bada herahera gaudia bona dava bada gaudia ma haida idia henia diba danu. Unai kontribusen gaudia ida revareva kwadogina idia siaia be namo, unai gaudia be harihari gaudia idia hahedinaraia totona.

KONTRIBUSEN MONINA MAI TARAVATUNA

Taunimanima ese moni idia henia diba, trust fund ai do ia noho totona. To bema nega ta henia tauna ia dabu bona ia ura ena moni ia abia lou, do idia henia lou. Bema oi ura ma hereva haida oi diba, namona be ai gwauraia vadaeni adres dekenai revareva oi torea.

PALANILAIA HENIA GAUDIA

Dala ma haida idia noho tanobada hegegemadai Basileia ena gaukara oi durua totona. Idia haida be inai:

Insurens: Bema ta ese life insurance ia hoia o moni be retirement fund ta ai ia atoa, IBSA ena ladana ia torea diba, bena ia mase neganai eiava ia buruka neganai unai moni do idia abia.

Banika Akaun: Ta ena banika ena taravatu hegeregerena, dala ia karaia diba, ia do mauri lalonai IBSA ese ena moni ia gaukaralaia totona, eiava ia mase neganai IBSA ese do ia abia totona.

Share Monina: Ta ese ena share monina be IBSA dekenai harihari gauna bamona ia henia diba.

Tano Bona Ruma: Bema ta be mai ena ruma o tano, ia hoihoilaia diba gauna, IBSA dekenai ia henia diba harihari gauna bamona, eiava do ia noholaia diba ela bona ia mase bena IBSA ese do ia abia. Bema ta ia ura unai bamona ia karaia, namona be iena tano ena brens opesi ia hadibaia guna.

Will Bona Trust Gaudia: Bema ta ena ura be ia mase neganai IBSA ese tano, ruma, kohu, o moni do ia abia, loea dekenai ia lao be namo, will pepana, mase murinai kohu haria gwaumaoro pepana, dekenai ena ura do ia torea totona. Eiava bema ena moni be trust fund ai ia noho, ia ese IBSA ena ladana be trust agreement pepana ai ia torea diba, unai moni do idia abia totona. Bema oi ura ataiai ia noho dala ta dekenai ma diba haida oi abia, namona be IBSA dekenai revareva oi siaia. Adres be International Bible Students Association of Papua New Guinea Inc., PO Box 636, Boroko, NCD 111. Telefon 325 3011.